સરકારે ટેલિવિઝન ચેનલો માટે 12-મિનિટની જાહેરાત સમયગાળાની મર્યાદા (Cap) હટાવવાનો નિર્ણય લીધો છે.

ટેલિવિઝન માટે જાહેરાત સમયગાળાની મર્યાદા વર્ષ 2006 માં કેબલ ટેલિવિઝન નેટવર્ક્સ રૂલ્સ, 1994 હેઠળ રજૂ કરવામાં આવી હતી. ત્યારથી, ટીવી બ્રોડકાસ્ટિંગ ક્ષેત્રમાં નોંધપાત્ર ફેરફારો થયા છે. 2006 માં, માત્ર 62 ટીવી ચેનલો હતી, જેની સરખામણીમાં વર્તમાનમાં 900 થી વધુ ચેનલો છે.

તે સમયે, ટીવી ચેનલો પહોંચાડવા માટેનું મુખ્ય પ્લેટફોર્મ કેબલ ટીવી, એનાલોગ હતું અને તેની કેરેજ ક્ષમતા મર્યાદિત હતી, જે ગ્રાહકોને ખૂબ જ મર્યાદિત વિકલ્પો પૂરા પાડતી હતી. કેબલ ટીવી ક્ષેત્રના સંપૂર્ણ ડિજિટાઇઝેશન પછી, DTH, કેબલ ટીવી, HITS અને IPTV સહિતના તમામ ટીવી વિતરણ પ્લેટફોર્મ હવે ડિજિટલ છે. આ પ્લેટફોર્મ હાલમાં 300 અને 500 કે તેથી વધુ ચેનલો ધરાવે છે, જે ગ્રાહકોની વિવિધ જરૂરિયાતોને પૂર્ણ કરે છે અને વધુ વિવિધતા સક્ષમ બનાવે છે. પરિણામે, બજારના ગતિશીલ માળખામાં (market dynamics) હવે પૂરતી સ્પર્ધા અસ્તિત્વમાં છે.

ટીવી બ્રોડકાસ્ટિંગ ક્ષેત્રમાં આવેલા ફેરફારોને ધ્યાનમાં રાખીને, જાહેરાતના સમયગાળા સંબંધિત જોગવાઈઓની પુનઃસમીક્ષા કરવાની જરૂરિયાત અનુભવાઈ હતી. ભારતમાં, ચેનલ 'પે' (pay) છે કે 'ફ્રી-ટુ-એર' (free-to-air), તેનાથી પરે આ ક્ષેત્ર જાહેરાતો પર ખૂબ જ નિર્ભર છે. તદુપરાંત, ડિજિટલ મીડિયાની સરખામણીમાં પરંપરાગત ટીવી ચેનલો માટે સમાન તકોનો અભાવ (non-level playing field) હતો, જ્યાં જાહેરાત મર્યાદા નિયમન અંગે આવી કોઈ જોગવાઈ અસ્તિત્વમાં નથી.

માહિતી અને પ્રસારણ મંત્રાલય (Ministry of I&B) નો અભિપ્રાય છે કે ટીવી ઉદ્યોગની અંદર અને ટીવી ઉદ્યોગ તથા ડિજિટલ મીડિયા વચ્ચે બજારમાં પૂરતી સ્પર્ધા અસ્તિત્વમાં છે. સરકારે ન્યાયી સ્પર્ધાને સક્ષમ કરવા અને વેપાર કરવાની સરળતા સુનિશ્ચિત કરવા માટે જાહેરાતના સમયગાળાની મર્યાદા દૂર કરવાનો નિર્ણય લીધો છે.

આ નિર્ણય ગેઝેટમાં કેબલ ટેલિવિઝન નેટવર્ક્સ રૂલ્સ, 1994માં સુધારાના નોટિફિકેશનની તારીખથી અમલમાં આવશે.

SM/DK/JD