எனது இளம் நண்பர்கள் அனைவருக்கும் வாழ்த்துகள்!

2026-ம் ஆண்டின் தொடக்கம் உங்கள் வாழ்வில் புதிய மகிழ்ச்சியின் தொடக்கமாக அமைந்துள்ளது. இதனுடன், நேற்றுதான் வசந்த பஞ்சமி முடிவடைந்துள்ள நிலையில், உங்கள் வாழ்விலும் ஒரு புதிய வசந்தம் தொடங்குகிறது. இந்த நேரம் அரசியலமைப்பிற்கு நீங்கள் ஆற்ற வேண்டிய கடமைகளுடனும் உங்களை இணைக்கிறது. தற்செயலாக, குடியரசு தினத்தின் பிரம்மாண்டத் திருவிழா தற்போது நாட்டில் நடைபெற்று வருகிறது. நேற்று, ஜனவரி 23-ம் தேதியன்று, நேதாஜி சுபாஷ் சந்திர போஸின் பிறந்தநாளை முன்னிட்டு நாம்  வீர தினம் கொண்டாடினோம்; நாளை, ஜனவரி 25-ம் தேதி தேசிய வாக்காளர் தினம், அதனைத் தொடர்ந்து ஜனவரி 26-ம் தேதி குடியரசு தினம் வருகிறது. இன்றைய நாளும் ஒரு சிறப்பான நாளாகும். இதே நாளில்தான் நமது அரசியலமைப்பு 'ஜன கண மன' பாடலை தேசிய கீதமாகவும், 'வந்தே மாதரம்' பாடலை தேசியப் பாடலாகவும் ஏற்றுக்கொண்டது. இத்தகைய முக்கியத்துவம் வாய்ந்த இன்றைய நாளில், அறுபத்தொன்றாயிரத்திற்கும் மேற்பட்ட இளைஞர்கள் தங்கள் வாழ்க்கையில் ஒரு புதிய தொடக்கத்தை மேற்கொள்கின்றனர்.

இன்று, உங்கள் அனைவருக்கும் அரசுப் பணிகளுக்கான பணி நியமனக் கடிதங்கள் வழங்கப்படுகின்றன; ஒரு வகையில், இது தேசத்தைக் கட்டியெழுப்புவதற்கான அழைப்புக் கடிதமாகும். இது வளர்ச்சியடைந்த இந்தியாவை உருவாக்குவதற்கு வேகம் கொடுப்பதற்கான ஒரு உறுதிமொழி கடிதமாகும். உங்களில் பலர் நாட்டின் பாதுகாப்பை வலுப்படுத்துவீர்கள், பலர் நமது கல்வி மற்றும் சுகாதாரச் சூழலை மேலும் மேம்படுத்துவீர்கள், பல நண்பர்கள் நிதிச் சேவைகள் மற்றும் எரிசக்தி பாதுகாப்பை வலுப்படுத்துவீர்கள், அதே நேரத்தில் பல இளைஞர்கள் நமது பொதுத்துறை நிறுவனங்களின் வளர்ச்சியில் முக்கியப் பங்காற்றுவீர்கள். இளைஞர்களாகிய உங்கள் அனைவருக்கும் எனது மனமார்ந்த பாராட்டுகளையும் நல்வாழ்த்துகளையும் தெரிவித்துக் கொள்கிறேன்.

நண்பர்களே,

இளைஞர்களைத் திறன்களுடன் இணைப்பதும், அவர்களுக்கு வேலைவாய்ப்பு மற்றும் சுய வேலைவாய்ப்பிற்கான வாய்ப்புகளை வழங்குவதும் நமது அரசாங்கத்தின் முன்னுரிமையாக உள்ளது. அரசு நியமனங்கள் மிஷன் பயன்முறையில்  செய்யப்படுவதை உறுதி செய்வதற்காகவே 'வேலைவாய்ப்புத் திருவிழா'  தொடங்கப்பட்டது. கடந்த ஆண்டுகளில், இந்த வேலைவாய்ப்புத் திருவிழா ஒரு நிறுவனமாகவே மாறியுள்ளது. இதன் மூலம் லட்சக்கணக்கான இளைஞர்கள் அரசின் பல்வேறு துறைகளில் பணி நியமனக் கடிதங்களைப் பெற்றுள்ளனர். இந்த இயக்கத்தை மேலும் விரிவுபடுத்தும் வகையில், இன்று நாட்டின் நாற்பதுக்கும் மேற்பட்ட இடங்களில் இந்த வேலைவாய்ப்புத் திருவிழா நடைபெறுகிறது. இந்த அனைத்து இடங்களிலும் குழுமியுள்ள இளைஞர்களை நான் சிறப்பாக வரவேற்கிறேன்.

