ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಿನ್ನೆ ನಡೆದ ಕೇಂದ್ರ ಸಚಿವ ಸಂಪುಟ ಸಭೆಯು ಒಟ್ಟು ಒಂದು ಲಕ್ಷ ಕೋಟಿ ರೂಪಾಯಿಗಳ ಕೇಂದ್ರ ನೆರವಿನೊಂದಿಗೆ (CA) ‘ನಗರ ಸವಾಲು ನಿಧಿ’ (Urban Challenge Fund - UCF) ಸ್ಥಾಪಿಸಲು ಅನುಮೋದನೆ ನೀಡಿದೆ. ಕೇಂದ್ರ ನೆರವು ಯೋಜನಾ ವೆಚ್ಚದ ಶೇಕಡಾ 25 ರಷ್ಟನ್ನು ಒಳಗೊಂಡಿರುತ್ತದೆ, ಇದಕ್ಕೆ ಮಾರುಕಟ್ಟೆಯಿಂದ ಯೋಜನಾ ವೆಚ್ಚದ ಕನಿಷ್ಠ ಶೇಕಡಾ 50 ರಷ್ಟನ್ನು ಸಂಗ್ರಹಿಸುವುದು ಕಡ್ಡಾಯವಾಗಿದೆ. ಇದು ಮುಂದಿನ ಐದು ವರ್ಷಗಳಲ್ಲಿ ನಗರ ವಲಯದಲ್ಲಿ ಒಟ್ಟು ನಾಲ್ಕು ಲಕ್ಷ ಕೋಟಿ ರೂಪಾಯಿಗಳ ಹೂಡಿಕೆಗೆ ಕಾರಣವಾಗಲಿದೆ. ಇದು ಭಾರತದ ನಗರ ಅಭಿವೃದ್ಧಿ ವಿಧಾನವನ್ನು ಅನುದಾನ ಆಧಾರಿತ ಹಣಕಾಸು ವ್ಯವಸ್ಥೆಯಿಂದ ಮಾರುಕಟ್ಟೆ ಸಂಯೋಜಿತ, ಸುಧಾರಣಾ ಪ್ರೇರಿತ ಮತ್ತು ಫಲಿತಾಂಶ ಆಧಾರಿತ ಮೂಲಸೌಕರ್ಯ ಸೃಷ್ಟಿಯತ್ತ ಕೊಂಡೊಯ್ಯುವ ಮೂಲಕ ಒಂದು ದೊಡ್ಡ ಬದಲಾವಣೆಯನ್ನು ಸೂಚಿಸುತ್ತದೆ.

ಉತ್ತಮ ಗುಣಮಟ್ಟದ ನಗರ ಮೂಲಸೌಕರ್ಯಗಳನ್ನು ಒದಗಿಸಲು ಈ ನಗರ ಸವಾಲು ನಿಧಿಯು ಮಾರುಕಟ್ಟೆ ಹಣಕಾಸು, ಖಾಸಗಿ ಸಹಭಾಗಿತ್ವ ಮತ್ತು ನಾಗರಿಕ-ಕೇಂದ್ರಿತ ಸುಧಾರಣೆಗಳನ್ನು ಬಳಸಿಕೊಳ್ಳುತ್ತದೆ. ದೇಶದ ಮುಂದಿನ ಹಂತದ ಆರ್ಥಿಕ ಬೆಳವಣಿಗೆಯ ಪ್ರೇರಕ ಶಕ್ತಿಯಾಗಿ ನಗರಗಳನ್ನು ರೂಪಿಸಲು, ಸ್ಥಿತಿಸ್ಥಾಪಕತ್ವವುಳ್ಳ, ಉತ್ಪಾದಕ, ಒಳಗೊಳ್ಳುವ ಮತ್ತು ಹವಾಮಾನಕ್ಕೆ ಸ್ಪಂದಿಸುವ ನಗರಗಳನ್ನು ನಿರ್ಮಿಸುವ ಗುರಿಯನ್ನು ಈ ನಿಧಿಯು ಹೊಂದಿದೆ.

ಈ ನಿಧಿಯು 2025-26 ರಿಂದ 2030-31ರ ಆರ್ಥಿಕ ವರ್ಷದವರೆಗೆ ಕಾರ್ಯನಿರ್ವಹಿಸಲಿದ್ದು, ಇದರ ಅನುಷ್ಠಾನದ ಅವಧಿಯನ್ನು 2033-34ರ ಆರ್ಥಿಕ ವರ್ಷದವರೆಗೆ ವಿಸ್ತರಿಸಬಹುದಾಗಿದೆ. ಇದು 2025-26ರ ಬಜೆಟ್‌ನಲ್ಲಿ ಘೋಷಿಸಲಾದ ಸರ್ಕಾರದ ದೃಷ್ಟಿಕೋನಕ್ಕೆ ಅನುಗುಣವಾಗಿ 'ಬೆಳವಣಿಗೆಯ ಕೇಂದ್ರಗಳಾಗಿ ನಗರಗಳು' (Cities as Growth Hubs), 'ನಗರಗಳ ಸೃಜನಶೀಲ ಪುನರಾಭಿವೃದ್ಧಿ' (Creative Redevelopment of Cities) ಮತ್ತು 'ನೀರು ಹಾಗೂ ನೈರ್ಮಲ್ಯ'ಕ್ಕೆ (Water and Sanitation) ಸಂಬಂಧಿಸಿದ ಪ್ರಸ್ತಾವನೆಗಳನ್ನು ಜಾರಿಗೆ ತರಲಿದೆ.

ನಗರ ಸವಾಲು ನಿಧಿಯ ಪ್ರಮುಖ ಲಕ್ಷಣಗಳು:

i. ಯೋಜನಾ ವೆಚ್ಚದ ಕನಿಷ್ಠ 50 ಪ್ರತಿಶತದಷ್ಟು ಹಣವನ್ನು ಮುನ್ಸಿಪಲ್ ಬಾಂಡ್‌ ಗಳು, ಬ್ಯಾಂಕ್ ಸಾಲಗಳು ಮತ್ತು ಸಾರ್ವಜನಿಕ-ಖಾಸಗಿ ಸಹಭಾಗಿತ್ವದ (PPP) ಮೂಲಕ ಮಾರುಕಟ್ಟೆ ಮೂಲಗಳಿಂದ ಸಂಗ್ರಹಿಸಬೇಕಾಗುತ್ತದೆ. ಉಳಿದ ಭಾಗವನ್ನು ರಾಜ್ಯಗಳು, ಕೇಂದ್ರಾಡಳಿತ ಪ್ರದೇಶಗಳು (UTs), ನಗರ ಸ್ಥಳೀಯ ಸಂಸ್ಥೆಗಳು (ULBs) ಅಥವಾ ಇತರ ಮೂಲಗಳಿಂದ ಭರಿಸಬಹುದು.

ii. ಪಾರದರ್ಶಕ ಮತ್ತು ಸ್ಪರ್ಧಾತ್ಮಕ 'ಚಾಲೆಂಜ್ ಮೋಡ್' (Challenge Mode) ಮೂಲಕ ಯೋಜನೆಗಳನ್ನು ಆಯ್ಕೆ ಮಾಡಲಾಗುತ್ತದೆ, ಇದು ಹೆಚ್ಚಿನ ಪ್ರಭಾವ ಬೀರುವ ಮತ್ತು ಸುಧಾರಣಾ-ಆಧಾರಿತ ಪ್ರಸ್ತಾವನೆಗಳಿಗೆ ಬೆಂಬಲ ಸಿಗುವುದನ್ನು ಖಚಿತಪಡಿಸುತ್ತದೆ.

iii. ನಗರ ಆಡಳಿತ, ಮಾರುಕಟ್ಟೆ ಮತ್ತು ಹಣಕಾಸು ವ್ಯವಸ್ಥೆಗಳು, ಕಾರ್ಯಾಚರಣೆಯ ದಕ್ಷತೆ ಮತ್ತು ನಗರ ಯೋಜನೆ ವಲಯಗಳಲ್ಲಿನ ಸುಧಾರಣೆಗಳಿಗೆ ಹೆಚ್ಚಿನ ಒತ್ತು ನೀಡಲಾಗುವುದು.

iv. ಸುಸಂಘಟಿತ ಅಪಾಯ-ಹಂಚಿಕೆ ಚೌಕಟ್ಟುಗಳು ಮತ್ತು ಸೇವಾ ವಿತರಣಾ ಮಾನದಂಡಗಳ ಬೆಂಚ್‌ ಮಾರ್ಕಿಂಗ್ ಮೂಲಕ ಖಾಸಗಿ ವಲಯದ ಭಾಗವಹಿಸುವಿಕೆಯನ್ನು ಉತ್ತೇಜಿಸಲಾಗುತ್ತದೆ.

