ముంబయిలో ఈ రోజు జరిగిన యాడ్‌ట్రస్ట్ సమ్మిట్-2026లో సమాచార, ప్రసార మంత్రిత్వ శాఖ కార్యదర్శి శ్రీ సంజయ్ జాజు మాట్లాడుతూ... "ప్రకటనలు కేవలం విస్తృతిని పెంచడమే కాకుండా, విశ్వాసాన్నీ పెంపొందించాలి" అని వ్యాఖ్యానించారు. దేశంలో బాధ్యతాయుతమైన, పారదర్శకమైన, విశ్వసనీయమైన ప్రకటనల వ్యవస్థ ఆవశ్యకతను ఆయన స్పష్టం చేశారు. ముఖ్యంగా ఈ రంగం పరిమాణంలో, సంక్లిష్టతలో, ప్రభావంలో ముందుకు దూసుకెళ్తున్న తరుణంలో ఇది మరింత అవసరమని ఆయన పేర్కొన్నారు. ఈ రంగం నిరంతరం అభివృద్ధి చెందుతున్న క్రమంలో ముఖ్యంగా డిజిటల్ రంగంలో జవాబుదారీతనం ఎంతో అవసరమని శ్రీ జాజు ఉద్ఘాటించారు. సమాచార, ప్రసార మంత్రిత్వ శాఖ విధానం విశ్వాసాన్ని పెంపొందించడం, వృద్ధికి మద్దతునివ్వడం, బాధ్యతను నిర్ధారించడంపైనే దృష్టి సారిస్తుందని ఆయన తెలిపారు.

అడ్వర్టైజింగ్ స్టాండర్డ్స్ కౌన్సిల్ ఆఫ్ ఇండియా (ఏఎస్‌సీఐ) నిర్వహించిన యాడ్‌ట్రస్ట్ సమ్మిట్-2026 మొదటి సంచిక... బాధ్యతాయుతమైన ప్రకటనలకు సంబంధించిన కీలక సమస్యలపై చర్చించడానికి ప్రకటనలు, మీడియా, టెక్నాలజీ, ప్రభుత్వ రంగాల ప్రతినిధులను ఒకచోట చేర్చింది. ఈ చర్చలు అభివృద్ధి చెందుతున్న పోకడలు, చట్టపరమైన నిబంధనలు, ప్రకటనల పద్ధతులపై ఆధునిక సాంకేతికతల ప్రభావంపై ప్రధానంగా దృష్టి సారించాయి.

సదస్సులో శ్రీ జాజు మాట్లాడుతూ... ప్రకటనలు కేవలం ఒక వాణిజ్య కార్యక్రమం మాత్రమే కాదనీ, అవి మార్కెట్లను తీర్చిదిద్దుతాయని, బ్రాండ్‌లను నిర్మిస్తాయని, వినియోగదారులకు సమాచారం అందిస్తాయని, సంస్కృతిని సూచిస్తాయని, ఆకాంక్షలను ప్రభావితం చేస్తాయని పేర్కొన్నారు. భారత్ వంటి పెద్ద, వేగంగా డిజిటలైజ్ అవుతున్న దేశంలో ఆవిష్కరణలు, ఆర్థిక కార్యకలాపాలు, కంటెంట్ సృష్టి, సమ్మిళితత్వానికి ప్రకటనలు ఒక కీలక చోదక శక్తిగా మారాయన్నారు. డిజిటల్ ప్లాట్‌ఫారమ్‌లు, కృత్రిమ మేధ ఇప్పుడు బ్రాండ్‌లు, అంకురసంస్థలు, స్థానిక వ్యాపారాలు, సృష్టికర్తలు పెద్ద ఎత్తున వినియోగదారులను చేరుకోవడానికి వీలు కల్పిస్తున్నాయనీ... తద్వారా ప్రవేశ అవరోధాలను తగ్గించి, భాగస్వామ్యాన్నీ విస్తరిస్తున్నాయని శ్రీ జాజు వ్యాఖ్యానించారు.

