২৮-২৯ এপ্ৰিলত উত্তৰ প্ৰদেশ ভ্ৰমণ কৰিব প্ৰধানমন্ত্ৰী শ্ৰী নৰেন্দ্ৰ মোদীয়ে। ২৮ এপ্ৰিলৰ সন্ধিয়া প্ৰায় ৫ বজাত প্ৰধানমন্ত্ৰীগৰাকীয়ে মহিলা সন্মিলনত অংশগ্ৰহণ কৰিব, য’ত তেওঁ বাৰাণসীত প্ৰায় ৬,৩৫০ কোটি টকাৰ বিভিন্ন উন্নয়নমূলক প্ৰকল্পৰ উদ্বোধন আৰু আধাৰশিলা স্থাপন কৰিব। এই উপলক্ষে তেওঁ ৰাজহুৱা সমাৱেশতো ভাষণ দিব।

২৯ এপ্ৰিলৰ পুৱা প্ৰায় ৮:৩০ বজাত প্ৰধানমন্ত্ৰীগৰাকীয়ে বাৰাণসীৰ শ্ৰী কাশী বিশ্বনাথ মন্দিৰত উপস্থিত হৈ প্ৰাৰ্থনা কৰিব। ইয়াৰ পিছত প্ৰধানমন্ত্ৰীগৰাকীয়ে হৰদৈলৈ গৈ প্ৰায় ১১:৩০ বজাত গংগা এক্সপ্ৰেছৱে উদ্বোধন কৰিব। এই উপলক্ষে তেওঁ ৰাজহুৱা সমাৱেশতো ভাষণ দিব।

বাৰাণসীত পি এম

প্ৰধানমন্ত্ৰীগৰাকীয়ে মহিলা সন্মিলনত অংশগ্ৰহণ কৰিব, য’ত সমগ্ৰ অঞ্চলৰ মহিলাৰ ব্যাপক উপস্থিতি থাকিব। প্ৰধানমন্ত্ৰীগৰাকীয়ে ১,০৫০ কোটি টকাৰো অধিক মূল্যৰ ৪৮ টাতকৈও অধিক সম্পূৰ্ণ প্ৰকল্প দেশৰ বাবে উৎসৰ্গা কৰিব। এই মূল আন্তঃগাঁথনি প্ৰকল্পসমূহৰ ভিতৰত আছে বাৰাণসী-আজমগড় পথ সম্প্ৰসাৰণ সম্পূৰ্ণ কৰা, কাজ্জকপুৰা আৰু কাদিপুৰত অত্যাৱশ্যকীয় ৰেল অভাৰব্ৰীজ মুকলি কৰা, ভগৱানপুৰত ৫৫ এম এল ডিৰ নলা পৰিশোধন প্ৰকল্প (এছ টি পি) উদ্বোধন কৰা।

প্ৰধানমন্ত্ৰীগৰাকীয়ে জল জীৱন অভিযানৰ অধীনত ৩০খন গ্ৰাম্য খোৱাপানী আঁচনি, চন্দ্ৰাৱতী ঘাটৰ পুনৰ উন্নয়ন, সাৰনাথৰ সমীপৰ সাৰংনাথ মন্দিৰৰ পৰ্যটন উন্নয়ন, নগৱাৰ সন্ত ৰবিদাস উদ্যানৰ সৌন্দৰ্য আৰু সংস্কাৰকে ধৰি কেইবাটাও সম্প্ৰদায়কেন্দ্ৰিক প্ৰকল্প উদ্বোধন কৰিব। ইয়াৰ ভিতৰত ৰাজহুৱা সেৱা আৰু ক্ৰীড়াৰ উন্নতিও উল্লেখযোগ্য, বিশেষকৈ ইউ পি কলেজত কৃত্ৰিম হকী টাৰ্ফ, ৰামনগৰত ১০০ খন বিছনাযুক্ত বৃদ্ধাশ্ৰম আৰু ভেলুপুৰ পানী পৰিশোধন প্ৰকল্পত ১ মেগাৱাট সৌৰশক্তি কেন্দ্ৰ অন্যতন। আধুনিক স্বাস্থ্যসেৱা ব্যৱস্থাৰ সৈতে পৰম্পৰাগত চিকিৎসা বিজ্ঞানক একত্ৰিত কৰাৰ চৰকাৰৰ দায়বদ্ধতাক প্ৰতিফলিত কৰি প্ৰধানমন্ত্ৰীগৰাকীয়ে কেন্দ্ৰীয় তিব্বতী অধ্যয়ন বিশ্ববিদ্যালয়ত সোৱা ৰিগপা ভৱন আৰু চিকিৎসালয় উদ্বোধন কৰিব।

