U Myntri kam pohiing jong ka sorkar pdeng uba dei ruh u Myntri ka tnad iatreilang u Amit Shah u la pyniaid ia ka apex-level meeting kaba 10 jong ka Narco-Coordination Centre (NCORD) ha New Delhi mynta ka sngi. U Myntri kam Pohïing u la pyllait ïa ka ‘Vision Document on Control Drugs (2026-2029)’ bad ka ‘NCB Annual Report-2025’, bad u la plie paidbah ruh lyngba ka bor internet ïa ki NCB zonal office ha Jammu bad Guwahati. U Amit Shah u la pyllait paidbah ruh ïa ka ‘Online Drugs Disposal Fortnight Campaign’ na ka bynta ban pynduh pyndam ïa ki jingdih pynbuaid kiba khia haduh 2,09,500 kilo bad kiba shongdor haduh T.6,000 klur.

Ha ka jingai jingkren, u Myntri kam pohiing jong ka sorkar pdeng u Amit Shah u la ong ba mynta ka sngi ka ri jong ngi ka don ha ka por kaba kongsan ha ka jingiakhun pyrshah ia ki jingdih pynbuaid, ha kaba ki lai snem ban wan kin rai la ka jingkyrni kan jop ia ngi ne ngin jop ia ka jingkyrni. U la ong ba na ka bynta ka lawei jong ka ri ha kine ki 100 snem ban wan, ngi dei ban jop ia kane ka thma da ka jingkut jingmut kaba skhem bad ka jingpyrshang lang. Ia kane ka jingiakhun ym lah ban leh marwei da kano kano ka tnad, ka jylla, ka sorkar, ne ki briew. Hynrei, baroh ki jylla bad ki tnad ba dei peit kidei ban iawan lang ha kawei ka rynsan. Ha kane ka jingiakhun, ngi dei ruh ban kynthup ia ki briew kiba ai mynsiem ia ki paidbah, ki samla ki ban pynwandur ia ka lawei jong ka ri, bad ka bor jong ki kynthei jong ngi. Tang kumta ngi lah ban ioh ia ka jingjop kaba pura ha kane ka thma. U Shah u la ban jur ba ka jingeh jong u drok kam dei tang ka kam ba iadei bad ka shongsuk shongsain ne ka koit ka khiah jong ki briew. Ka iadei bha bad ka jingshngain hapoh ka ri, ka jingshong suk shong sain ha ka imlang sahlang, ka jingiada ia ki jingmyntoi ha ka ioh ka kot, bad ka lawei jong ki samla jong ngi bad, lyngba jong ki, ka lawei jong ka ri. Ka jingïoh ïa ka jingjop kaba pura halor kane ka jingeh ka dei ban long ka thong jong baroh ha ka ri na ka bynta baroh ki jylla jong ka India.

U Amit Shah u la ong ba ryngkat bad ka jingkhaii drok, ki kam runar ba la pynbeit ryntih, ka jingbei tyngka ia ki kam ba iadei bad ki jingdih pynbuaid, bad ka jingbei tyngka ia ki kynhun lehnoh kiba na shiliang pud, kane ka jingeh ruh ka la nang kylla sha ka kam ha kaba ka don ka jingiadei hapdeng ki kam pyntriem bad ki kam khaii drok. Na ka bynta ka jingshngain hapoh ka ri jong ngi, ka jingiada ia ka ioh ka kot jong ngi, bad ka lawei jong ka pateng ki samla jong ngi, ngi dei ban ioh ia ka jingjop kaba pura halor kane ka jingma. Ngi don ha ka jaka hapdeng ka Death Triangle bad ka Death Crescent. Ki nongkhaii drok ki nang pynlong shuh shuh ïa ka jingïakhun jong ngi kaba kham jynjar da kaba pdiang ïa ki rukom treikam kiba katkum ka juk mynta kum ki jingpynhap da ki drone, ki jingkit lyngba ki lynti duriaw, ka Darknet, ki jingsiew crypto, ki rukom pynbiang mar, ka jingphah ia ki mar, bad kiwei kiwei ki buit kiba kum kita. Mynta ki nongleh kam sniew ki la kylla long kiba la pyndonkam da ka teknoloji bad kiba la pyndonkam da ka rynsan. Mynta ki iakhun ia ngi kum ka rukom treikam kaba sinew bad kaba bun bynta. Ka jubab jong ngi ia kane ka jingiakhun kaba eh kadei ruh ban long kaba iatylli bad kaba la pynbeit ryntih, kaba la pynshong nongrim ha ka jingpynkhreh, kaba katkum ka juk mynta, bad kaba la ialam da ka jingstad. Ka rukom treikam jong ngi kadei ban long kaba pyndonkam ia ka teknoloji, bad ngi dei ban iakhun ia ka thma kaba pynshong nongrim ha ka rynsan da ka rukom treikam kaba tyngeh. Tang kumta ngin sa lah ban pynthikna ia ka jingjop pyrshah ia kane ka jingeh.

