ভারত মাতা কী জয়।                                                                

ভারত মাতা কী জয়।                                                                

ভারত মাতা কী জয়।       

উত্তর প্রদেস প্রদেসকী চীফ মিনিষ্টর য়োগী অদিত্যনাথ জি, কেন্দ্রগী মন্ত্রীমন্দলগী ঐগী মরুপশিং পঙ্কজ চৌধুরি জি অমসুং জয়ান্ত চৌধুরি জি, উত্তর প্রদেসগী দিপুতি চীফ মিনিষ্টর ব্রজেস পাথক জি, উত্তর প্রদেস সরকারগী মন্ত্রীশিং, সংসদকী ঐগী মরুপশিং, লেজিসলেচরশিং অমসুং মফম অসিদা মশিং য়াম্না ফম্লিবা ঐগী নুংশিরবা ইনাওশিং অমসুং ইচলশিং!

বাবা অঘরনাথকী শেংলবা লমদম অসিদা, মেরুতকী য়াওল ইহৌগী লৈবাক-লৈহাও অসিদা, বিকসিত উত্তর প্রদেস অমসুং বিকসিত ভারত অমগী মঙলান্দা ঙসি অনৌবা থৌনা অমা হাপ্লে। অহানবা ওইনা, চপ মান্নবা ফম্বাক্তগী, নোংমদা নমো ভারত রেপিদ রেল অমসুং মেত্রো সর্বিস শঙ্গারে। বিকসিত ভারত অমদা চৎথোক-চৎশিনগী থবক করিনো হায়বগী ফজরবা শক্তম অমা প্রোজেক অসিনা উৎলে। পুনশিল্লবা থবক অসিনা সহর অমদগী অমদা চৎনবা মেত্রো শীজিন্নগনি অমসুং নমো ভারত ত্রেনশিংনা “ত্বিন সিতিস’ গী পান্দম য়াংখৎহনগনি। উত্তর প্রদেস মসিগী মাইপাকপা অসি পুরকপদা ঐ অপেনবা ফাওই।

ইনাওশিং অমসুং ইচলশিং,

ঙসিগী থৌরম অসিদা বি.জে.পিগী দবল-ইঞ্জিন সরকারগী থবক তৌবগী চৎনবীগী মমি তারে। ঐখোয়গী থবক শুববগী চৎনবী অসি করিনো? দবল ইঞ্জিন সরকারগী থবক শুবগী চৎনবী অমা ওইনা প্রোজেকশিং মখা তানা পন্থহন্দ্রে। ঐখোয়গী থবক শুবগী চৎনবী মতুংইন্না থবক অমগী উরেপ-উয়ুং হেক তমখিবগা, মদু মপুংফানা লোইশিন্নবা নুংথিল অমসুং নুমিদাং অমতা ওইখি, মরম অদুনা হৌজিক প্রোজেকশিং মমাংঙৈগুম্না পন্দুনা লৈত্রিবনি। নমো ভারত অমসুং মেত্রো সর্বিস মমাঙদা ঐনা উরেপ-উয়ুং তমখিবনি অমসুং ঙসি ঐনা মখোয় লৈবাক মীয়ামদা কৎথোকপগী খুদোংচাবা ফংলে। ঐখোয়গী সরকারনা উরেপ-উয়ুং তমখিবা প্রোজেকশিং ঐখোয়গী সরকারনা লোইশিল্লে, ইশানা উরেপ-উয়ুং তম্লে অমসুং শঙ্গারে।

মরুপশিং,

ঙাইহাক্কী মমাঙদা, ঐ মেরুত মেত্রো তোংখ্রে। খোঙচৎ অদুদা ঐনা মহৈরোয়শিং অমসুং পেসেঞ্জর কয়াগা ৱারি শানখি। অসিগুম্বা অঙকপা খুদোংচাবা অমা মখোয়না কৈদৌঙৈদা ৱাখলদা খনখিদে হায়না মখোয়না ফোঙদোকখি। মখোয়না মমাংঙৈগী মতমশিং নিংশিংখি অমসুং মরুওইনা নুপীশিং অমসুং ইচানুপীশিংনা ঐঙোন্দা হায়খি মদুদি চহি খরগী মমাঙদা নুমিদাং ওইরকপগা, লম্বী পুম্নমক পুমচিক চিকখি অমসুং অকিবনা থনখি। হৌজিক লো অমসুং ওর্দর ফগৎলে অমসুং মীয়াম অশোই-অঙাম থোক্ত্রে অমসুং চৎথোক-চৎশিন নুংঙাইরে।

