আজি ৰাষ্ট্ৰীয় মিডিয়া চেণ্টাৰত পশ্চিম এছিয়াৰ শেহতীয়া ঘটনাক্ৰম সন্দৰ্ভত এক আন্তঃ-মন্ত্ৰী পৰ্যায়ৰ সংবাদমেল আয়োজিত হয়। পেট্ৰ’লিয়াম আৰু প্ৰাকৃতিক গেছ মন্ত্ৰালয়, বৈদেশিক পৰিক্ৰমা মন্ত্ৰালয়, বন্দৰ, জাহাজ পৰিবহণ আৰু জলপথ মন্ত্ৰালয় তথা তথ্য আৰু সম্প্ৰচাৰ মন্ত্ৰালয়ৰ জ্যেষ্ঠ বিষয়াসকলে অঞ্চলটোত উদ্ভৱ হোৱা পৰিস্থিতিৰ প্ৰতি লক্ষ্য ৰাখি ভাৰত চৰকাৰে গ্ৰহণ কৰা প্ৰস্তুতি আৰু পদক্ষেপসমূহৰ বিষয়ে সংবাদ মাধ্যমক অৱগত কৰে। এই সংবাদ মেলত শক্তি যোগানৰ প্ৰস্তুতি, সামুদ্ৰিক সুৰক্ষা, বিদেশত থকা ভাৰতীয় নাগৰিকৰ কল্যাণ আৰু চৰকাৰে গ্ৰহণ কৰা যোগাযোগ ব্যৱস্থাৰ শেহতীয়া অৱস্থিতি সন্দৰ্ভত তথ্য প্ৰকাশ কৰা হয়।

শক্তি যোগান আৰু ইন্ধনৰ উপলব্ধতা

পেট্ৰ’লিয়াম আৰু প্ৰাকৃতিক গেছ মন্ত্ৰালয়ৰ বিষয়াই নিৰবিচ্ছিন্ন শক্তি যোগান নিশ্চিত কৰাৰ উদ্দেশ্যে গ্ৰহণ কৰা পদক্ষেপ তথা দেশৰ ইন্ধন যোগানৰ পৰিস্থিতি সন্দৰ্ভত শেহতীয়া তথ্য সংবাদ মাধ্যমক প্ৰদান কৰে।

খাৰুৱা তেল

• ভাৰতৰ খাৰুৱা তেলৰ যোগান সুৰক্ষিত হৈ আছে। ভাৰতত খাৰুৱা তেলৰ দৈনিক ব্যৱহাৰ প্ৰায় ৫৫ লাখ বেৰেল আৰু বিভিন্ন উৎসৰ পৰা ক্ৰয়ৰ জৰিয়তে বৰ্তমান সুৰক্ষিত হৈ থকা খাৰুৱা তেলৰ পৰিমাণ সাধাৰণতে এই সময়ছোৱাত হৰমুজ জলপ্ৰণালীৰ জৰিয়তে আহিব লগা পৰিমাণতকৈ অধিক।
• ভাৰতে এতিয়া প্ৰায় ৪০খন দেশৰ পৰা খাৰুৱা তেল আমদানি কৰে। বিভিন্ন  উৎসৰ পৰা ক্ৰয় কৰাৰ ফলস্বৰূপে আগৰ প্ৰায় ৫৫ শতাংশৰ তুলনাত এতিয়া প্ৰায় ৭০শতাংশ খাৰুৱা তেলৰ আমদানি হৰমুজ জলপ্ৰণালীৰ বাহিৰৰ পথেৰে কৰা হৈছে।
• ইতিমধ্যে দুখন অতিৰিক্ত খাৰুৱা তেল পৰিবাহী জাহাজ ভাৰত অভিমুখে আহি আছে আৰু শীঘ্ৰেই দেশত উপস্থিত হ’ব, যাৰ ফলত খাৰুৱা তেলৰ যোগানৰ স্থিতি অধিক শক্তিশালী হ’ব।
• সমগ্ৰ দেশতে শোধনাগাৰবোৰে অতি উচ্চ ক্ষমতাৰ ব্যৱহাৰৰ স্তৰত কাম কৰি আছে, কিছুমান ক্ষেত্ৰত আনকি ১০০ শতাংশ ক্ষমতাৰ ওপৰতো ব্যৱহাৰ কৰা হৈছে।