U Myntri kam pohiing jong ka sorkar pdeng u la ong ba ngi dei ban pynneh ia ka rukom treikam kaba tyngeh ia kiba donkti ha ka kam khaii drok bad ka rukom treikam kaba don ka jingsngewlem ia kiba shah ktah ha u drok. U la bynrap ruh ba dei ka jingsngewlem bad ka jingsngewkhia jong ngi kaba lah ban pynïasoh biang ïa kine ki khynnah bad ka jingim kaba bha. Ngi hap ban bat ia ka kti jong ki bad ban ialam biang ia ki sha ka lynti kaba dei.

U Amit Shah u la ong ba ha ka jingpyni kaba ​​mynta ka sngi, la pynpaw shai ia ka jingiakhun jong ngi hapoh saw tylli ki rishot, kiba don la ki bynta hapoh jong ki ba la batai shai. La buh ia ki thong na ka bynta kawei pa kawei ka sub-pillar ryngkat bad ki por ban pynurlong ia ki. Ngin sa bishar bniah ia kane ka plan hadien shisnem, ngin sa batai biang ia ka katkum ka jingdonkam, bad nangta ngin sa iaid shakhmat da ka bor kaba thymmai na ka bynta ki ar snem ba khatduh jong kane ka jingiakhun.

U Myntri kam pohiing ka sorkar pdeng uba dei ruh u Myntri ka tnad treilang u la ong ba ka Drug Disposal Fortnight ka la sdang mynta ka sngi. U la ong ba ka jingpynduh pyndam ïa drok ba shongdor T.6,000 klur ha ka shi sngi kadei ka jingjop kaba khraw. Mynta ka sngi, la pyllait paidbah ruh ia ka Annual Report jong ka Narcotics Control Bureau (NCB). La plie paidbah ruh ia ka Vision Document of the Roadmap for Nasha Mukt Bharat. La plie paidbah ruh mynta ka sngi ia ka Zonal Office jong ka NCB ha Guwahati bad Jammu. Haduh mynta, ki la don 15,876 tylli ki jingialang jong ka NCORD ha ki distrik, 266 tylli ki jingialang ha ki jylla, 7 tylli ki jingialang jong ka Executive Committee, bad mynta ka sngi ngi pynlong ia ka jingialang kaba shiphew ha ka kyrdan kaba halor tam. Ki Chief Secretary bad ki Director General of Police jong baroh ki jylla ki dei ban shimkhia ban pynlong ïa ki jingïalang jong ka NCORD kiba seisoh.

U Amit Shah u la ong ba u Myntri Rangbahduh ka ri u Narendra Modi u la buh ia ka jingthmu jong ka Viksit Bharat shuwa u snem 2047 bad u la ai ruh ia ngi ia ka thong jong ka Nasha Mukt Bharat. Ka jingpynkhreh kam naduh u snem 2026 haduh u snem 2029 ba la pynkhreh ban pynurlong ia kane ka thong ka shong ha ki saw tylli ki rishot ba kongsan – Ka jingpyntreikam, ka jingwad bniah bad ki jingtreikam; Ka jingtehlakam ia ki mar ba donkam ban shna ia ki drok; Ka Jingpynduna ia ka jingdawa bad ka jingktah ia ki briew; bad ka Jingkyntiew ia ka bor treikam, ka jingpyniatreilang bad ka jingpeit bniah. Ka jingthmu ka long ban shim ia ki sienjam katkum ki jingtip pyrshah ia ka rynsan baroh kawei bad ban pynduh pyndam ia ka. Ngi dei ban pdiang ia ka rukom treikam ban pynsangeh ia u drok ha ka por ba dang pynmih hi. Ia ka jingialap ban pynduna ia ka jingdawa bad ban pynduna ia ka jingma yn rah shakhmat lyngba ka imlang sahlang, ka jinghikai bad ka jingai jingsumar. Ia ka nongrim kaba saw jong ka Jingkyntiew ia ka bor treikam, ka jingiatreilang bad ka jingpeit bniah la thaw ban pynlong ia ka rukom treikam baroh kawei kaba lah, kaba iadei, kaba don jingkitkhlieh bad kaba katkum ka juk mynta. Ia kane ka jingpynkhreh kam la pynkhreh da kaba buh ha ka jingmut ia ka rukom treikam jong baroh kawei ka sorkar bad jong barh kawei ka imlang sahlang. Ka kynthup ia ka bynta jong uwei pa uwei u nongshong shnong ka Ri India, hynrei ia ka kam ban ai mynsiem ia ki nongshong shnong yn hap ban leh da baroh ki Sorkar Jylla bad ki Secretary jong baroh ki Tnad jong ka Sorkar India. Ka jingjop jong kane ka jingpynkhreh kam bad ka jingpynurlong ha ka por kaba biang ia ki thong jong ka kadei ka jingkitkhlieh lang bad la buh ruh ia ka rukom peit bniah kaba biang.

U Myntri kam pohiing jong ka sorkar pdeng u la ong ba ia ka jingiakhun pyrshah ia u drok lah ban batai ha ki lai tylli ki kyntien – Detect, Disrupt bad Destroy. Ngi hap ban iaid shakhmat ban pynduh jait ia baroh lai jait ki kynhun khaii drok — kito kiba wanrah ia u drok nabar ri shapoh ka ri, kito kiba pynpoi ia ki na ki thain khappud sha ki jylla, bad kito kiba sam ia ki na ki jylla sha ki nongpyndonkam — da kaba pyndonkam ia ka HUMINT, ka teknoloji, bad ka jingpeit bniah ka imlang sahlang ha ki thain khappud bad ki distrik kiba kham don ha ka jingma. Baroh ki kynhun jong ngi kiba iadei bad ki kam pisa kidei ban iatreilang ban pynkhreh ia ka prokram ba iatreilang na ka bynta ban peit bniah ia ka Dark Web, ki jingsiew hawala, ki jingsiew crypto, bad ka jingpyndonkam ia ki kad lieng bad ki kad liengsuin. Hapoh ka Disrupt, ngi dei ban iakhun ia ki nongkhaii drok ha man la ki kyrdan — ki tyllong jong ki, ki lynti pynkit, ka jingbei tyngka, bad ka jinglong nongialam — da ka bor ba pura jong ka ain. Ngi donkam ban sdang ia ka campaign ban pynduh jait ia ki jingthung beain. Ki agency ki dei ban saindur ia ka rukom ban ithuh ia ki jaka test beain bad ban pynduh pyndam ia ki. Ngi donkam ruh ban wad ki lad ki lynti ban ialeh pyrshah ia ka rukom kaba thymmai ban pynpoi ia ki jingdih pynbuaid, bad da kaba pynbha shuh shuh ia ki, ngi dei ban buddien bad pyndep ia ka kam. U Shah u la ong ba lyngba ka PMLA bad ka ED, ngi dei ban pynlong ia ki jingtohkit ha ki kam pisa pyrshah ia ki nongkhaii drok da kaba tyngeh. Kadei ruh ka kamram jong ngi ban pynduh ia ki rynsan jong ki lyngba kane. Hapoh ka Destroy, ngi dei ban pynduh pyndam ia ki rynsan ha kata ka rukom ba kin ym lah ban khyllim im biang. Kito kiba don ha khlieh duh jong kane ka kam kiba shah kem kim dei ban lait phet. Baroh ki kyndon kiba donkam na ka bynta kane ki la don lypa ha ki ain jong ngi. Lyngba ka jingai jingsumar ban lait na ka jingkyrni, ngi hap ban pynduna ia ka jingdawa bad iaid sha ka liang ban pynduh pyndam ia ka jingpynbiang. Ia kane ka jingpynkhreh kam baroh kawei la pynkhreh halor ka nongrim jong kine ki lai tylli ki kyntien — Detect, Disrupt bad Destroy.

U Amit Shah u la ong ba hapoh ka jingialam jong u Myntri Rangbahduh ka ri u Narendra Modi, baroh ki Tnad jong ka Sorkar India, baroh ki Jylla bad baroh ki tnad kin hap ban iatylli lang ban iaid shakhmat ban pyntreikam ia ka polisi bym ailad satia ia u drok. Ha ki mukotduma ba kongsan jong ka NDPS, ka jingtohkit ia ka jingbei tyngka kadei ban long kaba donkam da ki Heh Pulit jong ka Jylla. Ka jingtreikam baroh kawei ban ithuh ia ki jingmih na ki kam runar, ban pynsangeh ia ki, ban kurup ia ki, bad ban pynthikna ba kin ym wanphai biang sha ki nongshah kem wat na phatok kan hap ban long kaba la pynshong nongrim ha ki sakhi bad kaba la pyndonkam da ka teknoloji katkum ka juk mynta. Ka tnad kam pohiing ka la rah ruh ia kane ka kam sha baroh ki High Court ban thaw ia ki iingbishar ba kyrpang, ban pynthikna ia ka jingdon ki nongbishar kiba biang, bad ban buh hakhmat eh ia ki jingbishar man ka sngi ia ki mukotduma kiba kongsan khnang ban lah ban pyndep kloi ia ka kam. Ngim ym lah ban bud ryntih ia ka rukom iaid ka pisa tad haduh ba ngin da pynthikna ia ka jingiasam jingtip mardor. Namarkata, dei ban pynthikna ia ka jingsam ia ki jingtip ha ka por.

U Myntri kam pohiing ka sorkar pdeng bad Myntri ka tnad iatreilang u la ong ba ngi donkam ruh ban bishar bniah ia ka jingbuh por ia ki mar kiba donkam ban shna drok bad ki jingdih pynbuaid bad ban pynthikna ia ka jingtreikam kaba biang pyrshah ia ka jingbei tyngka ia ki kam kiba iadei bad ki jingdih pynbuaid. Ka tnad Social Justice and Empowerment kadei ban pyniar ia ka campaign Nasha Mukt Bharat, ki prokram ai jinghikai paidbah, ka jingiashim bynta ha ka imlang sahlang, bad ki jingai jingsumar. Tang kumta ngi lah ban pynduna ia ka jingdawa da kaba jop. Ka tnad ka koit ka khiah ka dei ban pynthikna ban peitngor bha ia ka jingpynkylla ia ki dawai bad ki jaka die dawai online. Hapoh ka tnad pule puthi, ki Department of School Education and Higher Education kidei ban pdiang ia ka rukom treikam jong ka Drug-Free Campus. Nalor kane, ngi dei ban pynthikna ia ka jingsngewthuh hapdeng ki kmie ki kpa bad ki nonghikai da kaba rah ia kane ka jingmut shakhmat da ka jingmynjur lang jong baroh.