মরুপশিং,

নমো ভারত রেপিদ রেলনা নুপীশিংগী ফিবম ফগৎহনবগী খুদম অমা ওইরকপদা ঐ হরাওই। থবক অসিদা ত্রেন ওপরেতরশিং, ষ্টেসন কন্ত্রোল ষ্টাফ অমসুং অতোপ্পা থৌদাং কয়া ঐখোয়গী ইচানুপীশিংনা লৌরি। লৈবাক অসিগী অহানবা নমো ভারত রেপিদ রেল সর্বিস অমসুং মেরুত মেত্রোগীদমক উত্তর প্রদেস অমসুং দিল্লিগী মীয়ামদা ঐনা হরাওবা ফোংদোকচরি।

মরুপশিং,

ঐগা মেরুতকা অখন্নবা মরী অমা লৈনরি। ২০১৪, ২০১৯ অমসুং ২০২৪ দা ঐগী মীখলগী কেম্পেনশিং লমদম অসিদগী হৌখি। মেরুতকী মীয়াম, লমদম অসিগী লৌমীশিং, খুৎহৈবশিং অমসুং ওন্ত্রেপ্রেন্যুরশিং, দুকান ফম্বা মীওইশিংনা মতম পুম্নমক্ত ঐঙোন্দা থৌজাল পীখি।

মরুপশিং,

মতম অদুদা, চাউখৎ-থৌরাংগী মতাংদা ঐখোয়গা লাম্বা তৌন্নবা মখোয়গী হু চেনবা রাজনিতিগী থবকশিং থাদোক্নবা ঐনা কংগ্রেস অমসুং এস.পি-বি.এস.পিদা হায়খি।

মরুপশিং,

হায়রিবা দলশিং অসিনা মখোয়গী হু চেনবা রাজনিতি অদু হোংখিদে, অদুবু বি.জে.পিনা মসিগী থৌশিলশিং, মসিগী থবকশিং অমসুং মসিগী ৱাখল্লোন্দা চাউখৎ-থৌরাংনা মরুওইনা লৌখি। মেরুত মেত্রো অসি মদুগী খুদম অমনি।

মরুপশিং,

২০১৪ গী মমাঙদা ভারত্ত সহর ৫ খক্তদা মেত্রো সর্বিস লৈখি। অদুবু ঙসিদি বি.জে.পি সরকারগী মখাদা হৌজিক সহর ২৫ হেনবদা মেত্রোশিং চেল্লে, মালেমদা ভারত অহুমশুবা খ্বাইদগী চাউবা নেতৱার্ক লৈরে। মেরুতকী মথক্ত উত্তর প্রদেসকী সহর কয়াদা মেত্রো প্রোজেকশিং পায়খৎলি।

মরুপশিং,

হৌখিবা চহি ১১ দা, বি.জে.পি সরকারনা মীয়ামদা ত্রাফিক জামশিং অমসুং পোল্লুসন লৈতবা য়াম্না য়াংনা চৎথোক-চৎশিনগী খুদোংচাবশিং পীনবা সহর কয়া মেত্রো সর্বিসশিংগা শম্নরে। মরম অদুনা ঙসি নমো ভারতগুম্বা অনৌবা সেমি-হায়-স্পিৎ ত্রেনশিং অমসুং বন্দে ভারত ত্রেনশিং চেল্লিবনি।

