കേന്ദ്ര ആഭ്യന്തര, സഹകരണ മന്ത്രി ശ്രീ അമിത് ഷാ ഗുജറാത്തിലെ അഹമ്മദാബാദിലുള്ള സബർമതി റെയിൽവേ സ്റ്റേഷനിൽ ഇന്ന് 1,472 കോടി രൂപയുടെ വികസന പദ്ധതികൾ ഉദ്ഘാടനം ചെയ്യുകയും രാജ്യത്തെ ആദ്യ എൽ.എൻ.ജി. അധിഷ്ഠിത ട്രെയിൻ ഫ്ലാഗ് ഓഫ് ചെയ്യുകയും ചെയ്തു. റെയിൽവേ ലോക്കോമോട്ടീവ്  എഞ്ചിനുകളുടെ അറ്റകുറ്റപ്പണികൾക്കായി സജ്ജീകരിച്ച WAG-12 മെയിൻ്റനൻസ് ഷെഡും അദ്ദേഹം ഉദ്ഘാടനം ചെയ്തു. ഗുജറാത്ത് മുഖ്യമന്ത്രി ശ്രീ ഭൂപേന്ദ്ര പട്ടേലും മറ്റ് വിശിഷ്ട വ്യക്തികളും ചടങ്ങിൽ പങ്കെടുത്തു.

പരിസ്ഥിതി സുസ്ഥിരത, യാത്രാസൗകര്യങ്ങൾ, റെയിൽ യാത്രക്കാരുടെ സുരക്ഷ എന്നിവയിൽ ശ്രദ്ധ കേന്ദ്രീകരിച്ച് സബർമതി ഡിവിഷനിൽ ഇന്ന് നിരവധി റെയിൽവേ പദ്ധതികൾക്ക് തുടക്കം കുറിച്ചതായി  പരിപാടിയെ അഭിസംബോധന ചെയ്തുകൊണ്ട് കേന്ദ്ര ആഭ്യന്തര, സഹകരണ മന്ത്രി ശ്രീ അമിത് ഷാ പറഞ്ഞു. സത്യാഗ്രഹം, ലളിതജീവിതം, ഗ്രാമവികസനം, ഖാദി എന്നീ പരീക്ഷണങ്ങളെല്ലാം പ്രായോഗിക തലത്തിലേക്ക് പരിവർത്തനം ചെയ്യാനുള്ള യാത്ര ആരംഭിച്ചത് സബർമതിയിൽ നിന്നാണെന്ന് അദ്ദേഹം പറഞ്ഞു. സബർമതി റെയിൽവേ സ്റ്റേഷൻ ഇന്ന് കാര്യമായ വികസനത്തിന് സാക്ഷ്യം വഹിച്ചിട്ടുണ്ടെന്നും, എന്നാൽ 1980-കളിൽ സ്റ്റേഷനിൽ നിന്ന് ഒരു റിക്ഷ കണ്ടെത്താൻ പോലും യാത്രക്കാർക്ക് രണ്ട് കിലോമീറ്ററോളം നടക്കേണ്ടി വന്നിരുന്നുവെന്നും ശ്രീ അമിത് ഷാ പറഞ്ഞു. യാത്രാസൗകര്യങ്ങൾ, സുരക്ഷ, കണക്റ്റിവിറ്റി എന്നിവയുടെ കാര്യത്തിൽ സബർമതി റെയിൽവേ സ്റ്റേഷനിൽ വലിയ പരിവർത്തനമാണ് സംഭവിച്ചിട്ടുള്ളതെന്ന് അദ്ദേഹം വ്യക്തമാക്കി. ഇന്ന് ഉദ്ഘാടനം നിർവ്വഹിച്ചതും തറക്കല്ലിട്ടതുമായ 1,472 കോടി രൂപയുടെ വികസന പ്രവർത്തനങ്ങൾ വരും ദിവസങ്ങളിൽ ഈ മേഖലയ്ക്ക് ഏറെ നിർണായകമായി മാറുമെന്ന് ശ്രീ ഷാ പറഞ്ഞു. റെയിൽവേ ലോക്കോമോട്ടീവ് എഞ്ചിനുകളുടെ അറ്റകുറ്റപ്പണികൾക്കായി 700 കോടി രൂപ ചെലവിൽ ഒരു WAG-12 മെയിൻ്റനൻസ് ഷെഡ് ഇവിടെ നിർമ്മിച്ചിട്ടുണ്ടെന്നും അദ്ദേഹം പറഞ്ഞു. സുരക്ഷ വർദ്ധിപ്പിക്കുന്നതിനായി സബർമതി–കലോൽ–സബർമതി റെയിൽവേ സെക്ഷനിൽ 48 കോടി രൂപ ചെലവിൽ ‘കവച്’ ട്രെയിൻ സംരക്ഷണ സംവിധാനം ഏർപ്പെടുത്തിയിട്ടുണ്ട്. കൂടാതെ, അഹമ്മദാബാദ്–പാലൻപൂർ, അഹമ്മദാബാദ്–സമാഖിയാലി റെയിൽവേ സെക്ഷനുകളിൽ ‘കവച്’ നടപ്പിലാക്കുന്നതിനുള്ള പ്രവർത്തനങ്ങൾക്കും സബർമതി–സർഖേജ് റെയിൽവേ ലൈൻ ഇരട്ടിപ്പിക്കുന്നതിനുമുള്ള ജോലികൾക്കും തുടക്കം കുറിച്ചിട്ടുണ്ട്.

