57th International Film Festival of India 2026
20 – 28 Nov 2026

WANRAH KA CINEMA NA KA THAIÑ SHATEI LAM MIHNGI ÏA KI JINGIATHUHKHANA SHAPHANG KA RITI DUSTUR, KA JINGITHUH DALADE BAD KI JINGLONG JONG KA IMLANG SAHLANG KIBA HIAR PATENG HA KA TAMASA JONG KA 57TH IFFI

Pynpaw ki nongpynmih phlim, ka Aimee Baruah bad Duyu Tabyo, ïa ka bynta jong ka cinema ban pynneh pynsah ïa ka riti dustur tynrai, ki ktien bad ki jingïathuhkhana ki bym pat ju pynsngew bad pynpaw jong ka Shatei Lam Mihngi ka Ri India.

Ha ka: 22 NOV 2026 4:26PMby PIB ShillongRelease ID: 2340031Views: 10

Naduh ka imlang sahlang kaba dei jong ki nongthaiñ jaiñ tynrai ha Assam kiba pyrshang ban pynneh pynsah ïa ka riti dustur ka jong ki, haduh ka jingkhim bad shitom jingmut jingpyrkhat jong u kpa uba sngewsih namar ka jingkhlad ka khun kynthei jong u ha ki lum jong ka jylla Arunachal Pradesh, kine ki ar tylli ki phlim napoh ka thaiñ Shatei Lam Mihngi jong ka India ki wanrah ïa ki jingïathuhkhana bapher bapher halor ka jingithuh ne ka dur ka dar lade, ka jingkhlaiñ ha ka mynsiem bad ka jingsngew jong ki briew. Kine ki phlim ki long shi bynta ka tamasa jong ka 57th International Film Festival of India (IFFI).

Ka Red Carpet, kaba dei ka phlim ïathuhkhana (documentary) ha ka ktien Assamese, ka la shah jied an ïoh rung hapoh ka thup jong ka Indian Panorama Non-Feature Section, katba ka Urum pat ka don ha ka Indian Panorama Feature Film Category.

Kine ki ar tylli ki phlim, ka Red Carpet (Assamese), ba la pynïaid bad pynbit pynbiang da ka Aimee Baruah, bad ka Urum, da u Duyu Tabyo, ki la ïoh ïa ka lad ban pynpaw sha ki lad pathai khubor kaba la long mynta ka sngi ha Goa, ha kaba ki nongpynmih phlim ki la ïasam ïa ki jingmut jong ki shaphang kine ki phlim bad ka jingïaid lynti jong ki ha ka kam shna film.

Ka Red Carpet ka pyni ïa ka riti dustur jong ka jingshna bad thaiñ jaiñ tynrai ha ki shnong bad ka imlang sahlang jong ki nong Karbi kaba dei hi ha Karbi Anglong, Assam, ha kaba kane ka sap suh bad shna jaiñ ka dei kaba la don da ki spah snem kiba la ïakynduh ruh ïa ki jingeh na ka jingkylla jong ka juk mynta bad ki rukom im kiba la nang kylla. Kane ka documentary ka bud ïa ka jingïaid lynti jong kawei ka nongthaiñ jaiñ tynrai na ka shnong Donkamokam haduh ka Red Carpet jong ka tamasa ki phlim ha Cannes, da kaba pyni kumno ki jaiñ ba la thaiñ da ka kti ka la kylla long ka dak jong ka jingithuh ïa ka kolshor ka lariti, ka jingsarong bad ka jingkyrmen.

Haba ïasam ïa ka jingmut jong ka halor kane ka phlim, ka Aimee Baruah, kaba long ruh hakajuh ka por ka puron, ka nongpynmih bad nongshna phlim kaba la ïoh ïa ka khusnam bad kaba dang thmu ban pyndep ïa ka jingpule PhD jong ka, ka la ïathuh ïa ka jingïaid lynti jong ka ban rah ïa ki jaiñ tynrai kiba la thaiñ da ki kti na kawei ka shnong rit ha Assam sha ka rynsan jong ka Red Carpet kaba pawnam ha ka tamasa jong ka Cannes.