মরুপশিং,

দিল্লিদা এস.পি অমসুং কংগ্রেসকী সরকার পানবা মতমদা থবকশিং অসি পাংথোকপা ঙম্লোই। মতম অদুদা, ইনফ্রাষ্ট্রকচর প্রোজেকশিং স্কামশিংনা পীক থনখি। মেত্রোগী তেক্নোলোজিশিং ফাওবা মপান লৈবাকশিংদগী পুরকখি। ঐখোয়গী স্কামশিং থুপচিনখ্রে অমসুং লৈবাক অসি অত্মনির্ভরগী মাইকৈদা মাঙলোমদা চঙশিল্লে। লৈবাক অসি চাউখৎহনবা হায়বসি বি.জে.পিগী পান্দম ওইবনা, লৈবাক অসিগী মীয়াম খুদোংচারে অমসুং নুংঙাই য়াইফরে। য়েংউ, কমদৌনা মেরুত অমসুং নোংচুপ থংবা উত্তর প্রদেসকী মীয়ামগী পুন্সিদা অহোংবা পুরকপগে হায়বা। প্রোজেক অসিগী অখন্নবা শক্তম অমদি সরাই কালে খান, অনন্দ বিহার, ঘজিয়াবাদ অমসুং মেরুত্ত ভারত রেলৱেজ, মেত্রো অমসুং বস ষ্টেন্দশিং পুনশিনবা অসিনি। লৈবাক অসিদা অহানবা ওইনা, নমো ভারত অমসুং মেত্রো রেল চপ মান্নবা ষ্টেসন অমসুং চপ মান্নবা ত্রেক্ত চেনগনি। মসিনা তাকপদি মীয়াম সহর মনুংদা নত্ত্রগা দিল্লি ফাওবা চৎপা য়াহল্লে, মসিনা শিন্মীশিং অমসুং মহৈরোয়শিং তঙাইফদবদগী দিল্লিদা ভারাদা লৈবা অদু কোকহল্লে।

মরুপশিং,

ঙসি, বি.জে.পিগী দবল-ইঞ্জিন সরকারনা অনৌবা ইনফ্রাষ্ট্রকচরশিংগীদমক য়াম্লবা শেনফম থাদরে অমসুংর মসিনা অদোমগী শেনফমশিং কনবা খক নত্তনা নহারোলশিংদা থবকসু পীরে। এক্সপ্রেসৱেশিং, ফ্রেদ কোরিদোরশিং অমসুং জেৱার ইন্তরনেসনেল এয়রপোর্ত য়াওনা অনৌবা ইনফ্রাষ্ট্রকচরশিংদা সরকারনা শেন থাদবা অসিনা থবক ফংনবগী খুদোংচাবশিং য়াম্না পীরে। প্রোজেকশিং অসিনা লমদম অসিদা অনৌবা কম্পেনিশিং অমসুং ললোন-ইতিক্কী থবকশিং পুক্নিং চিংশিল্লে অমসুং অনৌবা থবক কয়া ফংহল্লে।

মরুপশিং,

উত্তর প্রদেস অসি শিন্মী অমসুং খুৎ-শা হৈবগী লমদম অমনি। রাজ্য অসিগী লৌমীশিং, শা-ষন লোইবশিং, ওন্ত্রেপ্রেন্যুরশিং, ফিশাবশিং অমসুং খুৎহৈবশিংনা হেরিতেচ অমসুং চাউখৎপগী লাইৱা মাইপাক্না শীজিন্নরে। ভারত চাউখৎলকপা মতমদা, উত্তর প্রদেসকী মীওই খুদিংমক কান্নবা ফংগনি।

মরুপশিং,

মালেমগী লৈবাকশিংনা ভারত্ত কয়া য়াম্না থাজবা থম্বগে, কমদৌনা মীয়াম থাজবগা থনবগে হায়বা হৌজিক অদোম উরে। চাউখৎলবা লৈবাক কয়া ভারতকা লোয়ননা ললোন-ইতিক্কী য়ানচেশিং খুৎয়েক পীনরে। কংগ্রেসকী সরকারশিংনা পানবা মতমদা চাউখৎলবা লৈবাকশিংগা এগ্রিমেন্তশিং লৈনখিদে। কংগ্রেস সরকার স্কামশিংগী মমিং চৎপদগী মালেমগী থবকশিংনা মখোয়গা থবক তৌমিন্নবদা চিংনবা লৈখি। ঙসিদি, চাউখৎলবা লৈবাকশিং ভারত লোয়ননা চৎমিন্ননবা ইখৌ লাংবা লৈরে। মসি মখোয়না ভারতকী চাউখৎপদা মখোয় মশাগী তুংগী ফিবম উবদগীনি অমসুং ভারতকী নহারোলশিংগী থৌনাদা মখোয়না থাজবা থম্লি। ঙসিদি, ২১শুবা চহিচাগী খুদোংচাদবশিং কোকহন্নবা পাম্বৈশিং পুথোক্নবা শক্তি অদু ভারতনি হায়বা মালেম্না খঙলে।

