কলচর অমদি তুরিজমগী কেন্দ্র মন্ত্রী শ্রী গজেন্দ্র সিংহ সেখাৱতনা ঙসি কলচর মন্ত্রালয়গী সেক্রেতরী শ্রী বিবেক অগরৱাল য়াওনা নই দিল্লীদা পি.এম. মিমেন্তোস ই-ওক্সনগী ৮শুবা ইদিসন হৌদোকখ্রে। ওক্সন অসিনা মীয়াম, কল্লেক্তর, ইনস্তিত্যুসন অমদি আর্ত এন্দ কলচরবু পামজবশিংগী মফমদা তোঙান তোঙানবা থৌরমশিংদা ইকায় খুম্নরবা প্রধান মন্ত্রীদা খুদোল তম্লকপা তোপ তোপ্পা মিমেন্তোশিংগী মপু ওইননবা তাঞ্জা অমা পীরি। পি.এম. মিমেন্তোস ই-ওক্সনগী ৮শুবা ইদিসন অসি ওফিসিএল পোর্তেল www.pmmementos.gov.in গী খুত্থাঙদা সেপ্তেম্বর ১৭, ২০২৬ তগী হৌগনি।

মেদিয়াদা ৱা ঙাংলদুনা, শ্রী গজেন্দ্র সিংহ সেখাৱতনা ইদিসন অসিদা পুন্না মিমেন্তো ১,৪৯৮ পুথোক্লি হায়খি। কল্লেক্সন অসিদা ভারতকী ইনাক খুল্লবা অমদি খেন্নবনা থল্লবা নাৎকী লনশিংগী মমি তারি অমদি লৈবাক অসিগী অর্তিস্তিক ত্রেদিসন, ত্রেদিস্নেল ক্রাফ্তসমেনসিপ, কল্চরেল প্রাক্তিসশিং, স্পিরিচুএল ত্রেদিসন্স অমদি শান্ন-খোৎনবগী লমদা মায় পাকখিবশিংগী মহুৎ শিনবা পোৎলমশিং য়াওরি। মিমেন্তোশিং অসি লৈবাক অসিগী তোঙান তোঙানবা মফমশিংদগী খোমজিল্লকপনা কল্লেক্সন অসিনা ভারত পুম্বগী ওইবা তোপ তোপ্পা মশক অমা পীরি।

কেন্দ্র মন্ত্রীনা কল্লেক্সন অসিদা স্তেত-স্তেতকী ওইবা রিপ্রজেন্তেসন থম্বা অসিনা ভারতকী জিওগ্রাফিকেল অমদি কল্চরগী খেন্নবা শক্তম উৎলি। মশিং য়াম্না য়াওরিবশিংগী মনুংদা ৱেস্ত বেঙ্গল, উত্তর প্রদেশ, গুজরাত, মহারাস্ত্র, অসাম, বিহার অমদি ওরিসাদগী মিমেন্তোশিং য়াওরি হায়খি। ৮শুবা ইদিসন অসিদা কল্লেক্সন অসিদা য়াওরিবা তোপ তোপ্পা পোৎলম খরগী মহুৎ শিল্লিবা মশক খঙদোক্লবা হিরো পোৎলম ৫০ য়াওরি। মখোয়গী মরক্তা কর্নাতকাদগী লুপা লাখ ১৩.৫০ গী বেজ মমল লৈবা প্রভু রামগী লুপাগী মিমেন্তো অমা; লুপা লাখ ৯ গী বেজ মমল লৈবা ককাতিয়া কলা থোরনমগী লুপাগী রেপ্লিকা অমা; লুপা লাখ ৭.৫০ গী বেজ মমল লৈবা ফ্রেম চনবা ত্রী ওফ লাইফ গোন্দ আর্ত পেন্তিং অমা; লুপা লাখ ৬ কী বেজ মমল লৈবা কাংদা তোংবা জগন্নাথকী ইমুং মনুং; অমদি লুপা লাখ ৫.৪০ গী মমল লৈবা ৯৯.৯৯ গী অফবা সনা কাপ্পা ফ্রেম চনবা রাধা কৃষ্ণ আর্তৱর্ক অমা য়াওরি হায়না মহাক্না মখা তানা ফোঙদোকখি।

