প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা ‘নারী শক্তি বন্দন সম্মেলন’ দা ৱা ঙাংখ্রে
ভারতকী নারী শক্তিনা অঙকপা থবক কয়া পাংথোক্লে: প্রধান মন্ত্রী
ঐখোয়গী লৈবাক্ত, পঞ্চয়তি রাজ ইন্সতিতুসনশিং নুপীশিংনা লুচিংবা ওইবগী শিংথানিঙাই ওইরবা খুদম অমনি: প্রধান মন্ত্রী
পুন্সিগী তাঙ্কক খুদিংমক্ত সরকারনা নুপীশিং শৌগৎলি: প্রধান মন্ত্রী
মতম অমদা নুপাশিং খক্তগীনি হায়না খন্নরম্বা হিরম কয়াদা ঙসিদি নুপীশিংনা মাঙজিল থারে: প্রধান মন্ত্রী
মখোয়গী হোৎনবা কনবা, থৌনা অমসুং থাজবনা মরম ওইদুনা ভারতকী নারী শক্তি নৌবা থাকশিং য়ৌবা ঙম্লে; হৌজিক, খুদোংচাবশিং হেনগৎহন্দুনা মখোয় মখা তানা ফিবম ফগৎনবা ঐখোয় পুন্না চৎমিন্নগদবনি: প্রধান মন্ত্রী
থাগৎখিবা:
13 APR 2026 1:28PM by PIB Imphal
ঙসি প্রধান মন্ত্রী শ্রী নরেন্দ্র মোদীনা বিজ্ঞান ভবন্দা নারী শক্তি বন্দন থৌরম অমদা ৱা ঙাংখ্রে। লৈবাক্কী তোঙান তোঙানবা মফমশিংদা অনৌবা চহি হৌবগী থৌরমশিং অমসুং শেংলবা বৈশাখি থৌরমগী মাংওইননা ৱা ঙাংলদুনা, প্রধান মন্ত্রীনা জাল্লিয়ানবাগ মীহাৎকী অথৌবশিংগী মফমদা ইকায়খুম্নবা উৎখি। প্রধান মন্ত্রীনা হায়খি মদুদি নারী শক্তিদা কৎথোক্লবা ৱারেপ অমা, ২১শুবা চহিচাগী খ্বাইদগী চাউবা ৱারেপ অমা ভারতনা লৌরগনি।
পুৱারি ওইরবা তাঞ্জা অমনি হায়না ফোঙদোক্লদুনা, প্রধান মন্ত্রীনা হায়খি মদুদি হৌখ্রবা মতমগী মঙালানশিং অমসুং তুংগী ৱারেপশিং থবক ওইনা পাংথোক্নবা লৈবাক অসিগী সংসদনা অনৌবা পুৱারি অমা শেম্নবা মতম অদু নকশিল্লক্লে। খুন্নাইগী অচুম্বা পুরকপা হায়বসি য়াম্না মরুওই। খুন্নাইগী অচুম্বা হায়বসি খোল্লাউ অমা ওইবা খক নত্তনা থবক শুবগী চৎনবগী তৎনবা য়াদ্রবা শরুক অমা ওইবা থোঙ মান্নবা ভারতগী মঙলান লৈবাক অসিনা মঙলি। রাজ্যশিংগী এশেমব্লিশিংদগী লৈবাক অসিগী সংসদ ফাওবা চহি কয়া ঙাইরকপা অদু লোইশিল্লগনি।
২০২৩ দা সংসদকী অনৌবা শঙলেন্দা নারী শক্তি বন্দন এক্ত পাস তৌখিবা অদু নিংশিংলদুনা, প্রধান মন্ত্রীনা হায়খি মদুদি ফিবম অমদা হেক্ত মসি ২০২৯ দা থবক ওইনা পাংথোক্কদবনি হায়না দল খুদিংমক্না অয়াবা পীদুনা এক্ত অসি অমতা ওইনা পাস তৌখিবনি। নারী শক্তি বন্দন এক্ত থবক ওইনা পাংথোক্কদবনি, নুপীশিং শরুক য়াদুনা ঐখোয়গী গনতন্ত্র মপাঙ্গল কনখৎহনগনি, মসিগীদমক এপ্রিল ১৬ দগী সংসদকী অখন্নবা মীফম অমা হৌরগনি। ৱারি শানদুনা, মতেং পাংনদুনা অমসুং শরুক য়াদুনা থবক অসি পাংথোকপা হায়বসি ঐখোয়গী থবক্নি অমসুং মরুওইবনি, মসিনা সংসদকী ইকায়খুম্নবা হেনগৎহনগনি।
