ಐಡಿಬಿಐ ಬ್ಯಾಂಕ್ ಲಿಮಿಟೆಡ್ ಒಂದು ಷೆಡ್ಯೂಲ್ಡ್‌ ಬ್ಯಾಂಕ್‌ ಆಗಿದ್ದು, ಭಾರತೀಯ ರಿಸರ್ವ್ ಬ್ಯಾಂಕ್‌ನ (ಆರ್‌ಬಿಐ) ನಿಯಂತ್ರಣಕ್ಕೆ ಒಳಪಟ್ಟಿದೆ. ಬ್ಯಾಂಕಿನ ಕಳಪೆ ಆರ್ಥಿಕ ಸ್ಥಿತಿಯಿಂದಾಗಿ ಪದೇಪದೇ ಬಂಡವಾಳವನ್ನು ಒದಗಿಸುವ ಅಗತ್ಯ ಉಂಟಾಗಿತ್ತು. ಆರಂಭದಲ್ಲಿ ಭಾರತ ಸರ್ಕಾರವು ಬಂಡವಾಳ ಒದಗಿಸಿತ್ತು; ನಂತರ ಭಾರತೀಯ ಜೀವ ವಿಮಾ ನಿಗಮ (ಎಲ್‌ಐಸಿ) ಬಂಡವಾಳ ಒದಗಿಸಿತು. 2017ರ ಮೇ 5ರಂದು, ಬ್ಯಾಂಕಿನ ಅನುತ್ಪಾದಕ ಆಸ್ತಿಗಳು ಮತ್ತು ನಷ್ಟಗಳನ್ನು ಪರಿಗಣಿಸಿ, ಭಾರತೀಯ ರಿಸರ್ವ್ ಬ್ಯಾಂಕ್ ಐಡಿಬಿಐ ಬ್ಯಾಂಕ್ ಅನ್ನು ತ್ವರಿತ ಸುಧಾರಣಾ ಕ್ರಮಗಳ ಚೌಕಟ್ಟಿನ ವ್ಯಾಪ್ತಿಗೆ ತಂದು, ಹಲವು ನಿರ್ಬಂಧಗಳನ್ನು ವಿಧಿಸಿತು. ಬ್ಯಾಂಕಿನ ಆರ್ಥಿಕ ಸ್ಥಿತಿಯಲ್ಲಿ ಸುಧಾರಣೆ ಕಂಡುಬಂದ ಹಿನ್ನೆಲೆಯಲ್ಲಿ, 2021ರ ಮಾರ್ಚ್ 10ರ ಪತ್ರದ ಮೂಲಕ ಆರ್‌ಬಿಐ ಕೆಲವು ಷರತ್ತುಗಳು ಮತ್ತು ನಿರಂತರ ಮೇಲ್ವಿಚಾರಣೆಗೆ ಒಳಪಟ್ಟು ಐಡಿಬಿಐ ಬ್ಯಾಂಕ್ ಮೇಲಿನ ನಿರ್ಬಂಧಗಳನ್ನು ತೆರವುಗೊಳಿಸಿತು.

ಈ ಹಿನ್ನೆಲೆಯಲ್ಲಿ, ಆರ್ಥಿಕ ವ್ಯವಹಾರಗಳ ಸಂಪುಟ ಸಮಿತಿಯು (ಸಿಸಿಇಎ) ಐಡಿಬಿಐ ಬ್ಯಾಂಕ್ ಲಿಮಿಟೆಡ್‌ನ ಕಾರ್ಯತಂತ್ರದ ಪುನಾರಚನೆಗೆ ಅನುಮೋದನೆ ನೀಡಿತು. ಅದರ ಅನುಸಾರ, ಐಡಿಬಿಐ ಬ್ಯಾಂಕ್ ಲಿಮಿಟೆಡ್‌ನ ಒಟ್ಟು ಶೇ. 60.72ರಷ್ಟು ಷೇರುಪಾಲನ್ನು ಕಾರ್ಯತಂತ್ರದ ಖರೀದಿದಾರರಿಗೆ ಮಾರಾಟ ಮಾಡಲು ನಿರ್ಧರಿಸಲಾಯಿತು. ಇದರಲ್ಲಿ ಭಾರತ ಸರ್ಕಾರದ ಪಾಲು ಶೇ. 30.48ರಷ್ಟಿದ್ದರೆ, ಎಲ್‌ಐಸಿಯ ಪಾಲು ಶೇ. 30.24ರಷ್ಟಿರುತ್ತದೆ. ಮಾರಾಟದ ಬಳಿಕ ಭಾರತ ಸರ್ಕಾರವು ಶೇ. 15ರಷ್ಟು ಮತ್ತು ಎಲ್‌ಐಸಿಯು ಶೇ. 19ರಷ್ಟು ಷೇರುಪಾಲನ್ನು ಉಳಿಸಿಕೊಳ್ಳಲಿವೆ.