মরুপশিং,

হন্দক, বি.জে.পি সরকারনা এগ্রিমেন্তশিং খুৎয়েক পীনখিবা অসিনা অপীকপা অমসুং য়ুমগী উদ্যোগশিংদা কান্নবা চাউনা ফংলগনি। মসিনা মেরুতকী শান্নবগী পোৎ-চৈশিং, মেরুতকী কাতি, খুরজাগী কপ অমসুং প্লেতশিং, মোরাদবাদগী শেঞ্জেংগী পোৎলমশিং, বাঘপাতকী য়ুমগী লৈতেংগী পোৎলমশিং, সহারানপুরগী উগী পোৎলমশিং অমসুং শাউন, তেক্সতাইল অমসুং  লিক-কোনগী পোৎ-চৈশিং পুথোক্লিবশিংদা মতেং পাংগনি। হায়রিবা অপীকপা অমসুং য়ুমগী উদ্যোগশিংনা হেন্না কান্নবা ফংগনি। ভারতকী অপীকপা অমসুং অচৌবা সহরশিংগী মপাঙ্গল মালেমগী মফম খুদিংমক্ত য়ৌহনবা, উত্তর প্রদেসকী তোঙান তোঙানবা জিলাশিংগী শক্তম ফগৎহনবা হায়বসি বি.জে.পীগী পান্দমনি।

মরুপশিং,

ঐখোয়গী মেরুত অমসুং মসিগী অকোয়বা মফমশিং অপীকপা উদ্যোগশিং অমসুং এম.এস.এম.ইশিংগী মরুওইবা মফমশিংনি। চহি অসিগী কেন্দ্রগী বজেত্ত, অপীকপা উদ্যোগশিংগী লুপা করোর ১০,০০০ গী অখন্নবা ফন্দ অমা ঐখোয়না লাউথোক্লে। মসিনা য়ু.পিদা লৈরিবা এম.এস.এম.ইনা লোনশিং লৌবদা লাইরগনি। বজেত্ত ঐখোয়না তেক্সতাইল উদ্যোগ অমসুং ফিশাবা মীওইশিংগীদমক মহাত্ম গান্ধী গ্রাম শ্বরাজ য়োজনা লাউথোক্লে। মসিনা খাদি, হেন্দলুম অমসুং হেন্দিক্রাফশিং মালেমগী কৈথেলশিং য়ৌবদা মতেং পাংগনি।

মরুপশিং,

মমাঙদা, অপীকপা খুৎহৈবশিংনা কোরিয়রগী খুৎথাংদা পোৎ-চৈ থাবদা লাখ ১০ দগী হেনবা য়াদবা অদু লৌথোক্লে। মসিনা মেরুত অমসুং উত্তর প্রদেস শীনবা থুংনা লৈরিবা ওন্ত্রেপ্রেন্যুরশিংনা ওনলাইন এপ্পশিংগী খুৎথাংদা য়ু.এস অমসুং য়ুরোপতা লৈরিবা কষ্টমরশিংদা হকথেংননা পোৎ-চৈ য়োনবা য়াহল্লে।

মরুপশিং,

মকোক্তগী হৌনা মেরুত-হাপুর লমদম অমসুং মসিগী অকোয়বগী মফমশিংনা চৌধুরি চরন সিংহ জিগী পান্দম উখ্রে। চৌধুরি চরন সিংহ জিদা ঐখোয়না ভারত রত্ন পীবা ফংবা অসি ঐখোয়গী সরকারগী লাইবক ফবনি। মহাক্না ইথিল পীদুনা চীঞ্জাক শেম-শাবা অমসুং পি.এম কিষান সম্মান নিধিগী খুৎথাংদা লৌমীশিংগী শেন্থোক শরুক অনি হেনগৎনবা দবল-ইঞ্জিন সরকারনা থবক পায়খৎলে। স্কিম অসিগী মখাদা, উত্তর প্রদেসকী লৌমীশিংদা লুপা করোর ৯৫,০০০ রোমগী শেনফম পীখ্রে। মেরুতকী লৌমীশিংসু লুপা করোর ৮০০ রোম ফংখ্রে।