থবক অসিদা লৈবাক শীনবা থুংবগী নুপীশিংগী মরক্ত হরাওরিবা অসি পল্লদুনা, প্রধান মন্ত্রীনা হায়খি মদুদি এশেমব্লিশিং অমসুং লোক সভা য়ৌরক্নবা লৈবাক শীনবা থুংবগী নুপীশিংনা মখোয়গী অপাম্বশিং ফোঙদোক্লি। মখোয়গী মঙলানশিংগী অনৌবা থাজবশিং লৈরে অমসুং লৈবাক অসিদা অফবা ফিবম অমা লৈরে। থবক অসিদা নুপীশিং থৱায় য়াওনা শরুক য়ানবা অমসুং মখোয়গী ৱাখল্লোনশিং অমসুং অনিংবশিং ফোঙদোক্নবা মখোয়গী এম.পিশিং উন্নবা নুপীশিংদা ঐনা হায়জরি।
নিংতম ইহৌদগী হৌরগা কন্সতিতুয়েন্ত এশেমব্লি ফাওবদা নুপীশিংনা পাংথোকখিবা থবকশিং খোঙ্গুল লীরদুনা, প্রধান মন্ত্রীনা হায়খি মদুদি নারী শক্তিগী অকনবা থৌদাংনা নিংতম্বা ভারতকী য়ুম্ফম থোনখিবনি। মীয়ামগী মীহুৎ ওইবা ফংলবা নুপীশিংনা লৈবাক অসিগিদমক মশক থোকপা থবক পাংথোকখ্রে। ঙসি ফাওবা, ঐখোয়গী লৈবাক্ত, রাষ্ট্রপতিদগী হৌরগা ফাইনান্স মিনিষ্টর ফাওবা, নুপীশিংনা মরুওইবা ফমশিং পায়রি। রাষ্ট্রপতিদগী হৌরগা প্রধান মন্ত্রী ফাওবদা, নুপীশিংনা লৈরুবা মফম খুদিংমক্ত, মখোয়না মখোয় মশাগী মফম অমা কনখি।
পঞ্চয়তি রাজ ইন্সতিতুসনশিং নুপীশিংনা লুচিংবা ওইবগী শিংথানিঙাই ওইরবা খুদম অমনি হায়রদুনা, প্রধান মন্ত্রীনা হায়খি মদুদি ঙসি লোকেল গভর্নমেন্ত বোদিশিংদা নুপী লাখ ১৪ হেন্না মাইপাক্না থবক তৌরি। চাউরাক্না রাজ্য ২১ রোমদা, পঞ্চয়তশিংদা মখোয়না শরুক য়াবা চাদা ৫০ রোম য়ৌরে। রাজনিতি অমসুং খুন্নাইগী পুন্সিদা নুপী লাখ কয়া থৱায় য়াওনা শরুক য়াবা অসিদা মালেমগী লুচিংবশিং অমসুং রাজনিতিগী অখঙ-অহৈশিং ফাওবা অঙকপা ফাওরে, ভারতকী চাউথোকচবা হেনগৎহল্লে।
তোঙান তোঙানবা থিজিনবশিং পল্লদুনা, প্রধান মন্ত্রীনা হায়খি মদুদি ৱারেপ লৌবগী থবকশিংদা নুপীশিং শরুক য়াবা হেনগৎলকপা অসিনা সরকারগী থবকশিংদা মীয়ামগী খনবা হেনগৎহল্লে। মসিনা ঈশিং, লাইরিক-লাইশু, হকশেল অমসুং মচি ওইবা চীঞ্জাকগুম্বা হিরমশিংদা থবকশিং হেন্না কৎথোকপা ঙম্লে। পঞ্চয়তকী থাক্ত নুপীশিং শরুক য়াদুনা অচৌবা থৌদাং অমা লৌবদগী জল জিবন মিসন মাইপাকপা অসি খুদম অমনি।
