କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଏବଂ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ଶ୍ରୀ ରାମମୋହନ ନାଇଡୁ କିଞ୍ଜାରାପୁ ପ୍ରମୁଖ ବିମାନ ବନ୍ଦରରେ ଯାତ୍ରୀ ସୁବିଧା, ସୁରକ୍ଷା ବ୍ୟବସ୍ଥା ଏବଂ ଇମିଗ୍ରେସନ ବ୍ୟବସ୍ଥାର ସମୀକ୍ଷା କରିଛନ୍ତି। ଏହି ବୈଠକରେ କେନ୍ଦ୍ର ଗୃହ ସଚିବ, ଗୁଇନ୍ଦା ନିର୍ଦ୍ଦେଶକ, ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ସଚିବ, କେନ୍ଦ୍ରୀୟ ଶିଳ୍ପ ସୁରକ୍ଷା ବାହିନୀ (ସିଆଇଏସ୍ଏଫ୍) ର ମହାନିର୍ଦ୍ଦେଶକ, ଭାରତୀୟ ବିମାନ ବନ୍ଦର ପ୍ରାଧିକରଣର ଅଧ୍ୟକ୍ଷ ଏବଂ ଗୃହ ମନ୍ତ୍ରଣାଳୟ ଏବଂ ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ଅନେକ ବରିଷ୍ଠ ଅଧିକାରୀ ଯୋଗ ଦେଇଥିଲେ।

କେନ୍ଦ୍ର ଗୃହମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ଯେ ମାନବ ସମ୍ବଳ ଖର୍ଚ୍ଚ ହ୍ରାସ କରିବା ଉଦ୍ଦେଶ୍ୟରେ ଦେଶର ସମସ୍ତ ବିମାନବନ୍ଦରରେ ପର୍ଯ୍ୟାୟକ୍ରମେ ଏକ ସ୍ୱୟଂଚାଳିତ ଏକ୍ସ-ରେ ଟ୍ରେ ରିଟର୍ଣ୍ଣ ସିଷ୍ଟମ (ଏଟିଆରଏସ) ସ୍ଥାପନ କରାଯିବ। ସେ ଏହା ମଧ୍ୟ କହିଥିଲେ ଯେ ନୂଆ ବିମାନ ବନ୍ଦରରେ ସ୍ୱୟଂକ୍ରିୟ ଏକ୍ସ-ରେ ଟ୍ରେ ରିଟର୍ଣ୍ଣ ସିଷ୍ଟମ ସ୍ଥାପନ କରିବା ଲାଗି ଉପଯୁକ୍ତ ମାନଦଣ୍ଡ ନିର୍ଦ୍ଧାରଣ କରାଯିବା ଉଚିତ। 

ଶ୍ରୀ ଅମିତ ଶାହ ନିର୍ଦ୍ଦେଶ ଦେଇଛନ୍ତି ଯେ ବିମାନବନ୍ଦରରେ ପ୍ରବେଶ ପଥ, ଚେକ୍-ଇନ୍ କାଉଣ୍ଟର, ସୁରକ୍ଷା ସ୍କ୍ରିନିଂ ଲେନ୍ ଏବଂ ଇମିଗ୍ରେସନ୍ କାଉଣ୍ଟର ମଧ୍ୟରେ ପାରସ୍ପରିକ ନିର୍ଭରଶୀଳତାକୁ ଧ୍ୟାନରେ ରଖି ଏକ ବ୍ୟାପକ ଢାଞ୍ଚା ବିକଶିତ କରାଯିବ, ଯାହା ଦ୍ୱାରା କୌଣସି ସ୍ପର୍ଶ-ପଏଣ୍ଟରେ ଯାତ୍ରୀଙ୍କ ଆତଯାତ ବାଧାପ୍ରାପ୍ତ ହେବ ନାହିଁ। ସେ କହିଥିଲେ ଯେ ବିମାନ ବନ୍ଦରରେ ପ୍ରତ୍ୟେକ ସ୍ଥାନ ପାଇଁ ଏକ ସମନ୍ୱିତ ଯୋଜନା ପ୍ରସ୍ତୁତ କରାଯାଇଛି, ଯାହାଦ୍ୱାରା ଯାତ୍ରୀମାନଙ୍କ ନିରବଚ୍ଛିନ୍ନ ଯାତାୟାତ ସୁନିଶ୍ଚିତ ହୋଇପାରିବ।

