ആദരണീയനും എന്റെ സുഹൃത്തുമായ പ്രസിഡന്റ്,

ഇരുരാജ്യങ്ങളിലെയും പ്രതിനിധികളേ,

മാധ്യമ സുഹൃത്തുക്കളേ,

നമസ്‌കാരം!

താഷ്‌കൻ്റിൽ എനിക്കും എൻ്റെ പ്രതിനിധി സംഘത്തിനും നൽകിയ ഊഷ്‌മളവും ഹൃദ്യവുമായ സ്വീകരണത്തിന് ഉസ്‌ബെക്കിസ്ഥാനിലെ പ്രസിഡൻ്റിനോടും ജനങ്ങളോടും ഞാൻ ആത്മാർത്ഥമായി നന്ദി പറയുന്നു.

ഇത് എൻ്റെ നാലാമത്തെ ഉസ്ബെക്കിസ്ഥാൻ സന്ദർശനമാണ്. അത് നമ്മുടെ ബന്ധങ്ങളുടെ അടുപ്പം, നമ്മുടെ അടുത്ത ഏകോപനം, നമ്മുടെ ആഴത്തിലുള്ള സൗഹൃദം എന്നിവയെ പ്രതിഫലിപ്പിക്കുന്നു.

ഒരു ദശാബ്ദത്തോളമായി പ്രസിഡൻ്റിനൊപ്പം പ്രവർത്തിക്കാനുള്ള അവസരം എനിക്ക് ലഭിച്ചിട്ടുണ്ട്. ഇക്കാലയളവിൽ പത്തിലധികം തവണ അദ്ദേഹത്തെ കാണാൻ അവസരം ലഭിച്ചിട്ടുണ്ട്.

അദ്ദേഹത്തിന്റെ ശുഭാത്മക ചിന്തയും ഭാവിയിലേക്കുള്ള കാഴ്ചപ്പാടും തുടർച്ചയായ പഠന മനോഭാവവും ശരിക്കും പ്രചോദനം നൽകുന്നതാണ്. ഇന്ത്യയോടുള്ള അദ്ദേഹത്തിന്റെ ആഴത്തിലുള്ള സൗഹൃദത്തിനും നമ്മുടെ ബന്ധത്തോടുള്ള അദ്ദേഹത്തിന്റെ അചഞ്ചലമായ പ്രതിബദ്ധതയ്ക്കും ഞാൻ അദ്ദേഹത്തെ ആത്മാർത്ഥമായി പ്രശംസിക്കുന്നു.

സുഹൃത്തുക്കളേ,

ഉസ്ബെക്കിസ്ഥാൻ മധ്യേഷ്യയുടെ ഹൃദയഭാഗത്തും ഈ മേഖലയുമായുള്ള ഇന്ത്യയുടെ ഇടപെടലിന്റെ കേന്ദ്രത്തിലുമാണ്. ഇന്ത്യയും ഉസ്ബെക്കിസ്ഥാനും കാഴ്ചപ്പാടുകളുടെയും അഭിലാഷങ്ങളുടെയും ആഴത്തിലുള്ള സംയോജനം പങ്കിടുന്നു. "യാംഗി ഉസ്ബെക്കിസ്ഥാൻ", "വികസിത് ഭാരത് 2047" എന്നിവയുടെ കാതൽ നമ്മുടെ യുവത്വം, നവീനാശയം, എല്ലാവരെയും ഉൾക്കൊള്ളുന്ന വളർച്ച, ആധുനിക സാങ്കേതികവിദ്യ എന്നിവയാണ്. ഈ പങ്കിട്ട ദർശനത്താൽ നയിക്കപ്പെടുന്ന ഞങ്ങൾ ഇരു രാജ്യങ്ങളിലെയും ജനങ്ങളുടെ ക്ഷേമത്തിനും സമൃദ്ധിക്കും വേണ്ടി പ്രവർത്തിക്കുന്നു.