তদুপৰি প্ৰধানমন্ত্ৰীগৰাকীয়ে প্ৰায় ৫,৩০০ কোটি টকাৰ ১১২টাতকৈও অধিক প্ৰকল্পৰ আধাৰশিলা স্থাপন কৰিব। ইয়াৰ ভিতৰত আছে আমৰুট ২.০ৰ অধীনত ১৩ খন নলা আৰু পানী যোগান আঁচনি, শ্ৰী শিৱপ্ৰসাদ গুপ্ত সংমণ্ডল জিলা চিকিৎসালয়ত ৫০০ বিছনাযুক্ত মাল্টি-ছুপাৰ স্পেচিয়েলিটি চিকিৎসালয়, ভোজুবীৰ আৰু ছিগ্ৰাত মাৰ্কেট কমপ্লেক্স আৰু কাৰ্যালয় স্থান নিৰ্মাণ, পুখুৰী সংস্কাৰ আৰু পুনৰুদ্ধাৰ, ১৯৮ বিছনাযুক্ত চিকিৎসালয় পুনৰ উন্নয়ন, ১০০ খন বিছনাযুক্ত এটা জটিল চিকিৎসালয় কেয়াৰ ব্লক আৰু আচ্ছি ঘাট, দশশ্বমেধ ঘাট আৰু নমো ঘাটকে ধৰি প্ৰধান ঘাটসমূহত পৰ্যটনৰ সুবিধাসমূহৰ উন্নয়ন সাধন। শাসন ​​আৰু সমাজ কল্যাণৰ আন্তঃগাঁথনি শক্তিশালী কৰাৰ বাবে প্ৰধানমন্ত্ৰীগৰাকীয়ে ৰামনগৰত সংহত সংমণ্ডলীয় কাৰ্যালয়, পৌৰ নিগমৰ কাৰ্যালয় ভৱন, চৰকাৰীভাৱে পৰিচালিত শিশু আশ্ৰয় গৃহ আৰু কিশোৰ ন্যায় ব’ৰ্ডৰ আধাৰশিলা স্থাপন কৰিব। ইয়াৰ উপৰি প্ৰধানমন্ত্ৰীগৰাকীয়ে বানাছ ডেইৰীৰ সৈতে জড়িত উত্তৰ প্ৰদেশৰ পৰা গাখীৰ যোগানকাৰীক ভাট্টা হিচাপে ১০৫ কোটিৰো অধিক ধন হস্তান্তৰ কৰিব।

প্ৰধানমন্ত্ৰীগৰাকীয়ে বাৰাণসী জংচন–পণ্ডিত দীনদয়াল উপাধ্যায় জংচন তৃতীয় আৰু চতুৰ্থ ৰেলপথ প্ৰকল্পৰ আধাৰশিলা স্থাপন কৰিব, য’ত গংগা নদীৰ ওপৰত ৰে’ল-কাম-ৰোড দলং নিৰ্মাণো অন্তৰ্ভুক্ত কৰা হ’ব। এই প্ৰকল্পৰ জৰিয়তে ৰেল যাতায়াতৰ যান-জঁট হ্ৰাস, সামগ্ৰী পৰিবহণ কাৰ্যক্ষমতা বৃদ্ধি, মাল্টি-মডেল সংযোগ শক্তিশালী, আৰু মসৃণ যান-বাহন চলাচল নিশ্চিত কৰি বাৰাণসী আৰু কাষৰীয়া জিলাক উপকৃত কৰা হ’ব। ইয়াৰ উপৰি কাশী বিশ্বনাথ ধাম, ৰামনগৰ অঞ্চল আৰু ১৯ নং ৰাষ্ট্ৰীয় ঘাইপথলৈ যোৱাৰ সুবিধা উন্নত কৰাৰ লগতে পূব উত্তৰ প্ৰদেশ আৰু বিহাৰৰ সৈতে ৰেল সংযোগ শক্তিশালী কৰা হ’ব।

