પ્રધાનમંત્રી શ્રી નરેન્દ્ર મોદીએ આજે પશ્ચિમ એશિયામાં તાજેતરના વિકાસથી ઉદ્ભવતી પરિસ્થિતિ અને ભારત પર તેની સંભવિત અસરના સંદર્ભમાં સજ્જતાની સમીક્ષા કરવા માટે રાજ્યોના મુખ્યમંત્રીઓ અને કેન્દ્રશાસિત પ્રદેશોના લેફ્ટનન્ટ ગવર્નરો સાથે વીડિયો કોન્ફરન્સિંગ દ્વારા બેઠકની અધ્યક્ષતા કરી હતી.

પ્રધાનમંત્રીએ તમામ મુખ્યમંત્રીઓ દ્વારા શેર કરવામાં આવેલા મૂલ્યવાન સૂચનો માટે તેમની પ્રશંસા કરી હતી અને નોંધ્યું હતું કે આ ઇનપુટ્સ બદલાતી પરિસ્થિતિને અસરકારક રીતે સંચાલિત કરવામાં નિમિત્ત બનશે. તેમણે આગામી પડકારોનો સામનો કરવા માટે તકેદારી, સજ્જતા અને સંકલિત કાર્યવાહીની જરૂરિયાત પર ભાર મૂક્યો હતો.

પશ્ચિમ એશિયામાં ચાલી રહેલી પરિસ્થિતિનો ઉલ્લેખ કરતા પ્રધાનમંત્રીએ કહ્યું કે ભારત પાસે સમાન વૈશ્વિક વિક્ષેપનો સામનો કરવાનો અગાઉનો અનુભવ છે. તેમણે કોવિડ-19 મહામારી દરમિયાનના સામૂહિક પ્રતિસાદને યાદ કર્યો, જ્યારે કેન્દ્ર અને રાજ્યોએ સપ્લાય ચેઈન, વ્યાપાર અને રોજિંદા જીવન પરની અસર ઘટાડવા માટે "ટીમ ઇન્ડિયા" તરીકે સાથે મળીને કામ કર્યું હતું. તેમણે ભારપૂર્વક જણાવ્યું હતું કે સહકાર અને સંકલનની આ જ ભાવના વર્તમાન સંજોગોમાં નેવિગેટ કરવામાં ભારતની સૌથી મોટી શક્તિ છે.

પ્રધાનમંત્રીએ હાઇલાઇટ કર્યું હતું કે પરિસ્થિતિ ગતિશીલ છે, જેના માટે સતત દેખરેખ અને અનુકૂલનશીલ વ્યૂહરચનાઓની જરૂર છે. તેમણે કહ્યું કે 3 માર્ચથી એક આંતર-મંત્રાલય જૂથ કાર્યરત છે, જે દરરોજ પરિસ્થિતિની સમીક્ષા કરે છે અને સમયસર નિર્ણયો લે છે. તેમણે ભારપૂર્વક જણાવ્યું હતું કે સરકારની પ્રાથમિકતાઓ આર્થિક અને વ્યાપાર સ્થિરતા જાળવવી, ઊર્જા સુરક્ષા સુનિશ્ચિત કરવી, નાગરિકોના હિતોનું રક્ષણ કરવું અને ઉદ્યોગ તથા સપ્લાય ચેઈનને મજબૂત કરવાની છે.

રાજ્યોની નિર્ણાયક ભૂમિકા પર ભાર મૂકતા પ્રધાનમંત્રીએ નોંધ્યું હતું કે નિર્ણયોનું અસરકારક અમલીકરણ રાજ્ય સ્તરે થાય છે. તેમણે કેન્દ્ર અને રાજ્યો વચ્ચે સતત સંવાદ અને સંકલન તેમજ માહિતીની સમયસર વહેંચણી અને સંયુક્ત નિર્ણય લેવાની હાકલ કરી હતી, જેથી પ્રતિસાદ ઝડપી અને સુસંગત હોય.

