രാഷ്ട്രപതിയും നാഷണൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്നോളജിയുടെ (NIFT) ഔദ്യോഗിക വിസിറ്ററുമായ ശ്രീമതി ദ്രൗപദി മുർമു, 2026 ഓഗസ്റ്റ് 31-ന് ന്യൂഡൽഹിയിൽ നടക്കുന്ന NIFT-യുടെ 2026-ലെ സംയുക്ത ബിരുദദാന ചടങ്ങിൽ മുഖ്യാതിഥിയായി പങ്കെടുക്കും. രാജ്യത്തെ 18 NIFT ക്യാമ്പസുകളിൽ നിന്നുള്ള ബിരുദം നേടുന്ന വിദ്യാർത്ഥികൾ ഈ ചടങ്ങിൽ ഒത്തുചേർന്ന് അവരുടെ ബിരുദദാനം ആഘോഷിക്കുകയും
സ്ഥാപനത്തിലെ അവരുടെ അക്കാദമിക യാത്രയുടെ പരിസമാപ്തി കുറിക്കുകയും ചെയ്യും. ബിരുദം നേടുന്ന വിദ്യാർത്ഥികളുടെ അക്കാദമിക മികവ്, സർഗ്ഗാത്മകത, അർപ്പണബോധം, നേട്ടങ്ങൾ എന്നിവയും ചടങ്ങിൽ അംഗീകരിക്കും.

കേന്ദ്ര ടെക്സ്റ്റൈൽസ് മന്ത്രി ശ്രീ ഗിരിരാജ് സിംഗ് ചടങ്ങിൽ സന്നിഹിതനാകും.  മറ്റ് വിശിഷ്ട വ്യക്തികൾ, ഭരണസമിതി അംഗങ്ങൾ, മുതിർന്ന ഉദ്യോഗസ്ഥർ, അധ്യാപകർ, ഗവേഷകർ, ബിരുദം നേടുന്ന വിദ്യാർത്ഥികൾ എന്നിവരും പരിപാടിയിൽ പങ്കെടുക്കും.

NIFT-യിൽ നിന്ന് ബിരുദം നേടുന്ന വിദ്യാർത്ഥികളുടെ നേട്ടങ്ങൾ ആഘോഷിക്കുന്ന ബിരുദദാന ചടങ്ങിൽ, സ്ഥാപനത്തിലെ പഠനകാലയളവിൽ അവർ കൈവരിച്ച അക്കാദമിക മികവ്, സർഗ്ഗാത്മകത, അർപ്പണബോധം, സംഭാവനകൾ എന്നിവയും അംഗീകരിക്കും. വിവിധ ക്യാമ്പസുകളിലെ ഓരോ കോഴ്‌സിലും ഏറ്റവും ഉയർന്ന സി.ജി.പി.എ. നേടി മികച്ച വിജയം കൈവരിച്ച വിദ്യാർത്ഥികളെ ചടങ്ങിൽ സ്വർണ്ണമെഡൽ നൽകി ആദരിക്കും.

സംയുക്ത ബിരുദദാന ചടങ്ങിനെത്തുടർന്ന് ക്യാമ്പസ് തിരിച്ചുള്ള ബിരുദ വിതരണ ചടങ്ങുകൾ നടക്കും. ബിരുദം നേടുന്ന വിദ്യാർത്ഥികൾ ഔദ്യോഗികമായി അവരുടെ ബിരുദങ്ങൾ ഏറ്റുവാങ്ങുകയും അക്കാദമിക ജീവിതത്തിൽ നിന്ന് പ്രൊഫഷണൽ ലോകത്തേക്കുള്ള അവരുടെ മാറ്റത്തിന് തുടക്കം കുറിക്കുകയും ചെയ്യും.

കേന്ദ്ര ടെക്സ്റ്റൈൽസ് മന്ത്രാലയത്തിന് കീഴിൽ 1986-ൽ സ്ഥാപിതമായ നാഷണൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്നോളജി (NIFT), 2006-ലെ NIFT നിയമപ്രകാരം പ്രവർത്തിക്കുന്ന ഒരു നിയമാനുസൃത സ്ഥാപനമാണ്. പരമ്പരാഗത കലകളും കരകൗശലവിദ്യകളും അക്കാദമിക അറിവ്, ഡിസൈൻ നൂതനാശയങ്ങൾ, സാങ്കേതികവിദ്യ, സർഗ്ഗാത്മക ചിന്ത, വ്യവസായ മേഖലയുമായുള്ള പങ്കാളിത്തം എന്നിവയുമായി സംയോജിപ്പിച്ചുകൊണ്ട് വർഷങ്ങളായി ഫാഷൻ വിദ്യാഭ്യാസ രംഗത്തെ മുൻനിര സ്ഥാപനമായി NIFT ഉയർന്നുവന്നിട്ടുണ്ട്.

