દેશની સૌથી પ્રતિષ્ઠિત મીડિયા શૈક્ષણિક સંસ્થા, ઇન્ડિયન ઇન્સ્ટિટ્યૂટ ઓફ માસ કોમ્યુનિકેશન (IIMC) ખાતે છ એમએ (MA) અને ચાર પીજી ડિપ્લોમા (PG Diploma) અભ્યાસક્રમોમાં પ્રવેશ માટેની ઈ-કાઉન્સેલિંગ પ્રક્રિયા શરૂ થઈ ગઈ છે. તમામ અભ્યાસક્રમો – એમએ અને પીજી ડિપ્લોમા – માં પ્રવેશ માત્ર ઈ-કાઉન્સેલિંગ પ્રક્રિયા દ્વારા જ કરવામાં આવશે. આ માટેનું રજીસ્ટ્રેશન https://iimc.admissions.nic.in/ પર કરી શકાશે. ઈ-કાઉન્સેલિંગ માટે રજીસ્ટ્રેશન કરવાની છેલ્લી તારીખ 7 જૂન, 2026 છે. પ્રથમ બેઠક ફાળવણી (એલોટમેન્ટ) 9 જૂનના રોજ જાહેર કરવામાં આવશે.

"આ વર્ષે, આઈઆઈએમસી દ્વારા ત્રણ નવા એમએ અભ્યાસક્રમો શરૂ કરવામાં આવ્યા છે, જેમાં એમએ ઇન હેલ્થ કોમ્યુનિકેશન, એમએ ઇન મીડિયા એન્ડ કોમ્યુનિકેશન ગવર્નન્સ અને એમએ ઇન કોર્પોરેટ કોમ્યુનિકેશન એન્ડ બ્રાન્ડ મેનેજમેન્ટનો સમાવેશ થાય છે. આ સાથે, આઈઆઈએમસી હવે તેના છ કેમ્પસ – નવી દિલ્હી, ઢેંકનાલ, આઈઝોલ, અમરાવતી, જમ્મુ અને કોટ્ટાયમમાં છ એમએ અભ્યાસક્રમો ઓફર કરે છે" તેમ પ્રવેશ પ્રભારી અને પરીક્ષા નિયામક પ્રો. (ડૉ.) રાકેશ કુમાર ગોસ્વામીએ જણાવ્યું હતું.

આઈઆઈએમસીના પરંપરાગત વારસા સમાન ચાર પીજી ડિપ્લોમા અભ્યાસક્રમો પણ ઉપલબ્ધ છે. આ અભ્યાસક્રમો અંગ્રેજી પત્રકારત્વ, હિન્દી પત્રકારત્વ, રેડિયો અને ટેલિવિઝન પત્રકારત્વ તેમજ એડવર્ટાઇઝિંગ એન્ડ પબ્લિક રિલેશન્સ (જાહેરાત અને જનસંપર્ક)માં પીજી ડિપ્લોમા છે.

ઓછામાં ઓછા 55% ગુણ સાથે બેચલર ડિગ્રી (સ્નાતક) ધરાવતા અને માસ કોમ્યુનિકેશન એન્ડ જર્નાલિઝમ (COQP17) માં માન્ય CUET-PG સ્કોર મેળવનાર ભારતીય નાગરિકો એમએ અભ્યાસક્રમો માટે પાત્ર છે. આ જ વિષયમાં માન્ય CUET-PG સ્કોર ધરાવતા સ્નાતકો પીજી ડિપ્લોમા અભ્યાસક્રમો માટે પાત્ર રહેશે. પીજી ડિપ્લોમા પ્રવેશ માટેની ઉપલી વય મર્યાદા 1 ઓગસ્ટ, 2026 ના રોજ સામાન્ય (જનરલ) કેટેગરીના ઉમેદવારો માટે 25 વર્ષ, ઓબીસી ઉમેદવારો માટે 28 વર્ષ અને એસસી/એસટી/પીડબ્લ્યુડી ઉમેદવારો માટે 30 વર્ષ નક્કી કરવામાં આવી છે.

ઉમેદવારોને રજીસ્ટ્રેશન કરાવતા પહેલા પ્રવેશ સૂચના, પ્રોસ્પેક્ટસ (માહિતી પુસ્તિકા) અને પ્રક્રિયાની રૂપરેખા કાળજીપૂર્વક વાંચવાની સલાહ આપવામાં આવે છે. રજીસ્ટ્રેશન ફોર્મ ભરતી વખતે તેમણે અભ્યાસક્રમો અને કેમ્પસ માટેની પોતાની પસંદગીઓ ખૂબ જ ધ્યાનપૂર્વક ભરવી જોઈએ, કારણ કે રજીસ્ટ્રેશન ફોર્મ સબમિટ કર્યા પછી પસંદગીઓમાં ફેરફાર માટેની કોઈપણ વિનંતી સ્વીકારવામાં આવશે નહીં.

ઉમેદવારોએ તેમના ફાળવવામાં આવેલા અભ્યાસક્રમમાં પ્રવેશ કન્ફર્મ (સુનિશ્ચિત) કરવા માટે રૂ. 20,000ની સીટ સ્વીકૃતિ ફી (સીટ એક્સેપ્ટન્સ ફી) ચૂકવવાની રહેશે. પ્રવેશ પ્રક્રિયા પૂર્ણ કરવા માટે બાકીની ટ્યુશન ફી નિર્ધારિત સમયમર્યાદામાં ચૂકવવી અનિવાર્ય છે.

ઉમેદવારોએ જન્મ તારીખની ચકાસણી માટે હાઇસ્કૂલનું પ્રમાણપત્ર (L.C. અથવા ધોરણ 10ની માર્કશીટ) અને સ્નાતકની અંતિમ માર્કશીટ સબમિટ કરવાની રહેશે. જે ઉમેદવારો પોતાના સ્નાતક કક્ષાના અંતિમ પરિણામની રાહ જોઈ રહ્યા છે, તેમણે નિર્ધારિત તારીખ અને સમયની અંદર જરૂરી દસ્તાવેજો સબમિટ કરવાના રહેશે. અનામત કેટેગરીના જે ઉમેદવારો પ્રવેશ સમયે જાતિનું પ્રમાણપત્ર સબમિટ કરવા અસમર્થ હોય, તેઓ બાંહેધરી પત્ર (અંડરટેકિંગ) આપી શકે છે અને નિર્ધારિત સમયગાળામાં પ્રમાણપત્ર રજૂ કરી શકે છે.

પ્રવેશ પ્રક્રિયા સંબંધિત અન્ય વિગતો માટે, ઉમેદવારોને આઈઆઈએમસીની વેબસાઇટ iimc.gov.in ની મુલાકાત લેવાની સલાહ આપવામાં આવે છે. કોઈપણ પૂછપરછ માટે, ઉમેદવારો admissions@iimc.gov.in પર ઈમેલ લખી શકે છે.

SM/BS/JD