ಸಿಸಿಇಎಯ ನಿರ್ಧಾರವನ್ನು ಎರಡು ಹಂತಗಳ ಸ್ಪರ್ಧಾತ್ಮಕ ಬಿಡ್ಡಿಂಗ್ ಪ್ರಕ್ರಿಯೆಯ ಮೂಲಕ ಜಾರಿಗೊಳಿಸಲಾಯಿತು. ಈ ಪ್ರಕ್ರಿಯೆಗೆ ಬಹುಹಂತದ ಸಾಮೂಹಿಕ ನಿರ್ಧಾರ ಕೈಗೊಳ್ಳುವ ವ್ಯವಸ್ಥೆಯ ಬೆಂಬಲವಿತ್ತು. ಇದರಲ್ಲಿ ಅಂತರ ಸಚಿವಾಲಯಗಳ ಗುಂಪು (ಐಎಂಜಿ), ಹೂಡಿಕೆ ಹಿಂತೆಗೆತದ ಕಾರ್ಯದರ್ಶಿಗಳ ಕೋರ್‌ ಗುಂಪು (ಸಿಜಿಡಿ) ಮತ್ತು ಅಧಿಕಾರಯುತ ಸಂಪುಟ ಸಚಿವರ ಗುಂಪನ್ನು ಒಳಗೊಂಡ ಪರ್ಯಾಯ ವ್ಯವಸ್ಥೆ (ಎಎಂ) ಸೇರಿದ್ದವು.

ಆಸಕ್ತರಿಂದ ಆಸಕ್ತಿ ಅಭಿವ್ಯಕ್ತಿ (ಇಒಐ) ಆಹ್ವಾನಿಸುವ ಪ್ರಾಥಮಿಕ ಮಾಹಿತಿ ಜ್ಞಾಪನಪತ್ರವನ್ನು (ಪಿಐಎಂ) 07.10.2022ರಂದು ಹೊರಡಿಸಲಾಯಿತು. ಭಾರತೀಯ ರಿಸರ್ವ್ ಬ್ಯಾಂಕಿನಿಂದ ‘ಸೂಕ್ತ ಮತ್ತು ಅರ್ಹ’ ಎಂದು ಪರಿಗಣಿಸಲ್ಪಟ್ಟು, ಗೃಹ ವ್ಯವಹಾರಗಳ ಸಚಿವಾಲಯದಿಂದ ಭದ್ರತಾ ಅನುಮತಿ ಪಡೆದವರಿಗೆ ಮಾತ್ರ ಬಿಡ್ಡಿಂಗ್ ಹಂತದಲ್ಲಿ ಭಾಗವಹಿಸಲು ಅವಕಾಶ ನೀಡಲಾಯಿತು. ಈ ಉದ್ದೇಶಕ್ಕಾಗಿ, ಅರ್ಹ ಆಸಕ್ತ ಪಕ್ಷಗಳಿಂದ (ಕ್ಯೂಐಪಿಗಳು) ತಾಂತ್ರಿಕ ಮತ್ತು ಹಣಕಾಸು ಬಿಡ್‌ಗಳನ್ನು ಆಹ್ವಾನಿಸಿ, ಪ್ರಸ್ತಾವನೆಗಾಗಿ ವಿನಂತಿ ಪತ್ರವನ್ನು ಹೊರಡಿಸಲಾಯಿತು. ಆರಂಭದಲ್ಲಿ ಆಸಕ್ತಿ ಅಭಿವ್ಯಕ್ತಿಯನ್ನು ಸಲ್ಲಿಸಿದ ಐದು ಪಕ್ಷಗಳ ಪೈಕಿ, ನಿಗದಿಪಡಿಸಿದ ಅರ್ಹತಾ ಮಾನದಂಡಗಳು ಮತ್ತು ಅನರ್ಹಗೊಳಿಸುವ ಷರತ್ತುಗಳ ಆಧಾರದ ಮೇಲೆ ನಾಲ್ಕು ಪಕ್ಷಗಳು ಅರ್ಹತೆ ಪಡೆದವು. ಈ ಪೈಕಿ ಅಂತಿಮವಾಗಿ ಎರಡು ಪಕ್ಷಗಳು ಮಾತ್ರ ತಾಂತ್ರಿಕ ಮತ್ತು ಹಣಕಾಸು ಬಿಡ್‌ಗಳನ್ನು ಸಲ್ಲಿಸಿ, ಈ ವಹಿವಾಟಿಗೆ ಅರ್ಹ ಬಿಡ್‌ದಾರರು (ಕ್ಯೂಬಿಗಳು) ಎನಿಸಿಕೊಂಡವು.

ಸಿಜಿಡಿ ನಡೆಸಿದ ಸಮಗ್ರ ಮೌಲ್ಯಮಾಪನದ ಬಳಿಕ ಮತ್ತು ಪರ್ಯಾಯ ವ್ಯವಸ್ಥೆಯ ಶಿಫಾರಸುಗಳನ್ನು ಪರಿಗಣಿಸಿ, 14.10.2026ರಂದು ನಡೆದ ಸಭೆಯಲ್ಲಿ ಆರ್ಥಿಕ ವ್ಯವಹಾರಗಳ ಸಂಪುಟ ಸಮಿತಿಯು ಈ ವಹಿವಾಟಿಗಾಗಿ M/s 10955230 Canada Inc. (ಮೂಲ ಸಂಸ್ಥೆ: M/s ಫೇರ್‌ಫ್ಯಾಕ್ಸ್ ಫೈನಾನ್ಶಿಯಲ್ ಹೋಲ್ಡಿಂಗ್ಸ್ ಲಿಮಿಟೆಡ್) ಅನ್ನು ಕಾರ್ಯತಂತ್ರದ ಖರೀದಿದಾರರನ್ನಾಗಿ ಅನುಮೋದಿಸಿತು. ಐಡಿಬಿಐ ಬ್ಯಾಂಕ್ ಲಿಮಿಟೆಡ್‌ನ ಶೇ. 60.72ರಷ್ಟು ಷೇರುಪಾಲನ್ನು ಸ್ವಾಧೀನಪಡಿಸಿಕೊಳ್ಳಲು ಒಟ್ಟು ₹52,878.0806181 ಕೋಟಿ ಖರೀದಿ ಮೊತ್ತವನ್ನು ನಿಗದಿಪಡಿಸಲಾಗಿದೆ. ಇದರಲ್ಲಿ ಭಾರತ ಸರ್ಕಾರದ ಬಳಿಯಿರುವ ಶೇ. 30.48ರಷ್ಟು ಮತ್ತು ಎಲ್‌ಐಸಿಯ ಬಳಿಯಿರುವ ಶೇ. 30.24ರಷ್ಟು ಈಕ್ವಿಟಿ ಷೇರುಪಾಲು ಸೇರಿವೆ.

ಇಂತಹ ವಹಿವಾಟುಗಳಲ್ಲಿ ಬಿಡ್ಡಿಂಗ್‌ಗಾಗಿ ಯಾವುದೇ ಮೊದಲೇ ನಿಗದಿಪಡಿಸಿದ ಮಾನದಂಡದ ಬೆಲೆ ಇರುವುದಿಲ್ಲ. ಬಿಡ್‌ದಾರರು ತಮ್ಮದೇ ಆದ ಮೌಲ್ಯಮಾಪನ ನಡೆಸಿ, ತಮ್ಮ ಬಿಡ್‌ಗಳನ್ನು ಗೌಪ್ಯವಾಗಿ ಮುಚ್ಚಿದ ಲಕೋಟೆಗಳಲ್ಲಿ ಸಲ್ಲಿಸುತ್ತಾರೆ. ಸಂಸ್ಥೆಗಳ ನ್ಯಾಯಸಮ್ಮತ ಮೌಲ್ಯಮಾಪನ ನಡೆಸಲು ಸ್ವತಂತ್ರ ಸಂಸ್ಥೆಗಳನ್ನು ನೇಮಿಸಲಾಗುತ್ತದೆ. ಅವು ಆಯಾ ಸಮಯದಲ್ಲಿ ಸಂಸ್ಥೆಯ ಮೌಲ್ಯವನ್ನು ನಿರ್ಧರಿಸುತ್ತವೆ. ಸಲ್ಲಿಸಲಾದ ಬಿಡ್‌ಗಳು ಸಮಂಜಸವಾಗಿವೆಯೇ ಎಂಬುದನ್ನು ಪರಿಶೀಲಿಸಲು ಈ ಮೌಲ್ಯಮಾಪನವನ್ನು ಹೋಲಿಕೆಯ ಮಾನದಂಡವಾಗಿ ಬಳಸಲಾಗುತ್ತದೆ.