କେନ୍ଦ୍ର ଗୃହମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ଯେ ବର୍ତ୍ତମାନ ନିର୍ମାଣାଧୀନ ୨୧ଟି ବିମାନବନ୍ଦର ଏବଂ ଅବଶିଷ୍ଟ ୪୧ଟି ବିମାନବନ୍ଦରକୁ ବେସାମରିକ ବିମାନ ଚଳାଚଳ ସୁରକ୍ଷା ବ୍ୟୁରୋର (ବିସିଏଏସ) ଦ୍ୱାରା ନିର୍ଦ୍ଧାରିତ ସୁରକ୍ଷା ମାନଦଣ୍ଡ ଅନୁଯାୟୀ ଯାତ୍ରୀ ଯାତାୟାତ ଆଧାରରେ ବିକାଶ ପାଇଁ ପ୍ରାଥମିକତା ଦିଆଯିବ। ଆଗାମୀ ଦୁଇ ବର୍ଷ ମଧ୍ୟରେ ସମସ୍ତ ୬୨ଟି ବିମାନ ବନ୍ଦରର କାର୍ଯ୍ୟ ଶେଷ କରିବାକୁ ସେ ନିର୍ଦ୍ଦେଶ ଦେଇଛନ୍ତି। 

ଶ୍ରୀ ଅମିତ ଶାହ ମଧ୍ୟ ବେସାମରିକ ବିମାନ ଚଳାଚଳ ମନ୍ତ୍ରଣାଳୟକୁ ଯାତ୍ରୀ ସଂଖ୍ୟା ଏବଂ ବିମାନ ଯାତାୟାତ ଆଧାରରେ ସମସ୍ତ ବିମାନବନ୍ଦରରେ ଏରୋବ୍ରିଜେସ୍‍ ସଂଖ୍ୟା ପାଇଁ ନିୟମ ସ୍ଥିର କରିବାକୁ ନିର୍ଦ୍ଦେଶ ଦେଇଛନ୍ତି। ସେ ଆହୁରି ନିର୍ଦ୍ଦେଶ ଦେଇଛନ୍ତି ଯେ ବର୍ତ୍ତମାନ ୧୬ ଟି ପ୍ରମୁଖ ବିମାନବନ୍ଦରରେ ଉପଲବ୍ଧ ବ୍ୟାଗେଜ୍ ଡ୍ରପ୍ ସୁବିଧା ଅଧିକ ଯାତ୍ରୀ ଭିଡ ଥିବା ଅନ୍ୟ ଅନ୍ତର୍ଜାତୀୟ ବିମାନବନ୍ଦରକୁ ମଧ୍ୟ ବିସ୍ତାର କରାଯିବ। ସେ କହିଥିଲେ ଯେ ଏକ୍ସ-ରେ ସ୍କ୍ରିନିଂ ପାଇଁ ନିୟୋଜିତ କେନ୍ଦ୍ରୀୟ ଶିଳ୍ପ ସୁରକ୍ଷା ବାହିନୀ (ସିଆଇଏସ୍ଏଫ୍) କର୍ମଚାରୀଙ୍କ ପାଇଁ ନିର୍ଦ୍ଧାରିତ ଶିକ୍ଷାଗତ ଯୋଗ୍ୟତା ହ୍ରାସ କରାଯିବା ଉଚିତ ନୁହେଁ। ଆବଶ୍ୟକ ଶିକ୍ଷାଗତ ଯୋଗ୍ୟତା ଥିବା ଅଧିକାରୀ ଏବଂ କର୍ମଚାରୀଙ୍କୁ ଏକ୍ସ-ରେ ସ୍କ୍ରିନିଂ ଦାୟିତ୍ୱରେ ନିୟୋଜିତ କରିବାକୁ ମଧ୍ୟ ସେ ନିର୍ଦ୍ଦେଶ ଦେଇଛନ୍ତି। 