প্ৰধানমন্ত্ৰীগৰাকীয়ে অমৃত ভাৰত এক্সপ্ৰেছৰ দুখন নতুন ৰে’ল- বনাৰস–পুনে (হাদাপচাৰ) আৰু অযোধ্যা–মুম্বাই (লোকমান্য তিলক টাৰ্মিনাছ)ৰো উদ্বোধন কৰিব। এই ৰে’লসমূহে সুলভ আৰু আধুনিক ভ্ৰমণৰ বিকল্প প্ৰদান কৰিব আৰু উত্তৰ প্ৰদেশ, মধ্যপ্ৰদেশ আৰু মহাৰাষ্ট্ৰৰ মাজত সংযোগ বৃদ্ধি কৰিব। বেনাৰস–পুনে সেৱাই কাশী বিশ্বনাথ ধামলৈ সহজ প্ৰৱেশৰ সুবিধা প্ৰদান কৰাৰ বিপৰীতে অযোধ্যা–মুম্বাই সেৱাই শ্ৰী ৰাম মন্দিৰৰ তীৰ্থস্থানৰ সৈতে সংযোগ উন্নত কৰি প্ৰধান ধৰ্মীয় স্থানসমূহৰ মাজত সংযোগ শক্তিশালী কৰিব।

হৰদৈত প্ৰধানমন্ত্ৰী

দেশৰ বিশ্বমানৰ আন্তঃগাঁথনিৰ উন্নয়নৰ ক্ষেত্ৰত এক উল্লেখযোগ্য মাইলৰ খুঁটি হিচাপে হৰদৈ জিলাত প্ৰধানমন্ত্ৰীগৰাকীয়ে উদ্বোধন কৰিব গংগা এক্সপ্ৰেছৱে। গংগা এক্সপ্ৰেছৱে হৈছে ৫৯৪ কিলোমিটাৰ দীঘল, ৬ লেনযুক্ত (৮ লেনলৈ সম্প্ৰসাৰণযোগ্য), প্ৰৱেশ নিয়ন্ত্ৰিত গ্ৰীণফিল্ড হাইস্পীড কৰিডৰ, যিটো মুঠ প্ৰায় ৩৬,২৩০ কোটি টকা ব্যয়েৰে নিৰ্মাণ কৰা হৈছে। এই এক্সপ্ৰেছৱেই ১২খন জিলাৰ মাজেৰে পাৰ হৈ যায়— মীৰুট, বুলণ্ডচহৰ, হাপুৰ, আমৰোহা, সম্ভল, বদৌন, শ্বাহজাহানপুৰ, হৰদয়, উন্নাও, ৰায়ে বৰেলী, প্ৰতাপগড়, আৰু প্ৰয়াগৰাজ। এই নিৰৱচ্ছিন্ন তীব্ৰবেগী কৰিডৰে উত্তৰ প্ৰদেশৰ পশ্চিম, মধ্য আৰু পূব অঞ্চলক সংযোগ কৰে।

এই প্ৰকল্পৰ জৰিয়তে মীৰুট আৰু প্ৰয়াগৰাজৰ মাজত যাত্ৰাৰ সময় বৰ্তমানৰ ১০-১২ ঘণ্টাৰ পৰা প্ৰায় ৬ ঘণ্টালৈ যথেষ্ট হ্ৰাস পাব, যাৰ ফলত যাতায়ত সহজ হ’ব আৰু পৰিবহণৰ কাৰ্যক্ষমতা বৃদ্ধি পাব।

প্ৰকল্পটোৰ অন্যতম মূল বৈশিষ্ট্য হৈছে শ্বাহজাহানপুৰ জিলাত ৩.৫ কিলোমিটাৰ দৈৰ্ঘ্যৰ জৰুৰীকালীন অৱতৰণ সুবিধা (এয়াৰষ্ট্ৰিপ)ৰ ব্যৱস্থা। এই দ্বৈত ব্যৱস্থাৰ আন্তঃগাঁথনিয়ে ৰাষ্ট্ৰীয় নিৰাপত্তাৰ প্ৰস্তুতি শক্তিশালী কৰে আৰু অৰ্থনৈতিক সুবিধাৰ বাহিৰেও কৌশলগত গুৰুত্ব প্ৰতিফলিত কৰে।

