மத்திய கலாச்சாரம் மற்றும் சுற்றுலாத்துறை  அமைச்சர் திரு கஜேந்திர சிங் ஷெகாவத் அவர்களே, கலாச்சாரத்துறை இணையமைச்சர் திரு ராவ் இந்திரஜித் சிங் அவர்களே, அறிஞர்களே, தாய்மார்களே, அன்பர்களே!

இன்று விஞ்ஞான் பவன் இந்தியாவின் பொற்காலத்தின் மறுமலர்ச்சியைக் காண்கிறது. சில நாட்களுக்கு முன்பு, நான் ஞான பாரதம் இயக்கத்தை அறிவித்தேன். இன்று இவ்வளவு குறுகிய காலத்தில் ஞான பாரதம் சர்வதேச மாநாட்டை ஏற்பாடு செய்கிறோம். அதனுடன் தொடர்புடைய வலைத்தளமும் சமீபத்தில் தொடங்கப்பட்டது. இது ஒரு அரசு அல்லது கல்வி சார்ந்த நிகழ்வு அல்ல; ஞான பாரதம் இயக்கம் இந்தியாவின் கலாச்சாரம், இலக்கியம் மற்றும் உணர்வுகளின் பிரகடனமாக மாறப்போகிறது. ஆயிரக்கணக்கான தலைமுறைகளின் எண்ணங்கள் மற்றும் சிந்தனை, இந்தியாவின் சிறந்த  முனிவர்கள், துறவிகள் மற்றும் அறிஞர்களின் ஞானம் மற்றும் ஆராய்ச்சி, நமது அறிவுசார் மரபுகள், நமது அறிவியல் பாரம்பரியம்ய முதலியவற்றை, ஞான பாரதம் இயக்கம் மூலம் டிஜிட்டல்மயமாக்கப் போகிறோம். இந்த பணிக்காக அனைத்து நாட்டு மக்களையும் நான் வாழ்த்துகிறேன். ஞான பாரதத்தின் குழுவிற்கும், கலாச்சார அமைச்சகத்திற்கும் எனது நல்வாழ்த்துகள்.

நண்பர்களே,

ஒரு கையெழுத்துப் பிரதியைப் பார்க்கும்போது, ​​அந்த அனுபவம் கடந்த காலத்திற்கு பயணிப்பதைப் போன்ற உணர்வை ஏற்படுத்துகிறது. இன்றைய சூழ்நிலைக்கும் முந்தைய சூழ்நிலைக்கும் இடையே மிகப்பெரிய வித்தியாசம் உள்ளது என்பதும் நினைவுக்கு வருகிறது. இன்று நாம் விசைப்பலகையின் உதவியுடன் நிறைய எழுதலாம், நீக்கலாம் மற்றும் திருத்தம் செய்யும் வசதியும் உள்ளது. மேலும் அச்சு இயந்திரங்களின் உதவியுடன் ஒரு பக்கத்தின் ஆயிரக்கணக்கான பிரதிகளையும் உருவாக்க முடியும். ஆனால் நூற்றுக்கணக்கான ஆண்டுகளுக்கு முந்தைய உலகத்தை கற்பனை செய்து பாருங்கள். அந்தக் காலத்தில் அத்தகைய நவீன பொருள்சார் வளங்கள் இல்லை, நம் முன்னோர்கள் அறிவுசார் வளங்களை மட்டுமே நம்பியிருக்க வேண்டியிருந்தது. ஒவ்வொரு கடிதத்தையும் எழுதும்போது எவ்வளவு கவனம் தேவைப்பட்டது, ஒவ்வொரு கையெழுத்துப் பிரதியை உருவாக்குவதற்கும் எவ்வளவு கடின உழைப்பு தேவைப்பட்டது, அந்த நேரத்தில் கூட இந்திய மக்கள் உலகின் மிகப்பெரிய நூலகங்களைக் கட்டியிருந்தனர். இன்றும் இந்தியாவில் உலகின் மிகப்பெரிய கையெழுத்துப் பிரதி சேகரிப்பு உள்ளது. எங்களிடம் சுமார் 1 கோடி கையெழுத்துப் பிரதிகள் உள்ளன. 1 கோடி என்ற எண்ணிக்கை குறைவானது அல்ல.