நண்பர்களே,

இன்று, இந்தியா உலகின் இளமையான நாடுகளில் ஒன்றாக உள்ளது. இந்தியாவின் இளைஞர் சக்திக்கு நாட்டிற்குள்ளும் உலகெங்கிலும் புதிய வாய்ப்புகள் உருவாக்கப்பட வேண்டும் என்பதே நமது அரசின் தொடர்ச்சியான முயற்சியாகும். இன்று, இந்திய அரசு பல நாடுகளுடன் வர்த்தகம் மற்றும் இடப்பெயர்வு ஒப்பந்தங்களில் கையெழுத்திட்டு வருகிறது. இந்த வர்த்தக ஒப்பந்தங்கள் இந்தியாவின் இளைஞர்களுக்கு எண்ணற்ற புதிய வாய்ப்புகளைக் கொண்டு வருகின்றன.

நண்பர்களே,

கடந்த காலங்களில், நவீன உள்கட்டமைப்பிற்காக இந்தியா முன்னெப்போதும் இல்லாத முதலீடுகளைச் செய்துள்ளது. இதன் காரணமாக, கட்டுமானம் தொடர்பான ஒவ்வொரு துறையிலும் வேலைவாய்ப்பு கணிசமாக அதிகரித்துள்ளது. இந்தியாவின் புத்தொழில்  சூழல் அமைப்பின் வீச்சும் அதிவேகத்தில் முன்னேறி வருகிறது. இன்று நாட்டில் சுமார் இரண்டு லட்சம் பதிவு செய்யப்பட்ட புத்தொழில்கள் உள்ளன. இவற்றில் 21 ஆயிரத்திற்கும் மேற்பட்ட இளைஞர்கள் பணியாற்றி வருகின்றனர். அதேபோல், டிஜிட்டல் இந்தியா ஒரு புதிய பொருளாதாரத்தை விரிவுபடுத்தியுள்ளது. அனிமேஷன் மற்றும் டிஜிட்டல் மீடியா போன்ற பல துறைகளில் இந்தியா ஒரு உலகளாவிய மையமாக மாறி வருகிறது. இந்தியாவின் படைப்பாற்றல் பொருளாதாரம்  மிக வேகமான வளர்ச்சியைக் கண்டு வருகிறது, இதிலும் இளைஞர்களுக்குப் புதிய வாய்ப்புகள் கிடைத்து வருகின்றன.

எனது இளம் நண்பர்களே,

இன்று இந்தியாவின் மீது உலகின் நம்பிக்கை அதிகரித்து வரும் விதம், இளைஞர்களுக்குப் பல புதிய சாத்தியக்கூறுகளை உருவாக்கி வருகிறது. ஒரு தசாப்தத்தில் தனது மொத்த உள்நாட்டு உற்பத்தியை இரட்டிப்பாக்கிய உலகின் ஒரே பெரிய பொருளாதாரம் இந்தியா மட்டுமே. இன்று, நூற்றுக்கும் மேற்பட்ட நாடுகள் நேரடி அந்நிய முதலீடு  மூலம் இந்தியாவில் முதலீடு செய்கின்றன. 2014-ம் ஆண்டிற்கு முந்தைய பத்து ஆண்டுகளுடன் ஒப்பிடுகையில், இரண்டரை மடங்குக்கும் அதிகமான நேரடி அந்நிய முதலீடு இந்தியாவிற்கு வந்துள்ளது. அதிக வெளிநாட்டு முதலீடு என்பது இந்தியாவின் இளைஞர்களுக்கு எண்ணற்ற வேலைவாய்ப்புகளைக் குறிக்கிறது.