প্ৰাকৃতিক গেছ

• ভাৰতৰ মুঠ প্ৰাকৃতিক গেছৰ ব্যৱহাৰ প্ৰায় ১৮৯ এম এছ চি এম ডি, যাৰ ভিতৰত ৯৭.৫ এম এছ চি এম ডি ঘৰুৱাভাৱে উৎপাদন কৰা হয়। আকস্মিক পৰিস্থিতিৰ বাবে প্ৰায় ৪৭.৪ এম এছ চি এম ডি যোগান প্ৰভাৱিত হৈছে।
• এই ব্যাঘাতৰ পৰা পৰিত্ৰাণ পাবলৈ বিকল্প যোগান ধৰোঁতা আৰু বিকল্প পথসমূহৰ জৰিয়তে ক্ৰয়ৰ কাম চলি আছে। গেছ কোম্পানীসমূহেও নতুন উৎসৰ পৰা এল এন জি কাৰ্গো লাভ কৰিছে আৰু দুখন এল এন জি কাৰ্গো দেশ অভিমুখে আহি আছে।
• চৰকাৰে গেছ যোগান পৰিচালনা কৰিবলৈ আৰু অগ্ৰাধিকাৰমূলক খণ্ডসমূহ সুৰক্ষিত কৰিবলৈ অত্যাৱশ্যকীয় সামগ্ৰী আইনৰ অধীনত ২০২৬ চনৰ ৯ মাৰ্চত প্ৰাকৃতিক গেছ নিয়ন্ত্ৰণ আদেশ জাৰি কৰিছিল।
• ঘৰুৱা পি এন জি যোগান আৰু বাহনৰ বাবে চি এন জি য়ে কোনো ব্যাঘাত  নোহোৱাকৈ ১০০শতাংশ যোগান লাভ কৰিব।
• চাহ উদ্যোগ, উৎপাদন গোট আৰু গেছ গ্ৰীডৰ সৈতে সংযুক্ত অন্যান্য ঔদ্যোগিক গ্ৰাহকে তেওঁলোকৰ পূৰ্বৰ ছয় মাহৰ গড় যোগানৰ প্ৰায় ৮০ শতাংশ লাভ কৰিব।
• সাৰ প্ৰকল্পসমূহে প্ৰায় ৭০ শতাংশ যোগান লাভ কৰিব, আনহাতে শোধনাগাৰ আৰু পেট্ৰোকেমিকেল ইউনিটসমূহে প্ৰায় ৩৫ শতাংশ হ্ৰাস কৰিব যাতে উচ্চ অগ্ৰাধিকাৰৰ খণ্ডসমূহক সুৰক্ষিত কৰিব পৰা যায়।