நண்பர்களே,

வரலாற்றின் கொடூரமான தாக்குதல்களில், லட்சக்கணக்கான கையெழுத்துப் பிரதிகள் எரிக்கப்பட்டு அழிந்துவிட்டன. ஆனால் எஞ்சியிருக்கும் கையெழுத்துப் பிரதிகள் ஞானம், அறிவியல், வாசிப்பு மற்றும் கற்பித்தல் ஆகியவற்றில் நம் முன்னோர்களின் பக்தி எவ்வளவு ஆழமாகவும் வலிமையாகவும் இருந்தது என்பதற்கு சாட்சியமளிக்கின்றன. வலிமை குன்றிய மரப்பட்டைகள் மற்றும் பனை ஓலைகளில் எழுதப்பட்ட கையெழுத்துப் பிரதிகள், செப்புத் தகடுகளில் பொறிக்கப்பட்ட வார்த்தைகள் உலோக அரிப்பு  அபாயத்தில் இருந்தன, ஆனால் நமது முன்னோர்கள் வார்த்தைகளை தெய்வமாக மதித்து, 'அக்ஷர் பிரம்ம பவ' என்ற உணர்வுடன் அவற்றுக்கு சேவை செய்தனர். தலைமுறை தலைமுறையாக, குடும்பங்கள் அந்த கையெழுத்துப் பிரதிகளை பாதுகாத்து வந்தன. அறிவுக்கு மிகுந்த மரியாதை, எதிர்கால சந்ததியினர் மீதான அக்கறை, சமூகத்தின் மீதான பொறுப்பு, நாட்டின் மீதான அர்ப்பணிப்பு உணர்வு - இதை விட பெரிய உதாரணத்தை நாம் எங்கே காணலாம்?

நண்பர்களே,

பாதுகாப்பு, புத்தாக்கம், சேர்த்தல் மற்றும் தகவமைப்பு ஆகிய நான்கு அடிப்படைத் தூண்களில் இந்தியாவின் அறிவுசார் பாரம்பரியம் கட்டமைக்கப்பட்டுள்ளதால் இன்றளவும் அது சிறந்து விளங்குகிறது. முதலாவது- பாதுகாப்பு, இரண்டாவது- புத்தாக்கம், மூன்றாவது- சேர்த்தல் மற்றும் நான்காவது- தகவமைப்பு.

நண்பர்களே,

பாதுகாப்பு பற்றி நான் பேசினால், நமது மிகப் பழமையான வேதங்கள் இந்திய கலாச்சாரத்தின் அடிப்படையாகக் கருதப்படுகின்றன. வேதங்கள் உயர்ந்தவை என்பதை நீங்கள் அறிவீர்கள். முன்னதாக வேதங்கள் 'ஸ்ருதி'யின் அடிப்படையில் அடுத்த தலைமுறைக்குக் கற்றுத் தரப்பட்டன. ஆயிரக்கணக்கான ஆண்டுகளாக, வேதங்கள் எந்தப் பிழையும் இல்லாமல் நம்பகத்தன்மையுடன் பாதுகாக்கப்பட்டன. நமது இந்த மரபின் இரண்டாவது தூண் புத்தாக்கம். ஆயுர்வேதம், வாஸ்து சாஸ்திரம், ஜோதிடம் மற்றும் உலோகவியலில் நாம் தொடர்ந்து புதுமைகளை உருவாக்கி வருகிறோம். ஒவ்வொரு தலைமுறையும் முந்தையதை விட முன்னேறி, பழைய அறிவை மேலும் அறிவியல் பூர்வமாக்கியது. சூரிய சித்தாந்தம் மற்றும் வராஹமிஹிர சம்ஹிதை போன்ற நூல்கள் தொடர்ந்து எழுதப்பட்டு வந்தன, மேலும் புதிய ஞானம் அவற்றுடன் சேர்க்கப்பட்டுக் கொண்டே இருந்தது. நமது பாதுகாப்பின் மூன்றாவது தூண் சேர்த்தல். அதாவது, ஒவ்வொரு தலைமுறையும், பழைய அறிவைப் பாதுகாப்பதுடன், புதிதாக ஒன்றையும் பங்களித்தது. உதாரணமாக, முதன் முதலில் எழுதப்பட்ட வால்மீகி ராமாயணத்திற்குப் பிறகு, பல ராமாயணங்கள் எழுதப்பட்டன. ராமசரிதமனாஸ் போன்ற நூல்கள் நமக்குக் கிடைத்தன. வேதங்கள் மற்றும் உபநிடதங்கள் பற்றிய குறிப்புகள் எழுதப்பட்டன. த்வைதம் மற்றும் அத்வைதம் போன்றவற்றிற்கு இந்திய ஆச்சாரியர்கள் விளக்கங்களை வழங்கினர்.

