ప్రధానమంత్రి శ్రీ నరేంద్ర మోదీ అధ్యక్షతన ఇవాళ జరిగిన ఆర్థిక వ్యవహారాల కేబినెట్ కమిటీలో ఉత్తరప్రదేశ్, హర్యానా మధ్య ఢిల్లీ-ముంబయి ఎక్స్‌ప్రెస్‌వే (ఢిల్లీ-ఫరీదాబాద్-బల్లభ్‌గఢ్-సోహ్నా అనుసంధాన రహదారి) నుంచి జెవార్ అంతర్జాతీయ విమానాశ్రయం వరకు హైబ్రిడ్ యాన్యుటీ మోడ్‌లో చేపట్టనున్న గ్రీన్ ఫీల్డ్ కనెక్టివిటీ నిర్మాణం కోసం సవరించిన అంచనా వ్యయం రూ.3630.77 కోట్లకు ఆమోదం లభించింది.

31.42 కి.మీ. పొడవైన ఈ ప్రాజెక్టు ద్వారా దక్షిణ ఢిల్లీ, ఫరీదాబాద్, గురుగ్రామ్ నుంచి జెవార్ అంతర్జాతీయ విమానాశ్రయానికి నేరుగా, వేగంగా వెళ్లేందుకు వీలుంటుంది. ఇది జాతీయ రాజధాని ప్రాంతంలో (ఎన్‌సీఆర్) ఆర్థిక వృద్ధిని, రవాణా సామర్థ్యాన్ని పెంచుతుంది.

ఈ కారిడార్ తూర్పు పెరిఫెరల్ ఎక్స్‌ప్రెస్‌వే, యమునా ఎక్స్‌ప్రెస్‌వే, ప్రత్యేక సరకు రవాణా కారిడార్ (డీఎఫ్‌సీ)లను అనుసంధానించి, వివిధ రవాణా వ్యవస్థల కలయికకు వేదికగా నిలుస్తుంది. ఈ ఎలివేటెడ్ కారిడార్ నిర్మాణపరమైన మెరుగుదల మాత్రమే కాక.. పట్టణ ప్రాంతంలో విప్లవాత్మక మార్పులకు, ప్రాంతీయ అనుసంధానానికి, జాతీయ రవాణా సామర్థ్యానికి వ్యూహాత్మకంగా నిలుస్తుంది. జెవార్ విమానాశ్రయం-ఢిల్లీ-ముంబయి ఎక్స్‌ప్రెస్‌వే కారిడార్ పూర్తి సామర్థ్యాన్ని వెలికితీయటానికి, ఫరీదాబాద్‌లో స్థిరమైన పట్టణాభివృద్ధికి దీని నిర్మాణం అత్యంత కీలకం.

ఈ ప్రాజెక్టులో 11 కి.మీ వరకు ఎలివేటెడ్ హైవేను అభివృద్ధి చేస్తారు. ఇది డీఎన్‌డీ-బల్లభ్‌గఢ్ బైపాస్, జెవార్ అంతర్జాతీయ విమానాశ్రయం మధ్య గ్రీన్ ఫీల్డ్ కనెక్టివిటీలో కీలక భాగం. ఈ మార్గం విమానాశ్రయాన్ని ఢిల్లీ-ముంబయి ఎక్స్‌ప్రెస్‌వేతో అనుసంధానిస్తుంది. ఈ కారిడార్ ఫరీదాబాద్ మాస్టర్ ప్లాన్-2031 ప్రకారం అత్యధిక జనసాంద్రత గల పట్టణాభివృద్ధికి, భవిష్యత్ మౌలిక సదుపాయాల విస్తరణకు కేటాయించిన ప్రాంతం నుంచి వెళుతుంది. ప్రతిపాదిత ఎలివేటెడ్ కారిడార్ నిర్మాణానికి అయ్యే అదనపు వ్యయం రూ.689.24 కోట్లు కాగా, రూ.450 కోట్లు వెచ్చించేందుకు హర్యానా ప్రభుత్వం అంగీకరించింది.

ఢిల్లీ-ముంబయి ఎక్స్‌ప్రెస్‌వే (ఢిల్లీ-ఫరీదాబాద్-బల్లభ్‌గఢ్-సోహ్నా అనుసంధాన రహదారి) నుంచి జెవార్ అంతర్జాతీయ విమానాశ్రయానికి గ్రీన్ ఫీల్డ్ కనెక్టివిటీ ప్రాజెక్ట్ మ్యాప్

***