પ્રધાનમંત્રીએ રાજ્યોને સપ્લાય ચેઈનનું સરળ સંચાલન સુનિશ્ચિત કરવા અને સંગ્રહખોરી તથા નફાખોરી સામે કડક પગલાં લેવા વિનંતી કરી હતી. તેમણે વિક્ષેપોને રોકવા માટે રાજ્ય અને જિલ્લા સ્તરે કંટ્રોલ રૂમ સક્રિય કરવા અને વહીવટી તકેદારી જાળવવાના મહત્વ પર પ્રકાશ પાડ્યો હતો. તેમણે કૃષિ ક્ષેત્રમાં આગોતરા આયોજનની જરૂરિયાત પર પણ ભાર મૂક્યો હતો, ખાસ કરીને ખાતરના સંગ્રહ અને વિતરણ પર દેખરેખ રાખવામાં, જેથી આગામી ખરીફ સીઝન દરમિયાન ખેડૂતોને મુશ્કેલીનો સામનો ન કરવો પડે.

પ્રધાનમંત્રીએ ખોટી માહિતી અને અફવાઓ ફેલાવવા સામે સાવધ કર્યા હતા અને જણાવ્યું હતું કે ગભરાટ ફેલાતો અટકાવવા માટે સચોટ અને વિશ્વસનીય માહિતીનો સમયસર પ્રસાર આવશ્યક છે. તેમણે ઓનલાઈન છેતરપિંડી અને નકલી એજન્ટો સામે પણ તકેદારી રાખવાની સલાહ આપી હતી. પ્રધાનમંત્રીએ શિપિંગ, આવશ્યક પુરવઠો અને દરિયાઈ કામગીરી સંબંધિત કોઈપણ ઉભરતા પડકારોનો સામનો કરવા માટે સરહદી અને દરિયાકાંઠાના રાજ્યોમાં વિશેષ ધ્યાન આપવા હાકલ કરી હતી.

તેમણે જનતાનો વિશ્વાસ જાળવી રાખવાના મહત્વ પર ભાર મૂક્યો હતો અને નોંધ્યું હતું કે આવશ્યક ચીજવસ્તુઓની ઉપલબ્ધતા અંગેની ખાતરી નાગરિકોમાં બિનજરૂરી ગભરાટને રોકવામાં મદદ કરશે. તેમણે વધુમાં સૂચવ્યું કે પશ્ચિમ એશિયામાં જે રાજ્યોના નાગરિકો છે તેમણે હેલ્પલાઇન સક્રિય કરવી જોઈએ, નોડલ ઓફિસરની નિમણૂક કરવી જોઈએ અને અસરગ્રસ્ત પરિવારોને મદદ કરવા અને માહિતીનો સમયસર પ્રવાહ સુનિશ્ચિત કરવા જિલ્લા સ્તરે સહાય પ્રણાલી સ્થાપિત કરવી જોઈએ.

પ્રધાનમંત્રીએ જણાવ્યું હતું કે ભારતની આર્થિક અને પુરવઠા પ્રણાલીને મજબૂત કરવા માટે તાજેતરના વર્ષોમાં હાથ ધરવામાં આવેલા પ્રયાસો વર્તમાન સંદર્ભમાં ફાયદાકારક સાબિત થઈ રહ્યા છે. તેમણે ઉદ્યોગો અને MSMEs સાથે સતત જોડાણ રાખવા હાકલ કરી હતી જેથી તેમની ચિંતાઓ દૂર કરી શકાય અને ઉત્પાદન તથા રોજગારમાં સ્થિરતા સુનિશ્ચિત કરી શકાય. તેમણે બદલાતી પરિસ્થિતિઓમાં ઝડપી પ્રતિસાદ આપવા સક્ષમ બનાવવા માટે મુખ્ય સચિવોના સ્તરે નિયમિત સમીક્ષા અને જિલ્લા સ્તરે સતત દેખરેખ સહિત તમામ સ્તરે મજબૂત સંકલન મિકેનિઝમની જરૂરિયાત પર પણ ભાર મૂક્યો હતો.

પ્રધાનમંત્રીએ તાત્કાલિક પ્રતિસાદ અને લાંબા ગાળાની સજ્જતા પર સમાંતર ધ્યાન આપવા હાકલ કરી હતી. તેમણે રાજ્યોને બાયોફ્યુઅલ, સોલર એનર્જી, ગોવર્ધન પહેલ, ઇલેક્ટ્રિક મોબિલિટી જેવા વૈકલ્પિક ઊર્જા સ્ત્રોતોને પ્રોત્સાહન આપવા તેમજ પાઈપ્ડ નેચરલ ગેસ કનેક્શનના વિસ્તરણના પ્રયાસોને વેગ આપવા વિનંતી કરી હતી. તેમણે રાજ્યોના સક્રિય સહકાર સાથે તેલ અને કુદરતી ગેસના ઘરેલું સંશોધનને વધારવાના મહત્વ પર પણ પ્રકાશ પાડ્યો હતો.

