কেন্দ্রগী মন্ত্রীমন্দলগী ঐহাক্কী মরুপ অমিত ভাই শাহ, গজেন্দ্র সিংহ শেখৱাত, ৱেস্ত বেঙ্গলগী থৌনা ফরবা মুখ্য মন্ত্রী শুভেন্দু অধিকারি, বি.জে.পি.গী মকোক থোংবা মেম্বর অমসুং ঐহাককুম্বা শিন্মী লাখ কয়াগী ফিদম্নফম ওইরিবা, শ্রী মখানলাল জী, বি.জে.পি.গী স্তেত প্রসিদেন্ত শামিক ভত্তাচার্য়, ইকায় খুম্নরবা মীয়ামগী মীহুৎশিং, মশক নাইবা মীথুংলেনশিং, নুপীশিং অমসুং নুপাশিং!

ময়াম পুম্নমক্তা ঐহাক্না খুরুমজরি!

ঐহাক্কী মাংজৌননা লেপখিবা প্রোগ্রাম্না মরম ওইদুনা, ঐহাক হৌজিক চৎলি। অদুবু তেক্নোলোজীগী মতেংগা লোয়ননা, ঐহাক্না মসিগী পুৱারী ওইরবা থৌরম অসিদা নখোয়গা শরুক য়াবা ঙমজরি।

মরুপশিং,

ঙসি, ঐখোয়গী লৈবাক্কী লৈহাও, নোংচুপ বেঙ্গলগী লৈহাওনা, ভারতকী অপুনবা শক্তমগীদমক কত্থোকখিবা অথোইবা লৈবাক নীংবা মীশক, মীৎয়েং শানবা মীশক অমা - মহাক্কী অথোইবা মচানুপা অমবু ইকায় খুম্নবা উৎতুনা নীংশিংলি। ঙসি ঐখোয়না মহাক্না থারমখিবা ৱাখল্লোনগী মহৈ অদুবু পালন তৌরি, মদুনা হৌজিক্তি মফম খুদিংমক্তা মপুং ফানা মহৈ য়ালি, অমসুং মোদর্ন ইন্দিয়াগী লমজিং-লমতাকপদা অচৌবা থৌদাং অমা লৌরি।

মরুপশিং,

ৱাখল্লোনশিং অসি মপুং ফানা ঙাকনা চৎপা মতমদা, ৱাখল্লোনশিং অসি মপাঙ্গল কনবা অমসুং অশেংবা ওইরবা মতমদা, অনৌবা ৱারেপশিং অসি মপুং ফানা কত্থোকপগা লোয়ননা ফংনবা হোৎনবা মতমদা, অমসুং মসিগুম্বা মরীশিং অসি অমত্তা ওইনা পুনশিনবা মতমদা, মায় পাকপা হায়বসি শোইদনা ফংগনি। দোক্তর. শ্যামা প্রসাদ মুখর্জীনা অসিগুম্বা পুন্সি অমা হিংখি। মহাক্কী ১২৫শুবা মপোক কুমওনগী থৌরমদা ঐহাক্না মহাকপু ইকায় খুম্নবা উৎচরি।

মরুপশিং,

মসিগী প্রোগ্রাম অসিসু নেসন ফার্স্ত হায়বা অসিদা সরকারনা অচেৎপা থাজবা থম্বা মতমদা, নেস্নেল হেরোশিংবু ইকায় খুম্নবা উৎলি অমসুং মখোয়গী ৱাখল্লোন অদুগী লম্বীদা চৎনবা হোৎনরি হায়বসিগী খুদম্নি। ঐখোয়গী সরকারনা দোক্তর মুখর্জীগী ১২৫শুবা মপোক কুমওন অসি চহি অনি চুপ্না নেস্নেল ফেস্তিবেল অমা ওইনা পাংথোক্লি। মমাং চহিগী জুলাই ৬তগী হৌখি অমসুং মথং চহিগী জুলাই ৬ ফাওবা মখা চত্থখিগনি। অমসুং হৌজিক, বেঙ্গলদা বি.জে.পি.গী সরকার অমা লৈরকপগা লোয়ননা, মসিগী জাতিগী থাক্তা ইকায় খুম্নবা অসিনা হেন্না মতিক-মগুন য়াওরক্লি। নুমিৎ খরনিগী মমাংদা, জুন ২০দা, ৱেস্ত বেঙ্গল দে অসি চাউনা পাংথোকখি। মসি বেঙ্গলগী লম অমসুং হেরিতেজদা ইকায় খুম্নবা অমনি। ঙসিগী প্রোগ্রাম অসি হেরিতেজকীদমক ইকায় খুম্নবা অদুগা মান্নবা অমনি। অসিগুম্বা চাউথোকচনীংঙাই ওইবা থৌরম অমা শীনবগীদমক ঐনা ৱেস্ত বেঙ্গল সরকারবু থম্মোয় শেংনা থাগৎপা ফোংদোকচরি।

