কেন্দ্রগী হোম মিনিস্তর অমসুং তেংবাং পিনবগী মন্ত্রী শ্রী অমিত শাহনা ঙসি লুপা করোর ১৪৭২গী চাওখৎ-থৌরাংগী প্রোজেক্তাশিং হৌদোকখ্রে অমসুং গুজরাতকি অহমদবাদতা লৈবা সাবরমতি রেলৱে স্তেসন্দগী লৈবাক অসিগী অহানবা এল.এন.জি. মহাক্না রেলৱে লোকোমোতিব ইঞ্জিনশিংগী মেন্তেনেন্সকিদমক লিংখৎলিবা ৱা.এ.জি.-১২ মেন্তেনেন্স সেদসু উরেপ-উয়ুং তমখি। থৌরম অদুদা গুজরাতকি মুখ্য মন্ত্রী শ্রী ভুপেন্দ্র পতেল অমসুং অতোপ্পা শক্নাইরবা মিওই কয়া শরুক য়াখি।

প্রোগ্রাম অসিদা ৱা ঙাংলদুনা কেন্দ্রগী হোম মিনিস্তর অমসুং তেংবাং পিনবগী মন্ত্রী শ্রী অমিত শাহনা হায়খি মদুদি ঙসি সাবরমতি দিবিজন্দা রেলৱে প্রোজেক্ত কয়া অমা হৌদোকখ্রে, মসিদা এনভাইরনমেন্ত সস্তেনেবিলিতি, পেসেঞ্জরগী খুদোংচাবশিং অমসুং রেল পেসেঞ্জরশিংগী সেফতিদা মিত্‍‌য়েং থমলি। মহাক্না হায়খি, সত্যগ্রহ, ইচম চম্বা পুন্সী, খুঙ্গং চাওখত্‍‌পা অমসুং খাদি, মফম অসিদা এক্সপরিমেন্ত পুম্নমক অসি থবক ওইনা ওন্থোকপগী খোঙচৎ অসি সাবরমতি মশামক্তগী হৌখিবনি। শ্রী অমিত শাহনা হায়খি মদুদি সাবরমতি রেলৱে স্তেসন অসি হৌজিক্তি মশক থোকপা চাওখত্‍‌পা অমা লাকলে, অদুবু ১৯৮০গী মতমদা পেসেঞ্জরশিংনা স্তেসন অসিদগী রিক্সা অমা থিবা ফাওবা চাওরাক্না কিলোমিতর অনি খোঙনা চৎপা তাখি। মহাক্না হায়খি মদুদি সাবরমতি রেলৱে স্তেসন অসি পেসেঞ্জরশিংগী খুদোংচাবশিং, সেফতি অমসুং কনেক্তিবিতিগী লমদা অচৌবা অহোঙবা অমা উবা ফংলে। শ্রী শাহনা হায়খি মদুদি লুপা করোর ১৪৭২ চঙনা ঙসি উরেপ উয়ুং তমখিবা অমসুং য়ুম্ফম  থোনবগী থবকশিং অসি লাক্কদৌরিবা নুমিৎ খরনি অসিদা লমদম অসিগীদমক্তা য়াম্না মরুওইবা অমা ওইনা উৎলগনি। মহাক্না হায়খি মদুদি মফম অসিদা রেলৱে লোকোমোতিব ইঞ্জিনশিংগী মেন্তেনেন্সকিদমক লুপা কোতি ৭০০ চঙনা ৱাগ-১২ মেন্তেনেন্স সেদা অমা শাখ্রে। সেফতি হেঙ্গৎহন্নবা লুপা কোতি ৪৮ চঙনা সাবরমতি–কালোল–সাবরমতি রেল সেক্সনদা ‘কবচ’ ত্রেন প্রোতেক্সন সিস্তেম হৌদোকখ্রে। মসিগী মথক্তা, অহমদবাদ–পালনপুর অমসুং অহমদবাদ–শামখিয়ালি রেল সেক্সনশিংদা ‘কবচ’ ইমপ্লিমেন্ত তৌবতা নত্তনা সাবরমতি–সরখেজ রেলৱে লাইন অসি শরুক অনি ওইহন্নবা থবক হৌখ্রে।