এলপিজি

• ভাৰতে ইয়াৰ এলপিজি ব্যৱহাৰৰ প্ৰায় ৬০শতাংশ আমদানি কৰে আৰু এই আমদানিৰ প্ৰায় ৯০শতাংশ হৰমুজ জলপ্ৰণালীৰ জৰিয়তে আহে, যি সাম্প্ৰতিক পৰিস্থিতিৰ ফলত প্ৰভাৱিত হৈছে।
• ২০২৬চনৰ ৮ মাৰ্চত চৰকাৰে শোধনাগাৰ আৰু পেট্ৰোকেমিকেল কমপ্লেক্সসমূহক প্ৰপেন, ব্যুটেন, প্ৰপিলিন আৰু ব্যুটেনৰ ধাৰাসমূহ এলপিজি পুললৈ স্থানান্তৰ কৰি এলপিজি উৎপাদন সৰ্বাধিক কৰিবলৈ নিৰ্দেশ জাৰি কৰিছিল। এই পদক্ষেপসমূহৰ ফলস্বৰূপে, ঘৰুৱা এলপিজি উৎপাদন প্ৰায় ২৫ শতাংশ বৃদ্ধি পাইছে আৰু সমগ্ৰ ঘৰুৱা এলপিজি উৎপাদনৰ ক্ষেত্ৰত ঘৰুৱা গ্ৰাহকসকলৰ অগ্ৰাধিকাৰ দিয়া হৈছে।
• অ-ঘৰুৱা এলপিজিৰ ক্ষেত্ৰত চিকিৎসালয় আৰু শিক্ষা প্ৰতিষ্ঠানৰ দৰে অত্যাৱশ্যকীয় খণ্ডসমূহক অগ্ৰাধিকাৰ দিয়া হৈছে।
• ৰেষ্টুৰেণ্ট, হোটেল আৰু অন্যান্য বাণিজ্যিক ব্যৱহাৰকাৰীৰ বাবে আবণ্টন পৰ্যালোচনা কৰিবলৈ আৰু উপলব্ধ এলপিজি যোগানৰ ন্যায্য আৰু স্বচ্ছ বিতৰণ নিশ্চিত কৰিবলৈ আইঅ’চিএল, এইচপিচিএল আৰু বিপিচিএলৰ কাৰ্যবাহী সঞ্চালকৰ তিনিজনীয়া সমিতি গঠন কৰা হৈছে।
• শেহতীয়াকৈ ৬০ টকা বৃদ্ধি হোৱাৰ পাছত দিল্লীত ঘৰুৱা এলপিজি চিলিণ্ডাৰৰ বৰ্তমান মূল্য হৈছে ৯১৩টকা। পিএমইউৱাইৰ হিতাধিকাৰীসকলৰ বাবে প্ৰতিটো চিলিণ্ডাৰৰ মূল্য ৬১৩ টকা হৈ আছে।
• এটা পিএমইউৱাই পৰিয়ালৰ বাবে, শেহতীয়া বৃদ্ধিৰ অৰ্থ হৈছে প্ৰতিদিনে ৮০ পইছাতকৈ কম।
• যদিও ২০২৩ চনৰ জুলাই মাহৰ পৰা ছৌদি চুক্তি মূল্য প্ৰায় ৪১শতাংশ বৃদ্ধি পাইছে, চৰকাৰী সমৰ্থনৰ বাবে একে সময়ছোৱাত পিএমইউৱাইৰ মূল্য প্ৰায় ৩২ শতাংশ হ্ৰাস পাইছে।
• চৰকাৰে এলপিজি আণ্ডাৰ-ৰিক্ভাৰীৰ ক্ষেত্ৰত তেল বিপণন কোম্পানীসমূহৰ বাবে ৩০,০০০কোটি টকাৰ ক্ষতিপূৰণ অনুমোদন কৰিছে।
• ফিল্ড ফিডবেকেৰ জৰিয়তে কিছু শংকাজনিত বুকিং আৰু মজুতকৰণৰ আচৰণ প্ৰতিফলিত হৈছে। অৱশ্যে, ঘৰুৱা এলপিজিৰ বাবে স্বাভাৱিক ডেলিভাৰী চক্ৰ প্ৰায় আঢ়ৈ দিন থাকে আৰু গ্ৰাহকসকলক দ্ৰুতগতিত চিলিণ্ডাৰ বুক নকৰিবলৈ পৰামৰ্শ দিয়া হৈছে।
• বিতৰক পৰ্যায়ত ডাইভাৰ্ছন প্ৰতিৰোধ কৰিবলৈ প্ৰায়  ৯০ শতাংশ গ্ৰাহকলৈ ডেলিভাৰী প্ৰমাণীকৰণ ক’ড (ডি এ চি) ব্যৱস্থাটো সম্প্ৰসাৰিত কৰা হৈছে।
• অস্থায়ী চাহিদা-ব্যৱস্থাপনা নিয়ন্ত্ৰণ কৰিবলৈ, এলপিজি বুকিঙৰ মাজৰ নিম্নতম ব্যৱধান ২১ দিনৰ পৰা ২৫ দিনলৈ বৃদ্ধি কৰা হৈছে।
• তেল বিপণন কোম্পানী আৰু কাৰ্যবাহী গোটসমূহে বিতৰকৰ বেকলগসমূহ পৰিষ্কাৰ কৰিবলৈ আৰু মসৃণ ডেলিভাৰী নিশ্চিত কৰিবলৈ ক্ষেত্ৰ পৰ্যায়ত সমন্বয়েৰে কাম কৰি আছে।
• চৰকাৰে আন্তৰ্জাতিক পৰিস্থিতি নিৰন্তৰ নিৰীক্ষণ কৰি আছে আৰু নিৰবিচ্ছিন্ন ইন্ধন যোগান নিশ্চিত কৰিবলৈ আৰু পৰিয়াল তথা অগ্ৰাধিকাৰমূলক খণ্ডসমূহ সুৰক্ষিত কৰিবলৈ প্ৰয়োজনীয় পদক্ষেপ গ্ৰহণ কৰি আছে।

