امورداخلہ اور امداد باہمی کے مرکزی وزیر جناب امت شاہ نے لوک سبھا میں حد بندی بل 2026 ، آئین (131 ویں ترمیمی) بل 2026 اور مرکز کے زیر انتظام علاقوں کے قوانین (ترمیمی) بل 2026 پر بحث میں حصہ لیتے ہوئے کہا کہ ایک غلط فہمی پھیلائی جا رہی ہے کہ ان تینوں بلوں کے بعد لوک سبھا میں جنوبی ریاستوں کی نمائندگی نمایاں طور پر کم ہو جائے گی اور انہیں بڑا نقصان اٹھانا پڑے گا ۔
مرکزی وزیر داخلہ نے کہا کہ حد بندی بل 2026 جنوبی ریاستوں کو نقصان نہیں پہنچائے گا بلکہ درحقیقت انہیں فائدہ پہنچائے گا ۔انہوں نے کہا کہ 50فیصد اضافے کے ماڈل کے تحت ، لوک سبھا میں موجودہ 543 نشستیں بڑھ کر 816 ہو جائیں گی ، جس سے تمام جنوبی ریاستوں کے لیے نشستوں کی تعداد میں اضافہ ہوگا ۔مرکزی وزیر داخلہ نے مزید کہا کہ لوک سبھا میں جنوبی ریاستوں کی موجودہ 129 نشستیں بڑھ کر 195 ہو جائیں گی  اور ایوان کی کل نشستوں میں ان کا حصہ  موجودہ تقریباً 24 فیصد کے برابررہے گا ۔
جناب امت شاہ نے کہا کہ 543 اراکین پر مشتمل موجودہ ایوان میں کرناٹک میں اس وقت 28 اراکین ہیں ، جو کل تعدادکا تقریباً 5.15 فیصد ہے ۔مجوزہ بلوں کی منظوری اور آئینی ترمیم کے بعد کرناٹک کے لیے نشستوں کی تعداد 28 سے بڑھ کر 42 ہو جائے گی ۔اس صورت میں 816 اراکین کی لوک سبھا میں کرناٹک کی نمائندگی تقریباً 5.14 فیصد رہے گی ، اس لیے کرناٹک کو کوئی نقصان نہیں ہوگا ۔
مرکزی وزیر داخلہ نے کہا کہ آندھرا پردیش میں اس وقت 25 نشستیں ہیں ، جن کی نمائندگی 543 رکنی ایوان میں تقریباً 4.60 فیصد ہے ۔مجوزہ تبدیلیوں کے بعد ، تقریباً 50 فیصد اضافے کے ساتھ ، نشستوں کی تعداد بڑھ کر 38 ہو جائے گی  اور آندھرا پردیش کی نمائندگی تقریباً 4.65 فیصد ہو جائے گی ۔اسی طرح تلنگانہ میں موجودہ لوک سبھا میں تقریبا ً3.13 فیصد کی نمائندگی کے ساتھ اس وقت 17 نشستیں ہیں ۔مجوزہ اضافے کے بعد ، نشستوں کی تعداد 26 ہو جائے گی  اور اس کی نمائندگی 3.18 فیصد تک پہنچ جائے گی۔
جناب امت شاہ نے کہا کہ وہ تمل ناڈو کے لوگوں کو یقین دلانا چاہیں گے کہ ان کی طاقت کم نہیں ہوگی بلکہ حقیقت میں بڑھے گی ۔تمل ناڈو کی نمائندگی میں کمی نہیں آئے گی بلکہ یہ بڑھے گی ۔اس وقت 39 اراکین تمل ناڈو سے منتخب ہوتے ہیں ، جو 543 رکنی ایوان کا تقریبا ً7.18 فیصد ہے ۔مجوزہ 50 فیصد اضافے کے بعد نشستوں کی تعداد بڑھ کر 59 ہو جائے گی اور 816 اراکین پر مشتمل نئے ایوان میں اس کی نمائندگی تقریباً 7.23 فیصد ہوگی ۔اس طرح یہ واضح ہے کہ ان ریاستوں کی نمائندگی میں کوئی کمی نہیں ہوگی بلکہ اضافہ ہوگا ۔
مرکزی وزیر داخلہ نے کہا کہ کیرالم میں اس وقت لوک سبھا کے 20 ممبران پارلیمنٹ ہیں ، جو 543 رکنی ایوان کے تقریباً 3.68 فیصد کی نمائندگی کرتے ہیں ۔مجوزہ اضافے کے بعد یہ تعداد 20 سے بڑھ کر 30 ہو جائے گی اور نمائندگی 3.67 فیصد کے قریب رہے گی ۔