ഈ വർഷം നമ്മുടെ തന്ത്രപരമായ പങ്കാളിത്തത്തിന്റെ 15-ാം വാർഷികമാണ്. ഈ പ്രത്യേക അവസരത്തിൽ, നമ്മുടെ ബന്ധത്തെ സമഗ്രമായ ഒരു തന്ത്രപ്രധാന പങ്കാളിത്തത്തിന്റെ തലത്തിലേക്ക് ഉയർത്താൻ ഞങ്ങൾ തീരുമാനിച്ചു.

ഇന്ന് ഈ പുതിയ ചട്ടക്കൂടിൽ നമ്മുടെ പങ്കാളിത്തം കൂടുതൽ വർദ്ധിപ്പിക്കാനും വ്യക്തമായ ഫലങ്ങളോടെ മുന്നോട്ട് കൊണ്ടുപോകുകയും ചെയ്യുന്നതിനുള്ള ഒരു അഭിലാഷകരമായ അജണ്ട ഞങ്ങൾ തയ്യാറാക്കിയിട്ടുണ്ട്.

നമ്മുടെ ഉഭയകക്ഷി വ്യാപാരം ഒരു ബില്യൺ ഡോളർ കടന്നു. 2030-ഓടെ ഉഭയകക്ഷി വ്യാപാരത്തിൽ അഞ്ച് ബില്യൺ ഡോളറിൻ്റെ ലക്ഷ്യം ഞങ്ങൾ ഇപ്പോൾ നിശ്ചയിച്ചിട്ടുണ്ട്. ഇത് നേടുന്നതിന്, വിപണി പ്രാപ്യത, കണക്റ്റിവിറ്റി, ബാങ്കിംഗ്, പേയ്‌മെൻ്റ് സംവിധാനങ്ങൾ എന്നിവയുമായി ബന്ധപ്പെട്ട പ്രശ്‌നങ്ങൾ ഞങ്ങൾ വ്യവസ്ഥാപിതമായി പരിഹരിക്കും.

അടിസ്ഥാന സൗകര്യ വികസനത്തിൽ ഇരു കൂട്ടർക്കും പ്രയോജനകരമായ സഹകരണം വർദ്ധിപ്പിക്കുന്നതിന് ഞങ്ങൾ ഒരുമിച്ച് പ്രവർത്തിക്കും. ഡിജിറ്റൽ പൊതു അടിസ്ഥാന സൗകര്യങ്ങൾ, നിർമിത ബുദ്ധി, നിർണായക ധാതുക്കൾ, ശുദ്ധമായ ഊർജ്ജം, ബഹിരാകാശം, ആണവോർജ്ജം എന്നിവയിലെ സഹകരണം നമ്മുടെ ബന്ധത്തെ ഭാവിക്ക് അനുയോജ്യമാക്കുന്നു.

സുഹൃത്തുക്കളേ,

കൃഷിയിലും ആരോഗ്യ സംരക്ഷണത്തിലുമുള്ള നമ്മുടെ ശക്തികൾ പരസ്പര പൂരകമാണ്. ഉദ്യാനകൃഷിയിലെ ഉസ്ബെക്കിസ്ഥാന്റെ വൈദഗ്ധ്യവും ഇന്ത്യയുടെ ആധുനിക കാർഷിക രീതികളും സംയോജിപ്പിക്കുന്നതിലൂടെ, ഇരു രാജ്യങ്ങളുടെയും ഭക്ഷ്യസുരക്ഷയ്ക്ക് നാം സംഭാവന നൽകും.

ഉസ്ബെക്കിസ്ഥാന്റെ ഔഷധ സസ്യങ്ങളും ആയുർവേദത്തിലുള്ള ഇന്ത്യയുടെ വൈദഗ്ധ്യവും സ്വാഭാവികമായ സംയോജനമാണ്. പരമ്പരാഗത വൈദ്യശാസ്ത്രത്തിൽ ഇന്ന് എത്തിയ കരാർ ഈ മേഖലയിലെ നമ്മുടെ സംയുക്ത ശ്രമങ്ങൾക്ക് കൂടുതൽ പ്രചോദനം നൽകും.

