ভাৰতৰ ৰাষ্ট্ৰপতি শ্ৰীমতী দ্ৰৌপদী মুৰ্মুৱে, যিগৰাকী নেচনেল ইনষ্টিটিউট অৱ ফেশ্বন টেকন'লজী (NIFT/নিফ্ট)-ৰ আনুষ্ঠানিক পৰিদৰ্শক (Visitor), ২০২৬ চনৰ ৩১ আগষ্টত নতুন দিল্লীত অনুষ্ঠিত হ'বলগীয়া নিফ্টৰ সন্মিলিত সমাৱৰ্তন ২০২৬-ত মুখ্য অতিথি হিচাপে উপস্থিত থাকিব, য'ত সমগ্ৰ দেশৰ ১৮ খন নিফ্ট চৌহদৰ পৰা উত্তীৰ্ণ হোৱা শিক্ষাৰ্থীসকলে তেওঁলোকৰ ডিগ্ৰী প্ৰদান উদযাপন কৰিবলৈ আৰু প্ৰতিষ্ঠানটোত তেওঁলোকৰ শৈক্ষিক যাত্ৰাৰ সামৰণি চিহ্নিত কৰিবলৈ একত্ৰিত হ'ব। এই অনুষ্ঠানে উত্তীৰ্ণ শিক্ষাৰ্থীসকলৰ শৈক্ষিক উৎকৰ্ষ, সৃষ্টিশীলতা, নিষ্ঠা আৰু সাফল্যকো স্বীকৃতি প্ৰদান কৰিব।

এই অনুষ্ঠানত কেন্দ্ৰীয় বস্ত্ৰ মন্ত্ৰী শ্ৰী গিৰিৰাজ সিঙৰ লগতে অন্যান্য বিশিষ্ট গণ্যমান্য ব্যক্তি, পৰিচালনা সমিতিৰ (Board of Governors) সদস্য, জ্যেষ্ঠ বিষয়া, অধ্যাপক-অধ্যাপিকা, গৱেষক আৰু উত্তীৰ্ণ শিক্ষাৰ্থীসকলো উপস্থিত থাকিব।

এই সমাৱৰ্তনে নিফ্টৰ পৰা উত্তীৰ্ণ হোৱা শিক্ষাৰ্থীসকলৰ সাফল্য উদযাপন কৰিব আৰু প্ৰতিষ্ঠানটোত তেওঁলোকৰ অধ্যয়নকালৰ শৈক্ষিক উৎকৰ্ষ, সৃষ্টিশীলতা, নিষ্ঠা আৰু অৱদানক স্বীকৃতি প্ৰদান কৰিব। এই অনুষ্ঠানত সকলো চৌহদ সামৰি প্ৰতিটো পাঠ্যক্ৰমৰ সৰ্বোচ্চ চি জি পি এ (CGPA) লাভ কৰা উৎকৃষ্ট শিক্ষাৰ্থীসকলক সোণৰ পদকেৰে সন্মানিত কৰা হ'ব।

সন্মিলিত সমাৱৰ্তনৰ পাছত চৌহদভিত্তিক ডিগ্ৰী বিতৰণ অনুষ্ঠান অনুষ্ঠিত হ'ব, য'ত উত্তীৰ্ণ শিক্ষাৰ্থীসকলে আনুষ্ঠানিকভাৱে তেওঁলোকৰ ডিগ্ৰী গ্ৰহণ কৰিব আৰু শৈক্ষিক জীৱনৰ পৰা পেছাদাৰী জগতখনলৈ তেওঁলোকৰ পৰিৱৰ্তন চিহ্নিত কৰিব।

ভাৰত চৰকাৰৰ বস্ত্ৰ মন্ত্ৰালয়ৰ অধীনত ১৯৮৬ চনত স্থাপিত, নেচনেল ইনষ্টিটিউট অৱ ফেশ্বন টেকন'লজী (NIFT/নিফ্ট) হৈছে নিফ্ট আইন, ২০০৬-ৰ দ্বাৰা পৰিচালিত এক বিধিবদ্ধ প্ৰতিষ্ঠান। বছৰ বছৰ ধৰি, পৰম্পৰাগত কলা আৰু শিল্প, শৈক্ষিক জ্ঞান, ডিজাইনৰ উদ্ভাৱন, প্ৰযুক্তি, সৃষ্টিশীল চিন্তা আৰু উদ্যোগৰ অংশগ্ৰহণক একত্ৰিত কৰি ফেশ্বন শিক্ষাৰ বাবে এক আগশাৰীৰ প্ৰতিষ্ঠান হিচাপে প্ৰতিষ্ঠানটোৱে আত্মপ্ৰকাশ কৰিছে।