প্রধান মন্ত্রীনা মখা তানা হায়খি মদুদি চহি কয়া লোকেল বোদিশিং অমসুং ইন্সতিতুসনশিংদা থবক তৌরক্লবা নুপী লাখ কয়া হৌজিক লৌশিং য়াম্না লৈরে। অচৌবা থৌদাংশিং লৌনবা মখোয় থৌরাং তৌরে অমসুং ইখৌ লাংলে। নারী শক্তি বন্দন এক্ত চৎহনবা অসিনা অসিগুম্বা নুপীশিংগী পুন্সিদা অচৌবা খুদোংচাবা অমা পীরগনি। পঞ্চয়ত্তগী সংসদ ফাওবগী খোঙচৎ হেন্না লাইরগনি।
বিকসিত ভারতকী খোঙচত্ত নুউপীশিংগী মরুওইবা থৌদাং পল্লদুনা, প্রধান মন্ত্রীনা হায়খি মদুদি মহাক্কী সরকারনা ২০১৪ দগী হৌনা নুপীশিংগী পুন্সিগী তাঙ্কক খুদিংমক্কী স্কিমশিং পায়খৎলে। পোকপদগী হৌরগা শিবা ফাওবা, তোঙান তোঙানবা স্কিমশিংনা ইচলশিং অমসুং ইচানুপীশিংগী সেবা তৌনবা সরকার লৈরি। অঙাং নুপীমচাশিং মমানা মীরোল্লিঙৈদা হাৎপা থিংনবা ঐখোয়না বেতি বচাউ বেতি পরাউ খোঙজং হৌদোক্লে, মীরোল্লিঙৈদা মচি ওইবা চীঞ্জাক চানবা মাত্রু বন্দন য়োজনাগী মখাদা লুপা ৫,০০০ গী শেন্থং পীরে অমসুং নুপীমচাশিং লাইরিক তম্বদা মতেং পাংনবা শেন্দোয় ৱাংনা পীবা সুকন্যা সমরিধি য়োজনা হৌদোক্লে।
প্রধান মন্ত্রীনা হায়খি মদুদি মতম চানা তিকা থানবা মিসন ইন্দ্রধনুস লৈরে, শ্বাচ্ছ ভারত অভিয়ানগী মখাদা তোইলেতশিং শারে, লেম্না সেনিতরি নেপকিনশিং ফংহল্লে, খেলো ইন্দিয়া স্কিমগী মখাদা মতেং পাংলে অমসুং সাইনিক স্কুলশিং অমসুং নেসনেল দিফেন্স একাদেমিদা নুপীশিং তম্বা য়ারে। পুন্সিগী মতুং তারকপা তাঙ্ককশিংদা, উজৱালা য়োজননা গ্যাস কন্নেক্সন করোর কয়া পীরে, হর ঘর নল সে জল খোঙজংনা য়ুমশিংদা ঈশিং ফংহল্লে, লেম্না চেঙ পীবা স্কিমনা চানবা ৱাৎহন্দ্রে অমসুং অয়ুস্মান য়োজননা লুপা লাখ ৫ ফাওবা লেম্ন লাইয়েংবগী খুদোংচাবা পীরে। জন ঔশাধি কেন্দ্রনা হিদাক-লাংথকশিং মমল চাদা ৮০ ফাওবা তানা ফংহল্লে, মসিনা ঐখোয়গী ইচলশিং অমসুং ইচানুপীশিংদা কান্নবা য়াম্না পীরে।
মখোয়গী ফিবম ফগৎনবা নুপীশিং শেন-থুমগী থবকশিংদা শরুক য়াবা হেনগৎহনবগী দরকার ওইবা অদু পল্লদুনা, প্রধান মন্ত্রীনা হায়খি মদুদি ৱারেপ খুদিংমক অমসুং স্কিম খুদিংমক হিরম অসিদা মরুওইনা লৌরে। মমাঙদা, ইমুংগী লন-থুম, মরুওইনা নুপাশিংগী মমিংদা পানখি, অদুবু পি.এম অৱাস য়োজনাগী মখাদা, য়ুমশিং নুপীশিংগী মমিংদা পাল্লে। হৌখিবা চহি ১১ দা, নুপী করোর ৩ হেন্না ৱারেপ অসিগী কান্নবা ফংলে অমসুং মখোয়গী য়ুমশিংগী মপু ওইরে অমসুং মখোয়গী শেন-থুমগী ফিবম ফগৎলে।