মরুপশিং,

দোক্তর. মুখর্জীগী পুন্সি অসি ৱাখল্লোন অমদগী হৌরগা মীয়ামগী খোঙজং অমা ওইরক্নবা ইথিল পীরিবা থৌওং অমনি। মহাক্না ভারত্তা আইদিওলোজিকেল ওইবা ইহৌ অমা লাকহনখি। জন সঙ্ঘ লিংখৎলকপা মতমদা, মফম খুদিংমক্তা কংগ্রেসনা লৈঙাক্লম্মি। অসিগুম্বা মতম অমদা, অতোপ্পা ৱাখল্লোনগী মফম অমা লৈতবা, লম্বী অমা ফংবদা অৱাবা লৈরকপা মতমদা, দাদোক্তর মুখর্জীনা ওইরিবা ফীভমশিং অদুদা শীংনখি অমসুং অনৌবা ৱাখল্লোন অমা পুথোক্নবগী থৌনা লৈখি। মসি ওর্গনাইজেসন অমা নৎত্রগা পোলিতিকেল পার্তী অমা শেম্নবা ৱারেপ অদু খক্তমক নত্তে। মসি ৱাখল্লোনগী খেন্নবশিং, জাতিগী ৱাখল্লোন, অমসুং দিমোক্রেসীদা মীয়াম্না শরুক য়াবদা মহাক্কী থাজবা অদুগী ময়েক লারবা খুদম ওইখি। মসিগী থাজবা অসিদগী, ভারত জন সংঘ অসি পোকখি।

মরুপশিং,

ৱাখল্লোন অমা হেক্তা হৌদোকপা খক্তনা অমর ওইবা নত্তে। ৱাখল্লোন অমবু মীরোল কয়ানা মখোয়গী পুন্সিগা লোয়ননা মদুবু য়োকখৎলবা মতমদা অমর ওইরকই। জন সঙ্ঘকী মৈরি অসি চাকহন্দুনা থম্নবা, শিন্মী লাখ কয়ানা মখোয়গী পুন্সি, মীকুপ অমগী মতুং মীকুপ অমা, কত্থোকপা অমগী মতুং কত্থোকপা অমাগা লোয়ননা হোৎনখি। মখোয়না মৈরি অদু কৈদৌঙৈদা মুৎহনখিদে। ঙসিদি, জন সংঘ অসি মসিগী অশেংবা মওংদা উবা ফংদ্রবসু, মৈ অদুগী মঙাল অসি ভারত মচা করোর কয়াগী থাজবা ওইদুনা শন্দোরক্লি। ঙসিদি মঙাল অসি লৈবাক অসিগী মফম খুদিংমক্তা থম্বাল মিলিয়ন কয়ানা লৈশাৎ তম্বগী মওংদা শন্দোরক্লি। মতম অমদা জন সংঘ অমা ওইরম্বা অদু ঙসিদি ভারত জনতা পার্তী ওইরে - মীয়ামগী সেবা তৌরিবা মালেমগী খ্বাইদগী চাউবা দেমোক্রেতিক ফোর্সনি।

মরুপশিং,

মতমগী মতুং ইন্না ৱাখল্লোন খরনা মখোয়গী অপাম্বা হন্থরকপা ঐখোয়না তোইনা উবা ফংই। অদুবু খল্লু - দোক্তর কে. মুখর্জীনা থারমখিবা মরু অদুনা কয়াদা শক্তি লৈরিবা, চহি কয়াগী মতুংদা, মসি য়াম্না থুনা মখা তানা পাকথোক চাউথোরক্লি। ঐহাক্না থাজবা থম্লি মদুদি লাক্কদৌরিবা মীরোলশিংনা বি.জে.পি.গী পুৱারী ইবা মতমদা, মখোয়না মসি নৈনবদা, মখোয়না দোক্তর শ্যামা প্রসাদ মুখর্জীবু, মহাক্কী থৌনা অমসুং মহাক্কী মীৎয়েং শানবা মতৌবু শোইদনা নীংশিংগনি। অমসুং ঐহাক্না অমুক্কা হন্না হায়জনীংবদি - বেঙ্গলগীদমক, নুংঙাইবা শরুক অনি ওইরি। অহানবদা, দোক্তর মুখর্জীগী ১২৫শুবা মপোক কুমওন। অমসুং অনিশুবদা, মহাক্কী মীৎয়েংদগী পোক্লকপা বি.জে.পি সরকার অমগী মখাদা বেঙ্গলদা মশামক চাউনা পাংথোকপা থৌরম। মসি ৱেস্ত বেঙ্গলগী মীয়াম্না মখোয়গী অথোইবা মচানুপাগী মফমদা থম্মোয় শেংনা পীবা ইকায় খুম্নবা অমনি।

