ঙসি প্রধান মন্ত্রী শ্রী নরেন্দ্র মোদীনা ময়াই তাংবল লৌদুনা রাজ্যশিংগী চীফ মিনিষ্টরশিং অমসুং লেপ্তনেন্ত গভর্নরশিংগা লোয়ননা নোংচুপ এসিয়াগী লালদগী ওইরক্লিবা ফিবমগী থৌরাং তৌরিবা অমসুং মসিনা ভারত্ত পীরকপা চৈথেংগী মতাংদা য়েংশিন্নবা মীফম অমা পাংথোকখ্রে।

চীফ মিনিষ্টরশিংনা মমল য়াম্লবা পাউতাকশিং পীরকপগীদমক মহাক্না থাগৎপা ফোঙদোক্লদুনা, প্রধান মন্ত্রীনা হায়খি মদুদি ফিবম মপুংফানা লাকশিনবদা পাউতাকশিং অসি য়াম্না কান্নগনি। মাঙদা তারিবা খুদোংচাদবশিং কোকহন্নবা মীকুপ-নাহুম শিংবা, শেম-শাবা অমসুং পুন্না থবক তৌমিন্নবা দরকার ওইরে।

নোংচুপ এসিয়াগী হৌজিক ওইরিবা ফিবম পল্লদুনা, প্রধান মন্ত্রীনা হায়খি মদুদি অসিগুম্বা মালেমগী খুদোংচাদবশিং থেংনবগী ভারতকী হান্নগী লৌশিং লৈরে। কোবিদ-১৯ লাইচৎ মনুংদা অপুনবা ওইনা মায়োক্নখি।  সপ্লাই চেনশিং, ললোন-ইতিক অমসুং নোংমগী পুন্সিদা পীবা অকায়বা কোকহন্নবা কেন্দ্র আমসুং রাজ্যশিং “তিম ইন্দিয়া” ওইনা থবক তৌমিন্নখি। মতেং পাংনবা অমসুং পুন্না চৎমিন্নবগী চপ মান্নবা ৱাখল্লোন অদু হৌজিক্কী ফিবমশিং অসি মায়োক্ননবা ভারতকী খ্বাইদগী কনবা মপাঙ্গল ওইরি।

প্রধান মন্ত্রীনা হায়খি মদুদি ফিবম অসি হৌজিক ফগৎলকপা লৈত্রি, মখা তানা য়েংশিনবা অমসুং লাল্লোংশিং চুন্নবা শেম্বা দরকার ওইরি। মার্চ ৩ দগী ইন্তর-মিনিষ্টরিয়েল গ্রুপ অমা থবক তৌরক্লি, ফিবম অসি নুমিৎ খুদিংগী হন্না য়েংশিল্লি অমসুং মতম চানা ৱারেপশিং লৌরি। সরকারগী মরুওইবা থবকশিংদি শেন-থুম অমসুং ললোন-ইতিক তংদু-লৈতানা লৈহনবা, ইনর্জি ফংহনবা, মীয়ামগী য়াইফনবা থবক পায়খৎপা অমসুং উদ্যোগ অমসুং সপ্লাই চেনশিং মপাঙ্গল কনখৎহনবনি।

রাজ্যশিংগী মরুওইবা থৌদাং পল্লদুনা, প্রধান মন্ত্রীনা হায়খি মদুদি রাজ্যগি থাক্ত লৌবা ৱারেপশিং মপুংফানা থবক ওইনা পায়খৎলে। মতম চানা ই-পাউ শরুক য়ামিন্নবা অমসুং পুন্না ৱারেপ লৌমিন্নদুনা, কেন্দ্র অমসুং রাজ্যশিংগী মরক্ত লেপ্তনা পাউ ফাউনরি অমসুং থবক তৌমিন্নরি, মসিনা য়াম্না য়াংনা থবকশিং পায়খৎহল্লে। 

