ಭಾರತ್ ಮಾತಾ ಕಿ ಜೈ

ಭಾರತ್ ಮಾತಾ ಕಿ ಜೈ

ಭಾರತ್ ಮಾತಾ ಕಿ ಜೈ

ಉತ್ತರ ಪ್ರದೇಶದ ಗೌರವಾನ್ವಿತ ಮತ್ತು ಜನಪ್ರಿಯ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಜಿ, ಕೇಂದ್ರ ಸಚಿವ ಸಂಪುಟದ ನನ್ನ ಸಹೋದ್ಯೋಗಿಗಳಾದ ಪಂಕಜ್ ಚೌಧರಿ ಜಿ ಮತ್ತು ಜಯಂತ್ ಚೌಧರಿ ಜಿ, ಉತ್ತರ ಪ್ರದೇಶದ ಉಪಮುಖ್ಯಮಂತ್ರಿ ಬ್ರಜೇಶ್ ಪಾಠಕ್ ಜಿ, ಉತ್ತರ ಪ್ರದೇಶ ಸರ್ಕಾರದ ಸಚಿವರೆ, ನನ್ನ ಸಹ ಸಂಸತ್ ಸದಸ್ಯರೆ, ಶಾಸಕರೆ ಮತ್ತು ಇಲ್ಲಿ ಇಷ್ಟೊಂದು ಸಂಖ್ಯೆಯಲ್ಲಿ ನೆರೆದಿರುವ ನನ್ನ ಪ್ರೀತಿಯ ಸಹೋದರ ಸಹೋದರಿಯರೆ!

ಮೀರತ್‌ನ ಕ್ರಾಂತಿಕಾರಿ ಮಣ್ಣಿನಲ್ಲಿರುವ ಬಾಬಾ ಔಘರ್ನಾಥರ ಈ ಪವಿತ್ರ ಭೂಮಿಯಲ್ಲಿ  ಇಂದು ಅಭಿವೃದ್ಧಿ ಹೊಂದಿದ ಉತ್ತರ ಪ್ರದೇಶ ಮತ್ತು ಅಭಿವೃದ್ಧಿ ಹೊಂದಿದ ಭಾರತದ ದೃಷ್ಟಿಕೋನಕ್ಕೆ ಹೊಸ ಶಕ್ತಿ ತುಂಬಲಾಗುತ್ತಿದೆ. ಮೊದಲ ಬಾರಿಗೆ ಒಂದೇ ವೇದಿಕೆಯಲ್ಲಿ ನಮೋ ಭಾರತ್ ರ‍್ಯಾಪಿಡ್ ರೈಲು ಮತ್ತು ಮೆಟ್ರೋ ಸೇವೆ ಎರಡೂ ಒಂದೇ ದಿನ ಉದ್ಘಾಟನೆಯಾಗುತ್ತಿವೆ. ಅಭಿವೃದ್ಧಿ ಹೊಂದಿದ ಭಾರತದಲ್ಲಿ ಸಂಪರ್ಕ ಹೇಗಿರುತ್ತದೆ ಎಂಬುದರ ಅದ್ಭುತ ನೋಟ ಇದಾಗಿದೆ. ನಗರ ಪ್ರಯಾಣಕ್ಕಾಗಿ ಮೆಟ್ರೋ ಮತ್ತು ಅವಳಿ ನಗರಗಳ ದೃಷ್ಟಿಕೋನ ವೇಗಗೊಳಿಸುವ ಆಧುನಿಕ ರೈಲು ನಮೋ ಭಾರತ್. ಉತ್ತರ ಪ್ರದೇಶದಲ್ಲಿ ಈ ಮೈಲಿಗಲ್ಲು ಸಾಧಿಸಲಾಗಿದೆ ಎಂಬ ತೃಪ್ತಿ ನನಗೆ ಇದೆ.

ಸಹೋದರ ಸಹೋದರಿಯರೆ,

ಇಂದಿನ ಕಾರ್ಯಕ್ರಮವು ಬಿಜೆಪಿಯ ಡಬಲ್-ಎಂಜಿನ್ ಸರ್ಕಾರದ ಕಾರ್ಯ ಸಂಸ್ಕೃತಿಯನ್ನು ಪ್ರತಿಬಿಂಬಿಸುತ್ತಿದೆ. ನಮ್ಮ ಕಾರ್ಯ ಸಂಸ್ಕೃತಿ ಏನು? ನಮ್ಮ ಕಾರ್ಯ ಸಂಸ್ಕೃತಿಯೆಂದರೆ, ಒಮ್ಮೆ ಅಡಿಪಾಯ ಹಾಕಿದ ನಂತರ, ಯೋಜನೆಯನ್ನು ಪೂರ್ಣಗೊಳಿಸಲು ನಾವು ಹಗಲು ರಾತ್ರಿ ನಮ್ಮನ್ನು ಅರ್ಪಿಸಿಕೊಳ್ಳುತ್ತಿದ್ದೇವೆ. ಅದಕ್ಕಾಗಿಯೇ ಯೋಜನೆಗಳು ಇನ್ನು ಮುಂದೆ ಹಿಂದಿನಂತೆ ಸ್ಥಗಿತಗೊಳ್ಳುವುದಿಲ್ಲ ಅಥವಾ ವಿಳಂಬವಾಗುವುದಿಲ್ಲ. ನಮೋ ಭಾರತ್ ಮತ್ತು ಮೆಟ್ರೋ ಸೇವೆಯನ್ನು ನಾನು ಮೊದಲೇ ಉದ್ಘಾಟಿಸಿದ್ದೆ, ಇಂದು ಅವುಗಳನ್ನು ರಾಷ್ಟ್ರಕ್ಕೆ ಸಮರ್ಪಿಸುವ ಸೌಭಾಗ್ಯ ನನಗೆ ಸಿಕ್ಕಿದೆ.

ಸ್ವಲ್ಪ ಸಮಯದ ಹಿಂದೆ ನಾನು ಮೀರತ್ ಮೆಟ್ರೋದಲ್ಲಿ ಪ್ರಯಾಣಿಸಿದೆ. ಪ್ರಯಾಣದ ಸಮಯದಲ್ಲಿ, ನಾನು ಅನೇಕ ಯುವ ವಿದ್ಯಾರ್ಥಿಗಳು ಮತ್ತು ಇತರ ಪ್ರಯಾಣಿಕರೊಂದಿಗೆ ಸಂವಹನ ನಡೆಸಿದೆ. ಎಲ್ಲರೂ ಇಂತಹ ಅದ್ಭುತ ಸೌಲಭ್ಯವನ್ನು ಎಂದಿಗೂ ಊಹಿಸಿರಲಿಲ್ಲ ಎಂದು ಹೇಳಿದರು. ಅವರು ಹಳೆಯ ದಿನಗಳನ್ನು ನೆನಪಿಸಿಕೊಂಡರು, ವಿಶೇಷವಾಗಿ ಮಹಿಳೆಯರು ಮತ್ತು ಹೆಣ್ಣು ಮಕ್ಕಳು ಕೆಲವು ವರ್ಷಗಳ ಹಿಂದೆ  ಸಂಜೆಯಾಗುತ್ತಿದ್ದಂತೆ, ಮೌನ ಮತ್ತು ಭಯ ಇಡೀ ಮಾರ್ಗವನ್ನು ಆವರಿಸುತ್ತಿತ್ತು ಎಂದು ನನಗೆ ಹೇಳಿದರು. ಈಗ ಒಂದೆಡೆ ಕಾನೂನು ಮತ್ತು ಸುವ್ಯವಸ್ಥೆ ಸುಧಾರಿಸಿದೆ. ಮತ್ತೊಂದೆಡೆ, ಜನರು ಸುರಕ್ಷಿತ ಮತ್ತು ಅನುಕೂಲಕರ ಪ್ರಯಾಣದ ಮಾರ್ಗ ಹೊಂದಿದ್ದಾರೆ.