நண்பர்களே,

அதேபோல், நான்காவது தூண் - தகவமைப்பு. அதாவது, காலப்போக்கில் சுயபரிசோதனை செய்து, தேவைக்கேற்ப நம்மை மாற்றிக் கொண்டோம். வேதங்கள் பற்றிய விவாதம் தொடர்பான  கலாச்சாரத்தின் தொடர்ச்சி மற்றும் விவாதங்களை மேற்கொண்டோம். பின்னர் சமூகம் காலாவதியான கருத்துக்களைக் கைவிட்டு, புதிய கருத்துக்களை ஏற்றுக்கொண்டது. இடைக்காலத்தில், பல தீமைகள் சமூகத்திற்குள் வந்தபோது, ​​சமூகத்தின் மனசாட்சியை விழிப்புடன் வைத்திருந்த, பாரம்பரியத்தைக் காப்பாற்றி பாதுகாத்த புகழ்பெற்ற ஆளுமைகளும் வந்தனர்.

நண்பர்களே,

நாடுகளின் நவீன கருத்துக்களுக்கு அப்பால், இந்தியாவுக்கு ஒரு கலாச்சார அடையாளம், அதன் சொந்த உணர்வு, அதன் சொந்த ஆன்மா உள்ளது. இந்தியாவின் வரலாறு சுல்தான்களின் வெற்றி தோல்விகளைப் பற்றியது மட்டுமல்ல. நமது சுதேச அரசுகள் மற்றும் ராஜ்ஜியங்களின் புவியியல் மாறிக்கொண்டே இருந்தது, ஆனால் இமயமலை முதல் இந்தியப் பெருங்கடல் வரை, இந்தியா அப்படியே இருந்தது. ஏனெனில் இந்தியா ஒரு உயிரோட்டம், இது அதன் எண்ணங்கள், லட்சியங்கள் மற்றும் மதிப்புகளால் உருவாக்கப்பட்டது. இந்தியாவின் பண்டைய கையெழுத்துப் பிரதிகளில், இந்தியாவின் தொடர்ச்சியான வாழும் நீரோடையைக் காண்கிறோம். இந்த கையெழுத்துப் பிரதிகள் நமது பன்முகத்தன்மையில் ஒற்றுமையின் பிரகடனமாகவும் உள்ளன. நம் நாட்டில் சுமார் 80 மொழிகளில் கையெழுத்துப் பிரதிகள் உள்ளன. சமஸ்கிருதம், பிராகிருதம், அசாமி, பெங்காலி, கன்னடம், காஷ்மீரி, கொங்கணி, மைதிலி, மலையாளம், மராத்தி போன்ற பல மொழிகளில் நமக்கு ஒரு பெரிய அறிவுப் பெருங்கடல் உள்ளது. கில்கிட் கையெழுத்துப் பிரதிகள் காஷ்மீரின் உண்மையான வரலாற்றை நமக்குச் சொல்கின்றன. இப்போது நடைபெறும் சிறிய கண்காட்சியைப் பார்க்கச் சென்றேன். அது அங்கு விரிவாக விவரிக்கப்பட்டுள்ளது, அதன் படங்களும் உள்ளன. கௌடில்ய அர்த்த சாஸ்திரத்தின் கையெழுத்துப் பிரதியில், அரசியல் அறிவியல் மற்றும் பொருளாதாரம் பற்றிய இந்தியாவின் புரிதலைப் பற்றி நாம் அறிந்துகொள்கிறோம். ஆச்சார்ய பத்ரபாகுவின் கல்ப சூத்திரத்தின் கையெழுத்துப் பிரதியில், சமண மதத்தின் பண்டைய ஞானம் பாதுகாக்கப்படுகிறது. பகவான் புத்தரைப் பற்றிய ஞானம் சாரநாத்தின் கையெழுத்துப் பிரதிகளில் கிடைக்கிறது. ரசமஞ்சரி  மற்றும் கீதகோவிந்தம் போன்ற கையெழுத்துப் பிரதிகள் பக்தி, அழகு மற்றும் இலக்கியத்தின் பல்வேறு சாயல்களைப் பாதுகாத்துள்ளன.