നമ്മുടെ പങ്കാളിത്തം രണ്ട് തലസ്ഥാനങ്ങളിൽ മാത്രമായി ഒതുങ്ങുന്നില്ലെന്ന് ഉറപ്പാക്കുക എന്നതാണ് ഞങ്ങളുടെ ശ്രമം. അതിനാൽ, നമ്മുടെ നഗരങ്ങളും സംസ്ഥാനങ്ങളും തമ്മിൽ പങ്കാളിത്തം സ്ഥാപിക്കുന്നതിനായി ഞങ്ങൾ പ്രവർത്തിക്കുന്നു. നഗര മാനേജ്മെന്റ്, വ്യവസായം, വിദ്യാഭ്യാസം, ടൂറിസം, സംസ്കാരം തുടങ്ങിയ മേഖലകളിൽ സുസ്ഥിരമായ നേരിട്ടുള്ള ബന്ധങ്ങൾ വളർത്തിയെടുക്കാൻ ഈ പങ്കാളിത്തങ്ങൾ സഹായിക്കും.

നമ്മുടെ ഇരു രാജ്യങ്ങളും തമ്മിലുള്ള അടുത്ത പ്രതിരോധ, സുരക്ഷാ സഹകരണം നമ്മുടെ ബന്ധത്തിന് അടിവരയിടുന്ന ആഴത്തിലുള്ള പരസ്പര വിശ്വാസത്തെ പ്രതിഫലിപ്പിക്കുന്നു. മുന്നോട്ട് പോകുമ്പോൾ, നമ്മുടെ ഇരു രാജ്യങ്ങളുടെയും പ്രതിരോധ വ്യവസായങ്ങൾ തമ്മിലുള്ള നേരിട്ടുള്ള ബന്ധം, സഹ-ഉല്പാദനം, സഹ-വികസനം എന്നിവ പ്രോത്സാഹിപ്പിക്കും.

ഭീകരത, തീവ്രവാദം, വിഘടനവാദം എന്നിവ മുഴുവൻ മേഖലയ്ക്കും ഗുരുതരമായ വെല്ലുവിളികൾ ഉയർത്തുന്നുവെന്ന് ഞങ്ങൾ വിശ്വസിക്കുന്നു.

അവരോട് സഹിഷ്ണുതയില്ലാത്ത നയം സ്വീകരിക്കാനുള്ള ഞങ്ങളുടെ പങ്കിട്ട ദൃഢനിശ്ചയം അചഞ്ചലമായിരുന്നു, ഇനിയും അങ്ങനെ തന്നെ തുടരും.

സുഹൃത്തുക്കളേ,

നമ്മുടെ ബന്ധത്തിന്റെ ആഴമേറിയ വേരുകൾ നമ്മുടെ പങ്കിട്ട പൈതൃകത്തിലാണ്. ഇന്ന്, ഈ ബന്ധങ്ങൾ കൂടുതൽ ശക്തിപ്പെടുത്തുന്നതിന് ഞങ്ങൾ പ്രത്യേക ഊന്നൽ നൽകി.

ഉസ്ബെക്കിസ്ഥാന്റെ ബുദ്ധമത പൈതൃക കേന്ദ്രങ്ങളുടെ സംരക്ഷണത്തിനായി ഞങ്ങൾ ഒരുമിച്ച് പ്രവർത്തിക്കും. നമ്മുടെ രണ്ട് രാജ്യങ്ങളിലെയും യുവാക്കൾ, പ്രത്യേകിച്ച് വിദ്യാർത്ഥികൾ, പ്രൊഫഷണലുകൾ എന്നിവർ തമ്മിലുള്ള വിനിമയം പ്രോത്സാഹിപ്പിക്കുന്നത് ഞങ്ങൾക്ക് ഉയർന്ന മുൻഗണനയാണ്. ഇന്ന് ഇരു രാജ്യങ്ങളും തമ്മിലുള്ള ടൂറിസം പ്രോത്സാഹിപ്പിക്കുന്നതിനുള്ള ഒരു സഹകരണ പരിപാടിയിൽ ഞങ്ങൾ ധാരണയിലെത്തി. ഉസ്ബെക്കിസ്ഥാനിൽ ഹിന്ദി ഭാഷ പ്രോത്സാഹിപ്പിക്കുന്നതിനായി ഇന്ന് ഞങ്ങൾ സ്കോളർഷിപ്പുകൾ പ്രഖ്യാപിക്കാൻ പോകുന്നു എന്നതിൽ എനിക്ക് സന്തോഷമുണ്ട്.