মরুপশিং,

সংসদতা মহাক্কী ৱারোল অমদা, দোক্তর মুখর্জীনা ঙসি ফাওবা ঐখোয়দা ইথিল পীদুনা লাক্লিবা ৱাফম অমা হায়রম্মি। মহাক্না হায়খি: “নেস্নেল য়ুনিতীনা য়ুম্ফম ওইরগা খক্তা সনাগী তুংলমচৎ অমগী য়ুম্ফম থোনগনি।” অমসুং তশেংনমক, ভারতনা চাউথোকচবা ফাওনা হায়জবা য়াই মদুদি দোক্তর. মুখর্জীনা মহাক্কী অরোইবা মীকুপ ফাওবা মসিগী থাজবা অসিগা লোয়ননা হিংখি। ইং ১৯৪৭, লৈবাক অসি খায়দোকপা মতমদা অমসুং অতোপ্পা অৱাবা অমা লাকপা মতমদা - বেঙ্গল পুম্নমকপু ভারত্তগী তোখায়হন্নবা ৱাখল্লোন কয়া অমা থোরকলমখি। মতম অদুদা, দোক্তর মুখর্জীনা অসিগুম্বা প্লোৎশিং অসিগী মায়োক্তা শিংথানিংঙাই ওইবা মওংদা লেপখি। মহাক্না মীয়ামগী ৱাখল্লোন পুখৎখি, রাজনিতীগী লান থেংনখি অমসুং ৱেস্ত বেঙ্গল অসি ভারতকী শরুক অমা ওইহন্নবা হোৎনখি। মদুগী মতুংদা দোক্তর. শ্যামা প্রসাদ মুখর্জীনা হায়খি: "কংগ্রেস দেস ভাগ কোরেছে, অমি পাকিস্তান কে ভাগ কোরেছি।" মসিগী ৱাহন্থোক অদুদি কংগ্রেসনা লৈবাক অসিবু খায়দোকখি, অদুবু ঐহাক্না পাকিস্তান অসিবু খায়দোকখি।

মরুপশিং,

মদুগী ঈহৌ, মদুগী পাঙ্গল, মদু রাজনিতীনা উৎকনি - ঙসিগী ফিভম অসিদা ঐখোয়না য়েংবা মতমদা মদুগী পাঙ্গল অদু ফাওবা ঙম্মী।

মরুপশিং,

দোক্তর. মুখর্জী অসি এক ভারত, শ্রেস্থ ভারতকী মঙলান অদুদা মপুং ফানা কত্থোকখি। মরম অদুনা, কন্সতিত্যুসন অনি, প্রধান মন্ত্রী অনি, অমসুং ফিরাল অনিগী ৱাখল্লোন পুখৎলকপা মতমদা, মহাক্না মদুবু কন্না য়ানীংদবা ফোংদোকখি। মহাক্না লৈবাক অসিদা মন্ত্র অসি পীরম্মি: এক দেশে দুই বিধান, দুই প্রোধান ইবোং দুই নিশন - অমরা কোখোনো মিনে নেবো না।” অতোপ্পা ৱাহৈদা হায়রবদা: লৈবাক অমদা, সংবিধান অনি, প্রধান মন্ত্রী অনি, অমসুং ফিরাল অনি - অসি অয়াবা পীরোই, অয়াবা পীরোই। মসি স্লোগান অমা খক্তা নত্তে। মসিদা মান্নবা হকশিং, সংবিধান অমা, অমসুং অমত্তা ওইবা নেস্নেলগী কন্সিয়সনেসকী ৱাখল্লোন অমা য়াওখি। মহাক্না হায়রিবা প্রিন্সিপলশিং অসিগীদমক লান্থেংনখি, জেলদা চংখি, অমসুং অরোইবদা কাশ্মীরগীদমক্তা মহাক্না চাউনা কত্থোকখি। ঙসি, ঐখোয়গী সরকারনা চাউথোকচরি মদুদি আর্তিকল ৩৭০ লৌথোক্তুনা, ঐখোয়না দোক্তর মুখর্জীগী মঙলান অদু মপুং ফাহনখি।