ಸ್ನೇಹಿತರೆ,

ನಮೋ ಭಾರತ್ ರಾಪಿಡ್ ರೈಲು ಮಹಿಳಾ ಸಬಲೀಕರಣದ ಸಂಕೇತವಾಗಿದೆ ಎಂಬುದರಿಂದ ನನಗೆ ಸಂತೋಷವಾಗಿದೆ. ಈ ಸೇವೆಯಲ್ಲಿ, ರೈಲು ನಿರ್ವಾಹಕರು, ನಿಲ್ದಾಣ ನಿಯಂತ್ರಣ ಸಿಬ್ಬಂದಿ ಮತ್ತು ಇತರೆ ಹಲವರ ಪಾತ್ರಗಳನ್ನು ನಮ್ಮ ಹೆಣ್ಣು ಮಕ್ಕಳು ನಿರ್ವಹಿಸುತ್ತಿದ್ದಾರೆ. ದೇಶದ ಮೊದಲ ನಮೋ ಭಾರತ್ ರಾಪಿಡ್ ರೈಲು ಸೇವೆ ಮತ್ತು ಮೀರತ್ ಮೆಟ್ರೋಗಾಗಿ ನಿಮ್ಮೆಲ್ಲರಿಗೂ, ಉತ್ತರ ಪ್ರದೇಶ  ಮತ್ತು ದೆಹಲಿಯ ಜನರಿಗೆ ನನ್ನ ಹೃತ್ಪೂರ್ವಕ ಅಭಿನಂದನೆಗಳನ್ನು ಸಲ್ಲಿಸುತ್ತೇನೆ.

ಸ್ನೇಹಿತರೆ,

ನನಗೆ ಮೀರತ್ ಭೂಮಿಯೊಂದಿಗೆ ವಿಶೇಷ ಬಾಂಧವ್ಯವಿದೆ. 2014ರ ಚುನಾವಣೆಗಳು, 2019ರ ಚುನಾವಣೆಗಳು ಮತ್ತು 2024ರ ಲೋಕಸಭಾ ಚುನಾವಣೆಗಳಲ್ಲಿ, ನನ್ನ ಪ್ರಚಾರವು ಮೀರತ್‌ನಿಂದಲೇ ಆರಂಭವಾಯಿತು. ಮೀರತ್‌ ಜನರು, ಇಲ್ಲಿನ ರೈತರು, ಉದ್ಯಮಿಗಳು, ಸಣ್ಣ ಕೈಗಾರಿಕೆಗಳ ಕಾರ್ಮಿಕರು, ಕುಶಲಕರ್ಮಿಗಳು ಮತ್ತು ಅಂಗಡಿ ವರ್ತಕರು ಯಾವಾಗಲೂ ನನಗೆ ಆಶೀರ್ವಾದ ಮಾಡಿದ್ದಾರೆ.

ಸ್ನೇಹಿತರೆ,

ಆಗಲೂ ನಾನು ಕಾಂಗ್ರೆಸ್ ಮತ್ತು ಎಸ್‌ಪಿ-ಬಿಎಸ್‌ಪಿಯ  ವಿಷಕಾರಿ ರಾಜಕೀಯವನ್ನು ತ್ಯಜಿಸಿ ಅಭಿವೃದ್ಧಿಯ ವಿಷಯದಲ್ಲಿ ನಮ್ಮೊಂದಿಗೆ ಸ್ಪರ್ಧಿಸಲು ಹೇಳಿದ್ದೆ.

ಸ್ನೇಹಿತರೆ,

ಈ ಪಕ್ಷಗಳು ತಮ್ಮ ವಿಷಕಾರಿ ರಾಜಕೀಯವನ್ನು ಬದಲಾಯಿಸಲಿಲ್ಲ, ಆದರೆ ಬಿಜೆಪಿ ತನ್ನ ನೀತಿಗಳು, ಕಾರ್ಯವಿಧಾನ ಮತ್ತು ಉದ್ದೇಶದಲ್ಲಿ ಅಭಿವೃದ್ಧಿಯನ್ನೇ ತನ್ನ ಅತ್ಯುನ್ನತ ಆದ್ಯತೆಯನ್ನಾಗಿ ಮಾಡಿದೆ. ಮೀರತ್ ಮೆಟ್ರೋ ಇದಕ್ಕೆ ಒಂದು ಉದಾಹರಣೆಯಾಗಿದೆ.

ಸ್ನೇಹಿತರೆ,

2014ಕ್ಕಿಂತ ಮೊದಲು ಭಾರತದಲ್ಲಿ ಮೆಟ್ರೋ ಸೇವೆಗಳ ವಿಸ್ತರಣೆ ಅತ್ಯಂತ ನಿಧಾನವಾಗಿತ್ತು. ಕಾಂಗ್ರೆಸ್ ಸರ್ಕಾರದ ಅಡಿ, ಮೆಟ್ರೋ ರೈಲುಗಳು ಕೇವಲ 5 ನಗರಗಳಲ್ಲಿ ಮಾತ್ರ ಓಡುತ್ತಿದ್ದವು. ಆದರೆ ಇಂದು ಬಿಜೆಪಿ ಸರ್ಕಾರದಲ್ಲಿ, ದೇಶಾದ್ಯಂತ 25ಕ್ಕೂ ಹೆಚ್ಚು ನಗರಗಳಲ್ಲಿ ಮೆಟ್ರೋ ರೈಲುಗಳು ಓಡುತ್ತಿವೆ. ಭಾರತವು ಈಗ ವಿಶ್ವದ 3ನೇ ಅತಿದೊಡ್ಡ ಮೆಟ್ರೋ ಜಾಲವಾಗಿದೆ. ಉತ್ತರ ಪ್ರದೇಶದಲ್ಲೂ ಮೀರತ್ ಹೊರತುಪಡಿಸಿ, ಹಲವಾರು ನಗರಗಳಲ್ಲಿ ಮೆಟ್ರೋ ಯೋಜನೆಗಳ ಕೆಲಸ ನಡೆಯುತ್ತಿದೆ.

ಸ್ನೇಹಿತರೆ,

ಕಳೆದ 11 ವರ್ಷಗಳಲ್ಲಿ ಬಿಜೆಪಿ ಸರ್ಕಾರವು ಜನರಿಗೆ ಅನುಕೂಲ ಕಲ್ಪಿಸಲು, ಸಂಚಾರ ದಟ್ಟಣೆ ಮತ್ತು ಮಾಲಿನ್ಯ ಮುಕ್ತವಾಗಿ ನಾಗರಿಕರಿಗೆ ಹೆಚ್ಚಿನ ವೇಗದ ಪ್ರಯಾಣವನ್ನು ನೀಡಲು ಬಯಸುತ್ತಿರುವುದರಿಂದ ಡಜನ್ ಗಟ್ಟಲೆ ನಗರಗಳು ಮೆಟ್ರೋ ಸೇವೆಗಳೊಂದಿಗೆ ಸಂಪರ್ಕ ಹೊಂದಿವೆ. ಅದಕ್ಕಾಗಿಯೇ ಇಂದು ನಮೋ ಭಾರತ್‌ನಂತಹ ಆಧುನಿಕ ಅರೆ-ಹೈ-ಸ್ಪೀಡ್ ರೈಲುಗಳು ಓಡುತ್ತಿವೆ, ಜತೆಗೆ ವಂದೇ ಭಾರತ್ ರೈಲುಗಳು ಸಹ ಕಾರ್ಯ ನಿರ್ವಹಿಸುತ್ತಿವೆ.

