ଦେଶର ସବୁ ସ୍ଥାନରେ ଯେଭଳି ଅତ୍ୟାବଶ୍ୟକ ସାମଗ୍ରୀ ସହଜରେ ସମସ୍ତଙ୍କ ପାଇଁ ଉପଲବ୍ଧ ହୁଏ ତାହା ସୁନିଶ୍ଚିତ କରିବା ସକାଶେ କେନ୍ଦ୍ର ଗୃହ ସଚିବ ଶ୍ରୀ ଅଜୟ କୁମାର ଭଲ୍ଲା ସମସ୍ତ ରାଜ୍ୟର ମୁଖ୍ୟ ଶାସନ ସଚିବମାନଙ୍କ ନିକଟକୁ ପତ୍ର ଲେଖିଛନ୍ତି । ଏଦିଗରେ ଯଥାଶୀଘ୍ର ବିହିତ ପଦକ୍ଷେପ ଗ୍ରହଣ ପୂର୍ବକ ଅତ୍ୟାବଶ୍ୟକ ସାମଗ୍ରୀ (ଇସି) ଆଇନ 1955 ଜାରି କରିବା ନିମନ୍ତେ ଶ୍ରୀ ଭଲ୍ଲା ନିର୍ଦ୍ଦେଶ ଦେଇଛନ୍ତି । ଏଭଳି ବ୍ୟବସ୍ଥା ମଧ୍ୟରେ ସାମଗ୍ରୀ ମହଜୁଦ ପରିମାଣ, ମୂଲ୍ୟ ନିର୍ଦ୍ଧାରଣ, ଉତ୍ପାଦନ ବୃଦ୍ଧି, ଆକାଉଣ୍ଟ ଧାରୀଙ୍କ ଜମାଖାତା ଯାଞ୍ଚ ଏବଂ ଅନ୍ୟାନ୍ୟ କାର୍ଯ୍ୟାନୁଷ୍ଠାନ ଗ୍ରହଣ ସକାଶେ ନିର୍ଦ୍ଦେଶ ଦିଆଯାଇଛି ।

ବିଭିନ୍ନ କାରଣରୁ ଦେଶରେ ଅତ୍ୟାବଶ୍ୟକ ସାମଗ୍ରୀ, ବିଶେଷ କରି ଶ୍ରମଶକ୍ତିର ଯୋଗାଣରେ ହ୍ରାସ ଯୋଗୁ  ଉତ୍ପାଦନ ହ୍ରାସ ଘଟିଛି ବୋଲି ରିପୋର୍ଟ ପ୍ରକାଶ ପାଇଛି । ଏଭଳି ପରିସ୍ଥିତିରେ, ଅସାଧୁ ବ୍ୟବସାୟୀ ଓ ମହଜୁଦକାରୀମାନେ ସାମଗ୍ରୀ ଠୁଳ କରିପାରନ୍ତି ଓ ତାହାକୁ କଳାବଜାରରେ ବିକ୍ରି କରିପାରନ୍ତି । ମୁନାଫାଖୋରମାନେ ଏଭଳି ପରିସ୍ଥିତିରୁ ଫାଇଦା ଉଠାଇ ପରିସ୍ଥିତିକୁ ଚାହିଁ ସେଭଳି ସାମଗ୍ରୀ ବିକି ଅଧିକ ଲାଭ କରିପାରନ୍ତି । ଏହାଫଳରେ ବଜାରରେ ଅତ୍ୟାବଶ୍ୟକ ସାମଗ୍ରୀର ମୂଲ୍ୟ ବୃଦ୍ଧି ଘଟିବାର ଆଶଙ୍କା ରହିଛି । ତେଣୁ ଏଭଳି ପରିସ୍ଥିତିର ମୁକାବିଲା ନିମନ୍ତେ ରାଜ୍ୟମାନଙ୍କୁ ନିର୍ଦ୍ଦେଶ ଦିଆଯାଇଛି ଯେ, ସେମାନେ ଏ ଦିଗରେ ତୁରନ୍ତ ପଦକ୍ଷେପ ଗ୍ରହଣ କରି ସେହିସବୁ ଅତ୍ୟାବଶ୍ୟକ ସାମଗ୍ରୀ ଯେଭଳି ସହଜରେ ଓ ସୁଲଭ ମୂଲ୍ୟରେ ସମସ୍ତଙ୍କ ପାଇଁ ଉପଲବ୍ଧ ହେବ ତାହା ସୁନିଶ୍ଚିତ କରନ୍ତୁ ।

ଇତି ପୂର୍ବରୁ, ସ୍ୱରାଷ୍ଟ୍ର ବ୍ୟାପାର ମନ୍ତ୍ରଣାଳୟ (ଏମଏଚଏ), ତାଙ୍କର ବିପର୍ଯ୍ୟୟ ପରିଚାଳନା ଆଇନ ବଳରେ ଉତ୍ପାଦନ/ ପ୍ରସ୍ତୁତି, ପରିବହନ ଓ ଯୋଗାଣ ଚେନର ଅନ୍ୟାନ୍ୟ କାର୍ଯ୍ୟ ଯାହାକି ଅତ୍ୟାବଶ୍ୟକ ସାମଗ୍ରୀ ଯଥା ଖାଦ୍ୟଦ୍ରବ୍ୟ, ଔଷଧ ଓ ମେଡ଼ିକାଲ ଉପକରଣ କ୍ଷେତ୍ରରେ ଆବଶ୍ୟକ ତାହା ଜାରି ରଖିବା ଲାଗି ଅନୁମତି ପ୍ରଦାନ କରିଥିଲେ ।

ଏହା ବ୍ୟତୀତ, ଭାରତ ସରକାରଙ୍କ ଖାଉଟି ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରଣାଳୟ ରାଜ୍ୟ/ କେନ୍ଦ୍ର ଶାସିତ କ୍ଷେତ୍ରର ସରକାରମାନଙ୍କୁ ଇସି ଆଇନ, 1955 ବଳରେ ଆଦେଶନାମା ଜାରି କରିବା ସକାଶେ କ୍ଷମତା ପ୍ରଦାନ କରିଥିଲେ ଯଦ୍ୱାରା ଜୁନ 30,2020 ପର୍ଯ୍ୟନ୍ତ କେନ୍ଦ୍ର ସରକାରଙ୍କ ଠାରୁ ଏଦିଗରେ ଆଗୁଆ ସ୍ୱୀକୃତି ଲାଭ ବ୍ୟବସ୍ଥାକୁ କୋହଳ କରାଯାଇଛି ।

ଇସି ଆଇନ ଅଧୀନରେ କୌଣସି ଅପରାଧକୁ ଫୌଜଦାରୀ ଅପରାଧ ବୋଲି ବିବେଚିତ ହୋଇଥାଏ ଏବଂ ଫଳ ସ୍ୱରୂପ ଏଥିପାଇଁ 7 ବର୍ଷ ଜେଲଦଣ୍ଡ କିମ୍ବା ଜୋରିମାନା ଅଥବା ଉଭୟ ଦଣ୍ଡର ପ୍ରାବଧାନ ରହିଛି । ରାଜ୍ୟ/କେନ୍ଦ୍ର ଶାସିତ କ୍ଷେତ୍ରର ସରକାରମାନେ ଅତ୍ୟାବଶ୍ୟକ ସାମଗ୍ରୀର କଳାବଜାରୀ ଓ ଏହାର ଯୋଗାଣ ପରିଚାଳନା ଆଇନ, 1980 ବଳରେ ଯେକୌଣସି ଖିଲାଫକାରୀଙ୍କୁ ଅଟକ ରଖିପାରିବେ ।

**********