ଭାରତୀୟ ରେଳବାଇର କାଜିପେଟ୍ ରେଳ ଉତ୍ପାଦନ ୟୁନିଟ୍ ସମ୍ପୂର୍ଣ୍ଣ ହେବାର ଦ୍ୱାରଦେଶରେ ଅଛି। ଏହା ଏକ ବହୁମୁଖୀ ରେଳ ରୋଲିଂ ଷ୍ଟକ୍ ଉତ୍ପାଦନ ୟୁନିଟ୍। ପ୍ରାରମ୍ଭରେ, ଆଗାମୀ ୫ବର୍ଷ ମଧ୍ୟରେ କାଜିପେଟ୍ ୨୦୦ଟି ଇଣ୍ଟରସିଟି ଟ୍ରେନ୍ ନିର୍ମାଣ କରିବ। କେନ୍ଦ୍ର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଏବଂ କେନ୍ଦ୍ର ରେଳ ରାଷ୍ଟ୍ରମନ୍ତ୍ରୀ ରବନୀତ ସିଂ ବିଟ୍ଟୁ ଆଜି ବରିଷ୍ଠ ଅଧିକାରୀଙ୍କ ସହ କାଜିପେଟ ରେଳ ଉତ୍ପାଦନ ୟୁନିଟକୁ କାର୍ଯ୍ୟକ୍ଷମ କରିବାର ଯୋଜନା ସମୀକ୍ଷା କରିଛନ୍ତି। 

ସ୍ୱଳ୍ପ ଦୂରତା ଯାତ୍ରା ପାଇଁ ଏହି ଟ୍ରେନଗୁଡ଼ିକୁ ସାରା ଦେଶରେ ଚଳାଚଳ କରାଯିବ। ସେମାନେ ବିଭିନ୍ନ ସ୍ଥାନରେ ବାରମ୍ବାର ଅଟକି ରହିବେ। ଏହି ଟ୍ରେନଗୁଡ଼ିକ ସାଧାରଣତଃ ପ୍ରାୟ ୩୦୦ କିଲୋମିଟର ପର୍ଯ୍ୟନ୍ତ ଚାଲିବ। ପ୍ରତ୍ୟେକ ଯାତ୍ରାରେ ଅନେକ ରହଣି ରହିବ ଯାହା ଦ୍ୱାରା ନାଗରିକମାନେ ସହର ମଧ୍ୟରେ ସହଜରେ ଯାତାୟାତ କରିପାରିବେ। ତାହା ଆଖପାଖ ସହରରେ ଉଚ୍ଚ ଶିକ୍ଷା ପାଇଁ ଯାଉଥିବା ଛାତ୍ରଛାତ୍ରୀ ହୁଅନ୍ତୁ, କିମ୍ବା ସେମାନଙ୍କ ସ୍ୱାସ୍ଥ୍ୟ ଏବଂ କାର୍ଯ୍ୟ ଆବଶ୍ୟକତା ପାଇଁ ଯାତାୟାତ କରୁଥିବା ସାଧାରଣ ଲୋକ ହୁଅନ୍ତୁ। 

ଏହି ଟ୍ରେନଗୁଡ଼ିକ ଲୋକଙ୍କୁ ଆନ୍ତଃସହରାଞ୍ଚଳ ଯାତ୍ରା ପାଇଁ ଏକ ନୂଆ ସୁଲଭ ବିକଳ୍ପ ପ୍ରଦାନ କରିବ। ଏହି ଇଣ୍ଟରସିଟି ଟ୍ରେନଗୁଡ଼ିକ ଭାରତର ଆଖପାଖ ସହରଗୁଡ଼ିକୁ ସଂଯୋଗ କରୁଥିବା ସଟଲ୍ ସେବା ଭଳି ହେବ। ଏହି ଟ୍ରେନଗୁଡ଼ିକର ଉତ୍ପାଦନ ସହିତ, ବହୁ ସଂଖ୍ୟକ ଯାତ୍ରୀ ସଡକ ପରିବହନରୁ ରେଳପଥକୁ ଯିବାର ସମ୍ଭାବନା ରହିଛି। 

ଇଣ୍ଟରସିଟି ଟ୍ରେନଗୁଡ଼ିକ ସ୍ୱୟଂକ୍ରିୟ ଦ୍ୱାର ବନ୍ଦ କରିବା, ଉନ୍ନତ ବାୟୁ ଚଳାଚଳ ଏବଂ ୨୦ଟି କୋଚ ବିଶିଷ୍ଟ ଏକ ସୁରକ୍ଷିତ କୋଚ୍ ଡିଜାଇନ୍ ଭଳି ଆଧୁନିକ ବୈଶିଷ୍ଟ୍ୟ ସହିତ ସଜ୍ଜିତ ହେବ। ପ୍ରତ୍ୟେକ କୋଚରେ ଉଭୟ ପାର୍ଶ୍ୱରେ ଗୋଟିଏ କରି ମୋଟ୍‍ ଦୁଇଟି ଶୌଚାଳୟ ରହିବ । 

ଏହାବ୍ୟତୀତ, ଏହି ଇଣ୍ଟରସିଟି ଟ୍ରେନଗୁଡ଼ିକରେ ଆଧୁନିକ ଜର୍କ୍ ମୁକ୍ତ କପ୍ଲର୍ ଏବଂ ବଗି ରହିବ। ଏହି ଟ୍ରେନଗୁଡ଼ିକ ଘଣ୍ଟାପ୍ରତି ୧୩୦ କି. ମି. ବେଗରେ ଚଳାଚଳ କରିବା ପାଇଁ ପରିକଳ୍ପନା କରାଯିବ। 

ଏହି ଟ୍ରେନଗୁଡ଼ିକରେ ରିଜେନେରେଟିଭ୍ ବ୍ରେକିଂ ବ୍ୟବସ୍ଥା ମଧ୍ୟ ରହିବ। ଏହାର ଅର୍ଥ ହେଉଛି ଯେ ଯେତେବେଳେ ଟ୍ରେନ୍ ବ୍ରେକ୍ ଲଗାଇବ, ଏହା ବିଦ୍ୟୁତ୍ ଜେନେରେଟରରେ ପରିଣତ ହେବ ଏବଂ ପୁନଃ ଉତ୍ପନ୍ନ ବିଦ୍ୟୁତକୁ ଗ୍ରୀଡକୁ ଫିଡ୍ କରିବ । ତେଣୁ ଏହା ଶକ୍ତି ସଞ୍ଚୟକାରୀ ଅଟେ। ଏହା ପରିବହନର ଏକ ସବୁଜ ମାଧ୍ୟମ ଏବଂ ସଡ଼କ ପରିବହନ ତୁଳନାରେ ଏଥିରେ କାର୍ବନ ନିର୍ଗମନ ଯଥେଷ୍ଟ କମ୍ ରହିବ। 

ରେଳବାଇ ଦ୍ୱାରା ଏତେ ସଂଖ୍ୟାରେ ଚଳାଚଳ ଆରମ୍ଭ ହେବା ଦ୍ୱାରା ସାରା ଦେଶରେ ସବୁଜ ଏବଂ ସ୍ୱଚ୍ଛ ପରିବହନ କ୍ଷମତା ବୃଦ୍ଧି ପାଇବ।

HS