நண்பர்களே,

இன்று இந்தியா ஒரு மிகப்பெரிய உற்பத்தி சக்தியாக உருவெடுத்து வருகிறது. மின்னணு பொருட்கள், மருந்துகள் மற்றும் தடுப்பூசிகள், பாதுகாப்பு மற்றும் ஆட்டோமொபைல் போன்ற பல துறைகளில் இந்தியாவின் உற்பத்தி மற்றும் ஏற்றுமதி ஆகிய இரண்டிலும் முன்னெப்போதும் இல்லாத வகையில் அதிகரிப்பு ஏற்பட்டுள்ளது. 2014-ம் ஆண்டு முதல், இந்தியாவின் மின்னணு பொருட்கள்  உற்பத்தியில் ஆறு மடங்கு அதிகரிப்பு ஏற்பட்டுள்ளது, ஆம் ஆறு மடங்கு. இன்று இது 11 லட்சம் கோடி ரூபாய்க்கும் அதிகமான மதிப்புள்ள ஒரு தொழில்துறையாக உள்ளது. நமது மின்னணு பொருட்கள் ஏற்றுமதியும் நான்கு லட்சம் கோடி ரூபாயைத் தாண்டியுள்ளது. இந்தியாவின் ஆட்டோமொபைல் துறையும் மிக வேகமாக வளர்ந்து வரும் துறைகளில் ஒன்றாக மாறியுள்ளது. 2025-ம் ஆண்டில், இருசக்கர வாகனங்களின் விற்பனை இரண்டு கோடியைத் தாண்டியுள்ளது. இது நாட்டின் மக்களின் வாங்கும் சக்தி அதிகரித்துள்ளதைக் காட்டுகிறது; வருமான வரி மற்றும் ஜிஎஸ்டி  குறைப்பு மூலம் அவர்கள் பல நன்மைகளைப் பெற்றுள்ளனர்; நாட்டில் அதிக எண்ணிக்கையில் வேலைவாய்ப்புகள் உருவாக்கப்படுவதைக் குறிக்கும் பல உதாரணங்கள் இவை.

நண்பர்களே,

இன்றைய நிகழ்ச்சியில் 8 ஆயிரத்திற்கும் மேற்பட்ட மகள்களும் பணி நியமனக் கடிதங்களைப் பெற்றுள்ளனர். கடந்த 11 ஆண்டுகளில், நாட்டின் தொழிலாளர் சக்தியில் பெண்களின் பங்கேற்பு கிட்டத்தட்ட இரண்டு மடங்கு அதிகரித்துள்ளது. முத்ரா மற்றும் புத்தொழில் இந்தியா  போன்ற அரசின் திட்டங்களால் நமது மகள்கள் பெரிதும் பயனடைந்துள்ளனர். பெண்களின் சுயவேலைவாய்ப்பு விகிதத்தில் சுமார் 15 சதவீத உயர்வு ஏற்பட்டுள்ளது. புத்தொழில்கள் மற்றும் குறு, சிறு மற்றும் நடுத்தரத் தொழில்களைப் (MSME) பற்றி நான் பேசினால், இன்று அங்கு பெண் இயக்குநர்கள் மற்றும் பெண் நிறுவனர்கள் மிக அதிக எண்ணிக்கையில் உள்ளனர். நமது கூட்டுறவுத் துறையிலும், கிராமங்களில் இயங்கும் சுய உதவிக்குழுக்களிலும் பெண்கள் அதிக எண்ணிக்கையில் தலைமை தாங்கி வருகின்றனர்.

நண்பர்களே,

இன்று நாடு 'சீர்திருத்த எக்ஸ்பிரஸ்' வாகனத்தில் பயணிக்கத் தொடங்கியுள்ளது. நாட்டில் வாழ்க்கை மற்றும் வணிகம் ஆகிய இரண்டையும் எளிதாக்குவதே இதன் நோக்கமாகும். ஜிஎஸ்டியில் மேற்கொள்ளப்பட்ட அடுத்த தலைமுறைச் சீர்திருத்தங்களால் அனைவரும் பயனடைந்துள்ளனர். இதன் மூலம் நமது இளம் தொழில்முனைவோரும், நமது குறு, சிறு மற்றும் நடுத்தரத் தொழில்களும் பயனடைகின்றன. சமீபத்தில், நாடு வரலாற்றுச் சிறப்புமிக்க தொழிலாளர் சீர்திருத்தங்களைச் செயல்படுத்தியுள்ளது. இதன் மூலம் தொழிலாளர்கள், ஊழியர்கள் மற்றும் வணிகங்கள் என அனைவரும் பயனடைவார்கள். புதிய தொழிலாளர் சட்டத் தொகுப்புகள், தொழிலாளர்கள் மற்றும் ஊழியர்களுக்கான சமூகப் பாதுகாப்பு வரம்பை மேலும் வலுப்படுத்தியுள்ளன.

