Kum ka dak jong u mawmer ba kongsan ha kaba pynkhlain ia ki lad kamai jakpoh ha ki jaka nongkyndong bad ban kyntiew ia ka jingthmu na ka bynta ki jaka nongkyndong jong ka ri India kiba la kiew, ka Viksit Bharat – Guarantee for Rozgar and Aajeevika Mission (Gramin) [VB-G RAM G] Act, 2025 ka la treikam ha baroh kawei ka ri naduh mynta ka sngi. Da ka jingsdang jong kane ka aiñ, ki longïing ha ki jaka nongkyndong kiba dei hok ban ioh bynta mynta kin ïoh ïa ka hok katkum ka aiñ ban ïoh 125 sngi ka jingtrei kaba ioh jingsiew kaba la pynthikna. Ka ain ka ialeh ban pynlong ia ka jingioh kam ioh jam ha ki jaka nongkyndong kaba kham biang, kaba shai bad kaba iadei bad ka jingmih katba ka pynsted ia ka jingwanrah ia ki jingdon jingem kiba iaineh ha ki jaka nongkyndong, ka jingpynneh pynsah ia ki jingdon jingem ka mariang, ka jingkyntiew ia ka jingmih ha ka rep ka riang, ka jingkyntiew ia ka kamai kajih bad ka roi ka par kaba ialam da ki kynthei.

Da ka jingtreikam kane ka aiñ, ka sorkar India ka la pynbna ruh ïa ki dor bai bylla ba la pynkylla hapoh ka VB-G RAM G, 2025 na ka bynta baroh ki Jylla, ki Union Territory bad ki jaka ba la pyntip na ka bynta ka bai bylla. Kumta, ym don ka jingsiew bai bylla ba la pynbna ha kano kano ka jaka ha ka ri ka ban duna ia ka T.300. Ka bai bylla ba la pynbna ha ka ri baroh kawei ka la kiew na ka T.298.8 shisngi sha ka T.327.4 shisngi, kaba pyni ia ka jingkiew kaba palat ia ka 10 percent. Ki jylla kum ka Uttar Pradesh, Bihar, Jharkhand, West Bengal, Assam, Arunachal Pradesh bad Himachal Pradesh ki la sakhi ïa ka jingkiew ka bai bylla kaba long naduh 15 haduh 25 per cent. Ban pynthikna ia ka jingpyntreikam kaba iaid beit iaid ryntih ia ka ain naduh ka sngi kaba nyngkong, ka Sorkar ka la dep pyllait ia ka mang tyngka ba shipor kaba T.95,692.31 klur sha ki Jylla bad ki Union Territory ban pynsuk ia ka jingpynmih ia ki lad ioh kam khlem jingthut, ka jingsiew ia ka bainong ha ka por bad ka jingpyntreikam ia ki kam pynroi.

U Myntri Sorkar Pdeng ba dei khmih ia ka Tnad Rural Development and Agriculture & Farmers’ Welfare, u Shivraj Singh Chouhan u la ong ba mynta ka sngi kadei ka sngi kaba kongsan bad kaba ym pat ju jia mynno mynno ruh na ka bynta ki jaka nongkyndong jong ka ri India. U la ong ba hapoh ka jingialam jong u Myntri Rangbahduh ka ri u Narendra Modi, ka VB-G RAM G Act kam dei tang ka ain kaba thymmai hynrei kadei ka sienjam kaba wanrah jingkylla kaba wanrah ia ka juk kaba thymmai jong ka burom, ka jingburom ialade bad ka jingshngain ha ka kamai kajih na ka bynta ki million ngut ki nongtrei ha ki jaka nongkyndong. U la ong ba ki longiing ha ki jaka nongkyndong kiba dei hok ban ioh bynta mynta kin ioh ia ka hok katkum ka ain ban ioh kam na ka bynta 125 sngi ha ka jaka jong ka 100 sngi. U Chouhan u la ban jur ba ka jingthmu ba kongsan tam jong ka Sorkar kalong ban pynthikna ba yn ym don uwei ruh u nongtrei ha ki jaka nongkyndong uba dei hok ban ioh un duh kam wat tang shi sngi ruh. U la bynrap ruh ba ka Sorkar Pdeng bad ki Jylla ki la pyndep ïa baroh ki jingpynkhreh ha ka liang ka jingpyniaid kam, ka pisa tyngka bad ka teknoloji na ka bynta ka jingpyntreikam kaba iaid beit iaid ryntih ïa kane ka aiñ. Haba pynpaw ïa ka jingshaniah ha kane ka sienjam, u la ong ba kan plie ïa ki lad kamai jakpoh kiba thymmai ha ki shnong ki thaw, kan pynsted ïa ka jingthaw ïa ki jingdon jingem kiba iaineh, kan pynkhlaiñ ïa ka jingpynkupbor ïa ki kynthei bad kan ai ka bor ba thymmai ïa ka jingthmu jong ka Atmanirbhar bad Viksit Rural India. U la kyntu ruh ïa baroh ki nongshong shnong ban long ki nongiatreilang ban tei ïa ki shnong kiba riewspah, kiba la pynkupbor bad kiba lah ban kyrshan ialade.

Ban rakhe ia ka jingpyntreikam ïa ka VB-G RAM G Act, 2025 ha ka ri baroh kawei, yn pynlong ïa ka prokram plie paidbah ha ka ri baroh kawei ha ka 2 tarik Naitung 2026 ha ka Shnong Mukkavaripalle, Obulavaripalle Mandal, Tirupati District, Andhra Pradesh. Ha kane ka prokram yn iadonlang u Myntri sorkar pdeng ba dei khmih ia ka Tnad Rural Development and Agriculture & Farmers’ Welfare u Shivraj Singh Chouhan, u Myntri Rangbah ka jylla Andhra Pradesh N. Chandrababu Naidu, u symbud Myntri Rangbah Konidela Pawan Kalyan, u Myntri Khynnah Dr. Chandra Sekhar Pemmasani, Myntri Khynnah u Kamlesh Paswan, lem bad kiwei kiwei ki kynrem ki lyndan.

Ha ka prokram plie paidbah ha ka ri baroh kawei yn don ka jingplie paidbah ia ka VB-G RAM G, ka jingsam ia ki Rural Employment Guarantee Card sha ki nongioh jingmyntoi, ka jingplie paidbah ia ka rynsan VB-G RAM G software, ka jingpyllait ia ki kot ba kongsan, ka jingiakren bad ki nongioh jingmyntoi, bad ka jingplie ia ki katto katne ki sienjam kiba thmu ban pynthikna ia ka jingpyntreikam kaba paka ia ka Ain.

***