மேற்கு வங்க சட்டம், ஒழுங்கு நிலைமை குறித்து மத்திய அமைச்சர் திரு அமித் ஷா ஆய்வு செய்தார்

மத்திய உள்துறை மற்றும் கூட்டுறவுத் துறை அமைச்சர் திரு அமித் ஷா, மேற்கு வங்கத்தின் சட்டம்-ஒழுங்கு நிலைமை குறித்து கொல்கத்தாவில் ஆய்வு செய்தார். இந்தக் கூட்டத்தில் மேற்கு வங்க முதலமைச்சர், மாநிலத் தலைமைச் செயலாளர் மற்றும் மத்திய உள்துறை அமைச்சகம் மற்றும் மேற்கு வங்க அரசின்  மூத்த அதிகாரிகள் கலந்துகொண்டனர்.

கூட்டத்தின்போது, மாநிலத்தின் பாதுகாப்பு கட்டமைப்பு, நீதித்துறை மற்றும் காவல் துறையின் திறன்களை வலுப்படுத்துவது குறித்து  திரு அமித் ஷா பல்வேறு முக்கிய அறிவுறுத்தல்களை வழங்கினார். கிராமப்புறங்களில் பெண்களின் பாதுகாப்பிற்கு முன்னுரிமை அளிக்கும் வகையில், பெண்களைச் சென்றடையும் திட்டம் ஒன்றைச் செயல்படுத்த அவர் உத்தரவிட்டார். அதிகாரிகளுடனான தொடர்ச்சியான கலந்துரையாடல்கள் மூலம் கிராமப்புறப் பெண்களிடையே விழிப்புணர்வை ஏற்படுத்தவும், அவர்களுக்கு  அதிகாரம் அளிக்க வேண்டியதன் அவசியத்தையும் அவர் வலியுறுத்தினார். இது தொடர்பாக, மாநில அரசு மத்திய உள்துறை அமைச்சகத்தை நேரடியாகத் தொடர்புகொள்ளலாம் என்றும் அவர் குறிப்பிட்டார்.

மாநிலத்தின் உள்நாட்டுப் பாதுகாப்பை மேலும் வலுப்படுத்தும் நோக்கில், போதைப்பொருள் தடுப்புப் படை (ANTF), பயங்கரவாத எதிர்ப்புப் படை (ATS) மற்றும் தேசியப் புலனாய்வு முகமையின் (NIA) மாதிரியில் சிறப்புப் புலனாய்வு முகமை (SIA) ஆகியவற்றை மாநிலத்தில் அமைப்பதற்கான நடவடிக்கைகளை மேற்கொள்ள முக்கியத்துவம் அளிக்கப்பட்டது. மாநிலத்தின் எல்லைப் பகுதிகளில் உள்ள அரசு நிலங்களில் மேற்கொள்ளப்பட்டுள்ள சட்டவிரோத ஆக்கிரமிப்புகளை அகற்றுவதற்கான உத்தரவுகளும் பிறப்பிக்கப்பட்டன.

இடதுசாரித் தீவிரவாதத்தால் முன்பு பாதிக்கப்பட்ட பகுதிகளில் அமைக்கப்பட்டிருந்த பாதுகாப்பு முகாம்களில் மூன்றில் ஒரு பங்கை,  பொதுச் சேவை மையங்களாக மாற்ற ஒருமித்த கருத்து எட்டப்பட்டது. மேலும், இணையப் பாதுகாப்புத் துறையில் திறனை மேம்படுத்துதல், போதைப்பொருள் கடத்தலைத் தடுக்க வழக்கமான கூட்டங்களை நடத்துதல் மற்றும் கொல்கத்தாவிற்கான விரிவான வெள்ள மேலாண்மைத் திட்டத்தை உருவாக்குதல் ஆகியவை குறித்தும் அறிவுறுத்தல்கள் வழங்கப்பட்டன. கூட்டத்தின் முடிவில், உடனடி நடவடிக்கைக்கான முக்கிய முன்னுரிமைகள் அடையாளம் காணப்பட்டதுடன், அவற்றை ஒரு குறிப்பிட்ட காலக்கெடுவுக்குள் செயல்படுத்துவதை உறுதிசெய்யுமாறு சம்பந்தப்பட்ட அமைப்புகளுக்கு உத்தரவிடப்பட்டது.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்: https://www.pib.gov.in/PressReleasePage.aspx?PRID=2286342&reg=3&lang=1

***

TV/BR/RJ