ইনাওশিং অমসুং ইচলশিং,

অমরোমদা, বিকসিত ভারত অমা শেমগৎনবা মীয়াম অহিং-নুংথিল থবক শুরি। অদুগা লৈবাক অসিদা রাজনিতি দল খরনা ভারতকী মাইপাকপা করিনো হায়বা খঙদ্রে। মালেমগী খ্বাইদগী চাউবা এ.আই কনফরেন্স ভারত্ত পাংথোকখিবা অদু অদোম উরে। লৈবাক ৮০ হেনবগী মীহুৎশিং দিল্লিদা লাকখি। লৈবাক ২০ রোমগী লৈবাক্কী লুচিংবশিং ভারত্ত লাকখি। দিল্লিদা মীওই লাখ কয়া পুনখি। অসিগুম্বা মীফম অমা মমাঙদা চাউখৎলক্লিবা লৈবাক অমদা পাংথোকখিদ্রি। মেরুতকী মীয়ামদা ঐনা হংনিংবদি- এ.আই কনফরেন্স অসিগীদমক অদোম চাউথোকচবা ফাওবরা নত্ত্রগা ফাওদবরা? অকনবা থৌনাগা লোয়ননা হায়বীয়ু-অদোম চাউথোকচবা ফাওবরা নত্ত্রগা ফাওদবরা? মসি ভারতকীদমক পাংথোকপরা নত্ত্রগা পাংথোক্তবরা? মসি ভারতকী নহারোলশিংগীদমক নত্তবরা? মসি ভারতকী মরাইবক অহোংবা পুরক্নবা পাংথোকপরা নত্ত্রগা করিগীনো? মসি ২১শুবা চহিদা লুচিংবা ওইনবা পাংথোকপরা নত্ত্রগা পাংথোক্তবরা? লৈবাক শীনবা থুংনা চাউথোকচরি। অদুবু কংগ্রেস অমসুং মসিগা লোয়নরবশিংনা করি পাংথোকখিবগে?

মরুপশিং,

ভারতকী মালেমগী থৌরম অমা কংগ্রেসনা মসিগী অমোৎপা অমসুং ইকায় খঙদবা রাজনিতিগী মফম অমা ওন্থোকখি। থৌরম মফমদা, মপানগী মীওইশিংগী মমাঙদা, কংগ্রেসকী লুচিংবশিং মখোয়গী মফি থোকখি। ঐনা কংগ্রেসকী মীওইশিংদা হংলি- অদোম রাজনিতিগী ইকায়বা খঙদবনি হায়বা মীওই খুদিংমক্না খঙলে, মতম অসিদা অদোমগী ফি লৌথোকপা করিগী মথৌ তারিবগে? লৈবাক অসিগী খ্বাইদগী লিরবা দল ফিবম কয়া য়াম্না শোক্লবগে হায়বা কংগ্রেস লুচিংবশিংনা উৎথোক্লে।

মরুপশিং,

মসি কনাগুম্বা অমনা ৱাখলদা ফাওবা খন্দে। মখোয় করম্ব মখলগী মীওইনো, খুঙ্গং অমদা লুহোংবা অমা থোকপদা, মদু মাইপাক্নবা খুঙ্গং পুম্নমক থৱায় য়াওনা হোৎনৈ, মরম অদুনা অতিথিশিং খুঙ্গং অদুগী অফবা ৱাখল অমগা লোয়ননা হনখি। অদুবু লৈবাক অসিগী মিংচৎ থিহন্নবা হোৎনবদা কংগ্রেস থবক য়াম্না চিনখি।

