ముంబయిలోని ఎన్ఎఫ్‌డీసీ కాంప్లెక్సులో 19వ ముంబయి అంతర్జాతీయ చలనచిత్రోత్సవం (ఎంఐఎఫ్ఎఫ్)తో పాటు 2026 జూన్ 16 నుంచి 18 వరకువేవ్స్ డాక్ బజార్ రెండో సంచిక జరుగుతుంది.

డాక్యుమెంటరీ, యానిమేషన్, షార్ట్ ఫిల్మ్‌మేకర్లను ప్రోత్సహించేందుకు, వారి ప్రయాణాన్ని వేగవంతం చేసేందుకు రూపొందించిన ముఖ్యమైన, సమగ్రమైన వేదికే వేవ్స్ డాక్ బజార్. ఇది సహకారాన్నీ, మార్గదర్శకత్వాన్నీ అందిస్తుంది. అలాగే మార్కెట్, ప్రపంచ గుర్తింపును పొందే అవకాశాలను కల్పిస్తుంది. ఆడియో విజువల్ రంగంలోని నిష్ణాతులను, వర్ధమాన ప్రతిభావంతులను ఒక్కచోట చేర్చాలని ఈ రెండో ఎడిషన్ లక్ష్యంగా నిర్దేశించుకుంది.  దర్శకులు, నిర్మాతలు, పంపిణీదారులు, ప్రసారకర్తలు, పెట్టుబడిదారులు, సాంకేతిక భాగస్వాములను ఒక్క చోట చేర్చే వేదికగా పనిచేస్తుంది. నిర్మాణంలో, పంపిణీలో వివిధ దశలకు తోడ్పాటునందిస్తుంది. అద్భుతమైన కథనాలను అంతర్జాతీయ ప్రేక్షకులకు చేరువ చేసేలా సాయపడుతుంది. ఈ కార్యక్రమంలో నిపుణులు, అనుభవజ్ఞులతో మాట్లాడి పరిశ్రమలో ప్రస్తుతం కొనసాగుతున్న ధోరణులు, మార్కెట్ డిమాండ్లు, పంపిణీ వ్యూహాలు, ప్రేక్షకుల ప్రాధాన్యాలను తెలుసుకోవచ్చు.

వేవ్స్ డాక్ బజార్‌లో ఉన్న మరో ముఖ్యమైన విభాగం వ్యూయింగ్ రూమ్ (వీఆర్). ఇక్కడ నమోదు చేసుకున్న ప్రతినిధులు, ఎంపిక చేసిన ప్రేక్షకులకు ఇటీవలే పూర్తయిన, పోస్టు ప్రొడక్షన్ దశలో ఉన్న డాక్యుమెంటరీ, షార్ట్ ఫిలిం, యానిమేషన్ చిత్రాలను ప్రదర్శిస్తారు.

ఎంపిక చేసిన కొనుగోలుదారులు, ప్రోగ్రామర్లు, పంపిణీదారులు, పెట్టుబడిదారులకు మాత్రమే అందుబాటులో ఉండే ఒక సురక్షితమైన వేదికగా దీన్ని రూపొందించారు. ఇది పంపిణీ ఒప్పందాలను కుదుర్చుకొనేందుకు, సహ నిర్మాతలు, ప్రపంచవ్యాప్త అమ్మకాల ఏజెంట్లతో సంబంధాలను ఏర్పాటు చేసుకోవడానికి, చలనచిత్రోత్సవాల్లో అవకాశాలను అన్వేషించడానికి, నిధులను పొందడానికి అవకాశాలను చిత్ర నిర్మాతలకు అందిస్తుంది. ప్రత్యేకంగా తీర్చిదిద్దిన వ్యవస్థ ద్వారా భాష, వ్యవధి, నిర్మాణంలో ప్రస్తుతం కొనసాగుతున్న దశ, ఇతర వివరాల ఆధారంగా కొనుగోలుదారులు చలనచిత్రాలను చూడొచ్చు. అదే సమయంలో ఎంపిక చేసిన చిత్రాలను వ్యూయింగ్ రూం క్యాటలాగులో పొందుపరిచి, కార్యక్రమం ప్రారంభమవడానికి ముందుగానే నమోదు చేసుకున్న ప్రతినిధులకు అందిస్తారు.

రఫ్ కట్ దశలో ఉన్న డాక్యుమెంటరీ, యానిమేషన్ చిత్రాల కోసం ప్రత్యేకంగా వర్క్-ఇన్-ప్రోగ్రెస్ (డబ్ల్యూఐపీ) ల్యాబును రూపొందించారు. ప్రవేశ నియంత్రణ ఉన్న ఈ ల్యాబులో ఎంపిక చేసిన వారికి తమ ప్రాజెక్టులను మెరుగుపరుచుకొనేలా చిత్ర నిర్మాతలు, ఎడిటర్లు, అంతర్జాతీయ మార్గదర్శకుల నుంచి విలువైన అభిప్రాయాలు, మార్గనిర్దేశం, సూచనలు లభిస్తాయి.