12,000 കുതിരശക്തി ശേഷിയുള്ള ഇരട്ട-സെക്ഷൻ എഞ്ചിൻ ഇന്ന് കമ്മീഷൻ ചെയ്തതായും, ഒറ്റയ്ക്ക് തന്നെ ഏകദേശം 600 ട്രക്കുകൾ വഹിക്കുന്നതിന് തുല്യമായ ചരക്ക് നീക്കാൻ ഇതിന് സാധിക്കുമെന്നും ശ്രീ അമിത് ഷാ പറഞ്ഞു. മുൻപ് ഇതിനായി രണ്ട് ലോക്കോമോട്ടീവുകൾ ആവശ്യമായിരുന്നിടത്ത്, ഇപ്പോൾ ഒരൊറ്റ WAG-12 എഞ്ചിന് ഈ ദൗത്യം നിർവ്വഹിക്കാൻ സാധിക്കും. ഇത് ഇന്ത്യൻ റെയിൽവേയുടെ ചരിത്രത്തിലെ ഒരു സുപ്രധാന നാഴികക്കല്ലായി മാറുമെന്നും അദ്ദേഹം പറഞ്ഞു. ഇന്ന് ഉദ്ഘാടനം ചെയ്ത എൽ.എൻ.ജി. അധിഷ്ഠിത ട്രെയിൻ വരും വർഷങ്ങളിൽ പരിസ്ഥിതി സംരക്ഷണത്തിന് ഗണ്യമായ സംഭാവന നൽകുമെന്നും ശ്രീ ഷാ വ്യക്തമാക്കി.

2014-ൽ ശ്രീ നരേന്ദ്ര മോദി പ്രധാനമന്ത്രിയായതിനുശേഷം റെയിൽവേയിൽ നിരവധി പുതിയ സൗകര്യങ്ങൾ കൊണ്ടുവരികയും റെയിൽ ശൃംഖലയെ ആധുനികവൽക്കരിക്കുകയും ചെയ്തതായി കേന്ദ്ര ആഭ്യന്തര മന്ത്രി ശ്രീ അമിത് ഷാ പറഞ്ഞു. മുംബൈയിലെ ജവഹർലാൽ നെഹ്‌റു പോർട്ട് ട്രസ്റ്റിൽ (JNPT) നിന്ന് വഡോദരയിലേക്കുള്ള രാജ്യത്തെ ആദ്യ ഇരട്ട-സ്റ്റാക്ക് ദീർഘദൂര കണ്ടെയ്നർ ട്രെയിനിൻ്റെ വിജയകരമായ പരീക്ഷണ ഓട്ടം പൂർത്തിയായതായി അദ്ദേഹം അറിയിച്ചു. ചരക്കുനീക്കത്തിനായി രാജ്യത്ത് പരിമിതമായ റെയിൽപ്പാതകളാണുള്ളതെന്നും, എന്നാൽ ഡബിൾ-സ്റ്റാക്ക് ചരക്കു ട്രെയിനുകൾ എന്ന ആശയം വിജയിച്ചാൽ ചരക്ക് വഹിക്കുന്നതിനുള്ള ശേഷി ഏതാണ്ട്  ഇരട്ടിയാകുമെന്നും അദ്ദേഹം പറഞ്ഞു. 11,000 കിലോമീറ്റർ ദൈർഘ്യമുള്ള ഒരു ഇടനാഴി ഇപ്പോൾ നാലുവരി ശൃംഖലയാക്കി മാറ്റിക്കൊണ്ടിരിക്കുകയാണെന്നും, ഇത് ഡൽഹി-ഹൗറ, ഡൽഹി-ഗുവാഹത്തി പാതകളിലെ ഗതാഗതം കൂടുതൽ സുഗമമാക്കുമെന്നും അദ്ദേഹം പറഞ്ഞു.