সামুদ্ৰিক সুৰক্ষা আৰু জাহাজ পৰিবহণ কাৰ্য্যকলাপ

বন্দৰ, জাহাজ পৰিবহণ আৰু জলপথ মন্ত্ৰালয়ে সংবাদ মাধ্যমক পাৰস্য উপসাগৰীয় অঞ্চলৰ বৰ্তমানৰ সামুদ্ৰিক পৰিস্থিতি আৰু ভাৰতীয় নাবিক, জাহাজ তথা সামুদ্ৰিক বাণিজ্য কাৰ্যকলাপ সুৰক্ষিত কৰাৰ বাবে গ্ৰহণ কৰা পদক্ষেপসমূহৰ বিষয়ে অৱগত কৰে। মন্ত্ৰালয়ৰ মতেঃ

• বৰ্তমান পাৰস্য উপসাগৰীয় অঞ্চলত ২৮খন ভাৰতীয় পতাকাবাহী জাহাজ চলি আছে। ইয়াৰ ভিতৰত ২৪খন জাহাজ হৰমুজ জলপ্ৰণালীৰ পশ্চিমে আছে, য’ত ৬৭৭জন ভাৰতীয় নাবিক আছে, আনহাতে ১০১ জন ভাৰতীয় নাবিকক লৈ জলপ্ৰণালীৰ পূবত ৪খন জাহাজ  আছে। তেওঁলোকৰ সুৰক্ষা আৰু নিৰাপত্তা সক্ৰিয়ভাৱে নিৰীক্ষণ কৰা হৈছে।
• ২০২৬ চনৰ ২৮ ফেব্ৰুৱাৰীৰ পৰা উন্নয়ন নিৰীক্ষণ আৰু সহায়ৰ সমন্বয়ৰ বাবে মন্ত্ৰালয় আৰু জাহাজ পৰিবহণ সঞ্চালকালয়ত ২৪ ঘণ্টাৰ এটা নিয়ন্ত্ৰণ কক্ষ কাৰ্যক্ষম হৈ আছে।
• জাহাজ পৰিবহণ সঞ্চালকালয়ে ২০২৬ চনৰ ২৮ ফেব্ৰুৱাৰীত ভাৰতীয় পতাকাবাহী জাহাজ আৰু ভাৰতীয় নাবিকসকলক উন্নত নিৰাপত্তা ব্যৱস্থা গ্ৰহণ কৰিবলৈ তথা কৰ্মচাৰীৰ বিৱৰণ দাখিলকে ধৰি প্ৰতিবেদন সম্পৰ্কীয় নীতি নিয়মসমূহ মানি চলিবলৈ নিৰ্দেশ জাৰি কৰিছিল।
• কৰ্তৃপক্ষ, জাহাজ ব্যৱস্থাপক আৰু নিযুক্তি সংস্থাসমূহে ভাৰতীয় দূতাবাস তথা স্থানীয় কৰ্তৃপক্ষৰ সৈতে ঘনিষ্ঠভাৱে সমন্বয় ৰক্ষা কৰি আছে যাতে সুৰক্ষা নিশ্চিত কৰিব পাৰি আৰু প্ৰয়োজন সাপেক্ষে ভাৰতীয় নাবিকসকলক সহায় প্ৰদান কৰিব পাৰি।