মরুপশিং,

ঙসি ঐখোয়না এক ভারত, শ্রেস্থ ভারতকী মতাংদা ৱা ঙাংলিবা মতমদা, মসি দাক্তর মুখর্জীগী পুন্সিনা মশক তাকখিবা লৈবাক অসিগী মঙলান অদুগী পাকথোক চাউথোকপা অমনি। অৱাং অমসুং খাগী মরক্তা অরাপ্পা অমত্তা লৈতবা, নোংপোক অমসুং নোংচুপ্না মান্নবা খুদোংচাবশিং ফংলিবা, ভারতকী অপুনবা মপাঙ্গলদা রাজ্য খুদিংমক্না মশাগী তোপ তোপ্পা মশক অমা হাপচিল্লিবা, অমসুং নাগরিক খুদিংমক সংবিধান অমা খক্তনা, লৈবাক অমগী ৱাখল্লোন অমা খক্তনা, অমসুং অপুনবা তুংলমচৎ অমা খক্তনা শম্নবা ভারত অমগী ৱাখল্লোন লৈখি। দোক্তর মুখর্জীনা ইথিল পীরদুনা ঙসিদি ভারতকী সংবিধান অসি লৈবাক শীনবা থুংনা মপুং ফানা চৎনরি মসিনা নাগরিক মিলিয়ন কয়াদা ইথিল পীরিবা অসিদা ঐহাক্না নুংঙাইবা পোকই।

মরুপশিং,

দোক্তর মুখর্জীনা লৈবাক শেমগৎপা হায়বসি ইন্সতিত্যুসন শেমগৎপদা য়ুম্ফম ওই হায়বা অসি ফজনা খঙলম্মি। চহি ৩৩ শুরকপদা মহাক কোলকাতা য়ুনিভর্সিতীগী খ্বাইদগী নহা ওইরবা ভাইস-চাঞ্চেল্লর ওইখি। অদুম ওইনমক, মহাক্না মসিগী থৌদাং অসি ওফিসিএলগী থৌদাং অমা খক্তং ওইনা লৌখিদে। মহাক্না য়ুনিভর্সিতীবু ভারতকী তুংলমচৎ শেমগদবা ইন্সতিত্যুসন অমা ওইনা উখি। মহাক্না এজুকেসনবু কোলোনিএল সর্ভিচুদকী ৱাখল্লোনদগী লাপথোক্নবা হোৎনখি। মহাক্না হায়খি: “বঙ্গো-জতির অত্তো-শোমন পুনোর-উদ্ধার ইবোং মেত্রী-ভশার মাধ্যোমে শিখর প্রোশার ই অমদের প্রোধান লোকখো হোৱা উচিত।” হায়বদি, বেঙ্গোলগী মীয়ামগী ইকাই খুম্নবা অমুক হন্না শেমগৎপা অমসুং ইমা লোলগী খুত্থাংদা এজুকেসন শন্দোকপা অসি ঐখোয়গী খ্বাইদগী মরুওইবা পান্দম ওইগদবনি। মহাক্না থাজখি মদুদি করিগুম্বা ভারত অসি মশানা থাজবা লৈবা লৈবাক অমা ওইরক্লবদি, মসিগী এজুকেসন অসি ভারতকী থম্মোয়দা মপুং ফানা লৈগদবনি। মসিগী ৱাখল্লোন অসিগী মতুং ইন্না মহাক্না ভারতকী লোলশিংদা ইকায় খুম্নবা উৎখি। ঙসিদি, অনৌবা নেস্নেল এজুকেসন পোলিসীগী মখাদা, লমদমসিগী লোলশিংদা এজুকেসনদা মরুওইবা পীরকপা অসিদা ঐখোয়না চাউথোকচবা পোকই – মসিনা দোক্তর মুখর্জীনা শাগৎচরম্বা মঙলান অদু থুংহল্লি।

