નેશનલ બોર્ડ ઓફ એક્ઝામિનેશન્સ ઇન મેડિકલ સાયન્સિસ (NBEMS) એ નિષ્પક્ષ, સુરક્ષિત અને સીમલેસ પરીક્ષા પ્રક્રિયા સુનિશ્ચિત કરવા માટે વ્યાપક લોજિસ્ટિકલ, તકનીકી, સુરક્ષા અને માનવબળ વ્યવસ્થા સાથે આજે, 30 ઓગસ્ટ 2026ના રોજ દેશભરમાં NEET-PG 2026 પરીક્ષા સફળતાપૂર્વક આયોજિત કરી હતી.

આ પરીક્ષા તમામ 36 રાજ્યો અને કેન્દ્રશાસિત પ્રદેશોને આવરી લેતા 339 શહેરોમાં 1,111 પરીક્ષા કેન્દ્રો પર 2,73,096 ઉમેદવારો માટે શિડ્યુલ કરવામાં આવી હતી. પરીક્ષામાં કુલ 2,65,980 ઉમેદવારો ઉપસ્થિત રહ્યા હતા, જેમાં લગભગ 2,63,535 ઉમેદવારો માટે પરીક્ષા સફળતાપૂર્વક પૂર્ણ થઈ હતી.

દેશવ્યાપી પરીક્ષાને વ્યાપક રીઅલ-ટાઇમ મોનિટરિંગ અને કડક સુરક્ષા પગલાં દ્વારા સમર્થન આપવામાં આવ્યું હતું. પરીક્ષાના સંચાલનની દેખરેખ માટે સ્વતંત્ર મૂલ્યાંકનકારો તરીકે કુલ 2,527 ફેકલ્ટી સભ્યોની નિમણૂક કરવામાં આવી હતી. આ ઉપરાંત, ડીન, ડિરેક્ટર્સ, મેડિકલ સુપ્રિન્ટેન્ડેન્ટ્સ અને વરિષ્ઠ પ્રોફેસરો સહિત 700 થી વધુ વરિષ્ઠ ફેકલ્ટી સભ્યોને ફ્લાઈંગ સ્ક્વોડ સભ્યો તરીકે તૈનાત કરવામાં આવ્યા હતા.

સંકલન અને મોનિટરિંગને મજબૂત બનાવવા માટે, દેશભરમાં 16 NBEMS રિજનલ કમાન્ડ સેન્ટર્સ કાર્યરત કરવામાં આવ્યા હતા.

પરીક્ષા કેન્દ્રોને લાઈવ CCTV સર્વેલન્સ હેઠળ પણ મૂકવામાં આવ્યા હતા, જેનું દ્વારકા સ્થિત NBEMS હેડક્વાર્ટરના કમાન્ડ સેન્ટર પરથી સતત મોનિટરિંગ કરવામાં આવ્યું હતું. રીઅલ-ટાઇમ સર્વેલન્સ અને મોનિટરિંગ માટે NBEMS અને TCSના 190 કર્મચારીઓની સમર્પિત ટીમ તૈનાત કરવામાં આવી હતી.

NBEMS હેડક્વાર્ટર ખાતે સમર્પિત કમાન્ડ સેન્ટર પર, NBEMS, આરોગ્ય અને પરિવાર કલ્યાણ મંત્રાલય, BEL, ECIL અને TCSના અધિકારીઓએ આખો દિવસ પરીક્ષા પ્રક્રિયા પર નજીકની અને સતત દેખરેખ રાખી હતી.

પરીક્ષાની સુરક્ષાને વધુ મજબૂત કરવા અને બનાવટી ઉમેદવારી (impersonation) અટકાવવાના પગલાંના ભાગરૂપે, પરીક્ષા કેન્દ્રો પર ઉમેદવારોનું આધાર- આધારિત ઓથેન્ટિકેશન (Aadhaar-based authentication) સફળતાપૂર્વક હાથ ધરવામાં આવ્યું હતું. સરકારી એજન્સીઓએ પરીક્ષાના સુરક્ષિત અને વ્યવસ્થિત સંચાલન માટે તેમનો સંપૂર્ણ સહયોગ આપ્યો હતો.

જ્યારે દેશભરમાં મોટાભાગના ઉમેદવારો માટે પરીક્ષા સફળતાપૂર્વક પૂર્ણ થઈ હતી, ત્યારે iON ડિજિટલ ઝોન iDZ સીતાપુરા કેન્દ્રો, જયપુર, રાજસ્થાન (TC નંબર 41682 અને 41683) ખાતે એક અણધારી તકનીકી વિક્ષેપ સર્જાયો હતો, જ્યાં પરીક્ષા સંચાલન એજન્સી M/s TCS લિમિટેડને આભારી ટેસ્ટ સેન્ટરો પર આંતરિક પાવર સપ્લાયની સમસ્યાઓને કારણે 2,445 ઉમેદવારો માટે પરીક્ષા પૂર્ણ થઈ શકી ન હતી.

NBEMS પ્રભાવિત ઉમેદવારોને પડેલી અસુવિધા માટે ઊંડો ખેદ વ્યક્ત કરે છે અને તેઓને NEET-PG 2026 માં ઉપસ્થિત રહેવાની ન્યાયી અને સમાન તક પૂરી પાડવામાં આવે તે સુનિશ્ચિત કરવા માટે તાત્કાલિક પગલાં લીધાં છે.

તદ્દનુસાર, તમામ પ્રભાવિત ઉમેદવારોની ફરીથી પરીક્ષા શનિવાર, 5 સપ્ટેમ્બર 2026ના રોજ બપોરે 3:00 વાગ્યે જયપુર, રાજસ્થાન ખાતે યોજાશે. સ્થળની વિગતો અને પરીક્ષા સંબંધિત અન્ય સૂચનાઓ સંબંધિત ઉમેદવારોને અલગથી જણાવવામાં આવશે.

339 શહેરોના 1,111 કેન્દ્રો પર પરીક્ષાનું સફળ આયોજન એ દેશવ્યાપી કવાયતમાં સામેલ પરીક્ષા સત્તામંડળો, તબીબી સંસ્થાઓ, ફેકલ્ટી, સુરક્ષા એજન્સીઓ, ટેકનોલોજી ટીમો અને અન્ય હિતધારકો વચ્ચેના વ્યાપક સંકલનને દર્શાવે છે.

NBEMS ઉમેદવારોના સહયોગ, ધૈર્ય અને વિશ્વાસની પ્રશંસા કરે છે અને NEET-PG 2026 ના સંચાલન સાથે સંકળાયેલા તમામ કર્મચારીઓ અને સંસ્થાઓના સમર્પિત પ્રયાસોનો સ્વીકાર કરે છે.

SM/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad