15 થી 21 જૂન, 2026 દરમિયાન યોજાઈ રહેલા 19માં મુંબઈ ઇન્ટરનેશનલ ફિલ્મ ફેસ્ટિવલ (MIFF 2026) માં સાંસ્કૃતિક રીતે સમૃદ્ધ એવા ઉત્તર-પૂર્વીય રાજ્યોની શોર્ટ ફિક્શન અને ડોક્યુમેન્ટરી ફિલ્મો માટે ખાસ ક્યુરેટેડ (વિશેષ રીતે તૈયાર કરાયેલું) સેક્શન રાખવામાં આવ્યું છે. આ ફિલ્મો ભારતના ઉત્તર-પૂર્વની સમૃદ્ધ પરંપરાઓ, ઐતિહાસિક અને ઇકોલોજીકલ (પર્યાવરણીય) વૈવિધ્યને પ્રદર્શિત કરે છે. અસાધારણ વ્યક્તિઓના ચિત્રણ, અવિરત પરંપરાઓ, વિવિધ સમુદાયો અને પરિવર્તન પામી રહેલા કુદરતી દ્રશ્યોના માધ્યમથી આ ફિલ્મો તે અસંખ્ય અવાજોને પ્રગટ કરે છે જે ભારતના ઉત્તર-પૂર્વને વ્યાખ્યાયિત કરે છે. ખાસી, નાગામીઝ, ઓ (Ao), કોકબોરોક, ભુટિયા, આસામી, મણિપુરી અને મિઝો જેવી સ્થાનિક ભાષાઓમાં બનેલી આ ફિલ્મો ફેસ્ટિવલના પ્રેક્ષકોને વારસો, ઓળખ, સ્થિતિસ્થાપકતા અને પ્રકૃતિની એ જીવંત કલાત્મક સભરતાથી પરિચિત કરાવે છે જે આ પ્રદેશના રોજિંદા જીવનની ગતિને આકાર આપવાનું ચાલુ રાખે છે.

કા પાતેંગ - KA PATENG (ખાસી)

સાન્કિરાંગ એલ. ખોંગવીર દ્વારા નિર્દેશિત અને નેશનલ ફિલ્મ ડેવલપમેન્ટ કોર્પોરેશન લિમિટેડ (NFDC) માટે પોનવિશાલ ચિદમ્બરનાથન દ્વારા નિર્મિત, ‘કા પાતેંગ’ (KA PATENG) એ ભારતની 30 મિનિટની ખાસી-ભાષાની શોર્ટ ફિક્શન ફિલ્મ (2023) છે. આ ફિલ્મ એક માતાના અવસાન પછીની પરિસ્થિતિ પર આધારિત છે, જે વર્ષોના અલગાવ પછી ત્રણ વિખૂટા પડેલા ભાઈ-બહેનોને ફરી એક જ છત નીચે સાથે લાવે છે. સૌથી મોટો ભાઈ શહેરમાં લાંબો સમય રહ્યા પછી પાછો ફરે છે, વચ્ચેનું સંતાન બાળપણની એક પીડાદાયક યાદનો બોજ વહન કરી રહ્યું છે, અને સૌથી નાની બહેન એક એવું રહસ્ય છુપાવી રહી છે જે તેને તેના નિકટવર્તી માતૃત્વ પર શંકા કરવા મજબૂર કરે છે.

લેન્ટિના ઓ - એ લાઇટ ઓન ધ ઇસ્ટર્ન હોરાઇઝન - LENTINA AO - A LIGHT ON THE EASTERN HORIZON (અંગ્રેજી, નાગામીઝ, ઓ)

સંજીબ પરાશર અને નીલાક્ષી મેધી દ્વારા નિર્દેશિત અને નેશનલ ફિલ્મ ડેવલપમેન્ટ કોર્પોરેશન લિમિટેડ દ્વારા નિર્મિત આ 2023 ની ડોક્યુમેન્ટરી અંગ્રેજી, નાગામીઝ અને ઓ (Ao) ભાષામાં પ્રસ્તુત કરવામાં આવી છે. આ ફિલ્મ નાગા લોકોના કલ્યાણ અને ઉત્થાન માટે પોતાનું જીવન સમર્પિત કરનાર સામાજિક કાર્યકર લેન્ટિના ઓ (Lentina Ao) ના અસાધારણ જીવન અને વારસાની ગાથા રજૂ કરે છે. વર્ષ 1955 માં અંતરિયાળ નાગા હિલ્સમાં એક મિડવાઇફ (દાયણ) તરીકે પોતાની સફર શરૂ કરીને, લેન્ટિના ઓ એ સામાજિક અન્યાય, રૂઢિચુસ્ત પૂર્વગ્રહો અને વ્યક્તિગત મુશ્કેલીઓનો સામનો કરીને પોતાના સમુદાયની સેવા કરવા માટે દાયકાઓ સમર્પિત કર્યા હતા.

