କର୍ମଚାରୀ ଭବିଷ୍ୟନିଧି ପାଣ୍ଠି (ଇପିଏଫ୍) ଯୋଜନା ୨୦୨୬ ଅନ୍ତର୍ଗତ ଏକ ପରିବର୍ତ୍ତନଶୀଳ ପଦକ୍ଷେପ ଭାବରେ ସର୍ବକ୍ଷମା ବ୍ୟବସ୍ଥା ପ୍ରଚଳନ କରାଯାଇଛି। ଏହା ସମ୍ପର୍କରେ ୨୯.୦୬.୨୦୨୬ ରେ ବିଜ୍ଞପ୍ତି ଜାରି ହୋଇଥିଲା। ଏହି ବ୍ୟବସ୍ଥାଗୁଡ଼ିକ ଆୟକର ଆଇନ, ୧୯୬୧ (୧୯୬୧ ର ଧାରା ୪୩) ଅନୁଯାୟୀ ସ୍ୱୀକୃତିପ୍ରାପ୍ତ ଭବିଷ୍ୟନିଧି ପାଣ୍ଠି (ପିଏଫ୍) ଟ୍ରଷ୍ଟଗୁଡ଼ିକର 'ଛାଡ' ସ୍ଥିତିକୁ ନିୟମିତ କରିବା ପାଇଁ ଏକକାଳୀନ ସୁଯୋଗ ପ୍ରଦାନ କରେ। କିନ୍ତୁ କର୍ମଚାରୀ ଭବିଷ୍ୟନିଧି ପାଣ୍ଠି ଏବଂ ବିବିଧ ବ୍ୟବସ୍ଥା (ଇପିଏଫ୍ ଆଣ୍ଡ ଏମପି) ଆଇନ, ୧୯୫୨ ର ଧାରା ୧୭ , କିମ୍ବା ସାମାଜିକ ସୁରକ୍ଷା ସଂହିତା (ସିଓଏସଏସ୍), ୨୦୨୦ ର ଧାରା ୧୪୩ ଅନୁଯାୟୀ କୌଣସି ଆନୁଷ୍ଠାନିକ ଛାଡ଼ ଆଦେଶ ନାହିଁ।

ଆବେଦନ ପଦ୍ଧତି, ପ୍ରକ୍ରିୟାଗତ ଆବଶ୍ୟକତା ଇତ୍ୟାଦିକୁ ଅନ୍ତର୍ଭୁକ୍ତ କରି ସର୍ବକ୍ଷମା ପାଇଁ କାର୍ଯ୍ୟକ୍ଷମ ନିର୍ଦ୍ଦେଶାବଳୀ ୧୧.୦୭.୨୦୨୬ ରେ ଏକ ବିସ୍ତୃତ ସର୍କୁଲାର ମାଧ୍ୟମରେ ଜାରି କରାଯାଇଥିଲା। ଏହି କ୍ଷମା ବ୍ୟବସ୍ଥା ବିଜ୍ଞପ୍ତି ତାରିଖରୁ ଛଅ ମାସ ପାଇଁ, ଅର୍ଥାତ୍ ୨୮.୧୨.୨୦୨୬ ତାରିଖ ପର୍ଯ୍ୟନ୍ତ ବୈଧ ରହିବ। ଛାଡ଼ପ୍ରାପ୍ତ ସ୍ଥିତିର ପୂର୍ବବର୍ତ୍ତୀ ନିୟମିତକରଣ ବ୍ୟତୀତ, ପିଏଫ୍ ଟ୍ରଷ୍ଟଗୁଡ଼ିକୁ ମିଳୁଥିବା ଅନ୍ୟାନ୍ୟ ପ୍ରମୁଖ ଲାଭ ମଧ୍ୟରେ ସର୍ବନିମ୍ନ କର୍ମଚାରୀଙ୍କ ସଂଖ୍ୟା, ପାଣ୍ଠି ଆକାର ଏବଂ ସିଓଏସଏସ୍, ୨୦୨୦ ଅଧୀନରେ ଥିବା ୩ - ବର୍ଷିଆ ଅନୁପାଳନ ନିୟମ ଭଳି କିଛି ଆବଶ୍ୟକତାର ଛାଡ଼ ଅନ୍ତର୍ଭୁକ୍ତ। ପୂର୍ବବର୍ତ୍ତୀ ନିୟମିତକରଣ ପରେ, ଏକ ପ୍ରତିଷ୍ଠାନ 'ଛାଡ଼ପ୍ରାପ୍ତ' କିମ୍ବା 'ଅଣ-ଛାଡ଼ପ୍ରାପ୍ତ' ପ୍ରତିଷ୍ଠାନ ଭାବରେ ନିୟମାବଳୀ ପାଳନ କରିବାକୁ ବାଛିପାରେ।

କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ (ଇପିଏଫ୍ଓ) ସମ୍ଭାବ୍ୟ ଆବେଦନକାରୀମାନେ ସାଧାରଣ କ୍ଷମା ବ୍ୟବସ୍ଥା ବିଷୟରେ ଭଲ ଭାବରେ ଅବଗତ ହେବା ଏବଂ ଏହାର କ୍ଷେତ୍ର କାର୍ଯ୍ୟାଳୟ ମାଧ୍ୟମରେ ସମ୍ପୂର୍ଣ ପ୍ରକ୍ରିୟାରେ ଉପଯୁକ୍ତ ମାର୍ଗଦର୍ଶନ ପାଇବାକୁ ନିଶ୍ଚିତ କରିବା ପାଇଁ ସମନ୍ୱିତ ପ୍ରୟାସ କରୁଛି । ଏକ ପ୍ରସାର ଅଭିଯାନର ଅଂଶ ଭାବରେ, ବିଭିନ୍ନ ଅଂଶୀଦାରଙ୍କ ସହିତ ପାରସ୍ପରିକ କାର୍ଯ୍ୟକଳାପ କ୍ରମାଗତ ଚାଲିଛି। ଇପିଏଫ୍ଓ ଭାରତୀୟ ଚାର୍ଟାର୍ଡ ଆକାଉଣ୍ଟାଣ୍ଟ ସଂସ୍ଥା (ଆଇସିଏଆଇ) ଭଳି ପେଶାଦାର ସଂସ୍ଥା ସହିତ ଜଡିତ ହୋଇଛି, ଯାହାର ସଦସ୍ୟମାନେ (ଚାର୍ଟର୍ଡ ଆକାଉଣ୍ଟାଣ୍ଟ) ଅନେକ ପ୍ରତିଷ୍ଠାନ ପାଇଁ ବୈଧାନିକ କିମ୍ବା ଆୟକର ଅଡିଟ୍ କରନ୍ତି। ଅନେକ କ୍ଷେତ୍ରରେ, ଏହି ପ୍ରତିଷ୍ଠାନଗୁଡ଼ିକ ପିଏଫ୍ ଟ୍ରଷ୍ଟ ପ୍ରତିଷ୍ଠା କରିଛନ୍ତି ଏବଂ ସାଧାରଣ କ୍ଷମା ଯୋଜନାରୁ ଲାଭ ପାଇପାରୁଥିବା ଟ୍ରଷ୍ଟଗୁଡ଼ିକୁ ଚିହ୍ନଟ କରିବା ପାଇଁ ଭଲ ସ୍ଥିତିରେ ଅଛନ୍ତି। ପିଏଫ୍ ଟ୍ରଷ୍ଟଗୁଡ଼ିକରୁ ସକାରାତ୍ମକ ପ୍ରତିକ୍ରିୟା ପାଇବା ପାଇଁ ଆଇସିଏଆଇକୁ ଏହାର ସଦସ୍ୟମାନଙ୍କ ମଧ୍ୟରେ କ୍ଷମା ବ୍ୟବସ୍ଥା ସମ୍ପର୍କରେ ସୂଚନା ପ୍ରସାର କରିବାକୁ ଅନୁରୋଧ କରାଯାଇଛି। ଏହା ସହିତ, ଉତ୍ତର ପ୍ରଦେଶ ଏବଂ କୋଲକାତାର ଜୋନାଲ ଅଫିସ୍ ଭଳି ଇପିଏଫ୍ଓ କ୍ଷେତ୍ର କାର୍ଯ୍ୟାଳୟଗୁଡ଼ିକ ଅଂଶୀଦାରମାନଙ୍କ ସହିତ ସେମିନାର ଏବଂ କର୍ମଶାଳା ଆୟୋଜନ କରିଛନ୍ତି।

ଏହା ବ୍ୟତୀତ, ଇପିଏଫ୍ଓ ଆୟକର ଆଇନ ଅନୁଯାୟୀ ସ୍ୱୀକୃତିପ୍ରାପ୍ତ ପିଏଫ୍ ଟ୍ରଷ୍ଟଗୁଡ଼ିକ ସମ୍ପର୍କରେ ସୂଚନା ପାଇବା ପାଇଁ ଆୟକର ବିଭାଗ ସହିତ ଯୋଗାଯୋଗ କରିଛି। ଏହା ମଧ୍ୟ ଅନୁରୋଧ କରିଛି ଯେ, ଆୟକର ଆଇନ ଅନୁଯାୟୀ ସ୍ୱୀକୃତି ପ୍ରଦାନ କରିବା ପୂର୍ବରୁ, ବିଭାଗ ଇପିଏଫ୍ ଆଣ୍ଡ ଏମପି ଆଇନ, ୧୯୫୨, କିମ୍ବା ସିଓଏସଏସ୍, ୨୦୨୦ ଅନୁଯାୟୀ ଏକ ପ୍ରତିଷ୍ଠାନର କଭରେଜ୍ ଏବଂ ଛାଡ଼ ସ୍ଥିତି ଯାଞ୍ଚ କରନ୍ତୁ। ଏହା ସହିତ, ଯେଉଁ ପିଏଫ୍ ଟ୍ରଷ୍ଟଗୁଡ଼ିକର ଇପିଏଫ୍ଓ ଠାରୁ ଆନୁଷ୍ଠାନିକ ଛାଡ଼ ଆଦେଶ ନାହିଁ, ସେମାନଙ୍କର ବିଦ୍ୟମାନ ମାନ୍ୟତା ପ୍ରତ୍ୟାହାର କରିବା ପାଇଁ ପ୍ରକ୍ରିୟା ଆରମ୍ଭ କରିବାକୁ ଇପିଏଫ୍ଓ ଅନୁରୋଧ କରିଛି।

ସଂସ୍ଥାଗୁଡ଼ିକ ସହିତ ଜଡିତ ପିଏଫ୍ ଟ୍ରଷ୍ଟଗୁଡ଼ିକ ୧୧.୦୭.୨୦୨୬ ତାରିଖର ଇପିଏଫ୍ଓ ସର୍କୁଲାରରେ ଉଲ୍ଲେଖିତ ବିବରଣୀ ଅନୁସାରେ (ଇପିଏଫ୍ଓ ୱେବସାଇଟ୍ : https://www.epfo.gov.in) ରେ ଉପଲବ୍ଧ ସାଧାରଣ କ୍ଷମା ଯୋଜନା ପାଇଁ ଆବେଦନ କରିପାରିବେ।

****

SSP