শ্রী সেখাৱতনা পি.এম. মিমেন্তোস ই-ওক্সন অসি মমাঙদা পাঙথোকখিবা ইদিসনশিংগী মখা তারকপা ওইনা পাঙথোকপনি অমদি মীয়াম, কল্লেক্তরশিং অমদি ইনস্তিত্যুসনশিংনা শরুক য়াদুনা লাকখি হায়খি। থৌরাং অসিনা ভারতকী খেন্নবা কলা অমদি নাৎকী মচৎপু শিংথাবগী তাঞ্জা অমা পীবগা লোয়ননা মিমেন্তোশিং অসিবু মীয়ামদা ফংহন্নবা অরোন অথুপ লৈতবা থৌওং অমা পীরি হায়না মহাক্না ফোঙদোকখি। থৌরাং অসিগী মরুওইবা ৱাফমশিং ফোঙদোক্লদুনা, পি.এম. মিমেন্তোস ই-ওক্সনগী মরুওইবা শক্তম অমা হায়রগদি ওক্সন অসিদগী ফংলকপা শেনফমশিং নমামি গঙ্গে প্রোগ্রামদা চঙখিগদবা অসিনি হায়না মন্ত্রীনা হায়খি। থৌরাং অসিনা ভারতকী নাৎকী লন অমসুং গঙ্গা তুরেলগী ফীভম ফগৎহনবা অমদি ঙাক শেনবগী নেস্নেল মিসনগী মরক্তা ৱাহন্থোক লৈবা মরী অমা শেমগৎলি হায়না মহাক্না ফোঙদোকখি।

কলচর মন্ত্রালয়গী মখাদা লৈবা নেস্নেল গেল্লরী ওফ মোদর্ন আর্ত (এন.জি.এম.এ.), নই দিল্লীনা থৌরাং অসিগী দোকুমেন্তেসন, একজিবিসন, অমদি ওপরেস্নেল থৌরাংশিং কোওর্দিনেত তৌরি। থৌরাং অসিদা এন.আই.সি. গা তেক্নিকেল অমদি পোর্তেলগা মরী লৈনবা ঙাক্লৌগীদমক, ইভালুএসন অমদি ভেলুএসনগীদমক মরী লৈনবা ওথোরিতীশিংগা, পেমেন্ত গেতৱে সপ্পোর্তকীদমক এস.বি.আই. গা, অমদি মায় পাক্না লৈখ্রবা পোৎলমশিং পেক্কিং অমসুং দেলিবরীগীদমক দেজিগনেতেদ ফাইন আর্ত হেন্দ্লিং এজেন্সীগা খুৎশম্নবা য়াওনা তোঙান তোঙানবা স্তেকহোল্দরশিংগা খুৎশম্ননা থবক পায়খৎমিন্নবা য়াওরি।

মসিগা লোয়ননা পাঙথোকমিন্নগদবা একজিবিসন অমনা ভিজিতরশিংদা ই-ওক্সন্দা শরুক য়াদ্রিঙৈদা মিমেন্তোশিং অসি য়েংননবা অমদি আর্তিস্তিক অমসি কলচরগী মরুওইবশিং খঙহৌনবা তাঞ্জা অমা পীগনি। একজিবিসন অসিনা মীয়ামবু কল্লেক্সন অসিদা য়াওরিবা ভারতকী ত্রেদিস্নেল ক্রাফ্ত, অর্তিস্তিক প্রাক্তিস অমদি কলচরেল এক্সপ্রেসনশিংগী খেন্নবা মশক মওংশিং য়েংবসু ফংহনগনি।

কলচর মন্ত্রালয়না মীয়াম, কল্লেক্তর, ইনস্তিত্যুসনশিং, কোর্পোরেত, আর্তপু পামজবা অমদি ভারতকী মীয়ামবু কল্লেক্সন অসি য়েংননবা, একজিবিসন অসিদা লাক্নবা অমসুং পি.এম. মিমেন্তোস ই-ওক্সনগী ৮শুবা ইদিসন্দা শরুক য়াননবা পাউজেল পীরক্লি।

পি.এম. মিমেন্তোস ই-ওক্সন অসি মীয়ামবু নমামি গঙ্গে প্রোগ্রামগী খুত্থাঙদা লৈবাক্কী মরুওইবা থৌরাং অমদা শরুক য়াবা অমদি থৌদাং লৌবা ঙমহনবগা লোয়ননা, ভারতকী পারী পুরীগী লন, কলা, খুৎশা হৈবা অমদি নাৎকী খেন্নবা শক্তমবু সেলেব্রেত তৌরিবা থৌরাং অমনি।

***