ప్రెస్ అండ్ రిజిస్ట్రేషన్ ఆఫ్ పీరియడికల్స్ (పీఆర్‌పీ) చట్టం- 2023 ప్రకారం పత్రికల రిజిస్ట్రేషన్ కోసం వచ్చే అన్ని దరఖాస్తుల విషయంలో పూర్తి ప్రక్రియను ఇప్పుడు ప్రెస్ సేవా పోర్టల్ ద్వారా డిజిటల్ పద్ధతిలోనే పూర్తి చేస్తున్నారు. దీనికి అనుగుణంగా గతంలో అమలులో ఉండి ఇప్పుడు రద్దు అయిన 1867 నాటి ప్రెస్ అండ్ రిజిస్ట్రేషన్ ఆఫ్ బుక్స్ చట్టం (పీఆర్‌బీ) కింద నమోదైన 1.5 లక్షలకు పైగా భౌతిక రికార్డులను డిజిటలైజ్ చేసి ప్రెస్ సేవా పోర్టల్‌లో విలీనం చేశారు. ప్రస్తుతం కొత్త పత్రికల రిజిస్ట్రేషన్, ఇప్పటికే ఉన్న పత్రికల వివరాల సవరణ, యాజమాన్య మార్పిడి, వార్షిక నివేదికల దాఖలు, ఆన్‌లైన్ జరిమానాల చెల్లింపు, సర్క్యులేషన్ తనిఖీలు వంటి సేవలన్నీ ఈ వెబ్‌సైట్ ద్వారానే నిర్వహిస్తున్నారు. ఈ చట్టం అమలులో భాగంగా దేశవ్యాప్తంగా 780 జిల్లాల సంబంధిత అధికారులను ప్రెస్ సేవా పోర్టల్‌లో అనుసంధానించారు. 2024 మార్చి 1 నుంచి ఇప్పటివరకు మొత్తం 11,081 దరఖాస్తుల ప్రక్రియను పూర్తి చేసి సంబంధిత విభాగాలకు ధ్రువీకరణ పత్రాలను జారీ చేశారు.

ప్రెస్ సేవా వెబ్‌సైట్ ద్వారా విధించిన, చెల్లించిన జరిమానాల వివరణాత్మక జాబితా అనుబంధం-Iలో ఉంది. రద్దు చేసిన పత్రికల సంఖ్యకు సంబంధించిన రాష్ట్రాల వారీ వివరణాత్మక జాబితా అనుబంధం-IIలో ఉంది. వివిధ కార్యక్రమాలు, తీసుకున్న చర్యలు చూపుతున్న ప్రభావాన్ని ప్రభుత్వం నిరంతరం అంచనా వేస్తోంది. వెబ్‌సైట్ ద్వారా మెరుగైన సేవలను అందించడానికి ప్రెస్ రిజిస్ట్రార్ జనరల్ ఆఫ్ ఇండియా (పీఆర్‌జీఐ) నిరంతరం అభిప్రాయాలను స్వీకరిస్తూ తగిన చర్యలు చేపడుతోంది.

రిజిస్టర్ అయిన వార్తాపత్రికలు, నియతకాలిక ప్రచురణల జాబితా పీఆర్‌జీఐ అధికారిక వెబ్‌సైట్ https://prgi.gov.in/ లో అందుబాటులో ఉంది. వెబ్‌సైట్‌లోని ‘అవర్ సర్వీసెస్’ విభాగంలో ఉన్న ‘రిజిస్టర్డ్ టైటిల్స్’లో ఈ వివరాలను చూడొచ్చు. లోక్‌సభలో శ్రీ దామోదర్ అగర్వాల్ అడిగిన ప్రశ్నకు లిఖితపూర్వక సమాధానంగా ఈ సమాచారాన్ని కేంద్ర సమాచార- ప్రసార, పార్లమెంటరీ వ్యవహారాల శాఖ సహాయ మంత్రి డాక్టర్ ఎల్. మురుగన్ నేడు సమర్పించారు.