শ্রী অমিত শাহনা হায়খি মদুদি ঙসিদি হোর্সপাৱর ১২,০০০গী ত্বিন-সেক্সন কেপাসিতি লৈবা ইঞ্জিন অমা কম্মিসন তৌখ্রে, মসিনা ত্রক ৬০০ ফাওবগী চাওরাক্না পোত্‍‌ পুথোক পুশিন তৌবা ঙমগনি। মমাঙদা মসিগীদমক্তা লোকোমোতিব অনি মথৌ তারম্মী, অদুবু হৌজিক্তি ৱা.এ.জি.-১২ অমখক্তানা চপ মান্নবা থবক অদু পাংথোকপা ঙমলে। মহাক্না হায়খি মদুদি মসিনা ইন্দিয়ন রেলৱেগী পুৱারিদা মরুওইবা মায়লস্তোন অমা ওইরগনি। শ্রী শাহনা হায়খি মদুদি ঙসি এল.এন.জি. পাৱর ত্রেনসু ঙসি শঙ্গাখ্রে, মসিনা লাক্কদৌরিবা চহী কয়াদা এনভাইরোন্মেন্তেল কঞ্জর্বেসন্দা মরুওইবা থৌদাং লৌবা ঙমহল্লগনি৷

কেন্দ্রগী হোম মিনিস্তর শ্রী অমিত শাহনা হায়খি মদুদি ২০১৪দা শ্রী নরেন্দ্র মোদীনা প্রধান মন্ত্রী ওইরবা মতুংদা রেলৱেদা অনৌবা খুদোংচাবা কয়া অমা হৌদোকখি অমসুং রেলৱে নেতৱার্ক মোদর্নাইজ তৌখি। মহাক্না হায়খি মদুদি জৱাহরলাল নেহরু পোর্ত ত্রস্ত (জে.এন.পি.তি.), মুম্বাইদগী বরোদারা ফাওবগী লৈবাক অসিগী অহানবা দবল স্তেক লোং-হোল কন্তেনর ত্রেন মায় পাক্না ত্রাইএল তৌবা লোয়শিনখ্রে। মহাক্না হায়খি মদুদি লৈবাক অসিদা পোত্‍‌ পুথোক পুশিন তৌনবগীদমক রেল ত্রেক য়াম্না নেম্মী, অদুবু করিগুম্বা দবল স্তেক ফ্রেৎ ত্রেনগী ৱাখল্লোন অসি মায় পাক্লবদি পোত্‍‌ পুবা ঙম্বগী চাং অসি চাওরাক্না শরুক অনি ওইরগনি। মহাক্না হায়খি মদুদি কিলোমিতর ১১,০০০ শাংবা কোরিদোর অমা হৌজিক লেন মরিগী নেতৱর্ক ওইনা ওন্থোক্লি, মসিনা দিল্লী–হাওরা অমসুং দিল্লী–গুৱাহাতিগী মায়কৈদা চৎথোক-চৎশিন তৌবদা য়াম্না লাইথোকহল্লগনি।

শ্রী অমিত শাহনা হায়খি মদুদি প্রধান মন্ত্রী মোদীগী লুচিং মখাদা দেদিকেতেদ ফ্রেৎ কোরিদোরশিং, রেপিদ রেল সিস্তেম অমসুং প্রিমিয়ম রেলৱে স্তেসনশিং হৌদোকখি। মহাক্না হায়খি মদুদি হন্দক্তা প্রধান মন্ত্রী মোদীনা হায়দ্রোজেন্না মথৌ তৌবা ত্রেন অমা উরেপ-উয়ুং তমখি, মসিনা ভারতপু তেক্নোলোজি অসি লৈবা মালেমগী লৈবাক মরি খক্তগী মনুংদা অমা ওইহল্লে। মহাক্না হায়খি মদুদি মোদী সরকারগী মতমদা বাইও-তোইলেৎকি চাদা ৯৭ থাদোকখি। মোদী সরকারগী মতমদা এল.ঐচ.বি.গী কোচ চাদা ৮৭ ভারত্তা শাখি। প্রধান মন্ত্রী মোদীনা ওফিশ পায়রকপা মমাঙদা রেলৱে ইলেক্ত্রিফিকেসন অসি চাদা ৩০ খক্তমক ওইখি, অদুগা লেমহৌরিবা চাদা ৭০দি মহাক্কী মতমদা লোয়শিনখি। মহাক্না হায়খি মদুদি মোদী সরকারগী মখাদা রেলৱে সেফতি বজেৎ চাদা ৬৭ হেনগত্‍‌লে, লোকোমোতিব পুথোকপগী কেপাসিতি চাদা ৬৬ হেনগত্‍‌লে।