মরুপশিং,

নীংতম্লবা ভারতকী অহানবা ইন্দস্ত্রী মন্ত্রী ওইনা মহাক্না ইন্দস্ত্রীগী চাউখৎ-থৌরাংগী পাক চাউরবা মীৎয়েং অমা থমখি। মহাক্না নেস্নেল ইন্সতিত্যুসনশিং লিংখৎখি অমসুং মখোয় অসি চহি তরাগী খুজিং কয়াগী ওইনা ভারতকী শেন্মিৎলোনগী মপাঙ্গলগী য়ুম্বী ওইখি। চিত্তরঞ্জন লোকোমোতিব ৱার্কসনা ভারতকী রেলৱেজদা অনৌবা থৌনা পীখি। সিন্দ্রি ফর্তিলাইজর প্লান্ত অসি লৌউ-শিংউগী লমদা মশা-মরোমদোম লেপচনবগী মায়কৈদা অচৌবা খোঙথাং অমনি। দামোদর ভেলী কোর্পোরেসন্না ইনর্জী অমসুং ইরিগেসনদা অনৌবা পন্দুপ অমা হাংদোকখি। ইন্দস্ত্রীএল ফাইনান্স কোর্পোরেসন ওফ ইন্দিয়া (আই.এফ.সি.আই.) না ভারতকী ইন্দস্ত্রীশিংদা শেল-থুমগী ওইবা য়ুম্ফম অমা পীখি।

মরুপশিং,

মহাক্কীদমক্তদি ইন্দস্ত্রী অমসুং ফেক্তরীশিং অসি ৱার্কশোপ খক্তমক নত্তে। য়ুনিভর্সিতীশিং অসি দিগ্রী পীবগী মফম খক্তা নত্তে। রিসর্চ ইন্সতিত্যুসনশিং অসি এক্সপরিমেন্তশিং পাংথোক্নবা মফমশিং খক্তা নত্তে। মহাক্কীদমক্তদি, মসি পুম্নমক অসি লৈবাক্কীদমক কত্থোকপগী ময়োললমশিং ওইরি। মহাক্না হৈশিংবা মীওইশিংদা খুদোংচাবা পীরিবা ইন্সতিত্যুসনশিং, ইন্নোবেসনবু পুক্নিং থৌগৎলিবা এজুকেসন, মশা-মরোমদোম লেপচবগী য়ুম্ফম ওইরিবা ইন্দস্ত্রীশিং অমসুং মপাঙ্গল কনবা ভারত অমগীদমক তুংগী মীরোনশিংদা শক্তি পীনবা সিস্তেমশিংদা থাজবা থমখি। মসিগী ৱাখল্লোন অসিনা ঙসিগী চাউখৎলবা ভারতকী মঙলান অসিগী মখাদা ইথিল পীরি।

মরুপশিং,

মসিগী থৌরম অসিদা, ঐহাক্না বেঙ্গলগী নহারোলশিং অমসুং লৈবাক অসিগী নহারোলশিংদা হায়জরি মদুদি: দোক্তর মুখর্জীনা মহাক্কী পুন্সি অসি এক ভারতকীদমক কত্থোকখি। ঐখোয়না শ্রেস্থ ভারতকীদমক হিংগদবনি। পুন্না হোৎনমিন্নদুনা, ঐখোয়না চাউখৎলবা ভারত অমগী ৱারেপ অদু মপুং ফাহনগদবনি। ঐখোয়না লৈবাক অসিবু মশা-মরোমদোম লেপচবা ঙম্বা ওইহনবা তাই। মসিগী ৱারোল অসিগা লোয়ননা ঐহাক্না অমুক্কা হন্না দোক্তর মুখর্জীগী মফমদা ইকায় খুম্নবা উৎচরি। অমসুং ঐহাক্না মহাক্না হায়রমখিবা ৱাহৈশিং, মহাক্কী মশাগী ৱাখল্লোনগা লোইশিনজরি: "জে কাজ ই হেতে নাও না কেনো, তা এতিওনোন্তো গুরুত্তো শোহোকারে কোর্তে হোবে।" ৱাহন্থোক: নহাক্না থবক অমা হেক্তা পায়খৎলবদি, মদু য়াম্না মরু ওইবা মওংদা, পুক্নিং চংনা, মপুং ফানা থম্মোয় শেংনা পাংথোকউ। থবক অমত্তা লোইশিন্দনা তোক্কনু - মতম পুম্নমক্তা মদু লোইনবা পাংথোকউ। দোক্তর মুখর্জীগী ৱাহৈশিংদ অসিগী ইথিল লৌবগা লোয়ননা ঐহাক্না ময়াম পুম্নমকপু থম্মোয় শেংনা য়াইফ-পাউজেল পীজরি।

হন্না-হন্না থাগৎচরি!

খঙহঞ্জবা- মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

*****