രാജ്യത്തുടനീളം പ്രൊഫഷണലായി പരിപാലിക്കപ്പെടുന്ന 20 ക്യാമ്പസുകളുമായി, സമഗ്രവും ചലനാത്മകവുമായ പഠനാന്തരീക്ഷം ഒരുക്കിക്കൊണ്ട് NIFT മുന്നേറുകയാണ്. ഇന്ത്യയുടെ ഫാഷൻ, സർഗ്ഗാത്മക വ്യവസായ മേഖലകളിലേക്ക് സംഭാവന നൽകാൻ യുവപ്രതിഭകളെ ആവശ്യമായ അറിവും വൈദഗ്ധ്യവും സർഗ്ഗാത്മക ശേഷികളും നൽകി സജ്ജരാക്കുകയാണ് ഈ സ്ഥാപനം.

ആശയങ്ങളെ സാധ്യതകളാക്കി മാറ്റാനും സർഗ്ഗാത്മകതയെ സ്വാധീനമായി മാറ്റാനും പഠിച്ച ഒരു തലമുറയെ ആഘോഷിക്കുന്ന നിമിഷമായിരിക്കും 2026-ലെ സംയുക്ത ബിരുദദാന ചടങ്ങ്. സ്ഥാപനത്തിൽ നിന്ന്   പടിയിറങ്ങുന്ന ഈ ബിരുദധാരികൾ പുതിയ ആഖ്യാനങ്ങൾക്ക് രൂപം നൽകാനും അർത്ഥവത്തായ  പരിഹാരങ്ങൾ കണ്ടെത്താനും ഇന്ത്യയുടെ വളർന്നുവരുന്ന സർഗ്ഗാത്മക മേഖലയ്ക്ക് സംഭാവന നൽകാനുമുള്ള ആത്മവിശ്വാസവുമായാണ് മുന്നോട്ട് പോകുന്നത്. NIFT-ലെ അവരുടെ യാത്ര ഔദ്യോഗികമായി ഇവിടെ പൂർത്തിയാകുകയാണെങ്കിലും ഭാവനയുടെയും നൂതനാശയങ്ങളുടെയും മികവിൻ്റെയും പുതിയൊരു യാത്രയ്ക്ക് ഇവിടെ തുടക്കമാകുകയാണ്.

അതിനാൽ, ഈ ചടങ്ങ് ബിരുദം നേടുന്ന വിദ്യാർത്ഥികളുടെ നേട്ടങ്ങളെ ആദരിക്കുന്നതോടൊപ്പം, പുതിയ ഇന്ത്യയുടെ ഫാഷൻ, ഡിസൈൻ, സർഗ്ഗാത്മക ആവാസവ്യവസ്ഥയെ രൂപപ്പെടുത്തുന്നതിൽ അവർ വഹിക്കാൻ പോകുന്ന പങ്കിലേക്കുള്ള ചുവടുവെപ്പിനുള്ള ഒരു വേദി കൂടിയായിരിക്കും. അവരുടെ പ്രതിഭയിലും സംരംഭകത്വത്തിലും ദർശനത്തിലുമാണ് കൂടുതൽ സർഗ്ഗാത്മകവും നൂതനവും ആഗോളതലത്തിൽ ബന്ധിപ്പിക്കപ്പെട്ടതുമായ ഒരു വികസിത ഇന്ത്യ  എന്ന ലക്ഷ്യത്തിനായുള്ള പ്രതീക്ഷ നിലകൊള്ളുന്നത്.

സർഗ്ഗാത്മകതയുടെയും മികവിൻ്റെയും പാരമ്പര്യത്തിൽ വേരൂന്നിയ NIFT-യുടെ ഈ ബിരുദ ബാച്ച്, ഇന്ത്യയുടെ ഫാഷൻ, സർഗ്ഗാത്മക മേഖലകളിൽ പുതിയ ആഖ്യാനങ്ങൾക്ക് രൂപം നൽകാൻ സജ്ജമാണ്. സ്ഥാപനത്തിലെ അവരുടെ യാത്ര ഇവിടെ അവസാനിക്കുകയാണെങ്കിലും, നൂതനാശയങ്ങളുടെയും ഗുണപരമായ മാറ്റങ്ങൾ കൊണ്ടുവരുന്നതിൻ്റെയും പുതിയൊരു ഘട്ടം ഇവിടെ ആരംഭിക്കുകയാണ്.

***