মরুপশিং,

কংগ্রেসনা মোদী পামদে। ঐগী মোঙফম তৌবা মখোয়না পামখি, ঐগী ইমা ইকায়বা পীবদা মখোয়দা চিংনবা লৈখিদে, মখোয়না বি.জে.পিগী ময়োক্ত লৈখি, মখোয়না এন.দি.এগী ময়োক্ত লৈখি। এ.আই গ্লোবেল সম্মিৎ অসি বি.জে.পিগী থৌরম অমা নত্তে, মদুদা বি.জে.পিগী লুচিংবা অমতা শরুক য়াখিদে হায়বা কংগ্রেসনা নিংশিংগদবনি। লৈবাক থৌরম অমা হায়বসি লৈবাক অদুগী চাউথোকচনবনি, মীয়ামগী হুমাংনা ওইহনবনি। অদুবু কংগ্রেসনা লৈবাকমচা তাবগী পন অদু থুগায়খি। লৈবাক শীনবা থুংনা কংগ্রেসকী থবক অদু য়ানিংদবা ফোঙদোকখি। লাইবক থিবদি, ইকায়বা ফাওবগী মহুত্ত, দল অসিগী লুচিংবশিংনা লৈবাক অসি ইকায়বা পীখিবা মীওইশিং থাগৎপা ফোঙদোকখি। কংগ্রেসকী মসিগী লমচৎ অসি মখা তানা চৎথরি। মখোয় মশামক সংসদতা মথৌ পাংথোকপা ঙমখিদে, মখোয়গা চৎমিন্নরবা দলশিং মখোয় ৱা ঙাংহনখিদে, মখোয়না সংসদকী মথৌ পাংথোকহনখিদে। খ্বাইদগী চাউবা মাঙজরিবা অসি কংগ্রেসগা চৎমিন্নরবা দলশিংনি।

লৈবাক অসিগী মেদিয়াদা ঐনা নোল্লুক্না হায়জরি। মেদিয়াগী পাউ খুদিংমক খাংবা ঙম্নব ঐঙোন্দা থৌনা পীনবা ঐনা ঈশ্বরদা হায়জরি। ঐনা মখোয়দা হায়জরি- অসিগুম্বা থবকশিং ঐখোয়না চৈবা মতমদা, “মোদীনা ওপোজিসন চৈখ্রে” হায়বগুম্বা হেদলাইনশিং থোনবীগনু। কংগ্রেস কনখৎনবা থবকশিং লেপ্পীয়ু। অতোপ্পা ওপোজিসন দলশিংনা অৱাবা নংলিঙৈদা অদোম্না কংগ্রেস কনখৎলে। কংগ্রেসনা পাপ তৌরি, অদুগা অতোপ্পশিংনা মদুগী ফল ফংলি। কংগ্রেসনা ফত্তবা থবকশিং পাংথোক্লি, অদুগা মেদিয়ানা “ওপোজিসন” হায়বা ৱাহৈ খক্ত শীজিন্নরি, কংগ্রেস শীজিন্নদে। করিগী অদোম্না কংগ্রেস কনখৎলিবনো? থবক অসিনা, অদোম্না কংগ্রেস কনবা নত্ত্রগা মসি ফগৎহনবা ঙম্লোই। করিগুম্বা অদোম্না কংগ্রেসকী অরানবশিং ইবা হৌরবদি, খেন্নবা অদু উবা ফংগনি। দিল্লিদা, তি.এম.সিনা করি অরানবা তৌবগে? তৌদে। দি.এম.কেনা করি পাপ তৌবগে? তৌদে। বি.এস.পিনা করি ফত্তবা তৌবগে? তৌদে। ফরুগ অবদুল্লাহগী দলনা করি ফত্তবা তৌবগে? তৌদে। কংগ্রেসকী লুচিংবশিং খক্তনা লৈবাক অসি মাঙহনবনি। অদোম্না প্রধান মন্ত্রী ওইনিংলবদি, অদোম অহানবদা মীয়ামগী থম্মোয় জয় তৌগদবনি। নমদুনা সিত মুন্নবা নুপী এম.পিশিং থাবনা অদোম প্রধান মন্ত্রী ওইবা ঙম্লোই।

মরুপশিং,

কংগ্রেস লৈবাক অসিগী পোৎলুম অমা ওইরে। দিল্লিগী থৌদোক মতুংদা, কংগ্রেসগা চৎমিন্নরিবা দলশিংনা কংগ্রেস চৈনবা থৌনা লৈরকপদা ঐ অপেনবা ফাওই। অচুম্বা অমসুং লৈবাক্কী চাউথোকচবগা লোয়ননা লেপ্পগীদমক ঐনা হায়রিবা ওপোজিসন দলশিং মীয়াম মমাংদা থাগৎচরি।