Ka la pynpaw ruh ïa ka sap bad ka jingtrei shitom jong ki nongthaiñ jaiñ kiba don ha ka thaiñ, bad kumno ki jaiñ tynrai jong ki, ki pyni ïa ka dur ka dar, ka jingithuh bad ka lariti jong ka imlang sahlang. Ka kdew ruh ba ka jingithuh bad ka jingpdiang burom ïa kine ki jaiñ ha ka pyrthei baroh kawei ka ai ïa ka jingithuh kaba kham khraw ha kaba ïadei bad ka riti ka dustur tynrai jong kane ka thaiñ.

Haba ban jur pat ha kaba ïadei bad ka jingdonkam ban pynneh pynsah ïa ka rukom thaiñ jaiñ tynrai, na ka liang ka Baruah ka la kyntu ïa ka pateng thymmai kaba mynta ba kin sngew sarong ïa la ka ktien, ka lariti ka kolshor bad ki rukom im tynrai, bad ruh ban rah ban kyntiew ïa kane ka pateng sha ki pateng ki ban wan.

Ka phlim kaba ar, ka Urum, ka dei kaba la pynïaid bad pynbit pynbiang da u Duyu Tabyo, ka ïathuh ïa ka khana shaphang ka jingsngewsih, ki jingkynmaw bad ki jingngeit tynrai lyngba ka khana jong uwei u kpa uba shem jingeh ban pdiang ïa ka jingkhlad ka khun kynthei jong u kaba dang khynnah ha kawei ka shnong kaba don ha ki lum ba jngai jong ka jylla Arunachal Pradesh. Katba u dang ïaleh pyrshah bad ka jingsngewrem, ka jingkitkhlieh bad ki jingïohi paw kiba wan ha ki jingmut jingpyrkhat jong u, ka phlim ka ïaid ryngkat lang ruh bad ki jingwad jong u ïa ka jingsuk mynsiem hapdeng ki jingshisha kiba la buhrieh, naduh ka jingsyier mynsiem bad ki bor bym lah ban ïohi kiba ktah ïa ka jingim jong ki briew hapoh ka imlang sahlang kaba u don.

U Duyu Tabyo, uba long ruh u nongthoh bad nongpynïaidbeit ïa ki phlim bad u briew uba ïadonbynta lang ban kyntiew ïa ka kolshor na ka jylla Arunachal Pradesh, u pynleit jingmut ha ki kam kiba ïadei bad ka jingithuh ïa ki jinglong tynrai, ki jingkynmaw bad ki jingjia bashisha ha ka imlang sahlang, ha kaba u la kynmaw ïa kawei ka jingjia kaba u la sakhi ha ka por ba u dang khynnah ha kaba jia Ziro, Arunachal Pradesh. Kane ka jingjia ka dei shaphang uwei u kpa uba la mad ïa ka jingsngewsih kaba khraw namar ka jingïap noh ka khun kynthei jong u. Kane ka jingjia ka ïaisah bun snem hapoh ki jingmut jingpyrkhat bad ki jingkynmaw jong u bad ha kaba kut jong kane ka phlim ula pynshong nongrim ïa khubor jong kane ka phlim. U la ong ba lyngba kane ka phlim, u kwah ban pynpaw ïa ka jingmut bad ki jingsngew jong u kpa uba la mad ïa ka jingsngewsih, ym ban ai ïa kano kano ka khubor ne jinghikai kaba kyrpang. U Tabyo u ai ruh ka jingkhublei bad pynpaw ïa ka jingsngewnguh ïa ka IFFI halor ka jingjied da kaba batai ba ka jingjied ïa ka phlim jong u ban ïadonbynta ha kane ka tamasa ka long ka jingithuh kaba khraw ïa ka kam shna phlim ha ka jylla Arunachal Pradesh da kaba pynpaw ruh ïa ka jingkyrmen ba lyngba kane kan nang ai mynsiem shuh shuh ïa ki samla nongshna phlim jong ka jylla ba kin wanrah bad ïathuh ïa ki khana jong ki.