ಸ್ನೇಹಿತರೆ,

ದೆಹಲಿಯಲ್ಲಿ ಕಾಂಗ್ರೆಸ್ ಮತ್ತು ಎಸ್‌ಪಿ ಸರ್ಕಾರವಿದ್ದಾಗ ಇದ್ಯಾವುದೂ ಸಾಧ್ಯವಾಗಿರಲಿಲ್ಲ. ಆ ಸಮಯದಲ್ಲಿ ಮೂಲಸೌಕರ್ಯ ಯೋಜನೆಗಳು ಹಗರಣಗಳಲ್ಲಿ ಮುಳುಗುತ್ತಿದ್ದವು. ಮೆಟ್ರೋ ವ್ಯವಸ್ಥೆಗಳಿಗೆ ಸಂಬಂಧಿಸಿದ ತಂತ್ರಜ್ಞಾನಗಳನ್ನು ಸಹ ವಿದೇಶದಿಂದ ಆಮದು ಮಾಡಿಕೊಳ್ಳಬೇಕಾಗಿತ್ತು. ನಾವು ಹಗರಣಗಳನ್ನು ನಿಲ್ಲಿಸಿ ದೇಶವನ್ನು ಸ್ವಾವಲಂಬನೆಯ ಹಾದಿಯಲ್ಲಿ ಮುನ್ನಡೆಸಿದ್ದೇವೆ. ಏಕೆಂದರೆ ಬಿಜೆಪಿಯ ಆದ್ಯತೆ ರಾಷ್ಟ್ರದ ಅಭಿವೃದ್ಧಿ, ಅದರ ನಾಗರಿಕರ ಅನುಕೂಲತೆ ಮತ್ತು ಸಮೃದ್ಧಿಯಾಗಿದೆ. ಮೀರತ್ ಮತ್ತು ಪಶ್ಚಿಮ ಯುಪಿಯ ಜನರ ಜೀವನ ಹೇಗೆ ಬದಲಾಗಲಿದೆ ಎಂಬುದನ್ನು ಇಲ್ಲಿ ನೋಡಿ. ಸರೈ ಕಾಲೇ ಖಾನ್, ಆನಂದ್ ವಿಹಾರ್, ಗಾಜಿಯಾಬಾದ್ ಮತ್ತು ಮೀರತ್‌ನಲ್ಲಿ ರೈಲ್ವೆ ನಿಲ್ದಾಣಗಳು, ಮೆಟ್ರೋ ನಿಲ್ದಾಣಗಳು ಮತ್ತು ಬಸ್ ಟರ್ಮಿನಲ್‌ಗಳು ಪರಸ್ಪರ ಸಂಬಂಧ ಹೊಂದಿವೆ. ದೇಶದಲ್ಲಿ ಮೊದಲ ಬಾರಿಗೆ, ನಮೋ ಭಾರತ್ ಮತ್ತು ಮೆಟ್ರೋ ರೈಲು ಒಂದೇ ನಿಲ್ದಾಣದಲ್ಲಿ, ಒಂದೇ ಹಳಿಯಲ್ಲಿ ಚಲಿಸಲಿವೆ. ಇದರರ್ಥ ನೀವು ಒಂದೇ ವೇದಿಕೆಯಿಂದ ನಗರದೊಳಗೆ ಪ್ರಯಾಣಿಸಬಹುದು, ಒಂದೇ ನಿಲ್ದಾಣದಿಂದ ನೀವು ನೇರವಾಗಿ ದೆಹಲಿಗೆ ಹೋಗಬಹುದು. ಮೀರತ್‌ನಿಂದ ಪ್ರತಿದಿನ ಅಧ್ಯಯನ, ಉದ್ಯೋಗಗಳು ಅಥವಾ ಇತರೆ ಕೆಲಸಗಳಿಗಾಗಿ ದೆಹಲಿಗೆ ಪ್ರಯಾಣಿಸುವ ಸಾವಿರಾರು ಜನರು ಇದರ ಪ್ರಯೋಜನ ಪಡೆಯುತ್ತಾರೆ. ದೆಹಲಿಯಲ್ಲಿ ಕೆಲಸ ಮಾಡುವ ಆದರೆ ಮೀರತ್‌ನಲ್ಲಿ ವಾಸಿಸುವವರು ಇನ್ನು ಮುಂದೆ ದೆಹಲಿಯಲ್ಲಿ ಮನೆಗಳನ್ನು ಬಾಡಿಗೆಗೆ ಪಡೆಯಬೇಕಾಗಿಲ್ಲ.

ಸ್ನೇಹಿತರೆ,

ಇಂದು ಬಿಜೆಪಿಯ ಡಬಲ್-ಎಂಜಿನ್ ಸರ್ಕಾರವು ಆಧುನಿಕ ಮೂಲಸೌಕರ್ಯಕ್ಕಾಗಿ ತುಂಬಾ ಹಣ ಖರ್ಚು ಮಾಡುತ್ತಿದೆ, ಇದು ನಿಮ್ಮ ಹಣವನ್ನು ಉಳಿಸುವುದಲ್ಲದೆ ಯುವಕರಿಗೆ ಉದ್ಯೋಗಗಳನ್ನು ಸೃಷ್ಟಿಸುತ್ತದೆ. ಪಶ್ಚಿಮ ಯುಪಿಯಲ್ಲಿ ನೋಡಿ - ಹೊಸ ಎಕ್ಸ್‌ಪ್ರೆಸ್‌ವೇಗಳನ್ನು ನಿರ್ಮಿಸಲಾಗುತ್ತಿದೆ, ಮೀಸಲಾದ ಸರಕು ಕಾರಿಡಾರ್‌ಗಳನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ, ಜೆವಾರ್‌ನಲ್ಲಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಬರುತ್ತಿದೆ. ಈ ಯೋಜನೆಗಳು ನಿರ್ಮಾಣ ಸಮಯದಲ್ಲಿ ಉದ್ಯೋಗ ಒದಗಿಸುತ್ತವೆ, ನಂತರ ಅವು ಹೊಸ ಕೈಗಾರಿಕೆಗಳು, ಹೊಸ ವ್ಯವಹಾರಗಳನ್ನು ತರುತ್ತವೆ, ಅವು ಉದ್ಯೋಗಗಳನ್ನು ಸಹ ಸೃಷ್ಟಿಸುತ್ತದೆ.

ಸ್ನೇಹಿತರೆ,

ಉತ್ತರ ಪ್ರದೇಶದ ಈ ಭೂಮಿ ಕಾರ್ಮಿಕರ ಭೂಮಿ, ಸೃಷ್ಟಿಯ ಭೂಮಿ. ರೈತರು, ಹೈನುಗಾರರು, ಸಣ್ಣ ಉದ್ಯಮಿಗಳು, ನೇಕಾರರು, ಕುಶಲಕರ್ಮಿಗಳು - ಎಲ್ಲರೂ ಪರಂಪರೆ ಮತ್ತು ಅಭಿವೃದ್ಧಿಯ ಮಂತ್ರವನ್ನು ಅರಿತುಕೊಳ್ಳುತ್ತಿದ್ದಾರೆ. ಭಾರತದ ಶಕ್ತಿ ಬೆಳೆದಾಗ, ಉತ್ತರ ಪ್ರದೇಶದ ಈ ಎಲ್ಲಾ ಸ್ನೇಹಿತರು ಪ್ರಯೋಜನ ಪಡೆಯುತ್ತಾರೆ.

