صدرِ جمہوریہ نے سوچھ سرویکشن ایوارڈز پیش کیے

صدرِ جمہوریہ محترمہ دروپدی مرمو نے آج (11 نومبر 2026) نئی دہلی میں سوچھ سرویکشن ایوارڈز 2025-25 پیش کیے۔

اس موقع پر خطاب کرتے ہوئے صدرِ جمہوریہ نے کہا کہ صفائی ستھرائی کے اہداف صرف کسی ایک ادارے کی کوششوں سے حاصل نہیں کیے جا سکتے۔ اس کے لیے ہر شہری، ہر گھرانے، ہر برادری اور ہر شہر کی شرکت ضروری ہے۔ انہوں نے اس بات پر زور دیا کہ صفائی ستھرائی محض عوامی مقامات کی خوب صورتی برقرار رکھنے کا معاملہ نہیں ہے، بلکہ یہ ہماری صحت، سماجی شعور اور انتظامی جواب دہی کی بھی عکاس ہے۔ اس کے ساتھ ہی یہ ہمارے گھروں میں اپنائی جانے والی عادات کا بھی آئینہ ہے۔

صدرِ جمہوریہ نے کہا کہ ہر شہری، بالخصوص نوجوانوں، خواتین، رہائشی فلاحی انجمنوں اور سماجی تنظیموں کو صفائی ستھرائی کے مختلف پہلوؤں سے وابستہ ہونا چاہیے۔ انہیں اپنے تجربات کا تبادلہ کرنا چاہیے اور صفائی کے انتظامات میں پائی جانے والی خامیوں کی نشاندہی کرنی چاہیے، تاکہ ان خامیوں کو دور کرکے اپنے شہروں کو مزید صاف ستھرا اور صحت مند بنایا جا سکے۔ اس سے بلدیاتی انتظامیہ اور شہریوں کے درمیان مسلسل مذکرات  کو فروغ ملے گا اور باہمی اعتماد، شفافیت اور جواب دہی کا نظام مزید مستحکم  ہوگا۔

صدرِ جمہوریہ نے کہا کہ اپنے ارد گرد کے ماحول کی صفائی ستھرائی کا جائزہ لینے کے معاملے میں شہری ہی بہترین رائے دے سکتے ہیں۔ لہٰذا شہریوں کی آرا اور تجاویز کا استعمال محض سروے یا درجہ بندی تک محدود نہیں رہنا چاہیے، بلکہ ان سے بلدیاتی خدمات کو بہتر بنانے اور مقامی مسائل کے حل کے لیے ایک اہم وسیلے کے طور پر استفادہ کیا جانا چاہیے۔

صدرِ جمہوریہ نے کہا کہ صفائی ستھرائی کے شعبے میں مؤثر، کم خرچ اور محفوظ ٹیکنالوجیز تیار کرنے کی ضرورت ہے۔ انہوں نے اس بات پر خوشی کا اظہار کیا کہ کئی آئی آئی ٹیز سمیت مختلف ادارے اور دیگر سائنسی تحقیقی تنظیمیں اس سمت میں سرگرمی سے کام کر رہی ہیں۔

صدرِ جمہوریہ نے کہا کہ صفائی ستھرائی کے شعبے میں کئی نئے اسٹارٹ اَپس  سامنے آئے ہیں۔ انہوں نے کہا کہ ایسے ادارے صفائی ستھرائی سے متعلق حقیقی مسائل کے حل میں اہم  رول  ادا کرنے کے ساتھ ساتھ روزگار کے مواقع پیدا کرنے میں بھی نمایاں تعاون کر سکتے ہیں۔

صدرِ جمہوریہ نے کہا کہ دوسرے اور تیسرے درجے کے شہروں کی صلاحیتوں میں اضافے پر خصوصی توجہ دینے کی ضرورت ہے، کیونکہ یہ تیزی سے ترقی کرنے والے شہری مراکز ہیں۔ ان شہروں کی ضروریات اور مسائل الگ نوعیت کے ہیں۔ ان کی ترقی کے لیے ایک ایسا قومی لائحہ عمل تیار کیا جانا چاہیے، جو ان کے مخصوص مسائل اور چیلنجوں کو مدنظر رکھتے ہوئے ان کا حل پیش کرے۔ انہوں نے کہا کہ دوسرے درجے کے شہروں کے منصوبہ ساز، پہلے درجے کے شہروں کو درپیش مسائل سے سبق حاصل کر سکتے ہیں۔ اس مقصد کے لیے انہیں پہلے درجے کے شہروں کے منصوبہ سازوں کے تجربات کا مطالعہ کرنا چاہیے۔

مرکزی وزارتِ ہاؤسنگ اور شہری امور کے زیر اہتمام منعقد ہونے والے سوچھ سرویکشن ایوارڈز کے ذریعے ہندوستان کے صاف ستھرے ترین شہروں کو اعزاز سے نوازا جاتا ہے اور سوچھ بھارت مشن (شہری) کے تحت ان کی نمایاں خدمات کا اعتراف کیا جاتا ہے۔

***

ش ح۔ ش  ب۔رض

7525:U-No