নেসনেল পেমেন্তস কোর্পোরেসন ওফ ইন্দিয়া (এন পি সি আই) গী এন.পি.সি.আই ইন্তরনেসনেল পেমেন্তস লিমিতেদনা ওগষ্ট ৩০,২০২৬ দা উজবেকিস্তানগী নেসনেল পেমেন্তস সিষ্টৈম, হুমোগী ওপেরেতর, নেসনেল ইন্তরবেঙ্ক প্রোসেসিং সেন্তর জে.এস.সিগা কম্মর্সিএল এগ্রিমেন্ত অমা লৈনরে। পুন্না থবক তৌমিন্নবা অসিনা লৈবাক শীনবা থুংনা উজবেকিস্তানগী নেসনেল ইন্তর ওপেরেবল ক্বিউ.আর কোদ য়ু.জেৎ.ক্বিউ.আর স্কেন তৌদুনা ভারতকী লমকোয়বা মীওইশিং, ললোনবশিং অমসুং মহৈরোয়শিংনা খুদক্ত শেন পীবা য়ারে।

ভারতকী প্রধান মন্ত্রীগী উজবেকিস্তান খোঙচৎ মনুংদা থবক অসি লাউথোকখিবনি। ঙমখৈ ৱাংমা লান্না শেন পীথোক-পীশিন য়ানবগীদমক রিজার্ব বেঙ্ক ওফ ইন্দিয়া অমসুং সেন্ত্রেল বেঙ্ক ওফ উজবেকিস্তান য়াওনা ফাইনান্সিএল রিগুলেতরশিংনা অয়াবশিং পীরবা মতুংদা এগ্রিমেন্ত অসি থবক ওইনা পাংথোকপনি।

এগ্রিমেন্তগী মরুওইবশিং

1.       য়ুনিভর্সেল মার্চেন্ত য়ারে: সি.বি.য়ুগী য়ু.জেৎ.ক্বিউ.আরগা পুনশিন্দুনা, উজবেকিস্তান্দা রিতেল, হোস্পিতেলিতি অমসুং সর্বিস মার্চেন্তশিংদা য়ু.পি.আই শীজিন্নবা য়ারে।

2.       অপনবা লৈতনা চৎথোক-চৎশিন পাংথোকপা: ফোরেন একচেঞ্জগী খেন্নবা লৈতনা অমসুং ইন্তরনেসনেল কার্দশিং নত্ত্রগা শেনগী মখা পোনবা হন্থহন্দুনা ভারতকী লমকোয়বশিং, ললোন-ইতিক্কী চৎথোক-চৎশিন তৌরিবশিং অমসুং মহৈরোয়শিংনা মখোয়গী বেঙ্ক একাউন্তশিংদগী হকথেংননা পর্সন-তু-মার্চেন্ত (পি২এম) পেমেন্তশিং য়ারে।

3.       লৈবাক অনিগী মরীশিং ফগৎহল্লে: থবক অসিনা দিজিতেল পব্লিক ইনফ্রাষ্ট্রকচরগী মতেং পাংনবা হেনগৎহল্লে অমসুং লৈবাক অনিমক্কী লাল্লোংশিং অমসুং শেন-থুমগী পান্দমশিংগা চুনরে।

লৈবাক ১০ দা য়ু.পি.আই চৎনরে

য়ু.পি.আইগী খুৎথাংদা ভারতকী লমকোয়বা মীওইশিংনা শিঙ্গাপুর, য়ু.এ.ই, ফ্রান্স, মাউরিসিয়স, নেপাল, ভুতানা, কাতর, শ্রী লঙ্কা, কম্বোদিয়া অমসুং গ্রিসতা নুংঙাইনা শেন পীথোক-পীশিন য়ারে।

***