ಈ ವಹಿವಾಟಿನಡಿ, 2025-26ನೇ ಹಣಕಾಸು ವರ್ಷದಲ್ಲಿ ಆರಂಭಿಕ ಬಿಡ್‌ಗಳನ್ನು ಆಹ್ವಾನಿಸಲಾಗಿತ್ತು. ಹೋಲಿಕೆಗಾಗಿ, ಆ ಸಮಯದಲ್ಲಿ ಪ್ರತಿ ಷೇರಿಗೆ ₹94.42ರ ಮೀಸಲು ಬೆಲೆಯನ್ನು ನಿಗದಿಪಡಿಸಲಾಗಿತ್ತು. ಈ ಬೆಲೆಯ ಮೇಲೆ ಮಾರುಕಟ್ಟೆ ಪರಿಸ್ಥಿತಿಗಳಿಂದ ಪ್ರಭಾವಿತವಾಗಿದ್ದ ಷೇರು ಬೆಲೆಯ ನೇರ ಮತ್ತು ಪರೋಕ್ಷ ಪರಿಣಾಮಗಳಿದ್ದವು. ಮಾರುಕಟ್ಟೆ ಪ್ರಭಾವವಿಲ್ಲದ ಪ್ರತಿಕಲ್ಪಿತ ಬೆಲೆ ಆ ಸಮಯದಲ್ಲಿ ಲಭ್ಯವಿರಲಿಲ್ಲ. ಆದರೆ, 07.10.2022ರಂದು ಪಿಐಎಂ/ಇಒಐ ಹೊರಡಿಸುವುದಕ್ಕೂ ಮುನ್ನ ನಡೆದ ಕೊನೆಯ ವಹಿವಾಟಿನ ದಿನದಂದು ಐಡಿಬಿಐ ಷೇರಿನ ಮೇಲೆ ಮಾರುಕಟ್ಟೆ ಪ್ರಭಾವವಿಲ್ಲದ ಬೆಲೆ ಪ್ರತಿ ಷೇರಿಗೆ ₹₹42.40ರಷ್ಟಿತ್ತು. ಇದಕ್ಕೆ ವಿರುದ್ಧವಾಗಿ, 08.01.2026ರಂದು ಆರಂಭಿಕ ಬಿಡ್‌ಗಳನ್ನು ಆಹ್ವಾನಿಸುವುದಕ್ಕೂ ಮುನ್ನ ನಡೆದ ಕೊನೆಯ ವಹಿವಾಟಿನ ದಿನದಂದು ಮಾರುಕಟ್ಟೆ ಪ್ರಭಾವಕ್ಕೊಳಗಾದ ಷೇರು ಬೆಲೆ ಪ್ರತಿ ಷೇರಿಗೆ ₹108.12ರಷ್ಟಿತ್ತು. ಆರಂಭಿಕ ಬಿಡ್‌ಗಳು ಆಗ ನಿಗದಿಪಡಿಸಿದ್ದ ಮೀಸಲು ಬೆಲೆಗಿಂತ ಕಡಿಮೆ ಇದ್ದುದರಿಂದ ಅವುಗಳಿಗೆ ಅನುಮೋದನೆ ನೀಡಲಾಗಲಿಲ್ಲ. ಆರಂಭಿಕ ಬಿಡ್‌ಗಳು ಯಶಸ್ವಿಯಾಗಿಲ್ಲ ಎಂಬುದು ತಿಳಿದ ಬಳಿಕ, ಮಾರುಕಟ್ಟೆ ಪ್ರಭಾವಕ್ಕೊಳಗಾಗಿದ್ದ ಷೇರು ಬೆಲೆಯೂ ತಿದ್ದುಪಡಿಯಾಗಿ, ಕಂಡುಬಂದ ಬಿಡ್ ಬೆಲೆಯಾದ ಪ್ರತಿ ಷೇರಿಗೆ ₹₹75ಕ್ಕಿಂತ ಗಣನೀಯವಾಗಿ ಕೆಳಕ್ಕೆ ಇಳಿಯಿತು.

