"மாட்சிமை தாங்கிய' மன்னர் அவர்களே,

140 கோடி இந்தியர்களின் சார்பாக, எனக்கும் எனது குழுவினருக்கும் அளிக்கப்பட்ட அன்பான வரவேற்பிற்கு எனது மனமார்ந்த நன்றிகளைத் தெரிவித்துக் கொள்கிறேன். பாரதத்திற்கும் ஜோர்டானுக்கும் இடையிலான உறவை ஒரு புதிய நிலைக்குக் கொண்டு செல்வதற்கான மிகச் சிறந்த ஆக்கபூர்வமான கருத்துக்களை நீங்கள் முன்வைத்துள்ளீர்கள். பாரதத்தின் மீதான உங்களது ஆழ்ந்த அர்ப்பணிப்பிற்கும், உங்களது நட்புக்கும் எனது நெஞ்சார்ந்த நன்றியைத் தெரிவித்துக் கொள்கிறேன்.

இந்த ஆண்டு, நமது அரசியல் உறவின் 75-வது ஆண்டு விழாவைக் கொண்டாடுகிறோம். இந்த மைல்கல் வரும் ஆண்டுகளில் புதுப்பிக்கப்பட்ட ஆற்றலுடன் முன்னோக்கிச் செல்ல நமக்குத் தொடர்ந்து உத்வேகம் அளிக்கும். இன்றைய சந்திப்பு நமது உறவுக்கு ஒரு புதிய வேகத்தையும் ஆழத்தையும் தரும் என்பதில் நான் முழு நம்பிக்கை கொண்டுள்ளேன். வர்த்தகம், உரங்கள், டிஜிட்டல் தொழில்நுட்பம், உள்கட்டமைப்பு மற்றும் மக்களுக்கிடையிலான உறவுகள் போன்ற துறைகளில் நாம் ஒத்துழைப்பை மேலும் மேம்படுத்துவோம்.

மாட்சிமை தாங்கிய' மன்னர் அவர்களே,

உலகளாவிய அளவிலும் நாம் நெருங்கிய தொடர்பில் இருந்து வருகிறோம். காசா விவகாரத்தில் தொடக்கம் முதலே நீங்கள் மிகவும் துரிதமான மற்றும் ஆக்கபூர்வமான பங்கினை ஆற்றி வருகிறீர்கள். இந்தப் பிராந்தியத்தில் அமைதியும் ஸ்திரத்தன்மையும் நிலவும் என்று நாம் அனைவரும் நம்புகிறோம். பயங்கரவாதத்திற்கு எதிராக நாம் தெளிவான மற்றும் ஒன்றுபட்ட நிலைப்பாட்டைக் கொண்டுள்ளோம். உங்கள் தலைமையின் கீழ், பயங்கரவாதம், தீவிரவாதம் மற்றும் அடிப்படைவாதம் ஆகியவற்றிற்கு எதிராக ஒட்டுமொத்த மனிதகுலத்திற்கும் ஜோர்டான் ஒரு வலுவான மற்றும் வியூக ரீதியிலான செய்தியை வழங்கியுள்ளது.

கட்டுப்பாடுகள் விதிக்கப்பட்ட அமர்வின் போது, முக்கியமான துறையில் ஒத்துழைப்பை மேலும் வலுப்படுத்துவது குறித்து நாம் விவாதித்தோம். 2018-ம் ஆண்டு நீங்கள் பாரதத்திற்கு வருகை தந்தபோது இஸ்லாமிய பாரம்பரியம் குறித்த மாநாட்டில் நாம் பங்கேற்றோம். 2015-ம் ஆண்டு ஐக்கிய நாடுகள் சபையின் ஒரு நிகழ்வின் போது, வன்முறை தீவிரவாதத்தை எதிர்ப்பது குறித்த நமது முதல் சந்திப்பு நடைபெற்றது என்பதையும் நான் நினைவுகூர்கிறேன். அப்போதும் கூட, இந்தத் தலைப்பில் நீங்கள் ஊக்கமளிக்கும் கருத்துக்களை வழங்கினீர்கள். நிதானத்தைப் பேணுவதற்கான உங்களது முயற்சிகள் பிராந்திய அமைதிக்கு மட்டுமல்லாமல், உலகளாவிய அமைதிக்கும் மிக முக்கியமானவை. இந்தத் திசையில் நாம் தொடர்ந்து ஆக்கபூர்வமான முறையில் இணைந்து பயணிப்போம். நமது பரஸ்பர ஒத்துழைப்பின் மற்ற அனைத்து பரிமாணங்களையும் நாம் மேலும் வலுப்படுத்துவோம். உங்கள் கனிவான விருந்தோம்பலுக்கு உங்களுக்கும் ஜோர்டான் மக்களுக்கும் மீண்டும் ஒருமுறை எனது மனமார்ந்த நன்றியைத் தெரிவித்துக் கொள்கிறேன்."

***

(Release ID 2204382)

AD/VK/KR