కొత్తగా అమల్లోకి వచ్చిన టెలికమ్యూనికేషన్ల చట్టం – 2023 పరిధిలో టెలివిజన్, రేడియో సేవల కోసం జారీ చేసిన వివిధ మార్గదర్శకాలను ఏకీకృతం చేయడానికి టెలికమ్యూనికేషన్లు (టెలివిజన్, రేడియో, అనుబంధ సేవలు) నియమాల ముసాయిదా – 2026ను ప్రభుత్వం విడుదల చేసింది. వాటిలో దిగువ పేర్కొన్న మార్గదర్శకాలున్నాయి.

1. భారత్‌లోని శాటిలైట్ టెలివిజన్ ఛానళ్లను అప్‌లింకింగ్, డౌన్‌లింకింగ్ చేయడం కోసం విధానపరమైన మార్గదర్శకాలు.

2. భారత్‌లో డైరెక్ట్–టు–హోం (డీటీహెచ్) బ్రాడ్‌కాస్టింగ్ సేవలను అందించడానికి లైసెన్సు పొందడానికి మార్గదర్శకాలు.

3. భారత్‌లో హెడెండ్–ఇన్–ది–స్కై (హెచ్ఐటీఎస్) ప్రసార సేవలను అందించడానికి మార్గదర్శకాలు.

4. ప్రైవేటు సంస్థల ద్వారా ఎఫ్ఎం రేడియో ప్రసార సేవల విస్తరణకు (మూడో దశ) విధాన మార్గదర్శకాలు.

5. భారత్‌లో కమ్యూనిటీ రేడియో స్టేషన్లను ఏర్పాటు చేయడానికి సవరించిన విధానపరమైన మార్గదర్శకాలు.

6. ఇంటర్నెట్ ప్రొటోకాల్ టెలివిజన్ (ఐపీటీవీ) సేవలను అందించడానికి మార్గదర్శకాలు.

వీటితో ఏకీకృతమైన, సరళీకరించిన నియమావళి పరిశ్రమకు లభిస్తుంది. టెలివిజన్, రేడియో బ్రాడ్‌కాస్టింగ్ రంగంలో వ్యాపార సౌలభ్యాన్ని ప్రోత్సహిస్తూ.. ప్రస్తుతం అమల్లో విధానాన్ని సమన్వయం చేసుకొనేలా ఈ నిబంధనలను రూపొందించారు. ఈ ముసాయిదా నిబంధనలు సమాచార, ప్రసార మంత్రిత్వ శాఖ వెబ్‌సైట్ (https://www.mib.gov.in/)లో ప్రచురితమయ్యాయి. 2026, జులై 27 లోగా ఆలోచనలు, అభిప్రాయాలు, సూచనలను తెలియజేయవచ్చు.

కొత్త నియంత్రణ విధానాన్ని స్వీకరించడంలో పరిశ్రమకు ముసాయిదా నియమాలు తోడ్పాటు అందిస్తాయి. వీటి ప్రకారం ఇప్పటికే ఉన్న లైసెన్సులు/అనుమతులను స్వచ్ఛందంగా కొత్త నియంత్రణ విధానంలోకి మార్చుకోవచ్చు. లేదా కొత్త వ్యవస్థలోకి మారేంత వరకు వాటిని కొనసాగించవచ్చు.

మధ్యప్రదేశ్‌లోని ఛింద్వారా జిల్లాలోని మారుమూల, గ్రామీణ ప్రాంతాలతో సహా దేశవ్యాప్తంగా టెలివిజన్, రేడియో, కమ్యూనిటీ రేడియో సేవలను మెరుగుపరచడానికి అవసరమైన నిబంధనలు ఈ ముసాయిదా నియమాల్లో ఉన్నాయి.

లోక్‌సభలో శ్రీ ముఖేష్ కుమార్ చంద్రకాంత్ దలాల్, శ్రీ దినేశ్ భాయ్ మక్వానా అడిగిన ప్రశ్నకు సమాధానంగా ఈ సమాచారాన్ని కేంద్ర రైల్వేలు, సమాచార, ప్రసారాలు, ఎలక్ట్రానిక్స్, ఇన్ఫర్మేషన్ టెక్నాలజీ మంత్రి శ్రీ అశ్వనీ వైష్ణవ్ అందించారు.

***