গংগা এক্সপ্ৰেছৱেক এটা ডাঙৰ অৰ্থনৈতিক কৰিড’ৰ হিচাপে কল্পনা কৰা হৈছে, ইয়াৰ পথৰ কাষৰীয়া ১২খন জিলাৰ প্ৰায় ২,৬৩৫ হেক্টৰ মাটিত সংহত উৎপাদন আৰু সামগ্ৰী পৰিবহণ কৰিড’ৰ গঢ়ি তোলা হ’ব। এক্সপ্ৰেছৱেই সামগ্ৰী পৰিবহণ খৰচ হ্ৰাস কৰিব, যোগান শৃংখলৰ কাৰ্যক্ষমতা বৃদ্ধি কৰিব আৰু উৎপাদন খণ্ডৰ প্ৰতিযোগিতামূলক ক্ষমতা বৃদ্ধি কৰিব।

উন্নত সংযোগে কৃষকসকলক নগৰ আৰু ৰপ্তানি বজাৰত প্ৰত্যক্ষ প্ৰৱেশৰ সুবিধা প্ৰদান কৰিব, যাৰ ফলত তেওঁলোকে নিজৰ উৎপাদিত সামগ্ৰীৰ উন্নত মূল্য লাভ কৰিব পাৰিব আৰু গ্ৰাম্য আয় শক্তিশালী কৰিব পাৰিব। এই প্ৰকল্পটোৱে পৰ্যটনক উন্নীত কৰিব, নতুন অৰ্থনৈতিক সুযোগ সৃষ্টি কৰিব আৰু সমগ্ৰ অঞ্চলটোত প্ৰত্যক্ষ আৰু পৰোক্ষভাৱে নিয়োগৰ সুযোগ সৃষ্টি কৰিব বুলিও আশা কৰা হৈছে।

গংগা এক্সপ্ৰেছৱেই ৰাজ্যখনৰ এক্সপ্ৰেছৱেৰ এক বিস্তৃত নেটৱৰ্কৰ মেৰুদণ্ড হিচাপেও কাম কৰিব, য’ত আগ্ৰা-লক্ষ্ণৌ এক্সপ্ৰেছৱে, জেৱাৰ লিংক এক্সপ্ৰেছৱে, ফাৰুখাবাদ লিংক এক্সপ্ৰেছৱে আৰু মীৰুটৰ পৰা হৰিদ্বাৰলৈ প্ৰস্তাৱিত সম্প্ৰসাৰণকে ধৰি কেইবাটাও লিংক কৰিড’ৰ হিচাপে কাৰ্যক্ষম বা পৰিকল্পিত। এই উদীয়মান এক্সপ্ৰেছৱে নেটৱৰ্কে সমগ্ৰ উত্তৰ প্ৰদেশত পূবৰ পৰা পশ্চিমলৈ আৰু উত্তৰৰ পৰা দক্ষিণলৈ তীব্ৰবেগী পথ সংযোগ সম্প্ৰসাৰণ কৰিব, যাৰ ফলত সুষম আঞ্চলিক উন্নয়ন সম্ভৱ হ’ব।

গংগা এক্সপ্ৰেছৱে কেৱল পৰিবহণ প্ৰকল্প নহয়, বৰঞ্চ ই এক পৰিৱৰ্তনশীল পদক্ষেপ, যিয়ে সামগ্ৰী পৰিবহণ খৰচ হ্ৰাস কৰিব, ঔদ্যোগিক বিনিয়োগ আকৰ্ষণ কৰিব, কৃষি আৰু গ্ৰাম্য আয় বৃদ্ধি কৰিব, চাকৰি সৃষ্টি কৰিব আৰু সমগ্ৰ ৰাজ্যতে সামগ্ৰিক অৰ্থনৈতিক বিকাশ ত্বৰান্বিত কৰিব।

*****

MJPS/VJ/KD