সপ্লাই চেনশিং ফজনা মথৌ পাংথোক্নবা অমসুং পৈশিন্দুনা থম্বা অমসুং মমল হেনগৎনা য়োনবশিংগী মথক্ত অকনবা থবক লৌখৎনবা প্রধান মন্ত্রীনা রাজ্যশিংদা খঙহনখ্রে। মহাক্না হায়খি মদুদি অপনবা পীরকপশিং মাঙজৌননা ঙাকথোক্নবা রাজ্য অমসুং জিলাগী থাকশিংদা কন্ত্রোল রুমশিং মথৌ পাংথোকপা অমসুং লৈঙাকশিং মীকুপ-নাহুম শিংনা লৈবা য়াম্না মরুওই। লাক্লিবা কালেন লৌরোক মনুংদা লৌমীশিং অৱাবশিং মায়োক্নদনবা, মরুওইনা হার থম্বা অমসুং য়েন্থোকপা য়েংশিনবা য়াওনা, লৌউ-শিংউগীদমক মাঙজৌননা থৌরাং তৌবগী তঙাইফদবা প্রধান মন্ত্রীনা তকশিনখ্রে।

অরানবা পাউ অমসুং তোকঙাশিং শন্দোকপদগী চেকশিন্নবা খঙহল্লদুনা, প্রধান মন্ত্রীনা হায়খি মদুদি পাখৎপা ফনবা মতম চানা চপ চাবা অমসুং অচুম্বা পাউ শন্দোক্নপা তঙাইফদে। ওনলাইন্দা নমথাই তৌবশিং অমসুং শাশিন্নবা এজেন্তশিংগী মথক্ত মীকুপ-নাহুম শিংনা লৈগদবনি। জহাজদা পোৎ-চৈ পুথোক-পুশিন তৌবা, তঙাইফদবা পোৎ-চৈশিং অমসুং সমুদ্রগী থবকশিংগা মরী লৈনবা খুদোংচাদবশিং কোকহন্নবা ঙমখৈ অমসুং সমুদ্র মপানগী রাজ্যশিংদা অখন্নবা মীৎয়েং চঙনবা প্রধান মন্ত্রীনা খঙহনখ্রে।

মীয়ামগী থাজবা লেংদনা লৈহনবগী মরুওইবা পল্লদুনা, প্রধান মন্ত্রীনা হায়খি তঙাইফদবা পোৎ-চৈশিং ফংহনবগী মতাংদা থাজবা পীবনা মীয়াম মরক্ত মথৌ তাদবা পাখৎপা মাঙজৌননা ঙাকথোকপা ঙমগনি। নোংচুপ এসিয়াদা মখোয়গী মীওইশিং লৈরিবা রাজ্যশিংনা অৱাবা তারবা ইমুংশিং মতেং পাংনবা অমসুং মতম চানা ই-পাউ পীনবা হেল্পলাইনশিং মথৌ তৌহনগদবনি, নোদেল ওফিসারিশিং হাপকদবনি অমসুং জিলা থাক্কী মতেং পাংনবা থবকশিং পায়খৎকদবনি।

প্রধান মন্ত্রীনা হায়খি মদুদি ভারতকী শেন-থুম অমসুং সপ্লাইগী থবকশিং মপাঙ্গল কনখৎহন্নবা হৌখিবা চহি খরদা ভারতনা পায়খৎখিবা থবকশিংগী কান্নবা হৌজিক ওইরিবা ফিবম অসিদা ফংলে হায়বা খঙলে। মখোয়গী খুদোংচাদবশিং কোকহন্নবা অমসুং পোৎথোক পুথোকপা অমসুং থবক পীবা তুংদু-লৈতানবা লেপ্তনা উদোগ অমসুং এম.এস.এম.ইশিংগা থবক তৌমিন্নগদবনি। চীফ সেক্রেতরিশিংগী থাক্ত চাংনাইনা মীফমশিং পাংথোকপা অমসুং ওইরক্লিবা ফিবমশিং অসিদা য়াংনা থবক পায়খৎপা ঙম্নবা, জিলা থাকশিংদা মখা তানা য়েংশিন্নবা, থাক খুদিংমক্ত পুন্না থবক তৌমিন্নবা হেনগৎহনবগী দরকার ওইবা অদু প্রধান মন্ত্রীনা ফোঙদোকখি।