బలహీన వర్గాలను తరచుగా లక్ష్యంగా చేసుకునే చేసే ఆర్థిక మోసాలు, తప్పుదోవ పట్టించే పెట్టుబడి ప్రచారాలు, మోసపూరిత ఉద్యోగ ఆఫర్లు వంటి డిజిటల్ ప్రకటనలతో ముడిపడి ఉన్న ప్రమాదాలనూ ప్రస్తావించిన శ్రీ జాజు... ఇలాంటి వాటి పట్ల అప్రమత్తంగా ఉండాలని హెచ్చరించారు. వాణిజ్య ప్రసంగం భావప్రకటనా స్వేచ్ఛలో భాగమే అయినప్పటికీ... తప్పుదోవ పట్టించే, మోసపూరిత ప్రకటనలను నియంత్రించవచ్చనీ, నియంత్రించాలనీ ఆయన పేర్కొన్నారు.

ప్రకటనల్లో ఏఐ పాత్ర, డీప్‌ఫేక్‌లు, డార్క్ ప్యాటర్న్‌లు, పెరుగుతున్న యాంటీ-ఇన్‌ఫ్లుయెన్సర్ మార్కెటింగ్ ధోరణి వంటి కొత్తగా తలెత్తుతున్న సమస్యలపై ఈ సదస్సులో కీలక చర్చలు జరిగాయి. ప్రకటనకర్తలు రీచ్‌తో పాటు విశ్వసనీయతపైనా దృష్టి పెట్టాలనీ... క్రియేటర్లు, ఇన్‌ఫ్లుయెన్సర్లు ప్రామాణికతను పాటిస్తూ, తప్పుదోవ పట్టించే ప్రమోషన్లకు దూరంగా ఉంటూ ప్రేక్షకుల నమ్మకాన్ని కాపాడుకోవాలని శ్రీ జాజు కోరారు.

బాధ్యతాయుతమైన ప్రకటనల కోసం ఐదు కీలక సూత్రాలను శ్రీ జాజు ప్రధానంగా వివరించారు. అవి: i) అన్ని కమ్యూనికేషన్లలో సత్యసంధత రాజీపడలేనిదిగా ఉండాలి. ii) ప్రకటనలు, స్పాన్సర్‌షిప్‌లు, ప్రచార సంబంధాలను గుర్తించడంలో పారదర్శకత అత్యవసరం. iii) అన్ని రకాల కంటెంట్ రూపకల్పన, పంపిణీకి బాధ్యత మార్గదర్శకంగా ఉండాలి. iv) బలహీన వర్గాలకు, ముఖ్యంగా పిల్లల రక్షణకు ప్రాధాన్యమివ్వాలి. v) జవాబుదారీతనంతో కూడిన ఆవిష్కరణలు, సాంకేతిక, సృజనాత్మక పురోగతులు విశ్వాసాన్ని బలహీనపరచకుండా, బలోపేతం చేసేలా నిర్ధారించాలి.

సదస్సు సందర్భంగా శ్రీ సంజయ్ జాజుతో పాటు ఏఎస్‌సీఐ సెక్రటరీ జనరల్, సీఈవో శ్రీమతి మనీషా కపూర్... మాడిసన్ ఛైర్మన్ శ్రీ సామ్ బల్సారా... ఏఎస్‌సీఐ ఛైర్మన్, పెడిలైట్ ఇండస్ట్రీస్ ఎమ్‌డీ శ్రీ సుధాన్షు వత్స్... ఏఎస్‌సీఐ బోర్డు సభ్యులు శ్రీ ప్రవీణ్ త్రిపాఠి... ఖైతాన్ అండ్ కో భాగస్వాములు శ్రీ ఇషాన్ జోహ్రి, శ్రీమతి తనూ బానర్జీలు సంయుక్తంగా 'యాడ్ లా కంపెండియం'ను ప్రారంభించారు. ఇది పరిశ్రమ వ్యాప్తంగా మరింత అవగాహన, అర్థం చేసుకోవడం, అనుగుణంగా ఉండడం వంటి వాటిని ప్రోత్సహించడానికి రూపొందించినది. ప్రకటనల చట్టాలు, నిబంధనల కోసం ఒక ఆచరణాత్మక మార్గదర్శిగా ఇది ఉపయోగపడుతుంది.

ఏఎస్‌సీఐ నాయకత్వం, విక్రయదారులు, డిజిటల్ ప్లాట్‌ఫారమ్‌లు, న్యాయవాద సంఘాల సభ్యులు సహా ప్రకటనల పరిశ్రమకు చెందిన భాగస్వాములతో కేంద్ర సమాచార, ప్రసార శాఖ కార్యదర్శి ఈ సందర్భంగా ప్రత్యేక సమావేశం నిర్వహించారు.

***