v. ಟಿಯರ್-II ಮತ್ತು ಟಿಯರ್-III ನಗರಗಳು ಸೇರಿದಂತೆ 4223 ನಗರಗಳ ಕ್ರೆಡಿಟ್ ಅರ್ಹತೆಯನ್ನು ಹೆಚ್ಚಿಸಲು ₹5,000 ಕೋಟಿಗಳ ಮೀಸಲು ನಿಧಿಯನ್ನು ಮೀಸಲಿಡಲಾಗಿದೆ. ಇದು ವಿಶೇಷವಾಗಿ ಮೊದಲ ಬಾರಿಗೆ ಮಾರುಕಟ್ಟೆ ಹಣಕಾಸು ಪಡೆಯಲು ಬಯಸುವ ನಗರಗಳಿಗೆ ಸಹಕಾರಿಯಾಗಲಿದೆ.

vi. ನಗರ ಸ್ಥಳೀಯ ಸಂಸ್ಥೆಗಳನ್ನು (ULBs) ಹೂಡಿಕೆಗೆ ಯೋಗ್ಯವಾದ ಆರ್ಥಿಕ ಶಕ್ತಿಯನ್ನಾಗಿ ರೂಪಿಸುವುದು.

ಸಣ್ಣ ನಗರಗಳಿಗೆ ಸಾಲ ಮರುಪಾವತಿ ಗ್ಯಾರಂಟಿ:

ಈಶಾನ್ಯ ಮತ್ತು ಗುಡ್ಡಗಾಡು ರಾಜ್ಯಗಳ ಎಲ್ಲಾ ನಗರಗಳು/ನಗರ ಸ್ಥಳೀಯ ಸಂಸ್ಥೆಗಳು (ULBs) ಮತ್ತು ಇತರ ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳ ಸಣ್ಣ ನಗರ ಸ್ಥಳೀಯ ಸಂಸ್ಥೆಗಳಿಗೆ (1,00,000 ಕ್ಕಿಂತ ಕಡಿಮೆ ಜನಸಂಖ್ಯೆ ಹೊಂದಿರುವ) ಮೊದಲ ಬಾರಿಗೆ ಮಾರುಕಟ್ಟೆ ಹಣಕಾಸು ಸೌಲಭ್ಯವನ್ನು ಸುಲಭಗೊಳಿಸಲು ₹5,000 ಕೋಟಿ ಮೊತ್ತದ 'ಸಾಲ ಮರುಪಾವತಿ ಗ್ಯಾರಂಟಿ ಯೋಜನೆ'ಗೆ ಅನುಮೋದನೆ ನೀಡಲಾಗಿದೆ. ಈ ಯೋಜನೆಯಡಿ, ಮೊದಲ ಬಾರಿಯ ಸಾಲಗಳಿಗೆ ₹7 ಕೋಟಿ ಅಥವಾ ಸಾಲದ ಮೊತ್ತದ ಶೇ. 70 ರವರೆಗೆ (ಯಾವುದು ಕಡಿಮೆಯೋ ಅದು) ಕೇಂದ್ರದ ಗ್ಯಾರಂಟಿ ನೀಡಲಾಗುವುದು. ಮೊದಲ ಸಾಲವನ್ನು ಯಶಸ್ವಿಯಾಗಿ ಮರುಪಾವತಿ ಮಾಡಿದ ನಂತರ, ₹7 ಕೋಟಿ ಅಥವಾ ಸಾಲದ ಮೊತ್ತದ ಶೇ. 50 ರವರೆಗೆ (ಯಾವುದು ಕಡಿಮೆಯೋ ಅದು) ಕೇಂದ್ರದ ಗ್ಯಾರಂಟಿಯನ್ನು ನೀಡಲಾಗುತ್ತದೆ. ಇದು ಸಣ್ಣ ನಗರಗಳಲ್ಲಿ ಮೊದಲ ಬಾರಿಗೆ ಕನಿಷ್ಠ ₹20 ಕೋಟಿ ಮತ್ತು ನಂತರದ ಯೋಜನೆಗಳಿಗೆ ₹28 ಕೋಟಿ ಮೊತ್ತದ ಯೋಜನೆಗಳಿಗೆ ಪರಿಣಾಮಕಾರಿಯಾಗಿ ಬೆಂಬಲ ನೀಡಲಿದೆ.