ಸ್ನೇಹಿತರೆ,

ಇಂದು ನೀವು ಜಗತ್ತು ಭಾರತದ ಮೇಲೆ ಎಷ್ಟು ನಂಬಿಕೆ ಹೊಂದಿದೆ, ಜನರು ಎಷ್ಟು ಆಶಾವಾದಿಗಳಾಗಿದ್ದಾರೆ ಎಂಬುದನ್ನು ನೋಡಬಹುದು. ಅನೇಕ ಅಭಿವೃದ್ಧಿ ಹೊಂದಿದ ದೇಶಗಳು ಭಾರತದೊಂದಿಗೆ ವ್ಯಾಪಾರ ಒಪ್ಪಂದಗಳಿಗೆ ಸಹಿ ಹಾಕುತ್ತಿವೆ. ಒಂದು ಕಾಲದಲ್ಲಿ ಕಾಂಗ್ರೆಸ್ ಸರ್ಕಾರಗಳು ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳೊಂದಿಗೆ ಒಪ್ಪಂದಗಳನ್ನು ಮಾಡಿಕೊಳ್ಳಲು ಸಾಧ್ಯವಾಗಲಿಲ್ಲ, ಕಾಂಗ್ರೆಸ್ ಸರ್ಕಾರವು ಹಗರಣಗಳಿಂದಲೇ ಕುಖ್ಯಾತಿ ಪಡೆದಿದ್ದರಿಂದ, ಜಗತ್ತು ಅವುಗಳನ್ನು ನಿಭಾಯಿಸಲು ಹಿಂಜರಿಯಿತು. ಆದರೆ ಇಂದು ಅಭಿವೃದ್ಧಿ ಹೊಂದಿದ ದೇಶಗಳು ಭಾರತದೊಂದಿಗೆ ಪಾಲುದಾರಿಕೆ ಮಾಡಿಕೊಳ್ಳಲು ಉತ್ಸುಕವಾಗಿವೆ. ಅವರು ಭಾರತದ ಅಭಿವೃದ್ಧಿಯಲ್ಲಿ ತಮ್ಮ ಭವಿಷ್ಯ ನೋಡುತ್ತಾರೆ, ಅವರು ಭಾರತದ ಯುವ ಶಕ್ತಿಯಲ್ಲಿ ಭರವಸೆ ನೋಡುತ್ತಾರೆ. ಭಾರತವು 21ನೇ ಶತಮಾನದ ಸವಾಲುಗಳಿಗೆ ಪರಿಹಾರಗಳನ್ನು ಒದಗಿಸಬಲ್ಲ ಶಕ್ತಿ ಎಂದು ಇಂದು ಜಗತ್ತು ನಂಬುತ್ತಿದೆ.

ಸ್ನೇಹಿತರೆ,

ಇತ್ತೀಚಿನ ವರ್ಷಗಳಲ್ಲಿ ಬಿಜೆಪಿ ಸರ್ಕಾರ ಮಾಡಿಕೊಂಡ ಒಪ್ಪಂದಗಳು ಸಣ್ಣ ಮತ್ತು ಗುಡಿ ಕೈಗಾರಿಕೆಗಳಿಗೆ ಹೆಚ್ಚಿನ ಪ್ರಯೋಜನ ನೀಡುತ್ತವೆ. ಇದು ಮೀರತ್‌ನ ಕ್ರೀಡಾ ಸಾಮಗ್ರಿ ತಯಾರಕರಿಗೆ, ಮೀರತ್‌ನ ಕತ್ತರಿ, ಖುರ್ಜಾದ ಪಾತ್ರೆಗಳು, ಮೊರಾದಾಬಾದ್‌ನ ಹಿತ್ತಾಳೆ ಪಾತ್ರೆಗಳು, ಬಾಗ್‌ಪತ್‌ನ ಗೃಹೋಪಯೋಗಿ ವಸ್ತುಗಳು, ಸಹರಾನ್‌ಪುರದ ಮರದ ಕೆತ್ತನೆ, ಹಾಗೆಯೇ ಚರ್ಮ, ಜವಳಿ ಮತ್ತು ಆಭರಣಗಳಿಗೆ ಸಂಬಂಧಿಸಿದ ಕೈಗಾರಿಕೆಗಳಿಗೆ ಸಹಾಯ ಮಾಡುತ್ತದೆ. ಈ ಎಲ್ಲಾ ಸಣ್ಣ ಮತ್ತು ಗುಡಿ ಕೈಗಾರಿಕೆಗಳು ಅಪಾರ ಲಾಭ ಗಳಿಸುತ್ತವೆ. ಉತ್ತರ ಪ್ರದೇಶದ ವಿವಿಧ ಜಿಲ್ಲೆಗಳ ಗುರುತು ಹೆಚ್ಚಿಸಲು ಭಾರತದ ಸಣ್ಣ ಮತ್ತು ದೊಡ್ಡ ನಗರಗಳ ಬಲವನ್ನು ಪ್ರಪಂಚದ ಮೂಲೆ ಮೂಲೆಗೆ ಕೊಂಡೊಯ್ಯುವುದು ಬಿಜೆಪಿಯ ಆದ್ಯತೆಯಾಗಿದೆ.

ಸ್ನೇಹಿತರೆ,

ನಮ್ಮ ಮೀರತ್ ಮತ್ತು ಈ ಇಡೀ ಪ್ರದೇಶವು ಸಣ್ಣ ಕೈಗಾರಿಕೆಗಳು ಮತ್ತು ಎಂಎಸ್ಎಂಇಗಳ ಪ್ರಮುಖ ಕೇಂದ್ರಗಳಾಗಿವೆ. ಈ ವರ್ಷದ ಕೇಂದ್ರ ಬಜೆಟ್‌ನಲ್ಲಿ ನಾವು ಸಣ್ಣ ಕೈಗಾರಿಕೆಗಳಿಗೆ 10,000 ಕೋಟಿ ರೂಪಾಯಿ ವಿಶೇಷ ನಿಧಿ  ಘೋಷಿಸಿದ್ದೇವೆ. ಇದು ಉತ್ತರ ಪ್ರದೇಶದ ಎಂಎಸ್ಎಂಇಗಳಿಗೆ ಸಾಲ ಪಡೆಯಲು ಹೆಚ್ಚು ಸುಲಭವಾಗುತ್ತದೆ. ಬಜೆಟ್‌ನಲ್ಲಿ ನಾವು ಜವಳಿ ಉದ್ಯಮ ಮತ್ತು ನೇಕಾರ ಸಮುದಾಯಕ್ಕಾಗಿ ಮಹಾತ್ಮ ಗಾಂಧಿ ಗ್ರಾಮ ಸ್ವರಾಜ್ ಯೋಜನೆ ಘೋಷಿಸಿದ್ದೇವೆ. ಇದು ಖಾದಿ, ಕೈಮಗ್ಗ ಮತ್ತು ಕರಕುಶಲ ವಸ್ತುಗಳು ಜಾಗತಿಕ ಮಾರುಕಟ್ಟೆಗಳನ್ನು ತಲುಪಲು ಸಹಾಯ ಮಾಡುತ್ತದೆ.

ಸ್ನೇಹಿತರೆ,

ಈ ಹಿಂದೆ ಸಣ್ಣ ಕುಶಲಕರ್ಮಿಗಳು ಕೊರಿಯರ್ ಮೂಲಕ 10 ಲಕ್ಷ ರೂಪಾಯಿವರೆಗಿನ ಸರಕುಗಳನ್ನು ಮಾತ್ರ ಕಳುಹಿಸಬಹುದಿತ್ತು. ಈಗ ಈ ಮಿತಿಯನ್ನು ಸಂಪೂರ್ಣವಾಗಿ ತೆಗೆದುಹಾಕಲಾಗಿದೆ. ಇದರರ್ಥ ಮೀರತ್ ಮತ್ತು ಉತ್ತರಪ್ರದೇಶದಾದ್ಯಂತದ ನೇಕಾರರು ಮತ್ತು ಸಣ್ಣ ಉದ್ಯಮಿಗಳು ತಮ್ಮ ಉತ್ಪನ್ನಗಳನ್ನು ಅಮೆರಿಕ ಅಥವಾ ಯುರೋಪ್‌ನಲ್ಲಿರುವ ಗ್ರಾಹಕರಿಗೆ ಆನ್‌ಲೈನ್ ಅಪ್ಲಿಕೇಶನ್‌ಗಳ ಮೂಲಕ ಸುಲಭವಾಗಿ ಕಳುಹಿಸಬಹುದು.