നമ്മുടെ സഹകരണത്തിന്റെ ഒരു പ്രധാന മേഖലയായി കായികരംഗവും ഉയർന്നുവരുന്നു. കഴിഞ്ഞ വർഷം, 20 വയസ്സുള്ള ഉസ്ബെക്ക് ഗ്രാൻഡ്മാസ്റ്റർ സിൻഡറോവ് ഗോവയിൽ നടന്ന FIDE ലോകകപ്പ് നേടി. നവംബറിൽ ഇന്ത്യയുടെ 20 വയസ്സുള്ള ചെസ് ചാമ്പ്യൻ ഗുകേഷിനെ നേരിടാൻ അദ്ദേഹം ഒരുങ്ങുകയാണ്. ഈ രണ്ട് യുവതാരങ്ങളും ചെസ്സ്ബോർഡിൽ ഏറ്റുമുട്ടുമ്പോൾ, ലോകം മുഴുവൻ ഈ ആവേശകരമായ മത്സരം വീക്ഷിക്കും. അടുത്ത മാസം സമർഖണ്ഡിൽ നടക്കുന്ന ചെസ് ഒളിമ്പ്യാഡിന് ഞാൻ എന്റെ ആശംസകൾ നേരുന്നു. വരും കാലങ്ങളിൽ, കുറാഷ്, കബഡി തുടങ്ങിയ പരമ്പരാഗത കായിക വിനോദങ്ങളും നമ്മുടെ കായിക പങ്കാളിത്തത്തിന് പുതിയ ഊർജ്ജം നൽകും.

ഇന്നത്തെ ചർച്ചകൾ നമ്മുടെ ബന്ധങ്ങളുടെ ഭാവിക്ക് വ്യക്തമായ ഒരു ഗതി നിശ്ചയിച്ചിട്ടുണ്ട്. ശക്തമായ ഇന്ത്യ-ഉസ്ബെക്കിസ്ഥാൻ പങ്കാളിത്തം മധ്യേഷ്യയിൽ സമാധാനത്തിനും പുരോഗതിക്കും സമൃദ്ധിക്കും കരുത്തുറ്റ ഒരു ശക്തിയായിരിക്കും.

ബഹുമാന്യരേ,

നിങ്ങളുടെ സൗഹൃദത്തിനും ഇന്ന് നമ്മൾ നടത്തിയ ഫലപ്രദമായ ചർച്ചകൾക്കും ഒരിക്കൽ കൂടി ഞാൻ വളരെ നന്ദി പറയുന്നു.

രണ്ട് ദിവസത്തിനുള്ളിൽ, ഉസ്ബെക്കിസ്ഥാൻ അതിന്റെ സ്വാതന്ത്ര്യത്തിന്റെ 35-ാം വാർഷികം ആഘോഷിക്കും. ഇന്ത്യയിലെ 1.4 ബില്യൺ ജനങ്ങളുടെ പേരിൽ, ഈ അവസരത്തിൽ നിങ്ങൾക്കും ഉസ്ബെക്കിസ്ഥാനിലെ എല്ലാ പൗരന്മാർക്കും എന്റെ ഊഷ്മളമായ അഭിനന്ദനങ്ങളും ആശംസകളും അറിയിക്കുന്നു.

വളരെ നന്ദി.

***

SK