ଭାରତର ସେମିକଣ୍ଡକ୍ଟର ଅଭିବୃଦ୍ଧିର ପରବର୍ତ୍ତୀ ପର୍ଯ୍ୟାୟରେ ସକ୍ରିୟ ଭାଗ ନେବାକୁ ସିଇଓମାନଙ୍କୁ ପ୍ରଧାନମନ୍ତ୍ରୀଙ୍କ ଆହ୍ୱାନ

ଉଦୀୟମାନ ପ୍ରଯୁକ୍ତିବିଦ୍ୟାରେ ଭାରତ ପ୍ରାରମ୍ଭିକ ନେତୃତ୍ୱ ନେବାର ଆକାଂକ୍ଷା ରଖିବା ଉଚିତ : ପ୍ରଧାନମନ୍ତ୍ରୀ

ଏକ ପୂର୍ବାନୁମାନଯୋଗ୍ୟ ଏବଂ ଉତ୍ତରଦାୟୀ ନୀତିଗତ ପରିବେଶ ପ୍ରତି ସରକାରଙ୍କ ପ୍ରତିବଦ୍ଧତାକୁ ଦୋହରାଇଲେ ପ୍ରଧାନମନ୍ତ୍ରୀ

ନୀତି ଏବଂ ପ୍ରଶାସନିକ ପଦକ୍ଷେପ ଉପରେ ପରାମର୍ଶ ସେୟାର ପାଇଁ ଶିଳ୍ପ ନେତୃବର୍ଗଙ୍କୁ ପ୍ରଧାନମନ୍ତ୍ରୀଙ୍କ ଆହ୍ବାନ

ଭାରତର ସେମିକଣ୍ଡକ୍ଟର ଇକୋସିଷ୍ଟମକୁ ସୁଦୃଢ଼ କରିବା ଲାଗି ପ୍ରଧାନମନ୍ତ୍ରୀଙ୍କ ନେତୃତ୍ୱ ଏବଂ ସରକାରଙ୍କ ନିରନ୍ତର ପ୍ରୟାସକୁ ସିଇଓମାନଙ୍କ ପ୍ରଶଂସା

ସେମିକଣ୍ଡକ୍ଟର ମୂଲ୍ୟ ଶୃଙ୍ଖଳାରେ ସାମର୍ଥ୍ୟ ନିର୍ମାଣ ପାଇଁ ଭାରତର କ୍ଷମତା ଉପରେ ସିଇଓମାନେ ଆତ୍ମବିଶ୍ୱାସ ବ୍ୟକ୍ତ କରିଥିଲେ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ସେବା ତୀର୍ଥଠାରେ ଅଗ୍ରଣୀ ସିଇଓମାନଙ୍କ ସହ ସେମିକଣ୍ଡକ୍ଟର ଗୋଲଟେବୁଲ ବୈଠକରେ ଅଧ୍ୟକ୍ଷତା କରିଛନ୍ତି।

ଏହି ବୈଠକରେ ପ୍ରଧାନମନ୍ତ୍ରୀ ଭାରତର ପ୍ରଯୁକ୍ତିବିଦ୍ୟା ଭବିଷ୍ୟତକୁ ରୂପ ଦେବାରେ ସରକାର ଏବଂ ସେମିକଣ୍ଡକ୍ଟର ଶିଳ୍ପ ମଧ୍ୟରେ ଘନିଷ୍ଠ ସହଯୋଗର ଗୁରୁତ୍ୱ ଉପରେ ଗୁରୁତ୍ୱାରୋପ କରିଥିଲେ। ସେ ଭାରତର ପ୍ରତିଭା, ପ୍ରଯୁକ୍ତିବିଦ୍ୟା ଗ୍ରହଣ ଏବଂ ଭିତ୍ତିଭୂମିର ଦୃଢ଼ ମୂଳଦୁଆ ଉପରେ ଆଲୋକପାତ କରିଥିଲେ ଏବଂ ଦକ୍ଷତା, ନବସୃଜନ ଏବଂ ଏଆଇ ଏବଂ କ୍ୱାଣ୍ଟମ କମ୍ପ୍ୟୁଟିଂ ଭଳି ଉଦୀୟମାନ ପ୍ରଯୁକ୍ତିବିଦ୍ୟାରେ ଶିଳ୍ପମାନଙ୍କର ଅଧିକ ଅଂଶଗ୍ରହଣ ପାଇଁ ଆହ୍ୱାନ କରିଥିଲେ। ଆର୍ଟିଫିସିଆଲ ଇଣ୍ଟେଲିଜେନ୍ସରେ ଏକ କୋଟି ଲୋକଙ୍କୁ ତାଲିମ ଦେବାର ଲକ୍ଷ୍ୟ ବିଷୟରେ ଉଲ୍ଲେଖ କରି ସେ କହିଥିଲେ ଯେ ଭାରତର ପ୍ରତିଭା ଭଣ୍ଡାର, ବିଶ୍ୱ ଶିଳ୍ପ ନେତୃବର୍ଗଙ୍କ ଅଭିଜ୍ଞତା ଏବଂ ସାମର୍ଥ୍ୟ ସହିତ ମିଶି ଗୁରୁତ୍ୱପୂର୍ଣ୍ଣ ସୁଯୋଗ ସୃଷ୍ଟି କରିପାରିବ।