U Amit Shah u la ong ba ka NCRB, NFSU, DFSS, I4C bad ka NATGRID kin hap ban leh ia ki kam kiba bun ha la ki jong ki jong ki kyrdan na ka bynta ban ithuh ia ki Nongkhaii drok. Ki jylla ki dei ban pynkylla ia ki ANTF jong ki sha ki jaka treikam ba pura bad pynkylla ia ki sha ki jaka treikam kiba aiti lut, kiba don ki jingdon jingem kiba biang, kiba la pynkhreh bad kiba don ka jingkitkhlieh. Ki Heh Pulit jong ka Jylla ki dei ban shimkhia shimet ia kane. Ha ki mukotduma kiba iadei bad ki drok kiba bun, ka jingtohkit ia ka kam pisa tyngka bad ki kam kiba iasoh bad kine ki dei ban long ka bynta kaba kongsan jong ki jingtohkit jong ngi, namar khlem kane ngim lah ban pynduh ia ka rynsan baroh kawei. Dei ban pynlong ia ki jingialang jong ka NCORD ha ki jylla bad ki distrik kiba pynshong nongrim ha ka jingmih bad ban buddien bha. Ngi dei ban iaid sha ka jingthung ia ki Special Public Prosecutor na ka bynta ki chargesheet kiba khlain bad ka jingpynshitom kaba seisoh. Ki heh pulit jong ki jylla kidei ban leit sha ki High Court lyngba ki tnad kam pohiing jong ki ban plie ia ki iingbishar NDPS ba kyrpang. Na ka bynta ban pynduna ia ka jingdawa, ka jingai jingsumar, ki prokram ai jinghikai, bad ban wanrah ka jingsngewthuh hapdeng ki kmie ki kpa, ki nonghikai, man la ka jylla ka dei ban thung ia u nodal officer ha man la ka tnad. Nalor kane, lyngba ka CBI ngi la sdang ia ka campaign ban wanrah biang ia ki nongphetwir, ha kaba ngi la ioh ia ka jingjop kaba khraw. Nga kyntu ruh ïa baroh ki Sorkar Jylla ba ïa kito kiba khaii drok bad ki runar na ki jylla jong phi kiba rieh tngen shabar ri dei ban buh thong da kaba phah ïa ki Red Corner Notice, da kaba pyndonkam ïa ka CBI bad kiwei kiwei ki tnad treikam ban sdang ïa ka kam ban wanrah biang ïa ki.

U Myntri kam pohiing ka sorkar pdeng u la ong ba hapdeng u snem 2004 bad 2014, la ioh kurup ia u drk ba shongdor haduh T.40,000 klur — 26 lak kilo ki drok ba shna na ki dawai. Haba ïanujor, naduh u snem 2014 haduh u snem 2026, la ïoh ban kurup ïa u drok ba shongdor T.1,84,000 klur — 1 klur 18 lak kilo. Kane ka pyni ba ka campaign jong ngi ka ïaid shakhmat da ka jingjop. Naduh u snem 2004 haduh u snem 2014, la pynduh pyndam ïa u drok ba shongdor haduh T.8,000 klur (3,26,000 kilo), katba hapdeng u snem 2014 bad 2026, la pynduh pyndam ia u drok ba shongdor T.89,896 klur (42,47,000 kilo). Kumjuh ruh, ngi la nang pynjur ia ka jingpynjulor ia ki jingthung beain. Ha u snem 2020, 10,000 akar ki jingthung opium beain ki la shah pynjulor, katba ha u snem 2025 ngi la pynjulor 42,282 akar. Hapdeng u snem 2004 haduh 2014, ki don haduh 1,73,000 tylli ki case ha kaba la kem haduh 1,95,000 ngut. Naduh u snem 2014 haduh u snem 2026, ki case kiba la rejister kilong haduh 8,75,000 tylli  bad 10,97,000 ngut kiba la shah kem. Kine ki jingkhein ki pyni ba haba ngi shimkhia, ka jingjop ka long kaba thikna. Ka Sorkar Modi ka la shim ia ki sienjam kiba shai, kiba don ia ki thong bad kiba hap ban pyndep hapoh ka por kaba la buh, bad hadien ba la ithuh ia baroh ki bynta jong ka jingiakhun pyrshah ia u drok, ngi la pynkhreh ia kane ka kam.

U Amit Shah u la ong ba lada ngi ïakhun lang ïa kane ka thma bad da ka jingïatylli, khlem pep ka jingjop kan long ka jong ngi. Ha ki lai snem ban wan, ngin sa kiew shaphrang ha ka jingpynduh ia ki kam khaii drok ha India. Lada baroh ngi buh ia ka thong kaba shai na ka bynta kine ki lai snem, ngi trei shitom da ka jingpyrshang lang, bad ngi iaid shakhmat da ki por ba la buh bad ka rukom treikam ba iasam lang, te ka jingjop jong ngi ka long kaba thikna.

****