ತದನಂತರ, ಸಾಮೂಹಿಕ ನಿರ್ಧಾರ ಕೈಗೊಳ್ಳುವ ವ್ಯವಸ್ಥೆಗೆ ವಹಿಸಲಾಗಿದ್ದ ಮತ್ತು ನೀಡಲಾಗಿದ್ದ ಅಧಿಕಾರಗಳನ್ನು ಚಲಾಯಿಸಿ, ವಹಿವಾಟಿನ ಮೌಲ್ಯವನ್ನು ಸಾಧ್ಯವಾದಷ್ಟು ಹೆಚ್ಚಿಸುವ ಉದ್ದೇಶದಿಂದ, 2026-27ರ ಹಣಕಾಸು ವರ್ಷದಲ್ಲಿ ಅರ್ಹ ಬಿಡ್‌ದಾರರಿಂದ ತಮ್ಮ ಅತ್ಯುತ್ತಮ ಆಫರ್ ಒಳಗೊಂಡ ಮುಚ್ಚಿದ ಲಕೋಟೆಯ ಬಿಡ್‌ಗಳನ್ನು ಆಹ್ವಾನಿಸಲಾಯಿತು. 18.05.2026ರಂದು ಅತ್ಯುತ್ತಮ ಆಫರ್‌ಗಳ ಬಿಡ್‌ಗಳನ್ನು ಆಹ್ವಾನಿಸುವುದಕ್ಕೂ ಮುನ್ನ ನಡೆದ ಕೊನೆಯ ವಹಿವಾಟಿನ ದಿನದಂದು ಐಡಿಬಿಐ ಷೇರಿನ ಬೆಲೆ ಪ್ರತಿ ಷೇರಿಗೆ ₹70.38ರಷ್ಟಿತ್ತು.