সমগ্ৰ দেশতে ২০ খন পেছাদাৰীভাৱে পৰিচালিত চৌহদৰ সৈতে, নিফ্টে এক সৰ্বাংগীন আৰু গতিশীল শিক্ষণ পৰিৱেশ গঢ়ি তোলাৰ প্ৰয়াস অব্যাহত ৰাখিছে, যুৱ প্ৰতিভাক জ্ঞান, দক্ষতা আৰু সৃষ্টিশীল সামৰ্থ্যৰে সজ্জিত কৰি ভাৰতৰ ফেশ্বন আৰু সৃষ্টিশীল উদ্যোগলৈ অৱদান আগবঢ়াবলৈ সাজু কৰি তুলিছে।

সন্মিলিত সমাৱৰ্তন ২০২৬ এনে এটা প্ৰজন্মক উদযাপন কৰাৰ মুহূৰ্ত হ'ব, যিয়ে ধাৰণাক সম্ভাৱনালৈ আৰু সৃষ্টিশীলতাক প্ৰভাৱলৈ ৰূপান্তৰিত কৰিবলৈ শিকিছে। স্নাতকসকলে প্ৰতিষ্ঠানটোৰ বাহিৰলৈ খোজ পেলোৱাৰ লগে লগে, তেওঁলোকে নতুন আখ্যান গঢ় দিয়াৰ, অৰ্থপূৰ্ণ সমাধান সৃষ্টি কৰাৰ আৰু ভাৰতৰ বিকশিত সৃষ্টিশীল দৃশ্যপটত অৱদান আগবঢ়োৱাৰ আত্মবিশ্বাস কঢ়িয়াই লৈ যাব। নিফ্টত তেওঁলোকৰ যাত্ৰা হয়তো আনুষ্ঠানিক সামৰণিত উপনীত হৈছে, কিন্তু তেওঁলোকৰ কল্পনা, উদ্ভাৱন আৰু উৎকৰ্ষৰ যাত্ৰা এতিয়াহে আৰম্ভ হৈছে।

সেয়েহে এই অনুষ্ঠানটোৱে সফলতাৰ উদযাপন আৰু ভৱিষ্যতৰ বাবে এক আৰম্ভণি মঞ্চ— দুয়োটা হিচাপে থিয় দিব— এখন নৱ ভাৰতৰ ফেশ্বন, ডিজাইন আৰু সৃষ্টিশীল পৰিৱেশ তন্ত্ৰ গঢ় দিয়াৰ ক্ষেত্ৰত তেওঁলোকে পালন কৰিবলগীয়া ভূমিকাৰ প্ৰতি লক্ষ্য ৰাখি উত্তীৰ্ণ শিক্ষাৰ্থীসকলৰ সাফল্যক সন্মান জনাব। তেওঁলোকৰ প্ৰতিভা, উদ্যোগ আৰু দৃষ্টিভংগীৰ মাজতেই নিহিত হৈ আছে এখন অধিক সৃষ্টিশীল, উদ্ভাৱনীমূলক আৰু বিশ্বজুৰি সংযুক্ত বিকশিত ভাৰতৰ প্ৰতিশ্ৰুতি।

নিফ্টৰ সৃষ্টিশীলতা আৰু উৎকৰ্ষৰ মনোভাৱৰ সৈতে গভীৰভাৱে সংযুক্ত হৈ, উত্তীৰ্ণ শিক্ষাৰ্থীৰ দলটো ভাৰতৰ ফেশ্বন আৰু সৃষ্টিশীল খণ্ডত নতুন আখ্যান গঢ় দিবলৈ সাজু হৈছে। প্ৰতিষ্ঠানটোত তেওঁলোকৰ যাত্ৰাৰ সামৰণি পৰিছে, কিন্তু তেওঁলোকৰ উদ্ভাৱন আৰু প্ৰভাৱৰ যাত্ৰাৰ আৰম্ভণিহে হৈছে।

***

MAM/VN/RD