ಸ್ನೇಹಿತರೆ,

ಮೀರತ್-ಹಾಪುರ್ ಪ್ರದೇಶ ಮತ್ತು ಸುತ್ತಮುತ್ತಲ ಪ್ರದೇಶಗಳು ಚೌಧರಿ ಚರಣ್ ಸಿಂಗ್ ಜಿ ಅವರ ದೃಷ್ಟಿಕೋನವನ್ನು ಮೊದಲಿನಿಂದಲೂ ಕಂಡಿವೆ. ಚೌಧರಿ ಚರಣ್ ಸಿಂಗ್ ಜಿ ಅವರಿಗೆ ಭಾರತ ರತ್ನ ನೀಡುವುದು ನಮ್ಮ ಸರ್ಕಾರದ ಅದೃಷ್ಟ. ಬಿಜೆಪಿಯ ಡಬಲ್-ಎಂಜಿನ್ ಸರ್ಕಾರವು ಅವರ ದೃಷ್ಟಿಕೋನ ಅನುಸರಿಸಿ ರೈತರ ಆದಾಯ ಹೆಚ್ಚಿಸಲು ನಿರಂತರವಾಗಿ ಕೆಲಸ ಮಾಡುತ್ತಿದೆ. ಇದಕ್ಕಾಗಿ, ಆಹಾರ ಸಂಸ್ಕರಣೆಗೆ ಬಲವಾದ ಒತ್ತು ನೀಡಲಾಗುತ್ತಿದೆ. ಪಿಎಂ-ಕಿಸಾನ್ ಸಮ್ಮಾನ್ ನಿಧಿ ಸಣ್ಣ ರೈತರಿಗೆ ಸಹ ಬಹಳ ಉಪಯುಕ್ತವೆಂದು ಸಾಬೀತಾಗಿದೆ. ಇಲ್ಲಿಯವರೆಗೆ ಉತ್ತರಪ್ರದೇಶದ ರೈತರು ಪಿಎಂ-ಕಿಸಾನ್ ಸಮ್ಮಾನ್ ನಿಧಿಯಡಿ ಸುಮಾರು 95,000 ಕೋಟಿ ರೂಪಾಯಿ ಪಡೆದಿದ್ದಾರೆ. ಮೀರತ್‌ನ ರೈತರು ಮಾತ್ರ ಸುಮಾರು 800 ಕೋಟಿ ರೂಪಾಯಿ ಪಡೆದಿದ್ದಾರೆ.

ಸಹೋದರರೆ,

ಒಂದೆಡೆ ನಾಗರಿಕರು ಭಾರತವನ್ನು ಅಭಿವೃದ್ಧಿಪಡಿಸಲು ಹಗಲಿರುಳು ಶ್ರಮಿಸುತ್ತಿದ್ದಾರೆ. ಆದರೆ ಭಾರತದ ಯಶಸ್ಸನ್ನು ಜೀರ್ಣಿಸಿಕೊಳ್ಳಲು ಸಾಧ್ಯವಾಗದ ಕೆಲವು ರಾಜಕೀಯ ಪಕ್ಷಗಳು ದೇಶದಲ್ಲಿವೆ. ನೀವು ಈಗಷ್ಟೇ ನೋಡಿದ್ದೀರಿ, ವಿಶ್ವದ ಅತಿದೊಡ್ಡ ಎಐ ಸಮ್ಮೇಳನ ಭಾರತದಲ್ಲಿ ನಡೆಯಿತು. 80ಕ್ಕೂ ಹೆಚ್ಚು ದೇಶಗಳ ಪ್ರತಿನಿಧಿಗಳು ದೆಹಲಿಗೆ ಬಂದರು. ಸುಮಾರು 20 ದೇಶಗಳ ರಾಷ್ಟ್ರಗಳ ಮುಖ್ಯಸ್ಥರು ಭಾರತಕ್ಕೆ ಬಂದರು. ದೇಶಾದ್ಯಂತ ಲಕ್ಷಾಂತರ ಜನರು ದೆಹಲಿಯಲ್ಲಿ ಜಮಾಯಿಸಿದರು. ಇಂತಹ ಸಮ್ಮೇಳನವನ್ನು ಈ ಹಿಂದೆ ಯಾವುದೇ ಅಭಿವೃದ್ಧಿಶೀಲ ರಾಷ್ಟ್ರದಲ್ಲಿ ನಡೆಸಲಾಗಿಲ್ಲ. ಮೀರತ್‌ನ ಜನರನ್ನು ನಾನು ಕೇಳಲು ಬಯಸುತ್ತೇನೆ - ಈ ಎಐ ಸಮ್ಮೇಳನದ ಬಗ್ಗೆ ನಿಮಗೆ ಹೆಮ್ಮೆ ಅನಿಸಿದೆಯೇ ಅಥವಾ ಇಲ್ಲವೇ? ಪೂರ್ಣ ಶಕ್ತಿಯಿಂದ ಹೇಳಿ - ನಿಮಗೆ ಹೆಮ್ಮೆ ಅನಿಸಿದೆಯೇ ಅಥವಾ ಇಲ್ಲವೇ? ನಿಮ್ಮ ತಲೆ ಎತ್ತಿದೆಯೇ ಅಥವಾ ಇಲ್ಲವೇ? ನಿಮ್ಮ ಎದೆ ಹೆಮ್ಮೆಯಿಂದ ಉಬ್ಬಿದೆಯೇ ಅಥವಾ ಇಲ್ಲವೇ? ಇದನ್ನು ಭಾರತಕ್ಕಾಗಿ ಮಾಡಲಾಗಿದೆಯೇ ಅಥವಾ ಇಲ್ಲವೇ? ಇದನ್ನು ಭಾರತದ ಯುವಕರಿಗಾಗಿ ಮಾಡಲಾಗಿದೆಯೇ ಅಥವಾ ಇಲ್ಲವೇ? ಇದನ್ನು ಭಾರತದ ಭವಿಷ್ಯ ಬದಲಾಯಿಸಲು ಮಾಡಲಾಗಿದೆಯೇ ಅಥವಾ ಇಲ್ಲವೇ? 21ನೇ ಶತಮಾನದಲ್ಲಿ ನಾಯಕತ್ವ ಪಡೆಯಲು ಇದನ್ನು ಮಾಡಲಾಗಿದೆಯೇ ಅಥವಾ ಇಲ್ಲವೇ? ಇಡೀ ದೇಶವು ಹೆಮ್ಮೆಯಿಂದ ಬೀಗಿತು, ಆದರೆ ಕಾಂಗ್ರೆಸ್ ಮತ್ತು ಅದರ ಮಿತ್ರ ಪಕ್ಷಗಳು ಏನು ಮಾಡಿವೆ?