நண்பர்களே,

இந்தியாவின் இந்த கையெழுத்துப் பிரதிகள் முழு மனிதகுலத்தின் வளர்ச்சிப் பயணத்தின் தடயங்களைக் கொண்டுள்ளன. இந்த கையெழுத்துப் பிரதிகளில் தத்துவம் மற்றும் அறிவியல் இரண்டும் உள்ளன. அவற்றில் மருத்துவம் மற்றும் மெய்ப்பொருளியல் உள்ளன. இவற்றில் கலை, வானியல் மற்றும் கட்டிடக்கலை உள்ளன. நீங்கள் விரும்பும் பல உதாரணங்களை எடுத்துக் கொள்ளலாம். கணிதம் முதல் இரும (பைனரி) அடிப்படையிலான கணினி அறிவியல் வரை, நவீன அறிவியலின் அடித்தளம், பூஜ்ஜியத்தை  அடிப்படையாகக் கொண்டது. பூஜ்ஜியம் இந்தியாவில் கண்டுபிடிக்கப்பட்டது என்பதை நீங்கள் அனைவரும் அறிவீர்கள். மேலும், பூஜ்ஜியம் மற்றும் கணித சூத்திரங்களின் பண்டைய பயன்பாட்டின் சான்றுகள் இன்னும் பக்ஷாலி கையெழுத்துப் பிரதியில் பாதுகாக்கப்படுகின்றன. யசோமித்ராவின் போவர் கையெழுத்துப் பிரதி பல நூற்றாண்டுகள் பழமையான மருத்துவ அறிவைப் பற்றி நமக்குச் சொல்கிறது. சரக் சம்ஹிதா மற்றும் சுஷ்ருத சம்ஹிதா போன்ற நூல்களின் கையெழுத்துப் பிரதிகள், இன்றுவரை ஆயுர்வேத அறிவைப் பாதுகாத்துள்ளன. சூல்வ சூத்திரத்தில் நாம் பண்டைய வடிவியல் அறிவைப் பெறுகிறோம். கிருஷி பராசரத்தில் விவசாயம் பற்றிய பாரம்பரிய தகவல்களைப் பெறுகிறோம். நாட்டிய சாஸ்திரம் போன்ற நூல்களின் கையெழுத்துப் பிரதிகள், மனித உணர்வுகளின் வளர்ச்சிப் பயணத்தைப் புரிந்துகொள்ள உதவுகின்றன.

நண்பர்களே,

ஒவ்வொரு நாடும் அதன் வரலாற்று விஷயங்களை ஒரு நாகரிக சொத்தாகவும், மகத்துவமாகவும் உலகின்முன் வைக்கிறது. உலக நாடுகளிடம் ஏதேனும் கையெழுத்துப் பிரதி, ஏதேனும் கலைப்பொருள் இருந்தால், அதை அவர்கள் ஒரு தேசிய பொக்கிஷமாகப் பாதுகாக்கிறார்கள். இந்தியாவில் இவ்வளவு பெரிய கையெழுத்துப் பிரதி புதையல் உள்ளது, அது நாட்டின் பெருமை. சமீபத்தில், நான் குவைத்துக்குச் சென்றேன், நான் தங்கியிருந்த காலத்தில், அங்கு 4-6 செல்வாக்கு செலுத்துபவர்களைக் கண்டுபிடிக்க முயற்சிக்கிறேன், எனக்கு நேரம் இருந்தால், அவர்களுடன் சிறிது நேரம் செலவிடுகிறேன், அவர்களின் சிந்தனையைப் புரிந்துகொள்ள முயற்சிக்கிறேன். பல நூற்றாண்டுகளுக்கு முன்பு இந்தியாவிலிருந்து கடல் வர்த்தகம் எவ்வாறு நடத்தப்பட்டது என்பது குறித்த பல ஆவணங்களை வைத்திருக்கும் ஒரு மனிதரை நான் குவைத்தில் சந்தித்தேன், அவர் மிகவும் பெருமையுடன் என்னிடம் வந்தார். மிகுந்த பெருமையுடன், அங்கு என்ன இருக்கும், எல்லாம் எங்கே இருக்கும் என்று நான் பார்த்தேன். இதையெல்லாம் நாம் பாதுகாக்க வேண்டும். இப்போது இந்தியா இந்த மகிமையை உலகிற்கு பெருமையுடன் வழங்கப் போகிறது. உலகில் உள்ள அனைத்து கையெழுத்துப் பிரதிகளையும் நாம் தேடி மீண்டும் கொண்டு வர வேண்டும் என்று இங்கே கூறப்பட்டது, பின்னர் பிரதமர் அதைச் செய்ய வேண்டும் என்று அமைதியாகக் கூறப்பட்டது. ஆனால் உங்களுக்குத் தெரியும், முன்பு நம்மிடமிருந்து திருடப்பட்ட சிலைகள் மிகக் குறைந்த அளவிலேயே திருப்பி அனுப்பப்பட்டன, இன்று நூற்றுக்கணக்கான தொன்மையான சிலைகள் திருப்பி அனுப்பப்படுகின்றன. எங்களிடம் அதை ஒப்படைத்தால், அதன் மகிமையை அதிகரிக்க எல்லா முயற்சிகளும் எடுக்கப்படும் என்ற நம்பிக்கை அவர்களுக்கு இருக்கிறது. இன்று இந்தியா உலகில் இந்த நம்பிக்கையை உருவாக்கியுள்ளது, இதுதான் சரியான இடம் என்று மக்கள் உணர்கிறார்கள். நான் மங்கோலியாவுக்குச் சென்றபோது, ​​அங்குள்ள புத்த துறவிகளுடன் நான் உரையாடிக் கொண்டிருந்தேன், அவர்களிடம் நிறைய கையெழுத்துப் பிரதிகள் இருப்பதைக் கண்டேன். எனவே, அதை வைத்து ஏதாவது செய்ய வேண்டும் என்று அவர்களிடம் கேட்டுக் கொண்டேன். நான் அந்த கையெழுத்துப் பிரதிகள் அனைத்தையும் கொண்டு வந்து, டிஜிட்டல்மயமாக்கி, அவர்களிடம் திருப்பிக் கொடுத்தேன், இப்போது அது அவர்களின் பொக்கிஷமாக மாறிவிட்டது.