వీఆర్, ఏఆర్, ఎక్స్ఆర్‌పై దృష్టి సారించి వేవ్స్ డాక్ బజార్లో ఇమర్సివ్ మార్కెట్ ఏర్పాటు

వేవ్స్ డాక్ బజార్లో మొదటిసారిగా ఇమర్సివ్ మార్కెట్‌ను ఏర్పాటు చేస్తున్నారు. ఇది కంటెంట్ రూపకర్తలు, నిర్మాతలు, సాంకేతిక భాగస్వాములకు ప్రత్యేక వేదికగా పనిచేస్తుంది. వీఆర్, ఏఆర్, ఎక్స్ఆర్ లాంటి వాటిపై ఈ మార్కెట్ దృష్టి సారించింది. వినూత్న ప్రాజెక్టులను ప్రదర్శించడానికి, కథనంలో కొత్త విధానాలను అన్వేషించడానికి, అర్థవంతమైన సహకారాలను ప్రోత్సహించడానికి అవకాశాలను అందిస్తుంది.

డైనమిక్ ప్రోగ్రామింగ్, పరిశ్రమ-కేంద్రీకృత కార్యక్రమాలతో డాక్యుమెంటరీలను, యానిమేషన్‌ను, లఘుచిత్రాల వ్యవస్థను బలోపేతం చేయడానికి, అదే సమయంలో సృజనాత్మక నైపుణ్యాన్ని పెంపొందించుకునేందుకు, అంతర్జాతీయంగా ఎదిగేందుకు నూతన మార్గాలను అందుబాటులోకి తీసుకురావడానికి వేవ్స్ డాక్ బజార్ సిద్ధంగా ఉంది.

వేవ్స్ డాక్ బజార్ - 2026లో ఏర్పాటు చేసే వ్యూయింగ్ రూం, డబ్ల్యూఐపీ ల్యాబులో ప్రదర్శనకు ప్రారంభమైన దరఖాస్తులు

డాక్యుమెంటరీలను, యానిమేషన్ చలనచిత్ర దర్శకులను ఈ రంగానికి చెందిన నిపుణులతో అనుసంధానం చేసే వేవ్స్ డాక్ బజార్-2026లో ఏర్పాటు చేసే వ్యూయింగ్ రూం, వర్క్-ఇన్-ప్రోగ్రెస్ (డబ్ల్యూఐపీ) ల్యాబుల్లో ప్రదర్శనకు దరఖాస్తుల స్వీకరిస్తున్నారు. ఆసక్తి గల అభ్యర్థులు భారత కాలమాన ప్రకారం 2026 మే 15 రాత్రి 11:59 గంటల వరకు దరఖాస్తులను సమర్పించవచ్చు.

2024లో డాక్ ఫిలిం బజార్ మొదటి సంచిక ప్రారంభానికి సంబంధించిన పీఐబీ ఫైల్ ఫొటోలు

అర్హతలు

ప్రపంచవ్యాప్తంగా ఉన్న డాక్యుమెంటరీ, యానిమేషన్ చిత్రాలకు ఈ కార్యక్రమం ఆహ్వానం పలుకుతోంది. లఘు, మధ్యస్థ నిడివి, పూర్తి నిడివి ఉన్న ఫీచర్ చిత్రాలకు వేవ్స్ డాక్ బజార్-2026లో ప్రదర్శించేందుకు అర్హత కలిగి ఉంటాయి. చిత్రాలు పూర్తి అయి ఉండాలి లేదా చాలా వరకు చిత్రీకరణ పూర్తయి పోస్ట్ ప్రొడక్షన్ దశలో ఉండాలి. చిత్రీకరణ దశలో లేదా ప్రీప్రొడక్షన్ దశలో ఉన్న ప్రాజెక్టులకు అవకాశం లేదు. ఉత్సవాలు, అమ్మకాలు, పంపిణీ, లేదా నిధుల కోసం చూస్తున్న చిత్ర నిర్మాతలు దరఖాస్తు చేసుకోవచ్చు. అంతర్జాతీయంగా పరిమితంగా లేదా అసలు గుర్తింపు లభించని చిత్రాలు పాల్గొనవచ్చు.

సమర్పణ ప్రక్రియ

మొదటి దశలో సమీక్ష కోసం పూర్తి చిత్రం లేదా రఫ్ కట్‌కు సంబంధించి పాస్‌వర్డ్ భద్రత ఉన్న స్క్రీనర్ లింకును సమర్పించాలి. ఈ దశలో ఎంపికైతే.. వ్యూయింగ్ రూం కోసం కనీసం 10 నిమిషాల ఫుటేజీని దర్శకులు సమర్పించాలి. పూర్తి చిత్రాన్ని పంపించాల్సిందిగా వారిని ప్రోత్సహిస్తున్నారు. తుది చిత్రాలను సురక్షితంగా అప్‌లోడ్ చేసి, అనుమతించిన వారికి మాత్రమే అందుబాటులో ఉంచుతారు.

అంతర్జాతీయ వేదికలపై తమ చిత్రాలను ప్రదర్శించే, డాక్యుమెంటరీ, యానిమేషన్ పరిశ్రమలో కీలకమైన వ్యక్తులతో అనుసంధానమయ్యే అవకాశాన్ని సద్వినియోగం చేసుకోవాల్సిందిగా ఫిలింమేకర్లను ఆహ్వానిస్తున్నారు.

ఆసక్తి కలిగిన వారు దిగువ పేర్కొన్న లింక్ ద్వారా దరఖాస్తులను సమర్పించవచ్చు.

https://my.miff.in/vr/start/ 

వీఆర్, డబ్ల్యూఐపీకి సంబంధించిన మరిన్ని వివరాలు, నియమాలు, నియంత్రణలు, ఎఫ్ఏక్యూలను ఇక్కడ చూడొచ్చు.

***