પ્રધાનમંત્રીએ પુનરોચ્ચાર કર્યો હતો કે આ પડકારનો સામનો કરવો એ એક સહિયારી જવાબદારી છે અને વિશ્વાસ વ્યક્ત કર્યો હતો કે "ટીમ ઇન્ડિયા" તરીકે સાથે મળીને કામ કરવાથી રાષ્ટ્ર આ પરિસ્થિતિ પર સફળતાપૂર્વક વિજય મેળવશે.

બેઠક દરમિયાન, રક્ષામંત્રી શ્રી રાજનાથ સિંહે હાઇલાઇટ કર્યું હતું કે સરકાર આ સંકટને પહોંચી વળવા માટે પ્રધાનમંત્રીના નેતૃત્વમાં સક્રિયપણે કામ કરી રહી છે અને LPG ની સમયસર ઉપલબ્ધતા સુનિશ્ચિત કરવા અને પેટ્રોલ તથા ડીઝલ પરની એક્સાઇઝ ડ્યુટી ઘટાડવા જેવા હકારાત્મક પગલાં લઈ રહી છે. તેમણે ચાલુ પરિસ્થિતિનો સામનો કરવા માટે તમામ રાજ્યો, કેન્દ્રશાસિત પ્રદેશો અને કેન્દ્ર તરફથી સામૂહિક કાર્યવાહીની જરૂરિયાત પર વધુ ભાર મૂક્યો હતો.

કેબિનેટ સચિવ શ્રી ટી. વી. સોમનાથને વર્તમાન પરિસ્થિતિ પર એક પ્રેઝન્ટેશન આપ્યું હતું અને રાજ્યો માટે પરિસ્થિતિને પહોંચી વળવા માટેના પગલાં અને ભલામણોની યાદી આપી હતી.

મુખ્યમંત્રીઓએ પરિસ્થિતિને પહોંચી વળવા માટે પ્રધાનમંત્રીના નેતૃત્વમાં કેન્દ્ર સરકાર દ્વારા લેવામાં આવેલા પગલાંની પ્રશંસા કરી હતી. તેમણે વિદેશમાં રહેલા ભારતીય નાગરિકોની સુખાકારી સુનિશ્ચિત કરવા માટે આ સંકટ વચ્ચે પ્રધાનમંત્રી દ્વારા વિવિધ દેશો સાથે કરવામાં આવેલા રાજદ્વારી સંપર્કની પણ પ્રશંસા કરી હતી.

વિવિધ રાજ્યોના મુખ્યમંત્રીઓએ વિશ્વાસ વ્યક્ત કર્યો હતો કે પરિસ્થિતિ સ્થિર છે, પેટ્રોલ, ડીઝલ અને LPG ની પૂરતી ઉપલબ્ધતા છે અને આવશ્યક ચીજવસ્તુઓના અવિરત પુરવઠાને સુનિશ્ચિત કરવા માટે સતત દેખરેખ પ્રણાલી અમલમાં છે. તેમણે ઇંધણ પરની એક્સાઇઝ ડ્યુટી ઘટાડવાના નિર્ણયને વ્યાપકપણે આવકાર્યો હતો અને નોંધ્યું હતું કે તે વૈશ્વિક અનિશ્ચિતતાઓ વચ્ચે નાગરિકોને મોટી રાહત આપશે. મુખ્યમંત્રીઓએ રાજ્યો અને કેન્દ્રશાસિત પ્રદેશોમાં કોમર્શિયલ LPG ફાળવણી 50% થી વધારીને સંકટ પૂર્વેના સ્તરના 70% કરવાના નિર્ણયને પણ આવકાર્યો હતો. તેમણે બદલાતી પરિસ્થિતિને અસરકારક રીતે સંચાલિત કરવા અને નાગરિકોના હિતોનું રક્ષણ કરવા માટે કેન્દ્ર સાથે ગાઢ સંકલનમાં કામ કરવાની પ્રતિબદ્ધતાનો પુનરોચ્ચાર કર્યો હતો.

SM/JY/JD