• সমগ্ৰ ভাৰতত বন্দৰৰ কাৰ্য্যকলাপ সুস্থিৰ হৈ আছে আৰু ৰপ্তানিকাৰীসকলে সন্মুখীন হোৱা অসুবিধাসমূহ হ্ৰাস কৰিবলৈ তথা এক্সিম বাণিজ্যৰ ধাৰাবাহিকতা নিশ্চিত কৰিবলৈ বন্দৰসমূহক প্ৰয়োজনীয় সহায় আগবঢ়াবলৈ নিৰ্দেশ দিয়া হৈছে।
• প্ৰধান বন্দৰসমূহে জাহাজৰ চলাচলৰ নিৰন্তৰ নিৰীক্ষণ, অঞ্চলটোৰ উন্নয়নৰ বাস্তৱ-সময়ৰ মূল্যায়ন আৰু জাহাজ তথা কাৰ্গোৰ স্থিতিৰ নিয়মীয়া প্ৰতিবেদ অটুট ৰাখিছে।
• মন্ত্ৰালয়ে ভাৰতীয় নাবিক আৰু ভাৰতীয় পতাকাবাহী জাহাজৰ সুৰক্ষাৰ ওপৰত গুৰুত্ব দি পাৰস্য উপসাগৰীয় অঞ্চলৰ শেহতীযা সামুদ্ৰিক পৰিস্থিতি নিবিড়ভাৱে নিৰীক্ষণ কৰি আছে।
• মন্ত্ৰালয়ে সামুদ্ৰিক বাণিজ্য আৰু নাবিকসকলক প্ৰয়োজনীয় সমৰ্থন প্ৰদান কৰিবলৈ উদ্যোগৰ অংশীদাৰসকলৰ সৈতে নিয়মীয়া মত-বিনিময় অব্যাহত ৰাখিছে।
• ভাৰতীয় নাবিকসকলৰ সুৰক্ষা আৰু কল্যাণ নিশ্চিত কৰা তথা ভাৰতৰ সামুদ্ৰিক স্বাৰ্থ সুৰক্ষিত কৰাৰ বাবে চৰকাৰ প্ৰতিশ্ৰুতিবদ্ধ হৈ আছে।

অঞ্চলটোত ভাৰতীয় নাগৰিকৰ সুৰক্ষা

বৈদেশিক পৰিক্ৰমা মন্ত্ৰালয়ে অঞ্চলটোত ভাৰতীয় নাগৰিকৰ সৈতে জড়িত পৰিস্থিতিৰ বিষয়ে এক শেহতীয়া তথ্য প্ৰদান কৰে আৰু ভাৰতীয় প্ৰব্ৰজনকাৰীৰ সুৰক্ষা তথা কল্যাণ নিশ্চিত কৰিবলৈ ভাৰতীয় অভিযানৰ জৰিয়তে কৰা প্ৰচেষ্টাৰ ওপৰত আলোকপাত কৰে। মন্ত্ৰালয়ে কয়ঃ