ପ୍ରଧାନମନ୍ତ୍ରୀ କହିଥିଲେ ଯେ ଉଦୀୟମାନ ପ୍ରଯୁକ୍ତିବିଦ୍ୟାରେ ଭାରତ ପ୍ରାରମ୍ଭିକ ନେତୃତ୍ୱ ନେବାରେ ଆଗ୍ରହୀ ହେବା ଉଚିତ। ସେମିକଣ୍ଡକ୍ଟର କ୍ଷେତ୍ରରେ ଉଲ୍ଲେଖନୀୟ ଅଗ୍ରଗତି ବିଷୟରେ ଦର୍ଶାଇ ସେ କହିଥିଲେ ଯେ ଇକୋସିଷ୍ଟମ୍ ବର୍ତ୍ତମାନ ମୌଳିକ ପ୍ରୟାସରୁ ଅଧିକ ବ୍ୟାପକ ଏବଂ ସୁଯୋଗର ପର୍ଯ୍ୟାୟ ଆଡ଼କୁ ଗତି କରୁଛି।

ପ୍ରଧାନମନ୍ତ୍ରୀ ଏକ ପୂର୍ବାନୁମାନଯୋଗ୍ୟ ଏବଂ ଉତ୍ତରଦାୟୀ ନୀତି ପରିବେଶ ପ୍ରତି ସରକାରଙ୍କ ପ୍ରତିବଦ୍ଧତାକୁ ଦୋହରାଇଥିଲେ ଏବଂ ବୈଷୟିକ ପ୍ରଗତି ଏବଂ ଶିଳ୍ପ ଆବଶ୍ୟକତା ଅନୁଯାୟୀ ନୀତି ବିକଶିତ ହେବା ଉପରେ ଗୁରୁତ୍ୱାରୋପ କରିଥିଲେ। ସେ ଶିଳ୍ପପତିମାନଙ୍କୁ ନୀତିଗତ ଏବଂ ପ୍ରଶାସନିକ ପଦକ୍ଷେପ ଉପରେ ପରାମର୍ଶ ସେୟାର କରିବା ପାଇଁ ନିମନ୍ତ୍ରଣ କରିଥିଲେ ଏବଂ ସେମାନଙ୍କୁ ଆଶ୍ୱାସନା ଦେଇଥିଲେ ଯେ ଏହି କ୍ଷେତ୍ରକୁ ଆହୁରି ମଜବୁତ କରିବା ପାଇଁ ସେମାନଙ୍କ ମତାମତ ଉପରେ ବିଚାର କରାଯିବ। ଭାରତର ସେମିକଣ୍ଡକ୍ଟର ଅଭିବୃଦ୍ଧିର ପରବର୍ତ୍ତୀ ପର୍ଯ୍ୟାୟରେ ସକ୍ରିୟ ଭାବେ ଅଂଶଗ୍ରହଣ କରିବା ଲାଗି ସେ ଉଦ୍ୟୋଗ ଜଗତର ନେତୃବର୍ଗଙ୍କୁ ପ୍ରୋତ୍ସାହିତ କରିଥିଲେ।