ಸವಾಲು-ಆಧಾರಿತ ಯೋಜನಾ ಆಯ್ಕೆ:

ಈ ನಿಧಿಯ ಅಡಿಯಲ್ಲಿ ಯೋಜನೆಗಳನ್ನು ಪರಿವರ್ತನಾತ್ಮಕ ಪ್ರಭಾವ, ಸುಸ್ಥಿರತೆ ಮತ್ತು ಸುಧಾರಣಾ ದೃಷ್ಟಿಕೋನವನ್ನು ಒಳಗೊಂಡಿರುವ 'ಸವಾಲು-ಆಧಾರಿತ ಚೌಕಟ್ಟಿನ' ಮೂಲಕ ಆಯ್ಕೆ ಮಾಡಲಾಗುತ್ತದೆ. ಹಣಕಾಸಿನ ನೆರವನ್ನು ಸುಧಾರಣೆಗಳು, ನಿಗದಿತ ಗುರಿಗಳು ಮತ್ತು ಸ್ಪಷ್ಟವಾಗಿ ವ್ಯಾಖ್ಯಾನಿಸಲಾದ ಫಲಿತಾಂಶಗಳಿಗೆ ಜೋಡಿಸಲಾಗಿರುತ್ತದೆ. ಮುಂದಿನ ಹಂತದ ನಿಧಿ ಬಿಡುಗಡೆಗೆ ಸುಧಾರಣೆಗಳ ಮುಂದುವರಿಕೆಯು ಪೂರ್ವಾಪೇಕ್ಷಿತ ಷರತ್ತಾಗಿರುತ್ತದೆ. ಯೋಜನೆಗಳು ಮತ್ತು ಸುಧಾರಣೆಗಳ ಕಾಗದರಹಿತ ಮೇಲ್ವಿಚಾರಣೆಯನ್ನು ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯದ ಏಕೈಕ ಡಿಜಿಟಲ್ ಪೋರ್ಟಲ್ ಮೂಲಕ ನಿರ್ವಹಿಸಲಾಗುತ್ತದೆ.

ಯೋಜನಾ ವಿಭಾಗಗಳು:

ನಗರಗಳನ್ನು ಬೆಳವಣಿಗೆಯ ಕೇಂದ್ರಗಳಾಗಿ ಗುರುತಿಸುವುದು, ನಗರ ಪ್ರದೇಶಗಳ ಗುರುತಿಸುವಿಕೆ, ಪ್ರಮುಖ ಆರ್ಥಿಕ ಕೇಂದ್ರಗಳು, ಸಮಗ್ರ ಪ್ರಾದೇಶಿಕ ಆರ್ಥಿಕ ಮತ್ತು ಸಾರಿಗೆ ಯೋಜನೆ - ಹಸಿರು ವಲಯ ಮತ್ತು ಅರೆ-ಹಸಿರು ವಲಯ ಅಭಿವೃದ್ಧಿಗಳು ಸೇರಿದಂತೆ, ಸಾರಿಗೆ ಮತ್ತು ಆರ್ಥಿಕ ಕಾರಿಡಾರ್‌ ಗಳ ಉದ್ದಕ್ಕೂ ಅಭಿವೃದ್ಧಿ, ನಗರ ಚಲನಶೀಲತೆ, ಮತ್ತು ಆರ್ಥಿಕ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸಲು ನಿರ್ಣಾಯಕ ಮೂಲಸೌಕರ್ಯ ಯೋಜನೆಗಳು.

ನಗರಗಳ ಸೃಜನಾತ್ಮಕ ಪುನರಭಿವೃದ್ಧಿ , ಕೇಂದ್ರ ವ್ಯಾಪಾರ ಜಿಲ್ಲೆಗಳು ಮತ್ತು ಪರಂಪರೆಯ ತಾಣಗಳ ನವೀಕರಣ, ಕೈಗಾರಿಕಾ ಪ್ರದೇಶಗಳ ಪುನಶ್ಚೇತನ, ಸಾರಿಗೆ ಆಧಾರಿತ ಅಭಿವೃದ್ಧಿ ಮತ್ತು ಹಳೆಯ ಮೂಲಸೌಕರ್ಯಗಳ ಆಧುನೀಕರಣ, ಹವಾಮಾನ ಸ್ಥಿತಿಸ್ಥಾಪಕತ್ವ, ವಿಪತ್ತು ನಿರ್ವಹಣೆ ಮತ್ತು ಈಶಾನ್ಯ ಹಾಗೂ ಗುಡ್ಡಗಾಡು ರಾಜ್ಯಗಳಲ್ಲಿನ ಅಸ್ತಿತ್ವದಲ್ಲಿರುವ ನಗರಗಳ ದಟ್ಟಣೆಯನ್ನು ಕಡಿಮೆ ಮಾಡಲು ಪರ್ಯಾಯ ನಗರ ಕೇಂದ್ರಗಳ ಅಭಿವೃದ್ಧಿ.

