57th International Film Festival of India 2026
20 – 28 Nov 2026

57व्या इफ्फींत ईशान्येकडल्या चित्रपटांतल्यान सांस्कृतिक वारसो, वळख आनी सामाजिक वास्तवाच्या कथांची मांडणी


दिग्दर्शक एमी बरुआ आनी दुयू ताब्यो हांणी ईशान्य भारताचो स्वदेशी वारसो, भास आनी अकथित कथांचें जतन करपांत चित्रपटांची भूमिका केली अधोरेखित

पोस्ट केल्लें: 22 NOV 2026 4:26PMby PIB Mumbaiउजवाडणी आयडी: 2340082Views: 7

गोंय, 22 नोव्हेंबर 2026

 

ईशान्य भारतांतल्या दोन चित्रपटांनी 57व्या भारतीय आंतरराष्ट्रीय चित्रपट महोत्सवांत (IFFI) आसामांतल्या सांस्कृतिक दायजाचें जतन करपाखातीर धडपड करपी पारंपरिक हातमाग विणकारांच्या समुदायापासून ते अरुणाचल प्रदेशांतल्या दोंगराळ भागांत रावपी एका दुख्खी बापायच्या मानसिक प्रवासामेरेन, वळख, लवचिकताय आनी मानवी भावनांच्यो वैशिश्ट्यपूर्ण काणयो सादर केल्यो.

भारतीय पॅनोरमांत ईशान्येकडल्या फिल्मां मदीं 'रेड कार्पेट' हो आसामी म्हायतीपट नॉन-फिचर विभागांत जाल्यार 'उरुम' हो चित्रपट फिचर-फिल्म विभागांतल्यान सादर जालो.

गोंयांत आयज आयोजीत पत्रकार परिषदेंत एमी बरुआन दिग्दर्शित केल्लो ‘रेड कार्पेट’ हो आसामी चित्रपट आनी दुयू ताब्योन दिग्दर्शित केल्लो ‘उरुम’ ह्या दोन चित्रपटांचेर खास भर दिलो. ह्या चित्रपटांच्या दिग्दर्शकांनी आपल्या चित्रपटांविशीं आनी चित्रपटनिर्मितीच्या प्रवासाविशीं सखोल म्हायती दिली.

‘रेड कार्पेट’ हो चित्रपट आसामांतल्या कार्बी आंगलाँग वाठारांत रावपी कार्बी समुदायाच्या पारंपरिक हातमाग विणकाम दायजाचें दर्शन घडयता. जायत्या शतकांपयलींची ही कला आतां आधुनिकीकरण आनी बदलत्या जिणेशैली संबंधित आव्हानांक तोंड दिता. हातान विणिल्लें एक वस्त्र सांस्कृतिक वळख, अभिमान आनी आशेचें प्रतीक कशे जाता, हाचो मागोवा घेत हो म्हायतीपट एका पारंपरिक विणकाराच्या डोनकामोकम गांवांतल्यान कान्स चित्रपट महोत्सवाच्या रेड कार्पेट मेरेनच्या प्रवासाचें दर्शन घडयता.

दिग्दर्शक, पुरस्कार फावो जाल्ल्यो भारतीय अभिनेत्री आनी पीएचडीचें शिक्षण घेवपी फिल्म निर्माती एमी बरुआ हांणी चित्रपटा विशींचो आपलो दृष्टिकोन मांडलो. आसामांतल्या ल्हानश्या गांवांन एक पारंपरीक, हातान विणिल्लें वस्त्र प्रतिष्ठित कान्स चित्रपट महोत्सवाच्या रेड कार्पेट मेरेन पावपाच्या प्रवासाविशीं तांणी म्हायती दिली.

ह्या वस्त्रांक मेळिल्ल्या आंतरराष्ट्रीय मान्यतेक लागून ह्या वाठारांतल्या स्वदेशी दायजाची दृश्यमानता वाडली, अशें नमूद करत तांणी थळाव्या विणकारांच्या हस्तकलेचें आनी तांच्या पारंपरिक वस्त्रांतल्यान दिसून येवपी सांस्कृतिक वळखीचें म्हत्व अधोरेखित केलें.

पारंपरीक विणकाम पद्दतींचें जतन करपाच्या गरजेचेर चड भर दितना, एमी बरुआ हांणी तरणाट्या पिळगेक तांची भास, संस्कृती आनी परंपरांचो अभिमान बाळगपाचें आनी हे दायज मुखार व्हरपाचें आवाहन केलें.

'उरुम' हो दुसरो चित्रपट, दुयू ताब्यो हांणी दिग्दर्शित केला आनी तो अरुणाचल प्रदेशांतल्या दुर्गम दोंगराळ समाजांत रावपी एका बापायची कथा मांडटा. आपल्या ल्हान धुवेच्या दुर्दैवी मरणाचो धक्को पचोवपाखातीर संघर्ष करपी ह्या बापायच्या कथेंतल्यान हो चित्रपट दुख्ख, यादी आनी स्थानिक श्रद्धांचो वेध घेता.