ଉତ୍ପାଦନ, ଡିଜାଇନ, ଭିତ୍ତିଭୂମି ଏବଂ ପ୍ରତିଭା ବିକାଶ କ୍ଷେତ୍ରରେ ହୋଇଥିବା ଅଗ୍ରଗତିକୁ ଉଲ୍ଲେଖ କରି ଭାରତର ସେମିକଣ୍ଡକ୍ଟର ସାମର୍ଥ୍ୟ ବିକାଶ ପାଇଁ ସରକାରଙ୍କ ନିରନ୍ତର ପ୍ରୟାସକୁ ସିଇଓମାନେ ପ୍ରଶଂସା କରିଥିଲେ। ଆଇଏସଏମ ୨.୦ ଅଧୀନରେ ସୃଷ୍ଟି ହେଉଥିବା ସୁଯୋଗ ଏବଂ ଉତ୍ପାଦନ, ଗବେଷଣା ଓ ବିକାଶ, ଉନ୍ନତ ପ୍ରଯୁକ୍ତିବିଦ୍ୟା ଏବଂ ସହାୟକ ଶିଳ୍ପ ସମେତ ସେମିକଣ୍ଡକ୍ଟର ମୂଲ୍ୟ ଶୃଙ୍ଖଳାରେ ଦକ୍ଷତା ନିର୍ମାଣ କରିବାର ଭାରତର କ୍ଷମତା ଉପରେ ସେମାନେ ଆତ୍ମବିଶ୍ୱାସ ବ୍ୟକ୍ତ କରିଥିଲେ।

ପ୍ରଧାନମନ୍ତ୍ରୀଙ୍କ ନେତୃତ୍ୱ ଏବଂ ସହଯୋଗକୁ ପ୍ରଶଂସା କରି ସେମାନେ କହିଥିଲେ ଯେ ବିଗତ ବର୍ଷଗୁଡ଼ିକରେ ହାସଲ କରାଯାଇଥିବା ପ୍ରଗତି ଶିଳ୍ପ କ୍ଷେତ୍ରରେ ଅଧିକ ଅଂଶଗ୍ରହଣ ପାଇଁ ଏକ ସୁଦୃଢ଼ ମୂଳଦୁଆ ସୃଷ୍ଟି କରିଛି। ବିଶ୍ୱସ୍ତରୀୟ ପ୍ରତିଦ୍ୱନ୍ଦ୍ୱିତାମୂଳକ ସେମିକଣ୍ଡକ୍ଟର ଏବଂ ଟେକ୍ନୋଲୋଜି ହବ୍ ଭାବେ ଭାରତର ଉତ୍ଥାନରେ ଯୋଗଦାନ ଦେବା ଲାଗି ସେମାନେ ନିଜର ପ୍ରତିବଦ୍ଧତା ବ୍ୟକ୍ତ କରିଥିଲେ।

ଏହି ବୈଠକରେ ସେମି, ମାଇକ୍ରନ୍, ଇନଫିନିଅନ୍, ଆପ୍ଲାଏଡ୍ ମ୍ୟାଟେରିଆଲ୍ସ, ଏଏସ୍ଏମ୍ଏଲ୍, ମର୍କ, ଟୋକିଓ ଇଲେକ୍ଟ୍ରନ୍ ଲିମିଟେଡ୍, ଫୁଜିଫିଲ୍ମ, ଏଏମଡି, ଇଣ୍ଟେଲ୍, ଟାଟା ଇଲେକ୍ଟ୍ରୋନିକ୍ସ, ଲାମ୍ ରିସର୍ଚ୍ଚ, ରାପିଡସ୍, ଏନ୍ଏକ୍ସପି, ଫକ୍ସକନ୍, ସେମି କଣ୍ଡକ୍ଟର ଡିଭାଇସ୍, ଆଡଭାଣ୍ଟେଷ୍ଟ୍, ସେଲେଷ୍ଟା କ୍ୟାପିଟାଲ୍, ସିଜି ପାୱାର୍, ଆଇବିଏମ୍ ରିସର୍ଚ୍ଚ ସମେତ ବିଭିନ୍ନ ସଂସ୍ଥାର ସିଇଓ, ମୁଖ୍ୟ ଏବଂ ପ୍ରତିନିଧିମାନେ ଯୋଗ ଦେଇଥିଲେ।

HS