• জি চি চি দেশসমূহত প্ৰায় এক কোটি লোকৰ প্ৰৱাসী ভাৰতীয় আছে আৰু তেওঁলোকৰ কল্যাণ তথা সুৰক্ষা এক অগ্ৰাধিকাৰৰ বিষয়।
• প্ৰধানমন্ত্ৰীয়ে ইউ এ ই, কাটাৰ, ছৌদি আৰৱ, ওমান, বাহৰেইন, কুৱেইট, জৰ্ডান আৰু ইজৰাইলকে ধৰি কেইবাখনো উপসাগৰীয় আৰু পশ্চিম এছিয়াৰ দেশৰ নেতাসকলৰ সৈতে মত বিনিময় কৰিছে।
• বৈদেশিক পৰিক্ৰমা মন্ত্ৰীগৰাকী এই দেশসমূহৰ লগতে ইৰাণৰ বৈদেশিক মন্ত্ৰীৰ সৈতেও নিয়মীয়া যোগাযোগত আছে।
• অঞ্চলটোত থকা ভাৰতীয় কৰ্তৃপক্ষসমূহে ভাৰতীয় নাগৰিকসকলক নিয়মীয়া পৰামৰ্শ জাৰি কৰি আহিছে।
• ৰাষ্ট্ৰদূত আৰু কনছুল জেনেৰেলে সম্প্ৰদায়ৰ সদস্যসকলৰ সুৰক্ষা আৰু নিৰাপত্তা নিশ্চিত কৰিবলৈ তেওঁলোকৰ সৈতে যোগাযোগ অব্যাহত ৰাখিছে।
• কৰ্তৃপক্ষসমূহে মস্কট, ৰিয়াদ আৰু জেদ্দাৰ দৰে স্থানৰ পৰা উপলব্ধ বাণিজ্যিক বিমান বিকল্পৰ জৰিয়তে ঘৰলৈ উভতি যাবলৈ পৰ্যটক আৰু পৰিবহন যাত্ৰীসহ আবদ্ধ ভাৰতীয়সকলক সহায় কৰিছে।
• বৈদেশিক পৰিক্ৰমা মন্ত্ৰালয়ে ভাৰতীয় নাগৰিকসকলক সহায় কৰিবলৈ এটা নিয়ন্ত্ৰণ কক্ষ স্থাপন কৰিছে।
• আক্ৰমণৰ সন্মুখীন হোৱা ব্যৱসায়িক জাহাজৰ সৈতে জড়িত ঘটনাত দুজন ভাৰতীয় নাগৰিকে প্ৰাণ হেৰুৱাইছে আৰু এজন সন্ধানহীন হৈ আছে। শোকসন্তপ্ত পৰিয়ালসমূহলৈ সমবেদনা জ্ঞাপন কৰা হয়।
• কিছুমান আহত ভাৰতীয় নাগৰিকে চিকিৎসা গ্ৰহণ কৰি আছে আৰু ভাৰতীয় কৰ্তৃপক্ষসমূহে তেওঁলোকক সহায় কৰি আছে। ইজৰাইলত আহত এজন ভাৰতীয় নাগৰিক সুস্থ হৈ উঠিছে আৰু ডুবাইত আহত আন এজন ভাৰতীয় নাগৰিক দূতাবাসৰ সংস্পৰ্শলৈ আহিছে।
• বৰ্তমান ইৰাণত প্ৰায় ৯,০০০ভাৰতীয় নাগৰিক আছে। ভাৰতীয় কৰ্তৃপক্ষ প্ৰবাসী নাগৰিকসকলৰ সৈতে সম্পৰ্ক বজাই ৰাখিছে।
• ভাৰতীয় শিক্ষাৰ্থী আৰু তীৰ্থযাত্ৰীসকলক তেহৰাণৰ বাহিৰৰ নিৰাপদ চহৰলৈ স্থানান্তৰিত কৰা হৈছে।
• আৰ্মেনিয়া আৰু আজৰবাইজানলৈ স্থল সীমান্ত পাৰ হোৱাৰ বাবেও সহায় আগবঢ়োৱা হৈছে যাতে ব্যক্তিসকলে বাণিজ্যিক বিমানযোগে ভাৰতলৈ ঘূৰি আহিব পাৰে।
• নাগৰিকসকলক নিয়মীয়া আপডেটৰ বাবে বৈদেশিক পৰিক্ৰমা মন্ত্ৰালয় আৰু ভাৰতীয় কৰ্তৃপক্ষসমূহে চৰকাৰী ছ’চিয়েল মিডিয়া হেণ্ডেলসমূহ অনুসৰণ কৰিবলৈ পৰামৰ্শ দিছে।