ഡെഡിക്കേറ്റഡ് ഫ്രൈറ്റ് കോറിഡോറുകൾ, റാപ്പിഡ് റെയിൽ സംവിധാനം, പ്രീമിയം റെയിൽവേ സ്റ്റേഷനുകൾ എന്നിവ അവതരിപ്പിച്ചത് പ്രധാനമന്ത്രി മോദിയുടെ നേതൃത്വത്തിലാണെന്ന് ശ്രീ അമിത് ഷാ വ്യക്തമാക്കി.  സമീപകാലത്ത് പ്രധാനമന്ത്രി മോദി ഹൈഡ്രജൻ ട്രെയിൻ ഉദ്ഘാടനം ചെയ്തതായും, ഇതോടെ ഈ സാങ്കേതികവിദ്യ സ്വന്തമായുള്ള ലോകത്തിലെ നാല് രാജ്യങ്ങളിൽ ഒന്നായി ഇന്ത്യ മാറിയെന്നും അദ്ദേഹം പറഞ്ഞു. റെയിൽവേയിലെ 97 ശതമാനം ബയോ-ടോയ്‌ലറ്റുകളും സ്ഥാപിച്ചത് മോദി ഗവണ്മെൻ്റിൻ്റെ ഭരണകാലത്താണെന്ന് ശ്രീ ഷാ ചൂണ്ടിക്കാട്ടി. ഇന്ത്യയിൽ നിർമ്മിച്ച എൽ.എച്ച്.ബി കോച്ചുകളിൽ 87 ശതമാനവും മോദി  ഗവണ്മെൻ്റിൻ്റെ   കാലയളവിലാണ് പൂർത്തിയായത്. പ്രധാനമന്ത്രി മോദി അധികാരമേൽക്കുന്നതിന് മുൻപ് റെയിൽവേ വൈദ്യുതീകരണം വെറും 30 ശതമാനം മാത്രമായിരുന്നു. എന്നാൽ ശേഷിച്ച 70 ശതമാനം വൈദ്യുതീകരണവും പൂർത്തിയാക്കിയത് മോദി ഗവണ്മെൻ്റിൻ്റെ  ഭരണകാലത്താണ്. മോദി ഗവണ്മെൻ്റിൻ്റെ   കീഴിൽ റെയിൽവേ സുരക്ഷാ ബജറ്റ് 67 ശതമാനവും, ലോക്കോമോട്ടീവ് ഉൽപ്പാദന ശേഷി 66 ശതമാനവും വർദ്ധിച്ചതായും അദ്ദേഹം കൂട്ടിച്ചേർത്തു.