প্রধান মন্ত্রীনা হায়খি মদুদি ২০১৪ দা, নুপী করোর কয়া বেঙ্ক অমগী থোঙ পুন্সিদা উবা ফংখিদে। জন ধন য়োজননা নুপী করোর ৩২ হেনবগী বেঙ্ক একাউন্তশিং হাংদোক্লে। ঙসিদি ঐখোয়গী ইচানুপীশিং অনৌবা ললোন-ইতিক্কী থবকশিংদা মখোয়গী মশক তাক্লে, মুদ্রা য়োজনাগী লোনগী চাদা ৬০ হেন্না নুপীশিংনা লৌরে।
ষ্টার্দঅপকী অওনবা পুরকপদা নুপীশিংনা মাঙজিল থাবগী মতাংদা পল্লদুনা, প্রধান মন্ত্রীনা হায়খি মদুদি রেজিষ্টার তৌরবা ষ্টার্দঅপশিংগী চাদা ৪৫ হেন্না য়ামদ্রবদা নুপী অমনা দিরেক্তর ওইনা থবক তৌরি। শীনফমদা অপনবা থোক্তনবা, অঙাং উনবগী ছুতি চয়োল ২৬ দা শাংদোক্লে। তেক্নোলোজিগী খুৎথাংদা অনৌবা মতমগী লৌউ-শিংউগী থবক তাকপী-তম্বীদুনা দ্রোন দিদি লিশিং কয়ানা লৌউ-শিংউগী থবক্ত অওনবা পুরক্তুনা চহি খরগী মমাঙদা হৌদোকখিবা স্কিল ইন্দিয়া মিসনগী ফলশিং হৌজিক উবা ফংলে।
মশক থোকপা মাইপাকপশিং পল্লদুনা, প্রধান মন্ত্রীনা হায়খি মদুদি হৌখিবা চহি ১১ দা, নুপী করোর ১০ রোম সেল্ফ-হেল্প গ্রুপশিং শরুক য়ারে। খুঙ্গংগী শেন্মিৎলোনগা লোয়ন্নরিবা নুপী করোর ৬ লাখপতি দিদিশিং ওইনা শেমগৎনবা সরকারনা পান্দম অমা থম্লি। মসিগী মনুংদা নুপী করোর ৩ হেন্না লাখপতি দিদিশিং ওইবা ঙমখ্রে। হায়রিবা নুপীশিং অসি ভোকেল ফোর লোকেলগী ব্রান্দ এম্বেসেদরশিং ওইরে।
প্রধান মন্ত্রীনা হায়খি মদুদি নুপীশিংনা লমজিংদুনা চাউখৎপা পুরকপদা অরিবা ৱাখল্লোনশিংগী শিংনবা কয়া মায়োক্নরি। মতম অমদা নুপাশিং খক্তগীনি হায়না খন্নরম্বা হিরম কয়াদা ঙসিদি নুপীশিংনা মাঙজিল থারে। ভারতকী নুপীশিং ফাইত্তর পাইলোতশিং ওইরে অমসুং অতিয়াশিং য়ৌবা ঙম্লে। মালেমদা লৈবাক অমগা হেক্ত চাংদম্নবদা নুপী পাইলোত মশিং খ্বাইদগী য়াম্না লৈবা লৈবাক ভারতনি।
লাইরিক-লাইশুগী লমদা মাইপাকপশিং হরাওবা ফোঙদোক্লদুনা, প্রধান মন্ত্রীনা হায়খি ২০১৪ গা চাংদম্নবদা নুপীশিং পি.ঐচ.দি তম্বা শরুক অনি হেনগৎল্লে, অৱাংবা থাক্কী মহৈ তম্বা অমসুং থিজিনবগী তঙ্খায় অমা হেন্না নুপীশিংনা ওইরে। মেথেমেতিক্স অমসুং সাইন্স তম্বদা, নুপীমচাশিংগী মশিং চাউরাক্না চাদা ৪৩ রোম য়ৌরে। হায়রিবা মাইপাকপশিং অসিদা ঐখোয়গী নুপীমচাশিংগী খুদোংচাবা ফংবগী হোংলক্লিবা ফিবমগী মমি তারে।