ಸ್ನೇಹಿತರೆ,

ಕಾಂಗ್ರೆಸ್ ಭಾರತದ ಜಾಗತಿಕ ಕಾರ್ಯಕ್ರಮವನ್ನು ತನ್ನ ಕೊಳಕು ಮತ್ತು ನಾಚಿಕೆಯಿಲ್ಲದ ರಾಜಕೀಯದ ಅಖಾಡವನ್ನಾಗಿ ಪರಿವರ್ತಿಸಿತು. ಸ್ಥಳದಲ್ಲಿದ್ದ ವಿದೇಶಿ ಅತಿಥಿಗಳ ಸಮ್ಮುಖದಲ್ಲಿ ಕಾಂಗ್ರೆಸ್ ನಾಯಕರು ತಮ್ಮ ಬಟ್ಟೆಗಳನ್ನು ಬಿಚ್ಚಿ ಬಂದರು. ನಾನು ಕಾಂಗ್ರೆಸ್ ಜನರನ್ನು ಕೇಳುತ್ತೇನೆ - ನೀವು ರಾಜಕೀಯವಾಗಿ ಬೆತ್ತಲೆಯಾಗಿದ್ದೀರಿ ಎಂಬುದು ಎಲ್ಲರಿಗೂ ಈಗಾಗಲೇ ತಿಳಿದಿದೆ, ಹಾಗಿದ್ದರೂ ನೀವು ಬಟ್ಟೆಗಳನ್ನು ಬಿಚ್ಚುವ ಅಗತ್ಯವೇನಿತ್ತು? ಅಲ್ಲಿ ಕಾಂಗ್ರೆಸ್ ನಾಯಕರು ಏನು ಮಾಡಿದರು ಎಂಬುದು ದೇಶದ ಅತ್ಯಂತ ಹಳೆಯ ಪಕ್ಷವು ಸೈದ್ಧಾಂತಿಕವಾಗಿ ದಿವಾಳಿಯಾಗಿದೆ ಮತ್ತು ಬಡತನದಲ್ಲಿದೆ ಎಂಬುದನ್ನು ತೋರಿಸುತ್ತದೆ.

ಸ್ನೇಹಿತರೆ,

ಇದನ್ನು ಯಾರೂ ಊಹಿಸಲು ಸಾಧ್ಯವಿಲ್ಲ. ಒಂದು ಹಳ್ಳಿಯಲ್ಲಿ ಮದುವೆ ನಡೆದಾಗ ಇಡೀ ಗ್ರಾಮವು ಅದನ್ನು ಯಶಸ್ವಿಗೊಳಿಸಲು ಪೂರ್ಣ ಹೃದಯದಿಂದ ಒಟ್ಟುಗೂಡುವ ಜನರು ನಾವು, ಇದರಿಂದ ಅತಿಥಿಗಳು ಹಳ್ಳಿಯ ಬಗ್ಗೆ ಉತ್ತಮ ಅನಿಸಿಕೆಯೊಂದಿಗೆ ಹೊರಡುತ್ತಾರೆ. ಆದರೆ ಕಾಂಗ್ರೆಸ್ ತನ್ನದೇ ಆದ ದೇಶವನ್ನು ಕೆಣಕುವಲ್ಲಿ ನಿರತವಾಗಿದೆ.

ಸ್ನೇಹಿತರೆ,

ಕಾಂಗ್ರೆಸ್ ನಾಯಕರು ಮೋದಿಯನ್ನು ದ್ವೇಷಿಸುತ್ತಾರೆ. ಅವರು ನನ್ನ ಸಮಾಧಿ ಅಗೆಯಲು ಬಯಸುತ್ತಾರೆ, ನನ್ನ ತಾಯಿಯನ್ನು ಅವಮಾನಿಸಲು ಅವರಿಗೆ ಯಾವುದೇ ಹಿಂಜರಿಕೆಯಿಲ್ಲ, ಅವರು ಬಿಜೆಪಿಯನ್ನು ವಿರೋಧಿಸುತ್ತಾರೆ, ಅವರು ಎನ್‌ಡಿಎ ವಿರೋಧಿಸುತ್ತಾರೆ. ಸರಿ, ಅದು ಅವರ ರಾಜಕೀಯಕ್ಕೆ ಅಗತ್ಯವಿದ್ದರೆ, ನಾವು ಅದನ್ನು ಅರ್ಥ ಮಾಡಿಕೊಳ್ಳಬಹುದು ಮತ್ತು ಸಹಿಸಿಕೊಳ್ಳಬಹುದು. ಆದರೆ ಎಐ ಜಾಗತಿಕ ಶೃಂಗಸಭೆಯು ಬಿಜೆಪಿ ಕಾರ್ಯಕ್ರಮವಲ್ಲ ಮತ್ತು ಯಾವುದೇ ಬಿಜೆಪಿ ನಾಯಕರು ಅಲ್ಲಿ ಹಾಜರಿರಲಿಲ್ಲ ಎಂಬುದನ್ನು ಕಾಂಗ್ರೆಸ್ ನೆನಪಿನಲ್ಲಿಟ್ಟುಕೊಳ್ಳಬೇಕಿತ್ತು. ಇದು ಜನರ ಬೆವರಿನ ಮೇಲೆ ನಿರ್ಮಿಸಲಾದ ರಾಷ್ಟ್ರೀಯ ಕಾರ್ಯಕ್ರಮವಾಗಿತ್ತು, ರಾಷ್ಟ್ರೀಯ ಹೆಮ್ಮೆಯ ವಿಷಯವಾಗಿತ್ತು. ಆದರೂ ಕಾಂಗ್ರೆಸ್ ಸಭ್ಯತೆಯ ಎಲ್ಲಾ ಮಿತಿಗಳನ್ನು ಮುರಿದಿದೆ. ಇಡೀ ದೇಶವು ಕಾಂಗ್ರೆಸ್‌ ನಡವಳಿಕೆಯನ್ನು ಖಂಡಿಸುತ್ತಿದೆ. ಆದರೆ ದುರದೃಷ್ಟವಶಾತ್, ನಾಚಿಕೆಪಡುವ ಬದಲು, ಅಂತಹ ಹಳೆಯ ಪಕ್ಷದ ನಾಯಕರು ರಾಷ್ಟ್ರವನ್ನು ಅವಮಾನಿಸಿದವರನ್ನು ನಾಚಿಕೆಯಿಲ್ಲದೆ ಹುರಿದುಂಬಿಸುತ್ತಿದ್ದಾರೆ. ಕಾಂಗ್ರೆಸ್‌ನ ಈ ನಡವಳಿಕೆ ನಿರಂತರವಾಗಿದೆ. ಅವರು ಸಂಸತ್ತಿನಲ್ಲಿ ಏನು ಮಾಡಿದರು ಎಂಬುದನ್ನು ನೋಡಿ - ತಮ್ಮನ್ನು ತಾವು ನಿರ್ವಹಿಸಲು ಸಾಧ್ಯವಾಗದೆ, ಅವರು ತಮ್ಮ ಮಿತ್ರರನ್ನು ಮಾತನಾಡಲು ಬಿಡುವುದಿಲ್ಲ, ಅವರು ಸಂಸತ್ತನ್ನು ಕಾರ್ಯ ನಿರ್ವಹಿಸಲು ಬಿಡುವುದಿಲ್ಲ. ದೊಡ್ಡ ನಷ್ಟವೆಂದರೆ ಕಾಂಗ್ರೆಸ್‌ನ ಮಿತ್ರಪಕ್ಷಗಳು. ಅವರು ಈಗ ಇದನ್ನು ಅರ್ಥ ಮಾಡಿಕೊಂಡಿದ್ದಾರೆ. ದೆಹಲಿಯಲ್ಲಿ ಕಾಂಗ್ರೆಸ್ ಪ್ರದರ್ಶಿಸಿದ ನಾಚಿಕೆಗೇಡು ವರ್ತನೆ ಅದರ ಎಲ್ಲಾ ಮಿತ್ರಪಕ್ಷಗಳನ್ನು ಆಘಾತಗೊಳಿಸಿದೆ, ಅವರು ಈಗ ಕಾಂಗ್ರೆಸ್ ಅನ್ನು ದೂರವಿಟ್ಟಿದ್ದಾರೆ.