ಕಡಿಮೆ ಪ್ರಮಾಣದಲ್ಲಿ ವಹಿವಾಟಾಗುವ ಐಡಿಬಿಐ ಷೇರಿನ ಮಾರುಕಟ್ಟೆ ಬೆಲೆ ಅಸ್ಥಿರವಾಗಿಯೇ ಮುಂದುವರಿಯಿತು. ಅದು ಬಿಡ್‌ಗಳ ಮೂಲಕ ಕಂಡುಬಂದ ಬೆಲೆಗಿಂತ ಕೆಲವೊಮ್ಮೆ ಹೆಚ್ಚಾಗಿಯೂ, ಕೆಲವೊಮ್ಮೆ ಕಡಿಮೆಯಾಗಿಯೂ ಏರಿಳಿತ ಕಂಡಿತು. ಮೌಲ್ಯಮಾಪನ ಅವಧಿಯಲ್ಲಿ ಪ್ರತಿ ಷೇರಿನ ಬೆಲೆ ₹118.38ರಿಂದ ₹₹61.01ರವರೆಗೆ ಏರಿಳಿತಗೊಂಡಿತು. ಹೀಗಾಗಿ, ಮಾರುಕಟ್ಟೆ ಬೆಲೆಯು ಉದ್ಯಮದ ಆಂತರಿಕ ಮೌಲ್ಯಕ್ಕೆ ಹೊಂದಿಕೆಯಾಗದ ರೀತಿಯಲ್ಲಿ ಮೌಲ್ಯಮಾಪನದ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದ್ದುದರಿಂದ, ಅದನ್ನು ಪರಿಗಣನೆಯಿಂದ ಕೈಬಿಡಲಾಯಿತು. ಬದಲಾಗಿ, ಈ ಸಮಸ್ಯೆಯನ್ನು ನಿವಾರಿಸುವ ಮಾರುಕಟ್ಟೆ ಗುಣಕ ವಿಧಾನವನ್ನು ಆಧರಿಸಿದ ಸಾಪೇಕ್ಷ ಮೌಲ್ಯಮಾಪನವನ್ನು ಬಳಸಲಾಯಿತು. 2026ರ ಮಾರ್ಚ್ 31ರಂದು ಮುಕ್ತಾಯಗೊಂಡ ಲೆಕ್ಕಪತ್ರಗಳ ಆಧಾರದ ಮೇಲೆ ಎಲ್ಲ ಸಾರ್ವಜನಿಕ ವಲಯದ ಬ್ಯಾಂಕುಗಳ ಮಾಹಿತಿಯನ್ನು ಪರಿಗಣಿಸಿ, ಸಂಸ್ಥೆಯ ನ್ಯಾಯಸಮ್ಮತ ಮಾರುಕಟ್ಟೆ ಮೌಲ್ಯವನ್ನು ಈ ವಿಧಾನದಿಂದ ನಿರ್ಧರಿಸಲಾಯಿತು. ಇದರ ಜೊತೆಗೆ, ಆಸ್ತಿಗಳ ಮೌಲ್ಯಮಾಪನ ವಿಧಾನವನ್ನು ಬಳಸಲಾಯಿತು. ಈ ವಿಧಾನದಲ್ಲಿ ಜಮೀನು ಮತ್ತು ಕಟ್ಟಡಗಳು ಸೇರಿದಂತೆ ಸ್ಪಷ್ಟ ಹಾಗೂ ಅಮೂರ್ತ ಆಸ್ತಿಗಳ ಜೊತೆಗೆ ಬಾಧ್ಯತೆಗಳನ್ನೂ ಪರಿಗಣಿಸಲಾಗುತ್ತದೆ. ಐಡಿಬಿಐ ಬ್ಯಾಂಕ್ ಲಿಮಿಟೆಡ್‌ನ 2026ರ ಮಾರ್ಚ್ 31ರ ಲೆಕ್ಕಪರಿಶೋಧಿತ ಲೆಕ್ಕಪತ್ರಗಳ ಆಧಾರದ ಮೇಲೆ ಸಂಸ್ಥೆಯ ನ್ಯಾಯಸಮ್ಮತ ನಿವ್ವಳ ಆಸ್ತಿ ಮೌಲ್ಯವನ್ನು ಈ ಮೂಲಕ ನಿರ್ಧರಿಸಲಾಯಿತು.

ಅದರಂತೆ, ಮೇಲೆ ವಿವರಿಸಿದ ಎರಡು ಸ್ವತಂತ್ರ ವಿಧಾನಗಳನ್ನು ಬಳಸಿಕೊಂಡು, ಎರಡು ವೃತ್ತಿಪರ ಮೌಲ್ಯಮಾಪನ ಸಂಸ್ಥೆಗಳು ಸಂಸ್ಥೆಯ ನ್ಯಾಯಸಮ್ಮತ ಮೌಲ್ಯಮಾಪನ ನಡೆಸಿದವು. ಈ ಎರಡೂ ಮೌಲ್ಯಮಾಪನಗಳ ಸರಾಸರಿ ಪ್ರತಿ ಷೇರಿಗೆ ₹75.99 ಆಗಿತ್ತು. ಅರ್ಹ ಬಿಡ್‌ಗಳನ್ನು ಮೌಲ್ಯಮಾಪನ ಮಾಡಲು ಇದನ್ನು ಮಾನದಂಡದ ಬೆಲೆಯಾಗಿ ಬಳಸಲಾಯಿತು. ವಿಜೇತ ಬಿಡ್‌ದಾರರು ಪ್ರತಿ ಷೇರಿಗೆ ₹81ರ ಅತ್ಯುತ್ತಮ ಆಫರ್ ಸಲ್ಲಿಸಿದ್ದರು. ಈ ಬೆಲೆಯು ಮಾನದಂಡದ ಬೆಲೆಗಿಂತಲೂ ಮತ್ತು ಎರಡೂ ಸ್ವತಂತ್ರ ಮೌಲ್ಯಮಾಪನ ಸಂಸ್ಥೆಗಳು ಅಂದಾಜಿಸಿದ ನ್ಯಾಯಸಮ್ಮತ ಮೌಲ್ಯಕ್ಕಿಂತಲೂ ಹೆಚ್ಚಾಗಿತ್ತು. ಆದ್ದರಿಂದ, ಈ ಆಫರ್‌ಗಿಂತ ಸಮಂಜಸವೆಂದು ನಿರ್ಧರಿಸಿ ಅನುಮೋದಿಸಲಾಯಿತು.