நண்பர்களே,

இன்று, 'சீர்திருத்த எக்ஸ்பிரஸ்' பற்றி எங்கும் விவாதிக்கப்படும் வேளையில், இது தொடர்பாக உங்களுக்கும் ஒரு பணியை ஒதுக்க விரும்புகிறேன். கடந்த ஐந்து முதல் ஏழு ஆண்டுகளில், நீங்கள் எப்போது, எந்த வடிவில் அரசாங்கத்துடன் தொடர்பு கொண்டீர்கள் என்பதை நினைவு கூருங்கள். ஏதேனும் அரசு அலுவலகத்தில் உங்களுக்கு வேலை இருந்ததா, அல்லது வேறு ஏதேனும் ஊடகம் வழியாகத் தொடர்பு கொண்டபோது நீங்கள் சிரமத்தை எதிர்கொண்டீர்களா, ஏதேனும் குறைபாட்டை உணர்ந்தீர்களா, அல்லது எரிச்சலை அடைந்தீர்களா - இத்தகைய விஷயங்களை மட்டும் நினைவில் கொள்ளுங்கள். இப்போது நீங்கள் ஒரு முடிவை எடுக்க வேண்டும் - எந்த விஷயங்கள் உங்களைத் துன்புறுத்தியதோ, சில சமயங்களில் உங்கள் பெற்றோரை, உங்கள் நண்பர்களைத் துன்புறுத்தியதோ, எது உங்களை வருத்தப்பட வைத்ததோ அல்லது கோபமடையச் செய்ததோ - அத்தகைய சிரமங்கள் உங்கள் பணிக்காலத்தில் மற்ற குடிமக்களுக்கு ஏற்படாமல் நீங்கள் பார்த்துக் கொள்ள வேண்டும். அரசாங்கத்தின் ஒரு அங்கமாக இருந்து, உங்கள் மட்டத்திலும் நீங்கள் சிறிய அளவிலான சீர்திருத்தங்களைச் செய்ய வேண்டும். அதிக எண்ணிக்கையிலான மக்கள் பயனடையும் வகையில் இந்த அணுகுமுறையுடன் நீங்கள் முன்னேற வேண்டும்.

வாழ்க்கையை எளிதாக்குதல்  மற்றும் வணிகம் செய்வதை எளிதாக்குதல் ஆகியவற்றை வலுப்படுத்தும் பணி, கொள்கைகள் மூலம் எவ்வளவு நடக்கிறதோ, அதே அளவு உள்ளூர் மட்டத்தில் பணியாற்றும் அரசு ஊழியரின் எண்ணம் மூலமாகவும் நடக்கிறது. நீங்கள் இன்னும் ஒரு விஷயத்தை நினைவில் கொள்ள வேண்டும். வேகமாக மாறிவரும் இந்தத் தொழில்நுட்ப யுகத்தில், நாட்டின் தேவைகளும் முன்னுரிமைகளும் வேகமாக மாறி வருகின்றன. இந்த வேகமான மாற்றத்துடன் நீங்களும் உங்களை மேம்படுத்திக் கொள்ள வேண்டும். 'iGOT கர்மயோகி' (iGOT Karmayogi) போன்ற தளங்களை நீங்கள் நிச்சயமாகச் சிறப்பாகப் பயன்படுத்த வேண்டும். மிகக் குறுகிய காலத்தில், சுமார் ஒன்றரை கோடி அரசு ஊழியர்கள் இந்த iGOT தளத்தில் இணைந்து தங்களுக்கான புதிய பயிற்சிகளைப் பெற்று தங்களை வலுப்படுத்திக் கொள்வது குறித்து நான் மகிழ்ச்சியடைகிறேன்.

நண்பர்களே,

அவர் பிரதமராக இருந்தாலும் சரி அல்லது அரசாங்கத்தின் ஒரு சிறிய ஊழியராக இருந்தாலும் சரி, நாம் அனைவரும் ஊழியர்களே. நம் அனைவருக்கும் ஒரு பொதுவான மந்திரம் உள்ளது; அதில் யாரும் உயர்ந்தவர் இல்லை, யாரும் வலதுபுறமோ இடதுபுறமோ இல்லை; நம் அனைவருக்கும், எனக்கும் உங்களுக்கும் அந்த மந்திரம் எதுவென்றால் - "நாக்ரிக் தேவோ பவ" (குடிமக்களே தெய்வம்). நாம் "நாக்ரிக் தேவோ பவ" என்ற மந்திரத்துடன் பணியாற்ற வேண்டும்; நீங்களும் அவ்வாறே செய்து வாருங்கள். மீண்டும் ஒருமுறை, உங்கள் வாழ்க்கையில் வந்துள்ள இந்தப் புதிய வசந்தம், வாழ்வின் இந்தப் புதிய யுகம் தொடங்குகிறது; உங்கள் மூலமாகத்தான் 2047-ல் ஒரு வளர்ச்சியடைந்த இந்தியா உருவாகப் போகிறது. எனது தரப்பிலிருந்து உங்களுக்குப் பல நல்வாழ்த்துகள்.

மிக்க நன்றி.

----

(Release ID:2218045)

AD/VK/KR