நண்பர்களே,

ஞான பாரதம் இயக்கம் இந்த மாபெரும் பிரச்சாரத்தின் ஒரு முக்கிய பகுதியாகும். நாட்டின் பல அமைப்புகள் பொதுமக்களின் பங்கேற்பு உணர்வுடன் இந்த முயற்சியில் அரசுடன் இணைந்து செயல்படுகின்றன. காசி நகரின் பிரச்சாரணி சபை, கொல்கத்தாவின் ஆசிய சங்கம், உதய்பூரின் 'தரோஹர்', குஜராத்தின் கோபாவில் உள்ள ஆச்சார்ய ஸ்ரீ கைலாஷ்சூரி ஞான மந்திர், ஹரித்வாரின் பதஞ்சலி, புனேவின் பண்டார்கர் ஓரியண்டல் ஆராய்ச்சி நிறுவனம், தஞ்சாவூர் சரஸ்வதி மகால் நூலகம் போன்ற நூற்றுக்கணக்கான அமைப்புகளின் ஒத்துழைப்புடன், இதுவரை ஒரு மில்லியனுக்கும் அதிகமான கையெழுத்துப் பிரதிகள் டிஜிட்டல்மயமாக்கப்பட்டுள்ளன. பல நாட்டு மக்கள் முன்வந்து தங்கள் குடும்ப பாரம்பரியத்தை நாட்டிற்கு கிடைக்கச் செய்துள்ளனர். இந்த அனைத்து அமைப்புகளுக்கும், இதுபோன்ற நாட்டு மக்களுக்கும் நான் நன்றி கூறுகிறேன். நான் நிச்சயமாக ஒரு தலைப்பில் கவனம் செலுத்த விரும்புகிறேன், சமீபத்தில் சில விலங்கு பிரியர்களை சந்தித்தேன், நீங்கள் ஏன் சிரித்தீர்கள்? நம் நாட்டில் இதுபோன்ற பலர் உள்ளனர், மேலும் சிறப்பு என்னவென்றால், அவர்கள் பசுவை ஒரு விலங்காகக் கருதுவதில்லை. எனவே, அவர்களிடம் பேசும்போது, ​​நம் நாட்டில் வேதங்களில் விலங்கு சிகிச்சை பற்றி நிறைய விஷயங்கள் உள்ளன; பல கையெழுத்துப் பிரதிகள் சாத்தியம் என்று சொன்னேன். நான் குஜராத்தில் இருந்தபோது, ​​குஜராத்தின் ஆசிய சிங்கத்தின் மீது எனக்கு ஆர்வம் இருந்தது, அதில் நான் அதிக ஆர்வம் காட்டினேன். எனவே, அதிகமாக வேட்டையாடினால், சிக்கலில் இருந்தால், ஒரு மரம் இருக்கிறது, அதன் பழங்களை சாப்பிட வேண்டும், ஏனெனில் வாந்தி ஏற்படலாம் என்பதை அறிந்திருந்தார்கள் என்பதை நான் கண்டுபிடித்தேன். இதன் பொருள் சிங்கக் குடியிருப்புகள் எங்கிருந்தாலும், அத்தகைய பழ மரங்கள் இருப்பது அவசியம். இப்போது இது நமது உரைகளில் எழுதப்பட்டுள்ளது. இவை அனைத்தும் எழுதப்பட்ட பல கையெழுத்துப் பிரதிகள் எங்களிடம் உள்ளன. நான் சொல்ல வருவது என்னவென்றால், நமக்கு நிறைய ஞானம் கிடைக்கிறது, அது எழுதப்பட்டுள்ளது, நாம் அதைத் தேட வேண்டும், ஆராய வேண்டும், இன்றைய சூழலில் அதை விளக்க வேண்டும்.