ଶ୍ରୀ ଶାହ କହିଛନ୍ତି ଯେ ୨୦୨୭ ସୁଦ୍ଧା ସମସ୍ତ ରାଜ୍ୟର ମୁଖ୍ୟାଳୟରେ ବିଦେଶୀ ଆଞ୍ଚଳିକ ପଞ୍ଜୀକରଣ କାର୍ଯ୍ୟାଳୟ (ଏଫ୍ଆରଆରଓ) କାର୍ଯ୍ୟକ୍ଷମ ହେବା ଉଚିତ। ସେ ଏହା ମଧ୍ୟ ନିର୍ଦ୍ଦେଶ ଦେଇଛନ୍ତି ଯେ ଅଗରତାଲା ଏବଂ ଜେୱାର ବିମାନବନ୍ଦରରେ ପ୍ରାଧିକୃତ ଇମିଗ୍ରେସନ୍ ଚେକପଏଣ୍ଟଗୁଡିକ ଯଥାଶୀଘ୍ର କାର୍ଯ୍ୟକ୍ଷମ କରାଯିବ। ସେ ଆହୁରି ମଧ୍ୟ କହିଛନ୍ତି ଯେ, ଫାଷ୍ଟ ଟ୍ରାକ୍ ଇମିଗ୍ରେସନ୍-ଟ୍ରଷ୍ଟେଡ୍ ଟ୍ରାଭେଲର୍ସ ପ୍ରୋଗ୍ରାମ୍ (ଏଫଟିଆଇ-ଟିଟିପି) କୁ ଲୋକପ୍ରିୟ କରିବା ପାଇଁ, ବିମାନ ଚଳାଚଳ ସଂସ୍ଥା ସହିତ ସମନ୍ୱୟ ରକ୍ଷା କରି ଏକ ବ୍ୟବସ୍ଥା ପ୍ରତିଷ୍ଠା କରାଯିବା ଉଚିତ, ଯାହା ଦ୍ୱାରା ଅନ୍ତର୍ଜାତୀୟ ଟିକେଟ୍ ବୁକ୍ କରିବା ସମୟରେ ଯାତ୍ରୀମାନଙ୍କୁ ଏକ ହ୍ୱାଟ୍ସଆପ୍ ବାର୍ତ୍ତା ପଠାଯାଇ ସେମାନଙ୍କୁ ଏଫଟିଆଇ-ଟିଟିପି ପାଇଁ ପଞ୍ଜୀକରଣ କରିବାକୁ ଅନୁରୋଧ କରାଯିବ। 

ଶ୍ରୀ ଅମିତ ଶାହ କହିଥିଲେ ଯେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏବଂ କେନ୍ଦ୍ରୀୟ ଶିଳ୍ପ ସୁରକ୍ଷା ବାହିନୀ, ପ୍ରମୁଖ ବିମାନ ବନ୍ଦରଗୁଡ଼ିକର ସମସ୍ତ ପଏଣ୍ଟରେ ଯାତ୍ରୀଙ୍କ ବିଳମ୍ବକୁ ଆକଳନ କରିବା ଏବଂ ହ୍ରାସ କରିବା ପାଇଁ, ବ୍ୟସ୍ତବହୁଳ ଯାତ୍ରା ଋତୁ ସମୟରେ ସ୍ୱତନ୍ତ୍ର ଭାବେ ତୃତୀୟ-ପକ୍ଷ ଅଧ୍ୟୟନ କରିବା ଉଚିତ।

HS/Swadhin/Manoj