কেন্দ্রগী হোম মিনিস্তর শ্রী অমিত শাহনা হায়খি মদুদি প্রধান মন্ত্রী মোদীনা ‘মেক ইন ইন্দিয়া’ অমসুং ‘আত্মনিরভর ভারত’ হায়বা ৱাখল্লোনশিং হৌদোকখি, অমসুং মসিগী মহৈ ওইনা লৈবাক অসিনা হৌজিক লৈবাক অসিদা লোকোমোতিবগুম্বা খুৎলায়শিং শাবগী মায়কৈদা চাওনা অহোঙবা পুরক্লে। মহাক্না হায়খি মদুদি ২০১৫–১৬তা রেলৱেনা দিজল লিতর কোতি ২৯৩ শিজিন্নখি, অদুবু মসি ২০২৪–২৫দা লিতর ক্রোর ১০৮দা হন্থরে। মহাক্না হায়খি মদুদি মসি য়াম্না চাওবা এচিবমেন্ত অমনি মসিদা য়াম্না ৱানা মিত্‍‌য়েং চংলি। শ্রী শাহনা হায়খি মদুদি ২০১০–১১দা রেলৱে ইলেক্ত্রিফিকেসন অসি চহি অমদা কিলোমিতর ৭৫ খক্তমক ওইখি, অদুগা ২০২৩–২৪দা চহি অমদা কিলোমিতর ৭১৮৮ ইলেক্ত্রিফিকেসন তৌখি। মহাক্না হায়খি মদুদি রেলৱে নেতৱারককি চাদা ৯৯.৬ হৌজিক ইলেক্ত্রিফিকেসন তৌখ্রে, অমসুং লেমহৌরিবা চাদা ০.৪সু অথুবা মতমদা লোয়শিনগনি। মহাক্না হায়খি মদুদি রেলৱে ইলেক্ত্রিফিকেসন অসি চাইনাদা চাদা ৯২, স্পেন্দা চাদা ৬৮, ফ্রান্সতা চাদা ৬০ অমসুং য়ুনাইতেদ কিংদমদা চাদা ৪৯দা লৈরি। চাদা ১০০ ইলেক্ত্রিফিকেসন ফংদুনা লৈবাকশিং অসিদগী ভারতনা মায়থিবা পিরগনি। মহাক্না হায়খি মদুদি স্বিদেন অসি মালেমদা চাদা ১০০ রেলৱে ইলেক্ত্রিফিকেসন তৌবা ঙম্বা লৈবাক অমনি, অদুবু স্বিদেন্দা রেলৱে লায়নশিংগী অপুনবা লম্বি অসি ভারতকি চাংদগী চাওরাক্না শরুক তরা হেল্লি।

কেন্দ্রগী হোম মিনিস্তর শ্রী অমিত শাহনা হায়খি মদুদি, করিগুম্বা রেলৱেগী বজেৎকি মতাঙদা গুজরাৎ অসি খুদম ওইনা লৌরবদি ২০০৯দগী ২০১৪ ফাওবগী রেলগী বজেৎ অসি সুপ্নতগী লুপা কোতি ৫৮৯ খক্তমক ওইখি। মসিগী ওন্ন-তৈনবদা চহি অমখক্তগী ওইনা, ২০২৬–২৭কি বজেৎ অসি লুপা করোর ১৭,৩৬৬নি। মহাক্না হায়খি মদুদি চাওখত্‍‌পাগী খোঙজেলগী খেৎনবা অসি ময়েক শেঙনা উবা ফঙই। মহাক্না হায়খি মদুদি লৈবাক অসিগী মীয়াম্না মিপায়বা পোকহন্দনা ৱাফম কয়া ফোঙদোক্লিবা ওপোজিসন পার্তিগী লুচিংবশিংদা ৱাফম অমসুং ফিগরশিংগা লোয়ননা ৱাফমশিং খন্ননবা হায়গদবনি। শ্রী শাহনা ওপোজিসন পারতিনা মখোয়গী লৈঙাক মনুংদা তৌখিবা থবকশিং অদুগী মতাঙদা ৱাহং হংখি। মহাক্না হায়খি মদুদি চহি ১০গী মনুংদা লুপা করোর লাখ ১২গী স্কেম, স্কেন্দেল অমসুং শেঞ্জা-থুমজা নত্তনা ওপোজিসন পার্তিনা করিগুম্বা অমত্তা তৌখিদে। শ্রী শাহনা হায়খি মদুদি চহি ১২গী মনুংদা মোদীজিগী মথক্তা শেঞ্জা-থুমজাগী অকনবা ৱাফম ফাওবা লাকখিদ্রি।

***