માય લાસ્ટ ફેસ: ફ્લેટ-નોઝ (માય લાસ્ટ ફેસ: કુંગબારા) - MY LAST FACE: FLAT-NOSE (MY LAST FACE: KUNGBARA) (કોકબોરોક, કૌબ્રુ)

સુજીત દેબ્બર્મા અને પ્રણબ જ્યોતિ ડેકા દ્વારા નિર્દેશિત તથા પ્રણબ જ્યોતિ ડેકા, દિલીપ દેબ્બર્મા અને સુજીત દેબ્બર્મા દ્વારા નિર્મિત આ 2024ની ડોક્યુમેન્ટરી કોકબોરોક અને કૌબ્રુ ભાષાઓમાં પ્રસ્તુત છે. ત્રિપુરાના હરિયાળા વાતાવરણની પૃષ્ઠભૂમિ પર આધારિત આ ફિલ્મ રિયાંગ (Reang) સમુદાયના પરંપરાગત પોશાક અને ઘરેણાં દ્વારા તેમની સમૃદ્ધ સાંસ્કૃતિક વિરાસતની શોધ કરે છે. માત્ર શણગાર કરતાં પણ વિશેષ, આ વસ્ત્રો અને આભૂષણો સુંદરતા, આધ્યાત્મિકતા, ઓળખ અને રક્ષણના કાયમી પ્રતીકો તરીકે સેવા આપે છે, જે પેઢી દર પેઢી વાર્તાઓ, માન્યતાઓ અને પૂર્વજોના જ્ઞાનને આગળ ધપાવે છે. આ જીવંત પરંપરાઓનું દસ્તાવેજીકરણ કરીને, આ ફિલ્મ સમુદાયની સાંસ્કૃતિક પ્રથાઓ અને સામૂહિક સ્મૃતિ તથા ઓળખને જાળવી રાખવામાં તેઓ જે મહત્વપૂર્ણ ભૂમિકા ભજવે છે તેની એક સૂક્ષ્મ સમજ પ્રદાન કરે છે.

શાંગ્રિલા - ધ હિડન પેરેડાઇઝ - SHANGRILA - THE HIDDEN PARADISE [સિક્કિમીઝ (ભુટિયા)]

સામતેન ભુટિયા દ્વારા નિર્દેશિત અને નેશનલ ફિલ્મ ડેવલપમેન્ટ કોર્પોરેશન લિમિટેડ દ્વારા નિર્મિત આ 2025 ની ડોક્યુમેન્ટરી સિક્કિમીઝ (ભુટિયા) ભાષામાં 90 મિનિટની ફિલ્મ છે. ભવ્ય કંચનજંઘા પર્વતની ઓથમાં વસેલા હિમાલયના રાજ્ય સિક્કિમની પૃષ્ઠભૂમિ પર બનેલી આ ફિલ્મ, આ પ્રદેશના આંતરરાષ્ટ્રીય સ્તરે પ્રખ્યાત લેન્ડસ્કેપ્સ અને પ્રવાસન આકર્ષણથી આગળ વધીને તેના ઓછા જાણીતા ઇતિહાસ, સંસ્કૃતિ અને ભૂગોળનો તાગ મેળવે છે. રાજ્યના વારસા અને ઓળખની ઊંડી તપાસ દ્વારા, આ ડોક્યુમેન્ટરી એક એવા પ્રદેશનું આકર્ષક ચિત્ર રજૂ કરે છે જેનો સમૃદ્ધ વારસો હજુ પણ મોટાભાગે અણખેડાયેલો રહ્યો છે.

