Ka Kynhun Myntri jong ka Sorkar Pdeng ba la pynïaid da u Myntri Rangbahduh ka ri u Narendra Modi mynta ka sngi kala mynjur ïa ka ‘Pradhan Mantri Surya Sarovar Yojana (PM-SSY)’, ka Skhim na ka bynta ban kyntiew ïa ki Projek Floating Solar Photovoltaic (FSPV) Projects bad ka Energy Storage Systems (ESS) ha ka jinglut baroh kaba T.5,070 klur.

Ka skhim ka thmu ban kyntiew ia ki projek Floating Solar Photovoltaic kiba heh 5,000 MW ryngkat bad ki jaka buh bording kiba don hajuh kiba don ia ka jinglah ban buh bording kaba duna tam kaba ar kynta kata,10,000 MWh. Ia ki projek yn ai jingmynjur ha u snem mang tyngka 2026-27 haduh u snem mang tyngka 2030-31, ha kaba ka jingpyllait pisa kan bteng haduh u snem mang tyngka 2032-33.

Kane ka jingmynjur ka long hadien ka jingbishar bniah ba dang shen ba la leh da ka National Institute of Solar Energy (NISE), kaba la antad ba kalad floating solar ka long kumba 102.18 GWp ha ki jaka den um bad kiwei kiwei ki jaka shong um kiba biang ha ka ri.

Hapoh kane ka skhim, ka Central Financial Assistance (CFA) kaba long T. Shi klur man ka MW yn pynbiang na ka bynta ki projek Floating Solar Photovoltaic kiba dei hok ban ioh hadien ba la jop ban pyntreikam. Nalor kata, ka CFA kaba haduh T.50 lak na ka bynta kawei ka projek kan long kaba lah ban peit ia ka jinglah ban treikam, kynthup ia ki jingpeit bniah ia ka bathymetry bad hydrography, ki jingwad bniah ia ka jinglong ka mariang, bad kiwei kiwei ki kam pynkhreh kiba donkam na ka bynta ban pynduh jingma ia ka jingkyntiew ia ka projek.

Baroh ki Jylla bad ki Union Territory kin ïoh jingmyntoi lyngba kane ka skhim. Kane ka skhim kan kyntiew ia ka lad pynmih bording floating Solar PV ha ka ri da 5,000 MW, kaba mynta ka long tang kumba 700 MW. Kine ki projek kin ai lad ban pyndonkam pura ia ki jaka buh um bad ki pung kiba la don lypa, bad pynduh ia ka jingiakhun na ka bynta ki jingdon jingem kiba duna. Ka jingpyniasoh lang ia ka rukom buh bording kan iarap ban pynkhlain ia ka jingshaniah ha ka grid. Kane ka skhim kan iarap ban pynduna kumba 10 million ton ka jingmih CO2 man la u snem. Kan iarap ha kaba pynmih kumba 16,000–17,000 tylli ki lad ioh kam ha ki kam kiba iadei bad ka projek. Kane ka skhim kan kyntiew ruh ïa ka jingshna hapoh ka ri ïa ki kor floatation bad kumjuh ruh ha baroh ki bynta kiba iadei bad ki projek, kum ki PV cell, ki module, ki rukom buh bording, bad kiwei kiwei, bad kyrshan ïa ka jingthmu Aatmanirbhar Bharat.

Ka skhim kan nohsynniang shuh shuh sha ka jinglah pynmih ia ka bording ba lah ban pynthymmai, kan kyrshan ia ka jingjop jong ki jingthmu jong ka ri ha kaba iadei bad ka bording bad ka jinglong ka suin bneng, bad kan pynsuk ia ka jingpyndonkam pura ia ki tyllong um katba ka dang kyntiew ia ka jingthmu Viksit Bharat.

****