উপ-রাস্ত্রপতিগী লোইশঙ
উপ-রাস্ত্রপতিনা ভন্দে মাতরমনা চহি ১৫০ মপুং ফারকপদা এম.পি.শিংগী হর ঘর তিরঙ্গা বাইক রেল্লী লমথাখ্রে
হরঘর তিরঙ্গা অসি মীয়ামগী খোঙজং অমা ওইরে, মসিনা ভন্দে মাতরমগী ৱাখল্লোনবু ময়েক শেংনা উৎলি: উপ-রাস্ত্রপতি
ভন্দে মাতরমনা মমা লৈবাক্কীদমক নুংশিবা অসি লৈবাক্কী থৌদাং অমদা ওন্থোকখি: উপ-রাস্ত্রপতি
प्रविष्टि तिथि:
12 AUG 2026 11:03AM by PIB Imphal
উপ-রাস্ত্রপতি শ্রী সি. পি. রাধাকৃষ্ণন্না ঙসি জাতিগী ঈশৈ, ভন্দে মাতরমগী চহি ১৫০ মপুং ফারকপগী পালন তৌরদুনা নই দিল্লীগী ভারত মন্দপমদা মেম্বর্স ওফ পার্লিয়ামেন্ত অমসুং অতোপ্পা মীয়ামগী মীহুৎশিংগা লোয়ননা হর ঘর তিরঙ্গা বাইক রেল্লীগী লমথাখ্রে।
রেল্লী অসিনা জাতিগীদমক চাউথোকচবা, অপুনবগী ৱাখল্লোন অমসুং প্রজানা শরুক য়াবগী পাউজেল পুদুনা ভারত মন্দপমদগী মেজর ধ্যানচান্দ নেস্নেল স্তেদিয়ম ফাওবা চৎখি।
মীয়াম তিনখিবা অদুদা ৱা ঙাংলদুনা মহাক্না হায়খি মদুদি ভন্দে মাতরমনা ইমা লৈবাকপু নুংশিবা অসি লৈবাক্কী থৌদাং অমা ওইনা ওন্থোকখি অমসুং ভারতকী নীংতম লানগী থৌনা অদুগী মপাঙ্গল কনবা শক্তম অমা ওইখি। মসিগী অমর ওইরবা ৱাহৈশিংনা মশিং থিঙমদ্রবা নীংতম্বগী লান্মীশিংবু মতৌ করম্না থৌনা, কত্থোকপা অমসুং থাজবগা লোয়ননা ইথিল পীরম্বগে হায়বা অদু মহাক্না নীংশিংখি।
মহাক্কী অন্দমান অমসুং নিকোবর ইথৎশিংদা চৎখিবা অদু নৌহৌননা নীংশিংলদুনা উপ-রাস্ত্রপতিনা হায়খি মদুদি নেতাজী সুভাস চন্দ্র বোস ইথৎ অমসুং পুৱারী ওইরবা সেলুলর জেলদা চৎখিবা অদু য়াম্না নুংঙাইবা ফাওখি। মহাক্না নেতাজীনা ইং ১৯৪৩দা তিরঙ্গা চীংখৎখিবা অমসুং সেলুলর জেলদা বন্দী ওইরম্বা নীংতম লান্মীশিংনা কত্থোকখিবশিং নীংশিংখি, মখোয় কয়া অমনা ফাশি তৌফমদা 'ভন্দে মাতরম'গী খোলাউ লাউখি।
ভারতকী নীংতম লানফমদা জাতিগী ঈশৈ 'ভন্দে মাতরম'না লৈবাক শীনবা থুংনা পীবা ইথিল অদু পল্লদুনা শ্রী সি. পি. রাধাকৃষ্ণন্না তামিল নাদুগী নীংতম লান্মীশিং অমসুং লুচিংবশিং, ভি. ও. চিদাম্বরম পিল্লাই, সুব্রামনিয়া শিবা, তিরুপপুর কুমারন অমসুং ভঞ্চিনাথন, লোয়ননা ভন্দে মাতরমগী ৱাখল্লোন অমসুং পাউজেল মীয়ামদা য়ৌহনখিবা জাতিগী কবি সুব্রামনিয়া ভারতীনা শরুক তমখিবশিং অমসুং কত্থোকখিবশিং অদু নীংশিংখি।
উপ-রাস্ত্রপতিনা হায়খি মদুদি ২০২২দা প্রধান মন্ত্রী শ্রী নরেন্দ্র মোদীনা হৌদোকখিবা হর ঘর তিরঙ্গা অভিয়ান অসি মীয়ামগী খোঙজং অমা ওইরক্লি। তিরঙ্গা য়াত্রা, বাইক অমসুং সাইকল রেল্লী, কলচরেল প্রোগ্রাম অমসুং অতোপ্পা থবক থৌরমশিংদা প্রজাশিংনা শরুক য়াবা হৌরে। মহাক্না হায়খি মদুদি তিরঙ্গা অসিনা লৈবাক অমগী ৱাখল্লোনবু ময়েক শেংনা উৎলি। মহাক্না এম.পি.শিং অমসুং মীয়ামগী মীহুৎশিংদা মখোয়গী কন্সতিত্যুএন্সীশিংদা কেম্পেন অসি প্রমোৎ তৌনবা অমসুং প্রজাশিংদা লৈবাক অসিগী ফিরালবু চাউথোকচবা পোকহন্নবা পুক্নিং থৌগৎনবা তকশিনখি।
কেন্দ্রগী মন্ত্রীশিং শ্রী গজেন্দ্র সিংহ শেখাৱত, শ্রী রাজীব রঞ্জন সিংহ, শ্রী বীরেন্দ্র কুমার, শ্রী জি. কিশান রেদ্দি, শ্রী কিরেন রিজিজু অমসুং শ্রী জিতেন্দ্র সিংহ অমসুং পার্লিয়ামেন্তকী মেম্বরশিং অমসুং মীয়ামগী অতোপ্পা মীহুৎশিংনা রেল্লী অসিদা শরুক য়াখি।
****
(रिलीज़ आईडी: 2299370)
आगंतुक पटल : 5
इस विज्ञप्ति को इन भाषाओं में पढ़ें:
Kannada
,
English
,
Urdu
,
हिन्दी
,
Marathi
,
Assamese
,
Bengali
,
Bengali-TR
,
Punjabi
,
Gujarati
,
Tamil
,
Telugu
,
Malayalam