ঙসি জুলাই ২৪, ২০২৬ দা ইন্দিয়া-রোমানিয়া ব্যুজিনেস ফোরমদা ভারতকী রাষ্ট্রপতি শ্রীমতি দ্রৌপতি মুর্মুনা ৱা ঙাংখ্রে অমসুং থৌরম অদুদা রোমানিয়াগী রাষ্ট্রপতি নিকুসোর দান, রোমানিয়া সরকারগী মেম্বরশিং, ভারত অমসুং রোমানিয়াগী ললোন-ইতিক্কী লুচিংবশিং অমসুং ভারত অমসুং রোমানিয়াগী উদ্যোগকী এসোসিএসনশিংগী মীহুৎশিং শরুক য়াখি।

থৌরম অদুদা ৱা ঙাংবদা, রাষ্ট্রপতিনা হায়খি মদুদি রোমানিয়ানা য়ুরোপকী ময়াইদা লৈদুনা, হৈথোই-শিংথোইরবা মীওইশিং, অৱাংবা থাক্কী উদ্যোগকী থবকশিং লৈরি অমসুং য়ুরোপিয়ান য়ুনিয়ন্দা য়াওরি অমসুং ভারতকী মমল য়াম্লবা মরুপ অমা ওইরি। রোমানিয়া অসি শেন থাদনবগী মরুওইবা মফম অমা ওইবা খক নত্তনা পাক-চাউরবা য়ুরোপকী কৈথেলগী থোঙ্গাল অমসু ওইরি। ফোরম অসিদা মশিং য়াম্লবা ভারতকী ললোন-ইতিক্কী মীহুৎ কাংবু শরুক য়াবা অসিদা ভারতকী উদ্যোগশিংদা রোমানিয়ানা পীরিবা খুদোংচাবশিংদা থাজবা হেনগৎলকপা অমসুং রোমানিয়াগী ললোন-ইতিকশিংগা পুন্না থবক তৌমিন্ননিংবগী মখোয়গী অপাম্বগী মমি তারে। 

রাষ্ট্রপতিনা হায়খি মদুদি হৌজিক লৈনরিবা মরী অসিদা ললোন-ইতিক অমসুং শেন-থুমগী মতেং পাংনবা অসি য়াম্না মরুওই। মীওই বিল্লিয়ন অনি অমসুং দোল্লার ত্রিল্লিয়ন ২৫ রোমগী অপুনবা কৈথেল অমা লৈদুনা, ইন্দিয়া-ই.য়ু এফ.তি.এ অসি মালেমদা খ্বাইদগী মরুওইবা শেন-থুমগী মরীশিংগী মনুংদা য়াওরে অমসুং ললোন-ইতিক পুনশিনবা হেনগৎহন্নবা, শেন থাদবা হেনগৎহন্নবা অমসুং মখল কয়াগী সপ্লাই চেনশিং শেমগৎনবা পান্দম থম্লি। অথুবা মতমদা অমসুং মপুংফানা এফ.তি.এ থবক ওইনা পাংথোকপা য়াম্না মরুওই। মসিনা ললোন-ইতিকশিংগী তম্বা ঙম্বা ফিবম অমা শেমগৎকনি, ভেলু চেন পুনশিনবা হেনগৎহনগনি অমসুং লৈবাক অনিমক্কী এম.এস.এম.ইশিং, ষ্টার্দঅপশিং অমসুং ইন্নোবেতরশিংগী অনৌবা খুদোংচাবশিং শেমগৎকনি।

রাষ্ট্রপতিনা হায়খি মদুদি ঙসিদি ভারত মালেমদা য়াংনা চাউখৎলক্লিবা অচৌবা ইকোনোমিশিংগী মনুংদা অমা ওইরে। বিকসিত ভারত ২০৪৭ গী ঐখোয়গী পান্দম্না ঐখোয়গী নিংতম্বা চহি ১০০ শুবা চহিদা ভারত চাউখৎলবা লৈবাক অমা ওইহন্নবা পান্দম থম্লি। ঐখোয়গী খোঙচত্ত মালেমগী লৈবাকশিংগা পুন্না চৎমিন্নবা, শেন থাদবা অমসুং তেক্নোলোজিগী মতেং পাংনবগী খুদোংচাবা কয়া য়াওরি। তেক্স লৌবগী থবক লাইহন্দুনা অমসুং প্রদক্সন-লিঙ্ক ইন্সেন্তিপশিং পায়খৎতুনা অরোনবা লৈতবা, তম্বা ঙম্বা অমসুং শেন থাদবা মীওইশিংনা নুংঙাইবা ফিবম অমা শেমগৎনবা ভারতনা থবকশিং পায়খৎলে।

রাষ্ট্রপতিনা হায়খি মদুদি ভারত অমসুং রোমানিয়াগী মরক্ত ইনর্জি সেকুরিতি অমসুং গ্রিন ত্রান্সসিসন্দা মতেং পাংন্নবা খুদোংচাবা কয়া লৈরি। কেমিকেল অমসুং হারগী উদ্যোগতা রোমানিয়াগী শক্তি কয়া লৈরি অমসুং হিরম অসিদা মতেং পাংনবগী খুদোংচাবা কয়া লৈরি। মালেম্না মশক খঙলবা ভারতকী দিজিতেল পব্লিক ইনফ্রাষ্ট্রকচর, অফবা ষ্টার্দ-অপ ইকোসিষ্টেম অমসুং ইনফোর্মেসন তেক্নোলোজিদা মাঙজিল থাবা অসিনা সোফৱায়ার ইঞ্জিনিয়ারিং, সাইবর-সেকুরিতি, থিজিনবা অমসুং অৱাংবা থাক্কী তেক্নোলোজিশিংদা রোমানিয়াগী মতেং পাংবা ঙমগনি। হিথাংফমশিং, রেলৱেজ, হায়ৱেশিং, লোজিষ্টিক্স পার্কশিং অমসুং মল্তি-মোদাল ত্রান্সপোর্ত য়াওনা ত্রান্সপোর্তেসন অমসুং লোজিষ্টিক্সতা ঐখোয়গী কম্পেনিশিং পুন্না থবক তৌমিন্নবগী খুদোংচাবা কয়া লৈরি। ঐখোয়না হিদাক-লাংথকশিং, অনা-লাইয়েং, লৌউ-শিংউ অমসুং চীঞ্জাক শেম-শাবদা হেন্না মতেং পাংনবা য়াগনি।

রাষ্ট্রপতিনা হায়খি মদুদি ভারত অমসুং রোমানিয়াগী ললোন-ইতিক্কী মীওইশিংনা নৌনা ফংলিবা খুদোংচাবশিং অসি লৌগনি অমসুং মখোয়না মাইপাক্লবা ললোন-ইতিক্কী থবকশিং ওন্থোক্কনি হায়বগী থাজবা থম্লি। ভারতকী চাউখৎপগী ৱারিদা রোমানিয়াগী কম্পেনিশিং থৱায় য়াওনা শরুক য়াগদবনি। ঐখোয়গী ললোন-ইতিকশিংনা অফবা সপ্লাই চেনশিং শেমগৎকনি, থবক পীগনি, ইন্নোবেসন য়োকখৎকনি অমসুং ঐখোয়গী মীয়ামগীদমক তুংকোইনা লৈহৌগদবা নুংঙাই-য়াইফবা পীগনি।

***