ટીન્સ ઓફ 1942 (બિયાલિસર લરાલી) - TEENS OF 1942 (BIYALLISAR LARALI) (આસામી)

2023 માં બનેલી આસામી ડોક્યુમેન્ટરી “ટીન્સ ઓફ 1942” સમીરન ડેકા દ્વારા નિર્દેશિત અને સમીરન ડેકા તથા ભાસ્કર જ્યોતિ દાસ દ્વારા નિર્મિત છે. ભારતીય સ્વતંત્રતાના 75 વર્ષના સન્માનરૂપે બનેલી આ ફિલ્મ, કિશોર વયના સ્વતંત્રતા સેનાનીઓ ભોલાનાથ નગારિયા અને રાધા બોરાની અસાધારણ દેશભક્તિની ઉજવણી કરે છે. તેમની ખંડિત સ્મૃતિઓના સંવેદનશીલ પુનઃનિર્માણ દ્વારા, આ ડોક્યુમેન્ટરી આ બહાદુર છતાં અજાણ્યા નાયકોને સન્માનિત કરે છે, તેમની વાર્તાઓને સુરક્ષિત રાખે છે અને દેશના સ્વતંત્રતા સંગ્રામ પ્રત્યેની તેમની હિંમત, બલિદાન અને પ્રતિબદ્ધતાથી ભાવિ પેઢીઓને પ્રેરણા આપે છે.

ધ હીલિંગ પ્રિસ્ટ (પુઇથિયમ) - THE HEALING PRIEST (PUITHIAM) (મિઝો)

નેપોલિયન આરઝેડ થાંગા દ્વારા નિર્દેશિત આ 2026 ની મિઝો-ભાષાની શોર્ટ ફિક્શન ફિલ્મ, પરંપરા, વિશ્વાસ અને સમકાલીન ચિંતાઓની 9 મિનિટની સફર છે. દાઈબાવલ (Daibawl) ની પ્રાચીન મિઝો હીલિંગ (રોગનિવારણ) વિધિ પર આધારિત, જેમાં એક પુઇથિયમ (સાધુ/વૈદ્ય) પૂજા વિધિ કરતા હતા અને બીમારી પેદા કરનાર માનવામાં આવતા દુષ્ટ આત્માઓને દૂર રાખવા માટે લેંગલેપ (Lenglep) લટકાવતા હતા, આ ફિલ્મ એક નિરાશ યુવાનની કથા રજૂ કરે છે, જે પોતાના બીમાર પિતાને સાજા કરવાનો માર્ગ શોધી રહ્યો છે. આ કથાના માધ્યમથી પરંપરાગત ઉપચાર પદ્ધતિઓ અને આધુનિક સ્વાસ્થ્યપ્રત્યેની અપેક્ષાઓ વચ્ચેના તણાવને ઉજાગર કરવામાં આવ્યો છે. આ વાર્તા દ્વારા, આ ફિલ્મ મિઝો સાંસ્કૃતિક વારસા અને બીમારી તથા ઉપચારની આસપાસની કાયમી માન્યતાઓની ઝાંખી કરાવે છે.

મણિપુર બ્રો એન્ટલર્ડ ડીયર (સંગાઈ) - MANIPUR BROW ANTLERED DEER (SANGAI) (મણિપુરી અને અંગ્રેજી)

આકાંક્ષા સૂદ સિંહ દ્વારા નિર્દેશિત અને રોશની નાડાર મલ્હોત્રા તથા ઋષિકેશ આત્મારામ ચવ્હાણ દ્વારા નિર્મિત આ 2025 ની ડોક્યુમેન્ટરી મણિપુરી અને અંગ્રેજીમાં બનેલી 30 મિનિટની દ્વિભાષી ફિલ્મ છે. તે સંગાઈ (Sangai) ની વાર્તાને અનુસરે છે, જે હરણની એક લુપ્તપ્રાય પેટા-પ્રજાતિ છે અને મણિપુર રાજ્યનું આઇકોનિક પ્રતીક બની ગયું છે. વંશીય અને રાજકીય તણાવ દ્વારા આકાર પામેલા પ્રદેશની પૃષ્ઠભૂમિ પર આધારિત, આ ડોક્યુમેન્ટરી આ આકર્ષક પ્રાણીને રાજ્યના અજોડ તરતા ઘાસના મેદાનો (ફ્લોટિંગ ગ્રાસલેન્ડ્સ) માં ફરતું દર્શાવે છે અને સાથે જ તેના અસ્તિત્વ માટેના લાંબા સંઘર્ષને હાઇલાઇટ કરે છે. સંગાઈની વાર્તા દ્વારા, આ ફિલ્મ વન્યજીવન, વસવાટ સંરક્ષણ અને પ્રદેશની સામાજિક-રાજકીય વાસ્તવિકતાઓ વચ્ચેના નાજુક સંબંધો પર પ્રકાશ પાડે છે.

એમઆઇએફએફ (MIFF) ખાતેની દૈનિક ઇવેન્ટ્સની પ્રેસ રિલીઝ અને ઉચ્ચ ગુણવત્તાવાળા ફોટા મેળવવા માટે અહીં ક્લિક કરો.

SM/BS/JD