ನಾನು ದೇಶದ ಮಾಧ್ಯಮಗಳಿಗೂ ವಿನಮ್ರ ಮನವಿ ಮಾಡುತ್ತೇನೆ. ಮಾಧ್ಯಮದಿಂದ ಎಲ್ಲವನ್ನೂ ಸಹಿಸಿಕೊಳ್ಳುವ ಶಕ್ತಿಯನ್ನು ನನಗೆ ನೀಡಬೇಕೆಂದು ನಾನು ದೇವರಲ್ಲಿ ಪ್ರಾರ್ಥಿಸುತ್ತೇನೆ. ಆದರೆ ಇಂದು ನಾನು ಅವರಿಗೆ ಮನವಿ ಮಾಡುತ್ತೇನೆ - ನಾವು ಅಂತಹ ಕ್ರಮಗಳನ್ನು ಟೀಕಿಸಿದಾಗ, ದಯವಿಟ್ಟು "ಮೋದಿ ವಿರೋಧ ಪಕ್ಷಗಳಿಗೆ ಹೊಡೆದರು" ಎಂಬಂತಹ ಸುದ್ದಿ ಮಾಡಬೇಡಿ. ಕಾಂಗ್ರೆಸ್ ರಕ್ಷಿಸಲು ಈ ತಂತ್ರಗಳನ್ನು ನಿಲ್ಲಿಸಿ. ಇದನ್ನು "ವಿರೋಧ" ಎಂದು ಕರೆಯುವ ಮೂಲಕ, ನೀವು ಕಾಂಗ್ರೆಸ್ ಅನ್ನು ಉಳಿಸುತ್ತೀರಿ, ಆದರೆ ಇತರೆ ವಿರೋಧ ಪಕ್ಷಗಳು ಬಳಲುತ್ತಿವೆ. ಕಾಂಗ್ರೆಸ್ ಪಾಪ ಮಾಡುತ್ತದೆ, ಆದರೆ ಇತರರು ಬೆಲೆ ತೆರುತ್ತಾರೆ. ಕಾಂಗ್ರೆಸ್‌ನ ಪರಿಸರ ವ್ಯವಸ್ಥೆ ಯಾವಾಗಲೂ ಈ ಆಟವನ್ನು ಆಡುತ್ತದೆ - ಕಾಂಗ್ರೆಸ್ ಪಾಪ ಮಾಡುತ್ತದೆ, ಟೀಕೆ ಕಾಂಗ್ರೆಸ್ ವಿರುದ್ಧ, ಕೋಪ ಕಾಂಗ್ರೆಸ್ ವಿರುದ್ಧ, ಆದರೆ ಮಾಧ್ಯಮಗಳಲ್ಲಿ "ವಿರೋಧ" ಎಂಬ ಪದ ಮಾತ್ರ ಕಾಣಿಸಿಕೊಳ್ಳುತ್ತದೆ, ಕಾಂಗ್ರೆಸ್ ಅಲ್ಲ. ನೀವು ಕಾಂಗ್ರೆಸ್ ಅನ್ನು ಏಕೆ ರಕ್ಷಿಸುತ್ತಿದ್ದೀರಿ? ಹೀಗೆ ಮಾಡುವುದರಿಂದ, ನೀವು ಕಾಂಗ್ರೆಸ್ ಅನ್ನು ಉಳಿಸುವುದಿಲ್ಲ ಅಥವಾ ಅದನ್ನು ಸುಧಾರಿಸುವಂತೆ ಒತ್ತಾಯಿಸುವುದಿಲ್ಲ. ಅದು ಕಾಂಗ್ರೆಸ್‌ನ ತಪ್ಪು ಎಂದು ನೀವು ಸ್ಪಷ್ಟವಾಗಿ ಬರೆಯಲು ಪ್ರಾರಂಭಿಸಿದರೆ, ವ್ಯತ್ಯಾಸ ನೋಡಿ. ದೆಹಲಿಯಲ್ಲಿ ಟಿಎಂಸಿ ಯಾವುದೇ ಪಾಪ ಮಾಡಿದೆಯೇ? ಇಲ್ಲ. ಡಿಎಂಕೆ ಯಾವುದೇ ಪಾಪ ಮಾಡಿದೆಯೇ? ಇಲ್ಲ. ಬಿಎಸ್‌ಪಿ ಯಾವುದೇ ಪಾಪ ಮಾಡಿದೆಯೇ? ಇಲ್ಲ. ಫಾರೂಕ್ ಅಬ್ದುಲ್ಲಾ ಅವರ ಪಕ್ಷ ಯಾವುದೇ ಪಾಪ ಮಾಡಿದೆಯೇ? ಇಲ್ಲ. ಅಜಾಗರೂಕ ಕಾಂಗ್ರೆಸ್ ನಾಯಕರು ಮಾತ್ರ ರಾಷ್ಟ್ರವನ್ನು ನಾಶ ಮಾಡಲು ಹಠಮಾರಿ ಆಗಿದ್ದಾರೆ. ನೀವು ಪ್ರಧಾನ ಮಂತ್ರಿ ಕುರ್ಚಿಯಲ್ಲಿ ಕುಳಿತುಕೊಳ್ಳಲು ಬಯಸಿದರೆ, ಮೊದಲು ನೀವು ಜನರ ಹೃದಯಗಳನ್ನು ಗೆಲ್ಲಬೇಕು. ಮಹಿಳಾ ಸಂಸದರನ್ನು ಬಲವಂತವಾಗಿ ಸ್ಥಾನಗಳನ್ನು ಆಕ್ರಮಿಸಿಕೊಳ್ಳಲು ಕಳುಹಿಸುವ ಮೂಲಕ, ನೀವು ಪ್ರಧಾನಿಯಾಗಲು ಸಾಧ್ಯವಿಲ್ಲ. ತಾಯಂದಿರು ಮತ್ತು ಸಹೋದರಿಯರನ್ನು ಈ ರೀತಿ ಮುಂದಕ್ಕೆ ತಳ್ಳಲು ನೀವು ಏಕೆ ಒತ್ತಾಯಿಸುತ್ತೀರಿ? ನೀವು ತುಂಬಾ ಟೊಳ್ಳಾಗಿದ್ದೀರಾ?

ಸ್ನೇಹಿತರೆ,

ಕಾಂಗ್ರೆಸ್ ರಾಷ್ಟ್ರಕ್ಕೆ ಹೊರೆಯಾಗಿದೆ. ದೆಹಲಿಯಲ್ಲಿ ನಡೆದ ಘಟನೆಯ ನಂತರ, ಕಾಂಗ್ರೆಸ್‌ನ ಎಲ್ಲಾ ಮಿತ್ರಪಕ್ಷಗಳು ಕಾಂಗ್ರೆಸ್ ಅನ್ನು ಬಲವಾಗಿ ಟೀಕಿಸುವ ಧೈರ್ಯ ಹೊಂದಿದ್ದವು ಎಂಬುದಿರಂದ ನನಗೆ ತೃಪ್ತಿ ಇದೆ. ಸತ್ಯದ ಪರವಾಗಿ ಮತ್ತು ರಾಷ್ಟ್ರದ ಹೆಮ್ಮೆಯೊಂದಿಗೆ ನಿಂತಿದ್ದಕ್ಕಾಗಿ ಈ ವಿಪಕ್ಷಗಳ ಮಿತ್ರರಿಗೆ ನಾನು ಸಾರ್ವಜನಿಕವಾಗಿ ಧನ್ಯವಾದ ಹೇಳುತ್ತೇನೆ.