ಯಶಸ್ವಿ ಬಿಡ್‌ದಾರರು, ಆಸಕ್ತಿ ಅಭಿವ್ಯಕ್ತಿ (ಇಒಐ) ಹಂತದಲ್ಲಿ ನಡೆಸಲಾದ ‘ಸೂಕ್ತ ಮತ್ತು ಅರ್ಹ’ ಮೌಲ್ಯಮಾಪನಕ್ಕೆ ಅನುಗುಣವಾಗಿ ತಮ್ಮ ಅರ್ಹತೆ ಮತ್ತು ವಿಶ್ವಾಸಾರ್ಹತೆಯ ವಿವರಗಳನ್ನು ಭಾರತೀಯ ರಿಸರ್ವ್ ಬ್ಯಾಂಕ್‌ಗೆ ಸಲ್ಲಿಸಬೇಕಾಗುತ್ತದೆ. ಅಲ್ಲದೆ, ಆ ಹಂತದಲ್ಲಿ ನಿಗದಿಪಡಿಸಲಾದ ನಿಯಂತ್ರಣಾತ್ಮಕ ಷರತ್ತುಗಳನ್ನು ಪಾಲಿಸುವ ಕುರಿತ ಕಾರ್ಯಯೋಜನೆಯನ್ನೂ ಸಲ್ಲಿಸಬೇಕಾಗುತ್ತದೆ. ಈ ಪ್ರಕ್ರಿಯೆ ಪೂರ್ಣಗೊಂಡ ಬಳಿಕ, ಇದು ದೇಶದ ಹಣಕಾಸು ವಲಯದಲ್ಲಿ ಇದುವರೆಗೆ ನಡೆದ ಅತಿದೊಡ್ಡ ವಿದೇಶಿ ನೇರ ಹೂಡಿಕೆ (ಎಫ್‌ಡಿಐ) ಆಗಲಿದೆ.

ಐಡಿಬಿಐ ಬ್ಯಾಂಕ್ ಲಿಮಿಟೆಡ್‌ನ ಒಟ್ಟು ಷೇರುಪಾಲಿನಲ್ಲಿ ಭಾರತ ಸರ್ಕಾರ ಉಳಿಸಿಕೊಳ್ಳುವ ಶೇ. 15ರಷ್ಟು ಪಾಲನ್ನು ಮುಕ್ತ ಮಾರುಕಟ್ಟೆಯ ಮೂಲಕ ಮಾರಾಟ ಮಾಡಲು, ಪ್ರಮಾಣಿತ ಕಾರ್ಯಾಚರಣಾ ವಿಧಾನಕ್ಕೆ ಅನುಗುಣವಾಗಿ ಕ್ರಮ ಕೈಗೊಳ್ಳುವ ಅಧಿಕಾರವನ್ನೂ ಸಿಸಿಇಎ ಪರ್ಯಾಯ ವ್ಯವಸ್ಥೆಗೆ ವಹಿಸಿದೆ. ಎಲ್‌ಐಸಿಯು ತನ್ನ ನಿಯಂತ್ರಕರ ನಿರ್ದೇಶನಗಳನ್ನು ಪಾಲಿಸುವುದನ್ನು ಖಚಿತಪಡಿಸಿಕೊಂಡು, ತನ್ನ ಆಂತರಿಕ ಕಾರ್ಯವಿಧಾನಗಳಿಗೆ ಅನುಗುಣವಾಗಿ ಉಳಿದ ಷೇರುಪಾಲನ್ನು ನಿರ್ವಹಿಸಲು ಸ್ವತಂತ್ರವಾಗಿರುತ್ತದೆ.

ಪದೇಪದೇ ಕೇಳಲಾಗುವ ಪ್ರಶ್ನೆಗಳಿಗೆ (FAQs) ಇಲ್ಲಿ ಭೇಟಿ ನೀಡಿ: https://www.pib.gov.in/PressReleasePage.aspx?PRID=2323320&v=7®=48&lang=2

*****