প্রধান মন্ত্রীনা হায়খি মদুদি নুপীশিং অশোই-অঙাম থোকহন্দবা হায়বসি খুন্নাই অচৌবা শিংনবা অমনি। মাইকৈ অসিদা অকনবা থবকশিং পায়খৎলে। আইনগী থবকশিংদা অওনবশিং পুরক্লে অমসুং অচুম্বা ৱায়েল ফংহনবগী থবকশিং ফগৎনবা অমসুং ৱারেপ লৌবদা য়াংশিন্নবা ফাষ্ট-ত্রেক কোর্তশিং লিংখৎলে। ভারতিয়া ন্যয়া সনহিতানা নুপীশিং ঙাক-শেন্নবা মরুওইনা লৌরি, ই-এফ.আই.আর নত্ত্রগা মফম অমদগী হেক্ত জিরো-এফ.আই.আর য়াহন্দুনা এফ.আই.আর চনবগী থবকশিং লাইথোকহল্লে অমসুং ওদিও-ভিদিওগী খুৎথাংদা অৱাবা তারবা মীওইশিংগী ৱারোল লৌশিনবগী খুদোংচাবশিং লৈরে।
প্রধান মন্ত্রীনা হায়খি মদুদি লৈবাক অসিনা মখোয় অনিংবশিং খঙই অমসুং মখোয়গী মঙলানশিং থবক ওইনা পাংথোক্নবা দরকার ওইবা থবক খুদিংমক পায়খৎলি হায়না লৈবাক অসিগী ইমা, ইচল অমসুং ইচানুপী খুদিংমক্ত থাজবা পীরি। মখোয়গী হোৎনবা কনবা, থৌনা অমসুং থাজবনা মরম ওইদুনা ভারতকী নারী শক্তি নৌবা থাকশিং য়ৌবা ঙম্লে; হৌজিক, খুদোংচাবশিং হেনগৎহন্দুনা মখোয় মখা তানা ফিবম ফগৎনবা ঐখোয় পুন্না চৎমিন্নগদবনি।
অখন্নবা ৱাফম অমা তকশিল্লদুনা, প্রধান মন্ত্রীনা হায়খি মদুদি নারী শক্তি বন্দন থৌরমদা খন্নখিবশিং মখোয় মশানা উনদুনা অমসুং সোসিএল মেদিয়াগী খুৎথাংদা লৈবাক অসিগী মফম খুঙ্গং খুদিংমক্ত থৌরম শরুক য়াখিবা নুপীশিংনা য়ৌহনগদবনি। মরুওইবা ৱারেপ অসি নুপী খুদিংমক খঙহনবা লৈবাক অসিনা দরকার ওই, মরম অদুনা মখোয়না মসিগী মপাঙ্গল, মসিগী থৌদাং অমসুং মঙলান খঙবা ঙমগনি, মখোয় রাজ্যশিংদগী হৌরগা লৈবাক অসিগী সংসদ ফাওবদা শরুক য়াবা ঙমগনি। নারী শক্তিদা মখোয়গী হকশিং ফংগনমি অমসুং ৱারেপ লৌবগী থবক্ত মখোয় মপুংফানা শরুক য়াগনি- মসি ঐখোয়গী তুংলমচৎকী খ্বাইদগী চাউবা থাজবনি হায়না ঐখোয় পুন্না ৱারেপ লৌরসি।
***
(রিলিজ আই.দি.: 2251635)
ভিজিতর কাউন্তর : 9
রিলিজ অসি মসিদা পাবীয়ু:
Bengali
,
Bengali-TR
,
Odia
,
Telugu
,
Kannada
,
English
,
Urdu
,
Marathi
,
हिन्दी
,
Nepali
,
Assamese
,
Punjabi
,
Gujarati
,
Malayalam