நண்பர்களே,

கடந்த காலங்களில் இந்தியா தனது அறிவை பணத்தின் சக்தியால் அளவிடவில்லை. நமது முனிவர்கள் - विद्या-दानमतः परम्।. என்றும் கூறியுள்ளனர். அதாவது, அறிவுதான் மிகப்பெரிய நன்கொடை. அதனால்தான், பண்டைய காலங்களில், இந்திய மக்களும் கையெழுத்துப் பிரதிகளை தாராளமாக நன்கொடையாக அளித்துள்ளனர். சீனப் பயணி ஹியூன் சாங் இந்தியாவுக்கு வந்தபோது, ​​அவர் தன்னுடன் அறுநூற்று ஐம்பதுக்கும் மேற்பட்ட கையெழுத்துப் பிரதிகளை எடுத்துச் சென்றார். மேலும், சீன அதிபர் ஒருமுறை என்னிடம் தனது பெரும்பாலான நேரத்தை வாட்நகரில் நான் பிறந்த எனது கிராமத்தில் கழித்ததாகக் கூறினார். ஆனால் அவர் இங்கிருந்து சீனாவுக்குத் திரும்பியபோது, ​​அவர் அதிபர் ஜியின் பிறந்த இடத்தில் வசித்து வந்தார். எனவே, அவர் என்னை அவரது கிராமத்திற்கு அழைத்துச் சென்றார், நான் ஹியூன் சாங் வாழ்ந்த இடத்தைப் பார்க்க அவருடன் சென்றேன், அதிபர் ஜி எனக்கு கையெழுத்துப் பிரதிகளை முழுமையாகக் காட்டினார், மேலும் அதில் இந்தியாவின் விளக்கத்தின் சில பத்திகள் இருந்தன, அதை மொழிபெயர்ப்பாளர் எனக்கு விளக்கினார். அது மனதை மிகவும் கவர்ந்திழுக்கிறது. அவர் ஒவ்வொரு விஷயத்தையும் பார்த்து, அவரிடம் என்ன புதையல் இருக்கலாம் என்று யோசிப்பார். இந்தியாவின் பல கையெழுத்துப் பிரதிகள் சீனாவிலிருந்து ஜப்பானை அடைந்துள்ளன. 7-ம் நூற்றாண்டில் ஜப்பானில் அவை ஹோரியுஜி மடாலயத்தில் ஒரு தேசிய பொக்கிஷமாகப் பாதுகாக்கப்பட்டன. இன்றும் கூட, இந்தியாவின் பண்டைய கையெழுத்துப் பிரதிகள் உலகின் பல நாடுகளில் வைக்கப்பட்டுள்ளன. ஞான பாரதம் இயக்கத்தின் கீழ், மனிதகுலத்தின் இந்தப் பகிரப்பட்ட பாரம்பரியத்தை ஒன்றிணைக்கவும் முயற்சிப்போம்.

நண்பர்களே,

ஜி-20 கலாச்சார உரையாடலின் போது நாங்கள் இந்த முயற்சியை எடுத்தோம். இந்த பிரச்சாரத்தில் இந்தியாவுடன் பல நூற்றாண்டுகள் பழமையான கலாச்சார உறவுகளைக் கொண்ட நாடுகளை நாங்கள் ஈடுபடுத்துகிறோம். மங்கோலிய தூதருக்கு மங்கோலிய கஞ்சூரின் மறுபதிப்பு தொகுதிகளை நாங்கள் பரிசளித்தோம். 2022-ம் ஆண்டில், இந்த 108 தொகுதிகள் மங்கோலியா மற்றும் ரஷ்யாவின் மடாலயங்களிலும் விநியோகிக்கப்பட்டன. தாய்லாந்து மற்றும் வியட்நாமில் உள்ள பல்கலைக்கழகங்களுடன் நாங்கள் புரிந்துணர்வு ஒப்பந்தங்களில் கையெழுத்திட்டுள்ளோம். பழைய கையெழுத்துப் பிரதிகளை டிஜிட்டல்மயமாக்க அங்குள்ள அறிஞர்களுக்கு நாங்கள் பயிற்சி அளித்து வருகிறோம். இந்த முயற்சிகளின் விளைவாக, பாலி, லன்னா மற்றும் சாம் மொழிகளில் உள்ள பல கையெழுத்துப் பிரதிகள் டிஜிட்டல்மயமாக்கப்பட்டுள்ளன. ஞான பாரதம் இயக்கம் மூலம் இந்த முயற்சிகளை மேலும் விரிவுபடுத்துவோம்.