अरुणाचल प्रदेशांतले स्वतंत्र लेखक-दिग्दर्शक आनी सांस्कृतिक अभ्यासक दुयू ताब्यो, जांचे काम स्थानिक वळख,  स्मृती आनी सामाजिक वास्तवाचो सोद घेता, हांणी अरुणाचल प्रदेशांतल्या झिरो हांगा आपल्या ल्हानपणानं पळयल्ल्या एका घडणुकेची याद सांगली. ह्या घडणुकेत एका बापायक आपल्या धुवेच्या मरणाच्या दुख्खा कडेन झुजतना तांणी पळयल्लें. ही याद जायत्यां वर्सां तांच्या मनांत घर करून उरली आनी निमाणे ती ह्या चित्रपटाचो पायो जाली. ह्या चित्रपटाच्या माध्यमांतल्यान खंयचोय विशिश्ट नैतिक संदेश दिवपापरस एका दुख्खी बापायची मानसिक आनी भावनिक अवस्था उगड करपाचो आपलो यत्न आशिल्लो, अशें तांणी सांगलें.

ताब्यो हांणी इफ्फीचे उपकार मानले आनी इफ्फींत आपल्या चित्रपटाची निवड जावप ही अरुणाचल प्रदेशांतल्या उदयोन्मुख चित्रपटसृष्टीखातीर एक म्हत्वाची वळख आसा, अशें नमूद केलें. हाका लागून राज्यांतल्या चड तरणाट्या चित्रपट निर्मात्यांक आपल्यो कथा सांगपाक प्रोत्साहन मेळटलें, अशी आशाय तांणी उक्तायली.

भाशिक आनी सांस्कृतिक संवर्धनाच्या म्हत्वाचेर भर दितना ताब्यो हाणी म्हळें, हो चित्रपट स्थानिक निशी भाशेंत तयार करपाचो निर्णय भाशेचे अस्सलपण जतन करपाखातीर आनी ह्या भाशेक चड प्रसिद्धी मेळोवन दिवपापाखातीर जाणीवपूर्वक घेतिल्लो. तरणाट्या पिळगेचो आपल्या स्थानिक भाशां कडेन आशिल्लो संपर्क दिसान दिस उणो जाता, अशें नमूद करत तांणी ह्या चित्रपटाचें वर्णन निशी समुदायाचो भाशिक वारसो जतन करपाचो एक यत्न, अशें केलें.

ईशान्य भारतांतल्या चित्रपटसृष्टीच्या वाडत्या तांकीविशीं उलयतना ताब्यो हांणी निरीक्षण नोंद केलें की, हो वाठार अजून मेरेन मुखार येवंक नाशिल्लो चित्रपटसृष्टीचो एक क्षेत्र आसा, जाचे कडेन संवसाराक दिवपाक खूब कितें आसा. मुखेल प्रवाहांतले चित्रपट निर्माते आनी निर्मिती संस्थांचो ह्या प्रदेशांत वाडपी रस तांणी नमूद केलो. चित्रपट फकत मनोरंजनाच्या पलीकडे वचून, सामाजिक जाणीव आनी परिवर्तनाचें एक प्रभावी माध्यम म्हणून काम करूंक शकता, हाचेर तांणी भर दिलो. थळाव्यो काणयो, भास आनी जिणे पद्दतींचें दस्तऐवजीकरण करपाचें म्हत्व तांणी मुखार अधोरेखित केलें आनी अशे यत्न तरणाट्या पिळग्येक आपल्या मुळां कडेन परत जोडपाक आनी तांच्या सांस्कृतिक वळखीची समृद्धी जाणून घेवपाक मजत करूंक शकतात, अशें तांणी सांगलें.

हे दोनूय चित्रपट ईशान्य भारतांतल्यो वेगवेगळ्यो काणयो राष्ट्रीय चित्रपट माचयेर हाडटात. हातूंतल्यान ह्या वाठारांतले वैविध्यपूर्ण सांस्कृतिक अणभव, थळाव्यो परंपरा आनी समकालीन वास्तवताय प्रतिबिंबीत जाता.  57व्या भारतीय आंतरराष्ट्रीय चित्रपट महोत्सवांत (IFFI) ह्या चित्रपटांचो आस्पाव जाल्ल्यान, ह्या वर्साच्या महोत्सवाचें वैशिश्ट्य आशिल्ल्या चित्रपटविषयक विविधतेत भर घालता.

ह्या पत्रकार परिषदेचें संचालन स्मिता सैकिया हांणी केलें.

Read IFFILOID here: https://www.pib.gov.in/iffi/57/iffiLoid.aspx?yr=2026&lang=1&reg=48

 

* * *

पीआयबी मुंबई | मनाली प्रभूगांवकर/मोनाली प्रभू/दर्शना राणे


Great films resonate through passionate voices. Share your love for cinema with #IFFI2026 and #StoriesWithoutBorders. Tag us @pibindia on Instagram and @PIB_India on X, and we will help amplify your festival moments!

For accredited journalists, critics, bloggers, and vloggers seeking 1-on-1 interviews with filmmakers and festival juries, write to us at:
iffi.mediadesk@pib.gov.in with the subject line: Take One with PIB.


Official Release ID: 2340082
•
Media Centre: Goa
•
Festival Dates: Nov 20 – 28, 2026