Haba ban jur pat halor ka jingdonkam ban pynneh pynsah ïa ki ktien ka thylliej bad ka kolshor tynrai, u Tabyo u la ong ba ka jingjied ban shna ïa kane ka phlim ha ka ktien tynrai Nishi ka dei kaba la rai bad kaba la pyrkhat bha, khnang ban pynneh ïa ka jingshisha jong ka khana bad ban ai ruh ïa ka jingithuh kaba kham khraw ïa kane ka ktien. U la kdew ruh da kaba ong ba ki pateng kiban sa wan jong ki khynnah samla mynta ki la nang duh suki pa suki khamtam halor ka jingïadei bad ki ktien tynrai jong ki, bad u la ong ruh ba kane ka phlim ka long kum kawei na ki jingpyrshang ban pynneh pynsah ïa ka pateng jong ka ktien hapoh ka ka imlang sahlang jong ki jaitbynriew Nishi.

Haba kren shaphang ka lad bad ka jingkiew jong ka kam shna phlim napoh ka thaiñ Shatei Lam Mihngi jong ka Ri India, u Tabyo u la ong ba kane ka thaiñ ka dang long kum kawei na ki jaka shna film kabym pat shym la lap ne wad bniah bha bad kaba dang don shibun ki khana kiba lah ban ai bad pynpaw sha ka pyrthei. U kdew ruh da kaba ong ba ki nongshna phlim bad ki nongpynmih phlim (Production House) kiba paw ha ka Ri ki la sdang ban phaikhmat bad pyni ïa ka jingsngewtynnad kaba kham khraw ban shna ïa ki phlim ha kane ka thaiñ. U la ong ruh ba ka cinema ka lah ban long ka lad kaba khlaiñ ban pynsngewthuh ïa ki briew shaphang ki mat bapher bapher kiba dei jong ka imlang sahlang bad ban wanrah ïa ka jingkylla, ym tang ki lad pynbyrngia. U la pynpaw ruh ïa ka jingdonkam ban buh jingthoh bad pynneh ïa ki khana tynrai, ki jait ktien bad ki rukom im jong ki jaitbynriew tynrai. U ong ruh ba kum kine ki jait jingpyrshang kin ïarap ïa ki pateng kiban wan ban pynïadei ïalade bad ki tynrai jong ki bad ruh ban sngewthuh ïa ka jingriewspah jong ka kolshor jong ki da kaba ïoh jingithuh.

Kine ki ar tylli ki phlim ki wanrah ïa ki khana bapher bapher na ka thaiñ Shatei Lam Mihngi jong ka India sha ka rynsan cinema jong ka Ri, da kaba pynpaw ïa ka jingpher ha kaba ïadei bad ka jingshem jong ki briew ha ka imlang sahlang, ki riti dustur tynrai bad ki jingjia bashisha jong ka juk mynta. Ka jingkynthup ïa kine ki film hapoh ka tamasa jong ka 57th International Film Festival of India kan nang pynriewspah shuh shuh ïa ka jingpher jong ki jait phlim kiba la pyni ha kane ka tamasa mynta u snem.

Ïa ka jingïalang bad ki lad pathai khubor la pynïaid da ka Smita Saikia.

*****


Great films resonate through passionate voices. Share your love for cinema with #IFFI2026 and #StoriesWithoutBorders. Tag us @pibindia on Instagram and @PIB_India on X, and we will help amplify your festival moments!

For accredited journalists, critics, bloggers, and vloggers seeking 1-on-1 interviews with filmmakers and festival juries, write to us at:
iffi.mediadesk@pib.gov.in with the subject line: Take One with PIB.


Official Release ID: 2340031
•
Media Centre: Goa
•
Festival Dates: Nov 20 – 28, 2026