நண்பர்களே,

ஞான பாரதம் இயக்கம் மூலம் மற்றொரு பெரிய சவாலும் தீர்க்கப்படும். பல நூற்றாண்டுகளாக நாம் பயன்படுத்தி வரும் இந்தியாவின் பாரம்பரிய அறிவுசார்  அமைப்புமுறை தொடர்பான பல முக்கியமான தகவல்கள் நகலெடுக்கப்பட்டு காப்புரிமை பெறப்படுகின்றன. இந்தத்  திருட்டைத் தடுப்பதும் அவசியம். இந்த முயற்சிகள் டிஜிட்டல் கையெழுத்துப் பிரதிகள் மூலம் அதிக வேகத்தைப் பெறும், மேலும் அறிவுசார் திருட்டு கட்டுப்படுத்தப்படும். அனைத்துப் பாடங்களிலும் அசல் மூலாதாரங்களை நம்பகத்தன்மையுடன் உலகம் அறிந்து கொள்ளும்.

நண்பர்களே,

ஞான பாரதம் இயக்கம் மற்றொரு மிக முக்கியமான அம்சத்தைக் கொண்டுள்ளது. இதற்காக, ஆராய்ச்சி மற்றும் புதுமைக்கான பல புதிய களங்களை நாங்கள் உருவாக்கி வருகிறோம். இன்று, உலகில் சுமார் இரண்டரை டிரில்லியன் டாலர் மதிப்புள்ள ஒரு கலாச்சார மற்றும் படைப்பாற்றல் துறை உள்ளது. டிஜிட்டல்மயமாக்கப்பட்ட கையெழுத்துப் பிரதிகள் இந்தத் துறையின் மதிப்புச் சங்கிலிகளுக்கு ஊக்கமளிக்கும். இந்த லட்சக்கணக்கான கையெழுத்துப் பிரதிகளும் அவற்றில் மறைந்திருக்கும் பண்டைய தகவல்களும் ஒரு பெரிய தரவுத்தளமாகவும் செயல்படும். இவை 'தரவு சார்ந்த புதுமைக்கு' ஒரு புதிய உந்துதலை வழங்கும். இது தொழில்நுட்பத் துறையில் இளைஞர்களுக்கு புதிய வாய்ப்புகளை உருவாக்கும். கையெழுத்துப் பிரதிகள் டிஜிட்டல்மயமாக்கப்படுவதால், கல்வி ஆராய்ச்சிக்கான புதிய சாத்தியக்கூறுகள் உருவாக்கப்படும்.