جناب امت شاہ نے کہا کہ اگر جنوبی ہندوستان کی مجموعی نمائندگی پر غور کیا جائے تو اس وقت 543 رکنی ایوان میں جنوبی ریاستوں سے 129 ممبران پارلیمنٹ آتے ہیں ، جو تقریبا ً23.76 فیصد ہے ۔مجوزہ 50 فیصد اضافے کے بعد ، یہ تعداد 129 سے 195 تک بڑھ جائے گی ، اور 816 رکنی ایوان میں ، ان کی نمائندگی تقریباً 23.87 فیصد ، یعنی تقریباً24 فیصد ہوگی ۔اس سے یہ واضح ہوتا ہے کہ جنوبی ریاستوں کی مجموعی نمائندگی کی طاقت میں اضافہ ہوگا ۔
امورداخلہ اور امداد باہمی کے مرکزی وزیر جناب امت شاہ نے یہ بھی کہا کہ وزیر اعظم جناب نریندر مودی کی قیادت میں مرکزی کابینہ نے ذات پات کی مردم شماری کرنے کا فیصلہ کیا ہے اور آئندہ مردم شماری میں ذات پات سے متعلق اعداد و شمار بھی یکجا کیے جائیں گے ۔انہوں نے کہا کہ مردم شماری دو مراحل میں کی جاتی ہے-پہلے گھروں کی گنتی ، اور پھر افراد کی گنتی ، اس وقت پہلا مرحلہ جاری ہے ، جس میں گھروں کی گنتی کی جا رہی ہے ، اور چونکہ گھروں میں ذات نہیں ہوتی ، اس لیے اس مرحلے میں فارم پر ذات پات کی کوئی تجویز نہیں ہے ۔وزیر داخلہ نے مزید کہا کہ آبادی کی گنتی کے مرحلے کے دوران افراد کے اعدادو شمار جمع  کرتے وقت ذات پات سے متعلق معلومات بھی ریکارڈ کی جائیں گی ۔
جناب امت شاہ نے کہا کہ ہم نے حد بندی کمیشن ایکٹ میں کوئی تبدیلی نہیں کی ہے ؛ ہم نے موجودہ ایکٹ کو بالکل مکمل طور پر دہرایا ہے ۔انہوں نے کہا کہ اگر اس ایکٹ کو ماضی میں کسی قسم کی ہیرا پھیری کے لیے استعمال کیا گیا تھا تو وہ اس پر تبصرہ نہیں کر سکتے لیکن موجودہ حکومت نے ایسی کوئی کوشش نہیں کی ہے ۔مرکزی وزیر داخلہ نے واضح کیا کہ حد بندی کمیشن کی رپورٹ پارلیمنٹ کی منظوری اور صدر کی منظوری حاصل کرنے کے بعد ہی نافذ العمل ہوگی ۔اس لیے اس عمل کو 2029 سے پہلے نافذ کرنے کا کوئی سوال ہی نہیں ہے ۔جناب شاہ نے کہا کہ اس ایکٹ کا تمل ناڈو یا مغربی بنگال میں جاری انتخابات پر کوئی اثر نہیں پڑے گا ؛ 2029 سے پہلے اس پر عمل درآمد کا کوئی سوال ہی نہیں ہے ۔2029 تک ہونے والے تمام انتخابات موجودہ نشستوں پر اور موجودہ عمل کے تحت ہوں گے ۔
مرکزی وزیر داخلہ امت شاہ نے کہا کہ جمہوریت میں اقتدار کا تعین شہریوں کی مرضی اور سوچ سے ہوتا ہے ، نہ کہ صرف سیاسی جماعتوں یا رہنماؤں سے ۔انہوں نے کہا کہ کوئی بھی 1.3 ارب لوگوں کے مینڈیٹ میں ہیرا پھیری نہیں کر سکتا ۔ اگر یہ ممکن ہوتا تو ماضی میں حکومت میں تبدیلیاں نہ ہوتیں ۔انہوں نے یہ بھی کہا کہ ہندوستان میں ایمرجنسی کے دوران بھی رائے عامہ کو مستقل طور پر متاثر نہیں کیا جا سکا اور عوام نے اپنا فیصلہ جمہوری طریقہ سے سنایا ۔جناب امت شاہ نے زور دے کر کہا کہ ملک میں جمہوریت کو ختم کرنے کی صلاحیت کسی میں نہیں ہے  اور تاریخ گواہ ہے کہ جب بھی ایسی کوششیں کی گئی ہیں ، لوگوں نے انہیں مسترد کر دیا ہے ۔
 

543 نشستوں سےلیکر 816 نشستوں تک (50فیصد اضافے کا ماڈل)

)

*******

ش ح۔ م ش۔م ش

U.NO.5945