ಸ್ನೇಹಿತರೆ,

ಬಿಜೆಪಿ ಸರ್ಕಾರಕ್ಕೆ ರಾಷ್ಟ್ರ ಮತ್ತು ಉತ್ತರ ಪ್ರದೇಶದ ಅಭಿವೃದ್ಧಿ ಅತ್ಯಂತ ಮುಖ್ಯ. ಆದರೆ ನೆನಪಿಡಿ, 10 ವರ್ಷಗಳ ಹಿಂದೆ ಯುಪಿ ಯಾವುದಕ್ಕೆ ಹೆಸರುವಾಸಿಯಾಗಿತ್ತು? ಎಲ್ಲರೂ ಮೀರತ್‌ನಲ್ಲಿ ಗಲಭೆಗಳು, ಪಶ್ಚಿಮ ಯುಪಿಯಲ್ಲಿ ಅಪರಾಧಿಗಳ ಗುಂಪುಗಳು, ಕೆಟ್ಟ ರಸ್ತೆಗಳು, ವಿದ್ಯುತ್ ಕಡಿತ ಮತ್ತು ಹಿಂದುಳಿದಿರುವ ಬಗ್ಗೆ ಜನರು ಮಾತನಾಡುತ್ತಿದ್ದರು. ಪಶ್ಚಿಮ ಯುಪಿಯ ಅಪರಾಧದ ಬಗ್ಗೆ ಚಲನಚಿತ್ರಗಳನ್ನು ನಿರ್ಮಿಸಲಾಯಿತು. ಎಸ್‌ಪಿ ಸರ್ಕಾರವು ಯುಪಿಯನ್ನು ಈ ಮಟ್ಟಕ್ಕೆ ಇಳಿಸಿತ್ತು. ಆದರೆ ಇಂದು ಯುಪಿ ಅಭಿವೃದ್ಧಿಗೆ ಹೆಸರುವಾಸಿಯಾಗಿದೆ. ಇಂದು ನಮ್ಮ ಯುಪಿ ಬ್ರಹ್ಮೋಸ್‌ಗೆ, ಮೊಬೈಲ್ ಫೋನ್ ಉತ್ಪಾದನೆಗೆ, ವಿಮಾನ ನಿಲ್ದಾಣಗಳಿಗೆ, ಪ್ರವಾಸಿ ಸೌಲಭ್ಯಗಳನ್ನು ಹೆಚ್ಚಿಸುವುದಕ್ಕೆ ಹೆಸರುವಾಸಿಯಾಗಿದೆ. ಯುಪಿ ಕ್ರೀಡಾ ಪರಿಸರ ವ್ಯವಸ್ಥೆಯಲ್ಲೂ ತನ್ನ ಗುರುತು ಸ್ಥಾಪಿಸುತ್ತಿದೆ. ಮೀರತ್‌ನಲ್ಲಿ ಕ್ರೀಡಾ ವಿಶ್ವವಿದ್ಯಾಲಯದ ಕೆಲಸ ವೇಗವಾಗಿ ಪ್ರಗತಿಯಲ್ಲಿದೆ.

ಸ್ನೇಹಿತರೆ,

ಎಸ್‌ಪಿ ಆಳ್ವಿಕೆಯಲ್ಲಿ ಅಪರಾಧಿಗಳು ನಿರ್ಭಯವಾಗಿ ಸುತ್ತಾಡುತ್ತಿದ್ದರು. ಇಂದು ಯೋಗಿ ಜಿ ಅವರ ಸರ್ಕಾರದಲ್ಲಿ, ಅವರು ಜೈಲಿನಲ್ಲಿ ತಮ್ಮ ದಿನಗಳನ್ನು ಕಳೆಯುತ್ತಿದ್ದಾರೆ. ಕಾಲೇಜುಗಳಿಂದ ಹೊರಬರುವ ನಮ್ಮ ಹೆಣ್ಣು ಮಕ್ಕಳನ್ನು ಅವಮಾನಿಸಲು ಯಾರೂ ಧೈರ್ಯ ಮಾಡುವುದಿಲ್ಲ.

ಸ್ನೇಹಿತರೆ,

ಕಾನೂನು ಮತ್ತು ಸುವ್ಯವಸ್ಥೆ ಸುಧಾರಿಸಿದಾಗ ವ್ಯಾಪಾರ, ವ್ಯವಹಾರದ ವಾತಾವರಣ ಸೃಷ್ಟಿಯಾಗುತ್ತದೆ. ಅದಕ್ಕಾಗಿಯೇ ಇಂದು ಯುಪಿಯ ಆರ್ಥಿಕತೆಯು ಅಗಾಧವಾದ ಬೆಳವಣಿಗೆ ಕಾಣುತ್ತಿದೆ. ಯೋಗಿ ಜಿ ನಾಯಕತ್ವದಲ್ಲಿ ಯುಪಿ ದೇಶದ ಪ್ರಮುಖ ಉತ್ಪಾದನಾ ಕೇಂದ್ರವಾಗುತ್ತಿದೆ. ನಿನ್ನೆಯಷ್ಟೇ ಯುಪಿಯ ಮೊದಲ ಸೆಮಿಕಂಡಕ್ಟರ್ ಕಾರ್ಖಾನೆ ನಿರ್ಮಾಣಕ್ಕೆ ಶಂಕುಸ್ಥಾಪನೆ ನೆರವೇರಿಸುವ ಅವಕಾಶ ನನಗೆ ಸಿಕ್ಕಿತು. ಈ ಕಾರ್ಖಾನೆಯೊಂದಿಗೆ, ಯುಪಿಯ ಬಲವು ಇನ್ನಷ್ಟು ಹೆಚ್ಚಾಗುತ್ತದೆ. ಇದು ಹೊಸ ಹೂಡಿಕೆಗಳು ಮತ್ತು ಹೊಸ ಉದ್ಯೋಗಗಳಿಗೆ ಅಸಾಧಾರಣ ಅವಕಾಶಗಳನ್ನು ಸೃಷ್ಟಿಸುತ್ತದೆ. ಬಿಜೆಪಿಯ ಡಬಲ್-ಎಂಜಿನ್ ಸರ್ಕಾರವು ಯುಪಿಯನ್ನು ದೇಶದ ಅತಿದೊಡ್ಡ ಆರ್ಥಿಕತೆಯನ್ನಾಗಿ ಮಾಡಲು ಕೆಲಸ ಮಾಡುವುದನ್ನು ಮುಂದುವರಿಸುತ್ತದೆ ಎಂದು ನಾನು ನಿಮಗೆ ಭರವಸೆ ನೀಡುತ್ತೇನೆ. ಯುಪಿ ಅಭಿವೃದ್ಧಿ ಹೊಂದಿದಾಗ ಮಾತ್ರ ಭಾರತ ಅಭಿವೃದ್ಧಿ ಹೊಂದುತ್ತದೆ. ಮತ್ತೊಮ್ಮೆ, ನಮೋ ಭಾರತ್ ರೈಲು ಮತ್ತು ಮೆಟ್ರೋ ಯೋಜನೆಗಾಗಿ ನಿಮ್ಮೆಲ್ಲರಿಗೂ ನನ್ನ ಹೃತ್ಪೂರ್ವಕ ಅಭಿನಂದನೆಗಳನ್ನು ಸಲ್ಲಿಸುತ್ತೇನೆ. ನಾವು ವಂದೇ ಮಾತರಂನ 150 ವರ್ಷಗಳನ್ನು ಆಚರಿಸುತ್ತಿದ್ದೇವೆ. ಹಾಗಾಗಿ, ನನ್ನೊಂದಿಗೆ ಹೇಳಿ ...

ವಂದೇ ಮಾತರಂ!

ವಂದೇ ಮಾತರಂ!

ವಂದೇ ಮಾತರಂ!

ವಂದೇ ಮಾತರಂ!

ವಂದೇ ಮಾತರಂ!

ವಂದೇ ಮಾತರಂ!

ವಂದೇ ಮಾತರಂ!

ವಂದೇ ಮಾತರಂ!

ವಂದೇ ಮಾತರಂ!

ವಂದೇ ಮಾತರಂ!

ವಂದೇ ಮಾತರಂ!

ವಂದೇ ಮಾತರಂ!

*****