நண்பர்களே,

இந்த டிஜிட்டல் கையெழுத்துப் பிரதிகளைப் படிக்க செயற்கை நுண்ணறிவு போன்ற புதிய தொழில்நுட்பங்களைப் பயன்படுத்துவதை நாம் அதிகரிக்க வேண்டும். இங்கே விளக்கக்காட்சியில் செயற்கை நுண்ணறிவால் திறமையையோ மனித வளங்களையோ மாற்ற முடியாது என்று கூறப்பட்டதை நான் ஏற்றுக்கொள்கிறேன், மேலும் அதை மாற்றக்கூடாது என்றும் நாங்கள் விரும்புகிறோம், இல்லையெனில் நாம் புதிய அடிமைத்தனத்திற்கு பலியாவோம். இது ஒரு ஆதரவு அமைப்பு, இது நம்மை பலப்படுத்துகிறது, நமது வலிமையை அதிகரிக்கிறது, நமது வேகத்தை அதிகரிக்கிறது. செயற்கை நுண்ணறிவின் உதவியுடன், இந்த பண்டைய கையெழுத்துப் பிரதிகளை ஆழமாகப் புரிந்து கொள்ள முடியும், மேலும் பகுப்பாய்வு செய்யவும் முடியும். இப்போது பாருங்கள், அனைத்து வேத கணித நூல்களும் கிடைக்கவில்லை, நாம் செயற்கை நுண்ணறிவு மூலம் முயற்சித்தால், பல புதிய சூத்திரங்களைக் கண்டுபிடிக்க முடியும். நாம் அவற்றைக் கண்டுபிடிக்க முடியும். இந்த கையெழுத்துப் பிரதிகளில் உள்ள அறிவை உலகிற்குக் கொண்டு வந்து  செயற்கை நுண்ணறிவைப் பயன்படுத்தலாம். மற்றொரு சிக்கல் என்னவென்றால், நமது கையெழுத்துப் பிரதிகள் சிதறடிக்கப்பட்டு, வெவ்வேறு வழிகளில், வெவ்வேறு காலங்களில் வழங்கப்படுகின்றன. செயற்கை நுண்ணறிவின் நன்மை என்னவென்றால், அதனால் இவை அனைத்தையும் சேகரிக்க முடியும், மேலும் அதிலிருந்து அமிர்தத்தைப் பிரித்தெடுக்க ஒரு நல்ல கருவியைப் பெறலாம். அதாவது 10 இடங்களில் பொருட்கள் இருந்தால், செயற்கை நுண்ணறிவின் உதவியுடன் அவற்றை ஒன்றிணைத்து ஆராயலாம். நாம்... ஆரம்பத்தில் ஒரு வார்த்தைக்கு பல பயன்கள் இருப்பதாக விளக்கக்காட்சியில் குறிப்பிட்டது போல, நாம் அவற்றைத் தீர்த்தவுடன், 100 கேள்விகளை உருவாக்குவோம், இன்று நாம் லட்சக்கணக்கான கேள்விகளுடன் சிக்கித் தவிக்கிறோம், அதை 100 ஆகக் கொண்டு வருவோம். மனித சக்தியுடன் நாம் இணையும்போது, ​​அது முடிவுகளைத் தரும், பல சிரமங்களும் உள்ளன, ஆனால் வழிகளும் உள்ளன.

நண்பர்களே,

நாட்டின் அனைத்து இளைஞர்களும் இந்த இயக்கத்தில் கலந்து கொள்ள முன்வர வேண்டும் என்று நான் வேண்டுகோள் விடுக்கிறேன். நேற்று முதல் இன்று வரை, இதில் பங்கேற்பவர்களில் 70% பேர் இளைஞர்கள் என்று அமைச்சர் என்னிடம் கூறினார். இது அதன் வெற்றியின் மிகப்பெரிய அடையாளம் என்று நான் நினைக்கிறேன். இளைஞர்கள் இதில் ஆர்வம் காட்டத் தொடங்கினால், நாம் மிக விரைவாக வெற்றியை அடைவோம் என்று நான் நம்புகிறேன். தொழில்நுட்பத்தின் மூலம் கடந்த காலத்தை எவ்வாறு ஆராய முடியும்? ஆதாரங்களின் அடிப்படையிலான அளவுருக்கள் மூலம் இந்த அறிவை மனிதகுலம் எவ்வாறு அணுக முடியும்? இந்த திசையில் நாம் முயற்சிகளை மேற்கொள்ள வேண்டும். நமது பல்கலைக்கழகங்களும் நிறுவனங்களும் இதற்காக புதிய முயற்சிகளை எடுக்க வேண்டும். இன்று, ஒட்டுமொத்த நாடும் சுதேசி உணர்வுடனும், தற்சார்பு இந்தியாவின் உறுதியுடனும் முன்னேறி வருகிறது. இந்த இயக்கமும் அதன் நீட்சியாகும். நமது பாரம்பரியத்தை நமது வலிமையுடன், அதாவது சக்தியுடன் இணைந்ததாக மாற்ற வேண்டும். எதிர்காலத்தின் ஒரு புதிய அத்தியாயம் ஞான பாரதம் இயக்கத்துடன் தொடங்கப் போகிறது என்று நான் நம்புகிறேன். இவை கவர்ச்சி, பளபளப்பு இல்லாத துறைகள் என்பதை நான் அறிவேன். ஆனால் அதன் சக்தி பல நூற்றாண்டுகளாக யாராலும் அசைக்க முடியாத அளவுக்கு அதிகமாக உள்ளது, நாம் இந்த சக்தியுடன் இணைய வேண்டும். இந்த நம்பிக்கையுடன், உங்கள் அனைவருக்கும் மீண்டும் ஒருமுறை வாழ்த்துகள்.

மிக்க நன்றி.

----- 

(Release ID 2166150)

AD/VK/KR