“Ka kam ai jingpynbna ka dei ban kyntiew ia ka jingshaniah, ym tang ka jingpynpoi kaba iar,” la ong u Sanjay Jaju, Secretary, ka tnat Information & Broadcasting, haba u la ai ka jingkren ha ka AdTrust Summit 2026 ha Mumbai mynta ka sngi. U Union I&B Secretary u la ban jur halor ka jingdonkam ban don ka kam ai jingpynbna kaba don jingbahkhlieh, kaba shai bad kaba lah ban shaniah ha India, khamtam haba kane ka kam ka kham iar, ka kham bun bynta bad ka kham bun ka jingktah. U jaju u la ban jur ba ka kam ka dei ban bteng ban kham iar, ka dei ruh ban don ka jingbahkhlieh, khamtam ha ki kam digital. Ka rukom treikam jong ka tnat I&B ka peit bniah ia ka jingkyntiew ia ka jingshaniah, ka jingkyrshan ia ka jingkiew shaphrang bad ka jingpynthikna ia ka jingbahkhlieh, u la bynrap.

Ka bynta kaba nyngkong eh jong ka AdTrust Summit 2026, ba la pynlong da ka Advertising Standards Council of India (ASCI) ka la wanrah lang ïa ki nongmihkhmat na ki kynhun ai jingpynbna, ki lad pathai khubor, ka teknoloji, bad ki tnat sorkar ban ïamir jingmut halor ki mat ba kongsan kiba ïadei bad ka jingpynbna kaba don ka jingkitkhlieh. Ki jingiakren ki long halor ki jinglong kiba dang mih, ki ain, bad ka jingktah jong ki buit thymmai ha ki rukom ai jingpynbna.

Haba kren ha ka jingialang, u Jaju u la kdew ba ka jingpynbna ka long kham palat ban ia ka kam kamai kaba pynwan dur ia ki iew ki hat, kaba tei ia ki kyrteng, kaba pyntip ia ki nongthied, kaba ai dak ia ka kolshor, bad kaba ktah ia ki jingangnud. Ha ka ri kaba heh bad kaba stet ban pynkylla digital kum ka India, ka jingpynbna ka la kylla long ka nongpyniaid kaba kongsan ia ka jingpynwandur, ka jingtreikam ha ka ioh ka kot, ka jingsaindur, bad ka jingai bynta lang ia baroh. Ki kor digital bad ka jingstad thymmai mynta ki plie lad ïa ki brand, ki startup, ki kam khaii ha ki thaiñ, bad ki nongthaw ban poi sha ki nongthied ha ka rukom kaba iar, kaba pynduna ïa ki jingkhanglad ban rung ha ki kam bad pynïar ïa ka jingïashim bynta.

Ha kajuh ka por, u Jaju u la maham ruh shaphang ki jingma kiba ïadei bad ka jingpynbna digital, kynthup ïa ki jingleh thok ha ka liang ka pisa tyngka, ki jingpynkyntiew ïa ka jingbei tyngka kiba ïalam bakla, bad ki jingtyrwa kam kiba thok, kiba ju thew ïa ki paidbah kiba don ha ka jingma. U la ban jur ba watla ka jingkren shaphang ki kam khaii ka dei ka bynta jong ka jinglaitluid ban kren shai, hynrei dei ban tehlakam ia ki jingpynbna kiba ialam bakla bad kiba thok.

Ki jingiakren ba kongsan ha kane ka jingialang ki kynthup ia ki mat kiba dang mih kum ka bynta jong ka AI ha ka jingpynbna, ki deepfake, ki dark pattern, bad ka jingkiew jong ka jingpyniaid iew pyrshah ia ki nongpynkylla. U Jaju u la kyntu ia ki nongai jingpynbna ban pynleit jingmut ha ka jingshaniah ryngkat bad ka jingpoi kaba iar, bad ki nongthaw bad ki nongpynkylla ban iada ia ka jingshaniah jong ki nongpeit da kaba pynneh ia ka jingshisha bad kiar na ki jingpynbna kiba ialam bakla.

U Jaju u la batai shuh shuh ia ki san tylli ki nongrim ba kongsan na ka bynta ka jingpynbna kaba don jingkitkhlieh, kiba long i) Ka jingshisha kam dei ban shah ktah ha kano kano ka jingiakren, ii) Ka jinglong kaba shai ka long kaba donkam ha kaba ithuh ia ki jingpynbna, ki jingkyrshan, bad ki jingiadei kiba pyniaid iew ia ki mar, iii) Ka jingkitkhlieh ka dei ban ialam lynti ia ka jingsaindur, jingpynmih jong ki kynhun kiba lah ban shah ktah. Iv) Ka jingiada ia ki bynta kiba don jingma, khamtam eh ia ki khynnah, ka dei ban don hakhmat eh, v) Ka jingsaindur thymmai ryngkat bad ka jingkitkhlieh ka dei ban pynthikna ba ki jingkiew ha ka liang ka teknoloji bad ka jingpsaindur ki pynskhem ia ka jingshaniah ban ia kaba pynduh ia ka.

Ha kane ka jingïalang, u Sanjay Jaju, ryngkat bad ka Manisha Kapoor, Secretary General & CEO jong ka ASCI, u Sam Balsara, Chairman ka Madison, u Sudhanshu Vats, Chairman ka ASCI & MD, Pidilite Industries, u Praveen Tajee Tripathi, u M. Ishan Bajee & Board Member, ASCI. Ki nongiatreilang, Khaitan & Co, ki la pyllait paidbah lang ia ka Ad Law Compendium. Kan long kum ka jingbatai ia ki ain bad ki kyndon kiba iadei bad ka kam ai jingpynbna ba la shna khnang ban kyntiew ia ka jingpynsngewthuh, bad jingbud ryntih kaba kham khlain ha kane ka kam.

U I&B Secretary jong ka Sorkar Pdeng u la pynlong ruh ia ka jingialang bad kito kiba don bynta ha ka kam ai jingpynbna, ba kynthup ia ki nongialam jong ka ASCI, ki nongpyniaid iew, ki rynsan digital bad kito kiba trei ha ki kam kiba iadei bad ka ain.