പ്രധാനമന്ത്രി മോദി ‘മെയ്ക്ക് ഇൻ ഇന്ത്യ’, ‘ആത്മനിർഭർ ഭാരത്’ എന്നീ ആശയങ്ങൾക്ക് തുടക്കം കുറിച്ചതായും, അതിൻ്റെ ഫലമായി രാജ്യം ഇപ്പോൾ ലോക്കോമോട്ടീവുകൾ ഉൾപ്പെടെയുള്ള ഉപകരണങ്ങൾ തദ്ദേശീയമായി നിർമ്മിക്കുന്നതിൽ ഗണ്യമായ പുരോഗതി കൈവരിച്ചിട്ടുണ്ടെന്നും കേന്ദ്ര ആഭ്യന്തര മന്ത്രി ശ്രീ അമിത് ഷാ പറഞ്ഞു. 2015–16-ൽ റെയിൽവേ 293 കോടി ലിറ്റർ ഡീസൽ ഉപയോഗിച്ചിരുന്ന സ്ഥാനത്ത്, 2024–25-ൽ ഇത് 108 കോടി ലിറ്ററായി കുറഞ്ഞതായി അദ്ദേഹം ചൂണ്ടിക്കാട്ടി. താരതമ്യേന അധികം ശ്രദ്ധിക്കപ്പെടാതെ പോയ ഒരു സുപ്രധാന നേട്ടമാണിതെന്ന് അദ്ദേഹം വ്യക്തമാക്കി. 2010–11 കാലയളവിൽ ഒരു വർഷത്തിനിടെ വെറും 75 കിലോമീറ്റർ മാത്രമായിരുന്നു റെയിൽവേ വൈദ്യുതീകരണം നടന്നിരുന്നതെങ്കിൽ, 2023–24-ൽ ഒരൊറ്റ വർഷം കൊണ്ട് 7,188 കിലോമീറ്റർ വൈദ്യുതീകരിച്ചതായി ശ്രീ ഷാ പറഞ്ഞു. റെയിൽവേ ശൃംഖലയുടെ 99.6 ശതമാനവും ഇപ്പോൾ വൈദ്യുതീകരിച്ചു കഴിഞ്ഞുവെന്നും, ബാക്കിയുള്ള 0.4 ശതമാനം ഉടൻ പൂർത്തിയാകുമെന്നും അദ്ദേഹം പറഞ്ഞു. റെയിൽവേ വൈദ്യുതീകരണം ചൈനയിൽ 92 ശതമാനവും, സ്പെയിനിൽ 68 ശതമാനവും, ഫ്രാൻസിൽ 60 ശതമാനവും, താരതമ്യേന ചെറിയ രാജ്യമായ യുണൈറ്റഡ് കിംഗ്ഡത്തിൽ 49 ശതമാനവുമാണ്. 100 ശതമാനം വൈദ്യുതീകരണം കൈവരിക്കുന്നതിലൂടെ ഇന്ത്യ ഈ രാജ്യങ്ങളെ മറികടക്കുമെന്നും അദ്ദേഹം പറഞ്ഞു. ലോകത്ത് 100 ശതമാനം റെയിൽവേ വൈദ്യുതീകരണം കൈവരിച്ച ഏക രാജ്യം സ്വീഡൻ ആണെന്നും, എന്നാൽ സ്വീഡനിലെ റെയിൽപ്പാതകളുടെ ആകെ നീളം ഇന്ത്യയുടേതിനേക്കാൾ ഏകദേശം പത്തിലൊന്ന് മാത്രമാണെന്നും അദ്ദേഹം പറഞ്ഞു.

റെയിൽവേ ബജറ്റിൻ്റെ കാര്യത്തിൽ ഗുജറാത്തിനെ ഒരു ഉദാഹരണമായി എടുത്താൽ, 2009 മുതൽ 2014 വരെയുള്ള റെയിൽവേ ബജറ്റ് വെറും 589 കോടി രൂപ മാത്രമായിരുന്നുവെന്ന് കേന്ദ്ര ആഭ്യന്തര മന്ത്രി ശ്രീ അമിത് ഷാ പറഞ്ഞു. ഇതിനു വിപരീതമായി, 2026–27 എന്ന ഒരൊറ്റ വർഷത്തെ ബജറ്റ് 17,366 കോടി രൂപയാണ്. വികസനത്തിൻ്റെ വേഗതയിലുണ്ടായ വ്യത്യാസം വ്യക്തമായി കാണാനാകുമെന്നും അദ്ദേഹം പറഞ്ഞു.
അടിസ്ഥാനരഹിതമായ പ്രസ്താവനകൾ നടത്തുന്ന പ്രതിപക്ഷ പാർട്ടി നേതാക്കളോട് വസ്തുതകളും കണക്കുകളും നിരത്തി വിഷയങ്ങൾ ചർച്ച ചെയ്യാൻ രാജ്യത്തെ ജനങ്ങൾ ആവശ്യപ്പെടണമെന്ന് അദ്ദേഹം പറഞ്ഞു. അവരുടെ ഭരണകാലത്ത് എന്താണ് ചെയ്തതെന്ന് ശ്രീ ഷാ പ്രതിപക്ഷ പാർട്ടിയോട് ചോദിച്ചു. 10 വർഷത്തിനിടെ 12 ലക്ഷം കോടി രൂപയുടെ അഴിമതികളും കുംഭകോണങ്ങളും അല്ലാതെ പ്രതിപക്ഷ പാർട്ടി ഒന്നും ചെയ്തിട്ടില്ലെന്ന് അദ്ദേഹം കുറ്റപ്പെടുത്തി. കഴിഞ്ഞ 12 വർഷത്തിനിടെ പ്രധാനമന്ത്രി മോദിക്കെതിരെ അഴിമതി സംബന്ധമായ ഒരു ആരോപണം പോലും ഉന്നയിക്കപ്പെട്ടിട്ടില്ലെന്നും ശ്രീ ഷാ പറഞ്ഞു.
 

****