মরুপশিং,

বি.জে.পি সরকারগী ওইনা, লৈবাক অসি অমসুং উত্তর প্রদেস চাউখৎহনবা হায়বসি মরুওইবনি। অদুবু চহি ১০ গী মমাঙদা, করিগীদমক উত্তর প্রদেস মমিং চৎপগে। মেরুতকী রাইওৎশিং, নোংচুপ থংবা উত্তর প্রদেসগী গেংশিং, লম্বীশিং ফত্তবা, মৈ লাক্তবা অমসুং চাউখৎতবগীদমক মমিং চৎখি। নোংচুপ থংবা উত্তর প্রদেস ফত্তবা থবকশিংদা ফিল্মশিং পুথোকখি। এস.পি সরকারনা উত্তর প্রদেস থাক অসিদা থমখি। অদুবু ঙসিদি চাউখৎপগীদমক উত্তর প্রদেস মীয়াম্না খঙনরে। ইরাংশিং অমসুং ফত্তবা থবকশিংগী যুগ অদুদগী অহোংবা লাক্তুনা হৌজিক ব্রহমোস, মোবাইল শাবা অমসুং তুরিজমগী মমিং চৎলে। ঙসিদি ফত্তবা থবক তৌবা মীওইশিং জেলদা থম্লে, নুপীমচাশিংগী ইকায়খুম্নবা ঙাক্লে আমসুং লোল অমসুং ওর্দরগী ফিবম ফগৎপদগী শেন-থুমগী ফিবম ফগৎলে অমসুং মেনুফেকচরিং চাউখৎলে। মেরুত্ত স্পোর্তস য়ুনিভর্সিতিগী থবক য়াংনা পায়খৎলি।

মরুপশিং,

এস.পি লৈঙাক মনুংদা মীফত্তশিং অকিবা লৈতনা কোইচৎ চৎখি। ঙসি, য়োগী জিগী সরকার মখাদা, মখোয় জেলদা লৈরি। কোলেজশিংগী থোক্লকপা ইচানুপীশিংদা কনাগুম্বা অমতনা ইকায়বা পীবা ঙমদ্রে।

মরুপশিং,

লো অমসুং ওর্দর ফগৎলকপা মতমদা, ললোন-ইতিক অমসুং দুকানশিংগী অফবা ফিবম অমা শেমগৎলে। মরম অদুনা ঙসি উত্তর প্রদেসগী শেন-থুমগী ফিবম অঙকপা ফংনা চাউখৎলকপা উরে। য়োগী জিগী লমজিং মখাদা, উত্তর প্রদেস লৈবাক অসিগী মেনুফেকচরিংগী মরুওইবা মফম অমা ওইরে। ঙরাং ঐনা উত্তর প্রদেসগী অহানবা সেমিকন্দক্তর ফেক্তরিগী উরেপ-উয়ুং তমখ্রে। ফেক্তরি অসিদগী উত্তর প্রদেস মপাঙ্গল হেন্না কনগৎলগনি। মসিনা নৌনা শেন থাদনবা  অমসুং অনৌবা থবকশিং ফংনবা খুদোংচাবশিং পীরগনি। উত্তর প্রদেস লৈবাক অসিগী খ্বাইদগী চাউবা ইকোনোমি অমা ওইনবা বি.জে.পিগী দবল-ইঞ্জিন সরকারনা মখা তানা থবক তৌগনি হায়বগী থাজবা ঐনা পীরি। বিকসিত উত্তর প্রদেস ওইরবা মতমদা বিকসিত ভারত ওইবা ঙমগনি। নমো ভারত ত্রেন অমসুং মেত্রো প্রোজেক্কীদমক ঐনা ময়ামগী মফমদা অমুক হন্না হরাওবা ফোঙদোকচরি। ঐখোয়না বন্দে মাতরমগী চহি ১৫০ শুবা থৌরম পাংথোক্লি। ঐগা লোয়ননা হায়মিন্নসি-

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

***