ನೀರು ಸರಬರಾಜು, ಒಳಚರಂಡಿ ಮತ್ತು ಮಳೆನೀರು ಕಾಲುವೆ ವ್ಯವಸ್ಥೆಗಳ ಮೇಲ್ದರ್ಜೆಗೇರಿಸುವಿಕೆ, ರುರ್ಬನ್ (Rurban) ಮೂಲಸೌಕರ್ಯ, ನೀರಿನ ಜಾಲಗಳು ಮತ್ತು ಸಮಗ್ರ ಘನತ್ಯಾಜ್ಯ ನಿರ್ವಹಣೆ, ಹಳೆಯ ತ್ಯಾಜ್ಯದ ವಿಲೇವಾರಿ ಸೇರಿದಂತೆ 'ಸ್ವಚ್ಛತೆ'ಯ ಮೇಲೆ ವಿಶೇಷ ಗಮನಹರಿಸುವುದು.

ವ್ಯಾಪ್ತಿ :

ಈ ನಿಧಿಯು ಈ ಕೆಳಗಿನವುಗಳನ್ನು ಒಳಗೊಳ್ಳುತ್ತದೆ:

• 10 ಲಕ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಜನಸಂಖ್ಯೆ ಹೊಂದಿರುವ ಎಲ್ಲಾ ನಗರಗಳು (2025 ರ ಅಂದಾಜುಗಳು);

• ಮೇಲೆ ಉಲ್ಲೇಖಿಸದ ಎಲ್ಲಾ ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳ ರಾಜಧಾನಿಗಳು; ಮತ್ತು

• 1 ಲಕ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಜನಸಂಖ್ಯೆ ಹೊಂದಿರುವ ಪ್ರಮುಖ ಕೈಗಾರಿಕಾ ನಗರಗಳು.

ಹೆಚ್ಚುವರಿಯಾಗಿ, ಗುಡ್ಡಗಾಡು ರಾಜ್ಯಗಳು, ಈಶಾನ್ಯ ರಾಜ್ಯಗಳ ಎಲ್ಲಾ ನಗರ ಸ್ಥಳೀಯ ಸಂಸ್ಥೆಗಳು ಮತ್ತು 1 ಲಕ್ಷಕ್ಕಿಂತ ಕಡಿಮೆ ಜನಸಂಖ್ಯೆ ಹೊಂದಿರುವ ಸಣ್ಣ ನಗರ ಸ್ಥಳೀಯ ಸಂಸ್ಥೆಗಳು 'ಕ್ರೆಡಿಟ್ ಮರುಪಾವತಿ ಗ್ಯಾರಂಟಿ ಯೋಜನೆ'ಯ ಅಡಿಯಲ್ಲಿ ಬೆಂಬಲ ಪಡೆಯಲು ಅರ್ಹವಾಗಿರುತ್ತವೆ. ತಾತ್ವಿಕವಾಗಿ ಎಲ್ಲಾ ನಗರಗಳನ್ನು ಈ 'ಯುಸಿಎಫ್' (UCF) ಅಡಿಯಲ್ಲಿ ಸೇರಿಸಲಾಗುವುದು.