অত্যাৱশ্যকীয় যোগানসমূহৰ ৰাজহুৱা যোগাযোগ আৰু নিৰীক্ষণঃ

তথ্য আৰু সম্প্ৰচাৰ মন্ত্ৰণালয়ৰ বিষয়াগৰাকীয়ে বৈঠকত নিম্নোক্ত বিষয়সমূহত গুৰুত্ব আৰোপ কৰে।

-কেন্দ্ৰীয় গৃহ সচিবগৰাকীয়ে সকলো ৰাজ্য আৰু কেন্দ্ৰীয় শাসিত অঞ্চলৰ মুখ্য সচিব আৰু আৰক্ষী সঞ্চালক প্ৰধানসকলৰ সৈতে এখন বৈঠকত মিলিত হয়।

-ৰাজ্য আৰু কেন্দ্ৰীয় শাসিত অঞ্চলসমূহক অত্যাৱশ্যকীয় সামগ্ৰীৰ মজুতকৰণৰ বিৰুদ্ধে কঠোৰ ব্যৱস্থা গ্ৰহণ কৰিবলৈ আৰু অত্যাৱশ্যকীয় সামগ্ৰীৰ নিৰবচ্ছিন্ন উপলব্ধতা নিশ্চিত কৰিবলৈ পৰামৰ্শ দিয়া হয়।

-ৰাজ্য আৰু কেন্দ্ৰীয় শাসিত অঞ্চলসমূহক জনসাধাৰণক নিয়মীয়াকৈ আৰু বিশ্বাসযোগ্য তথ্য প্ৰদান কৰিবলৈ ৰাজ্যিক পৰ্যায়ৰ এগৰাকী মুখপাত্ৰ নিযুক্তিৰ পৰামৰ্শ দিয়া হয়।

-চৰকাৰী ছ'চিয়েল মিডিয়া হেণ্ডেল, জিলা প্ৰশাসন আৰু সংবাদ মাধ্যমৰ অংশীদাৰসকলৰ জৰিয়তে পৰীক্ষণ কৰা আপডেটসমূহ প্ৰচাৰ কৰা উচিত।

-জিলা উপায়ুক্ত, আৰক্ষী আয়ুক্ত আৰু পৌৰসভা কৰ্তৃপক্ষৰ সৈতে জনসাধাৰণৰ সৈতে সক্ৰিয়ভাৱে জড়িত হৈ তথ্যৰ বিশ্বাসযোগ্য উৎস হিচাপে সেৱা আগবঢ়াই স্থানীয় প্ৰশাসনক যোগাযোগৰ বহুগুণক হিচাপে ব্যৱহাৰ কৰা উচিত।

ভাৰত চৰকাৰে পশ্চিম এছিয়াৰ পৰিস্থিতিৰ ওপৰত তীক্ষ্ণ দৃষ্টি ৰাখিছে আৰু সংশ্লিষ্ট মন্ত্ৰালয় আৰু সংস্থাৰ মাজত নিৰন্তৰ সমন্বয় ৰক্ষা কৰি আছে। শক্তি সুৰক্ষা, অঞ্চলটোত থকা ভাৰতীয় নাগৰিকৰ সুৰক্ষা, সামুদ্ৰিক কাৰ্যকলাপৰ সুৰক্ষা আৰু অত্যাৱশ্যকীয় সামগ্ৰীৰ নিৰৱচ্ছিন্ন উপলব্ধতা নিশ্চিত কৰিবলৈ প্ৰয়োজনীয় পদক্ষেপ গ্ৰহণ কৰা হৈছে বুলি তেওঁ পুনৰ দোহাৰে। চৰকাৰে জনসাধাৰণক অৱগত কৰি ৰখা আৰু বিকশিত পৰিস্থিতিৰ সময়ত ভাৰতৰ স্বাৰ্থ সুৰক্ষিত কৰাৰ বাবে সময়োপযোগী ব্যৱস্থা গ্ৰহণৰ বাবে প্ৰতিশ্ৰুতিবদ্ধ হৈ আছে।

****

MN/DD