খুদক্কী থবক পায়খৎনবা অমসুং তুংকোনগী শেম-শানবা চপ মান্নবা মীৎয়েং অমা চঙনবা প্রধান মন্ত্রীনা ফোঙদোকখি। প্রধান মন্ত্রীনা হায়খি মদুদি পাইপ নেচরেল গ্যাস কন্নেক্সন হেনগৎহনবগা লোয়ননা, বাইওফ্যুএলসিং, সোলার ইনর্জি, গোবরধনগী থবক, ইলেক্ত্রিক্কী গারিগুম্বা অচৌবা ইনর্জি শীজিন্নবগী থবকশিং য়াংখৎনবা রাজ্যশিংনা হোৎনগদবনি। রাজ্যশিংনা মপুংফানা মতেং পাংদুনা, লৈবাক অসিদা থাউ অমসুং নেচরেল গ্যাস থিবগী থবক হেনগৎহনবা য়াম্না মরুওই।

প্রধান মন্ত্রীনা হায়খি মদুদি খুদোংচাদবা কোকহনবা হায়বসি অপুনবা ওইনা থৌদাং লৌমিন্নগদবা অমনি অমসুং লৈবাক অসিনা “তিম ইন্দিয়া” ওইনা পুন্না থবক পায়খৎপদা ফিবম অসি মাইপাক্না মায়োক্নবা ঙমগনি হায়না প্রধান মন্ত্রীনা থাজবা ফোঙদোকখ্রে। 

মীফম অদুদা, দিফেন্স মিনিষ্টর শ্রী রাজনাথ সিংহনা হায়খি মদুদি খুদোংচাদবা অসি মায়োক্ননবা প্রধান মন্ত্রীগী লমজিং মখাদা সরকারনা থবক য়াওনা থবক পায়খৎলি অমসুং মতম চানা এল.পি.জি ফংহনবা য়াওনা অসিগুম্বা অফবা থবকশিং পায়খৎলি অমসুং পেত্রোল অমসুং দিজলদা এক্সসাইজ দ্যুতিশিং হন্থরে। হৌজিক ওইরিবা ফিবম অসি লাকশিন্নবা রাজ্যশিং, য়ু.তিশিং অমসুং কেন্দ্র পুন্না থবক তৌমিন্নবা দরকার ওইরি।

কেবিনেত সেক্রেতরি শ্রী তি.ভি সোমানাথন্না হৌজিক ওইরিবা ফিবম অসি পাউদমখি অমসুং ফিবম অসি লাকশিন্নবা থবকশিং অমসুং পাউতাকশিং রাজ্যশিংদা পীখি।

ফিবম অসি থেংননবা প্রধান মন্ত্রীগী লমজিং মখাদা কেন্দ্র সরকারনা পায়খৎলিবা থবকশিং চীফ মিনিষ্টরশিংনা থাগৎপা ফোঙদোকখ্রে। মপান্দা লৈরিবা ভারতমচাশিংগী য়াইফনবা লাল মরক অসিদা তোঙান তোঙানবা লৈবাকশিংদা প্রধান মন্ত্রীনা কুতনিতিগী থবক পায়খৎপদা চীফ মিনিষ্টরশিংনা থাগৎপা ফোঙদোকখি। 

মখোয়গী রাজ্যশিংদা পেত্রোল, দিজল অমসুং এল.পি.জি মরাংকাইনা ফংহন্দুনা অমসুং তঙাইফদবা পোৎলমশিং লেপ্তনা ফংহন্নবা মখা তানা য়েংশিনবগী থবকশিং পায়খৎতুনা, ফিবম অসি তুংদু-লৈতানা লৈগনি হায়বগী থাজবা চীফ মিনিষ্টরশিংনা ফোঙদোকখ্রে। মালেমগী তম্বা ঙমদ্রিবা ফিবমশিং মরক্ত থাউদা এক্সসাইজ দ্যুতি হন্থহন্নবা অমসুং রাজ্যশিংদা কম্মর্সিএল এল.পি.জি হৌজিক চাদা ৫০ ফংলিবা অসিগী মথক্ত হান্নগী চাদা ৭০ গী চাংদা ফংহন্নবা ৱারেপশিং লৌখিবদা চীফ মিনিষ্টরশিংনা তরাম্না ওকখ্রে। ফিবম অসি মপুংফানা থেংননবা অমসুং মীয়ামগী য়াইফনবা কেন্দ্রগা য়াম্না চেৎনা থবক তৌমিন্নগনি হায়বনা চীফ মিনিষ্টরনা অমুক হন্না থাজবা পীখ্রে। 

***