ಸುಧಾರಣೆ ಆಧಾರಿತ ಧನಸಹಾಯ ಚೌಕಟ್ಟು:

ನಗರ ಸವಾಲು ನಿಧಿ (Urban Challenge Fund - UCF) ಅಡಿಯಲ್ಲಿ ಧನಸಹಾಯವನ್ನು ಈ ಕೆಳಗಿನವುಗಳನ್ನು ಒಳಗೊಂಡಿರುವ ಸಮಗ್ರ ಸುಧಾರಣಾ ಕಾರ್ಯಸೂಚಿಯನ್ನು ಆಧರಿಸಿದೆ:
•    ಆಡಳಿತ ಮತ್ತು ಡಿಜಿಟಲ್ ಸುಧಾರಣೆಗಳು;

•    ಸಾಲದ ಅರ್ಹತೆಯನ್ನು ಬಲಪಡಿಸಲು ಮಾರುಕಟ್ಟೆ ಮತ್ತು ಆರ್ಥಿಕ ಸುಧಾರಣೆಗಳು;
•    ಸುಧಾರಿತ ಸೇವಾ ವಿತರಣೆ ಮತ್ತು ಉಪಯುಕ್ತತೆಯ ದಕ್ಷತೆಗಾಗಿ ಕಾರ್ಯಾಚರಣೆಯ ಸುಧಾರಣೆಗಳು;

•    ಸಾರಿಗೆ-ಆಧಾರಿತ ಅಭಿವೃದ್ಧಿ (TOD) ಮತ್ತು ಹಸಿರು ಮೂಲಸೌಕರ್ಯ ಸೇರಿದಂತೆ ನಗರಾಭಿವೃದ್ಧಿ ಯೋಜನೆ ಮತ್ತು ಪ್ರಾದೇಶಿಕ ಸುಧಾರಣೆಗಳು; ಮತ್ತು

•    ನಿರ್ದಿಷ್ಟ ಪ್ರಮುಖ ಕಾರ್ಯಕ್ಷಮತೆ ಸೂಚಕಗಳು, ತೃತೀಯ ಪಕ್ಷದ ಪರಿಶೀಲನೆ ಮತ್ತು ಸುಸ್ಥಿರ ಕಾರ್ಯಾಚರಣೆ ಹಾಗೂ ನಿರ್ವಹಣಾ (O&M) ಕಾರ್ಯವಿಧಾನಗಳನ್ನು ಹೊಂದಿರುವ ಯೋಜನೆ-ಆಧಾರಿತ ಸುಧಾರಣೆಗಳು.

ಫಲಿತಾಂಶ ದೃಷ್ಟಿಕೋನ:

i. ಯೋಜನೆಗಳನ್ನು ಅವುಗಳ ಪರಿವರ್ತಕ ಫಲಿತಾಂಶಗಳನ್ನು ನೀಡುವ ಸಾಮರ್ಥ್ಯದ ಮೇಲೆ ಮೌಲ್ಯಮಾಪನ ಮಾಡಲಾಗುತ್ತದೆ - ಇದರಲ್ಲಿ ಆರ್ಥಿಕ, ಸಾಮಾಜಿಕ ಮತ್ತು ಹವಾಮಾನ ಬದಲಾವಣೆ ಸೇರಿದಂತೆ ಆದಾಯ ಕ್ರೋಢೀಕರಣ, ಖಾಸಗಿ ಹೂಡಿಕೆ, ಉದ್ಯೋಗ ಸೃಷ್ಟಿ ಮತ್ತು ಸುಧಾರಿತ ಸುರಕ್ಷತೆ, ಒಳಗೊಳ್ಳುವಿಕೆ, ಸಮಾನ ಸೇವೆ ಮತ್ತು ಸ್ವಚ್ಛತೆ ಅಡಕವಾಗಿದೆ.

ii. ನಗರ ಸವಾಲು ನಿಧಿಯು (Urban Challenge Fund) ದೊಡ್ಡ ಪ್ರಮಾಣದ ಖಾಸಗಿ ಹೂಡಿಕೆಯನ್ನು ಉತ್ತೇಜಿಸಲು, ನಗರ ಆಡಳಿತವನ್ನು ಬಲಪಡಿಸಲು ಮತ್ತು ರಾಷ್ಟ್ರೀಯ ಅಭಿವೃದ್ಧಿ ಆದ್ಯತೆಗಳಿಗೆ ಅನುಗುಣವಾಗಿ ಭವಿಷ್ಯದ ನಗರಗಳ ನಿರ್ಮಾಣವನ್ನು ವೇಗಗೊಳಿಸಲು ನಿರೀಕ್ಷಿಸಲಾಗಿದೆ.

ನಗರ ಸವಾಲು ನಿಧಿಯ ಬಗ್ಗೆ ಪದೇ ಪದೇ ಕೇಳಲಾಗುವ ಪ್ರಶ್ನೆಗಳ ಲಿಂಕ್

*****