ਕੇਂਦਰੀ ਗ੍ਰਹਿ ਅਤੇ ਸਹਿਕਾਰਤਾ ਮੰਤਰੀ ਸ਼੍ਰੀ ਅਮਿਤ ਸ਼ਾਹ ਨੇ ਅੱਜ ਨਵੀਂ ਦਿੱਲੀ ਵਿੱਚ ਭਾਰਤ ਦੀ ਪਹਿਲੀ ਸਹਿਕਾਰਿਤਾ-ਅਧਾਰਿਤ ਟੈਕਸੀ ਸੇਵਾ, 'ਭਾਰਤ ਟੈਕਸੀ' ਦੀ ਰਸਮੀ ਸ਼ੁਰੂਆਤ ਕੀਤੀ। ਇਸ ਮੌਕੇ 'ਤੇ ਕੇਂਦਰੀ ਸਹਿਕਾਰਤਾ ਰਾਜ ਮੰਤਰੀ, ਸ਼੍ਰੀ ਕ੍ਰਿਸ਼ਨ ਪਾਲ ਗੁਰਜਰ ਅਤੇ ਸ਼੍ਰੀ ਮੁਰਲੀਧਰ ਮੋਹੋਲ ਅਤੇ ਸਹਿਕਾਰਤਾ ਸਕੱਤਰ, ਡਾ. ਅਸ਼ੀਸ਼ ਕੁਮਾਰ ਭੂਟਾਨੀ ਸਮੇਤ ਕਈ ਪਤਵੰਤੇ ਮੌਜੂਦ ਸਨ। ਦੇਸ਼ ਭਰ ਦੇ ਵੱਖ-ਵੱਖ ਰਾਜਾਂ ਤੋਂ 1,200 ਤੋਂ ਵੱਧ "ਸਾਰਥੀ" (ਡਰਾਈਵਰ ਭਾਈਵਾਲ) ਨੇ ਇਸ ਇਤਿਹਾਸਕ ਸਮਾਗਮ ਵਿੱਚ ਹਿੱਸਾ ਲਿਆ, ਭਾਰਤ ਟੈਕਸੀ ਦੇ ਡਰਾਈਵਰ ਸਸ਼ਕਤੀਕਰਣ ਅਤੇ ਸਹਿਕਾਰੀ ਮਾਲਕੀ ਮਾਡਲ ਲਈ ਵਿਆਪਕ ਸਮਰਥਨ ਦਾ ਪ੍ਰਦਰਸ਼ਨ ਕੀਤਾ।

ਇਸ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਕੇਂਦਰੀ ਗ੍ਰਹਿ ਅਤੇ ਸਹਿਕਾਰਤਾ ਮੰਤਰੀ ਸ਼੍ਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਦੀ ਅਗਵਾਈ ਹੇਠ, ਸਹਿਕਾਰਤਾ ਮੰਤਰਾਲਾ ਅਸੰਗਠਿਤ ਖੇਤਰ ਵਿੱਚ ਕੰਮ ਕਰਨ ਵਾਲੇ ਲੋਕਾਂ ਲਈ ਮਾਲਕੀ ਅਧਿਕਾਰਾਂ ਦਾ ਇੱਕ ਮਾਡਲ ਵਿਕਸਿਤ ਕਰ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਤਿੰਨ ਵਰ੍ਹਿਆਂ ਅੰਦਰ, ਕਸ਼ਮੀਰ ਤੋਂ ਕੰਨਿਆਕੁਮਾਰੀ ਅਤੇ ਦਵਾਰਕਾ ਤੋਂ ਕਾਮਾਖਿਆ ਤੱਕ ਸਹਿਕਾਰ ਟੈਕਸੀਆਂ ਸਾਡੇ ਟੈਕਸੀ ਸਾਥੀਆਂ ਦੀ ਭਲਾਈ ਲਈ ਇੱਕ ਵੱਡਾ ਮਾਧਿਅਮ ਬਣ ਜਾਣਗੀਆਂ। ਸ਼੍ਰੀ ਸ਼ਾਹ ਨੇ ਕਿਹਾ ਕਿ ਜਦੋਂ ਉਨ੍ਹਾਂ ਨੇ ਪਹਿਲੀ ਵਾਰ ਸੰਸਦ ਵਿੱਚ ਸਹਿਕਾਰ ਟੈਕਸੀਆਂ ਦਾ ਮੁੱਦਾ ਲਿਆ ਸੀ, ਤਾਂ ਬਹੁਤ ਸਾਰੇ ਲੋਕਾਂ, ਖਾਸ ਕਰਕੇ ਟੈਕਸੀ ਚਲਾਉਣ ਵਾਲੀਆਂ ਕੰਪਨੀਆਂ ਨੇ ਸਵਾਲ ਕੀਤਾ ਸੀ ਕਿ ਸਰਕਾਰ ਟੈਕਸੀ ਖੇਤਰ ਵਿੱਚ ਕਿਉਂ ਪ੍ਰਵੇਸ਼ ਕਰ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਅਜਿਹੇ ਲੋਕ 'ਸਹਿਕਾਰ' ਅਤੇ 'ਸਰਕਾਰ' ਵਿੱਚ ਅੰਤਰ ਨੂੰ ਨਹੀਂ ਸਮਝਦੇ ਸਨ। ਸ਼੍ਰੀ ਸ਼ਾਹ ਨੇ ਕਿਹਾ ਕਿ ਇਹ ਸਰਕਾਰ ਟੈਕਸੀ ਖੇਤਰ ਵਿੱਚ ਪ੍ਰਵੇਸ਼ ਨਹੀਂ ਕਰ ਰਹੀ ਸੀ , ਸਗੋਂ ਸਹਿਕਾਰ ਟੈਕਸੀ ਦੇ ਖੇਤਰ ਵਿੱਚ ਪ੍ਰਵੇਸ਼ ਕਰ ਰਿਹਾ ਹੈ। 

ਕੇਂਦਰੀ ਸਹਿਕਾਰਤਾ ਮੰਤਰੀ, ਸ਼੍ਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਸ਼ਾਇਦ ਦੁਨੀਆ ਵਿੱਚ ਪਹਿਲੀ ਵਾਰ ਅਜਿਹੀ ਵਿਲੱਖਣ ਕੰਪਨੀ ਹੋਂਦ ਵਿੱਚ ਆ ਰਹੀ ਹੈ, ਜਿਸਦਾ ਅਸਲ ਮਾਲਕ ਕੋਈ ਵਿਅਕਤੀ ਜਾਂ ਬਾਹਰੀ ਕੰਪਨੀ ਨਹੀਂ, ਸਗੋਂ ਟੈਕਸੀ ਡਰਾਈਵਰ ਖੁਦ ਹੈ। ਸਹਿਕਾਰ ਟੈਕਸੀ ਨਾਲ ਜੁੜਿਆ ਹਰ ਸਾਰਥੀ ਭਰਾ ਅਤੇ ਭੈਣ ਇਸ ਸਹਿਕਾਰੀ ਟੈਕਸੀ ਸੋਸਾਇਟੀ ਦਾ ਅਸਲ ਮਾਲਕ ਹੈ। ਉਨ੍ਹਾਂ ਕਿਹਾ ਕਿ ਇਹ ਸੰਕਲਪ ਸਹਿਕਾਰ ਟੈਕਸੀ ਨਾਲ ਜੁੜੇ ਸਾਰਥੀ ਵਰਕਰਾਂ ਦੇ ਜੀਵਨ, ਆਤਮਵਿਸ਼ਵਾਸ ਅਤੇ ਆਰਥਿਕ ਸਥਿਤੀ ਵਿੱਚ ਇੱਕ ਬੁਨਿਆਦੀ ਤਬਦੀਲੀ ਲਿਆਏਗਾ। ਸ਼੍ਰੀ ਸ਼ਾਹ ਨੇ ਇਹ ਵੀ ਕਿਹਾ ਕਿ ਸਾਡੇ ਦੇਸ਼ ਵਿੱਚ ਪਹਿਲਾਂ ਵੀ ਅਜਿਹੇ ਕਈ ਮਾਡਲ ਸਫਲ ਰਹੇ ਹਨ। ਅਮੂਲ ਦੀ ਸ਼ੁਰੂਆਤ ਸਿਰਫ਼ 11 ਦੁੱਧ ਉਤਪਾਦਕਾਂ ਦੁਆਰਾ ਕੀਤੀ ਗਈ ਸੀ। ਅੱਜ, ਗੁਜਰਾਤ ਵਿੱਚ 3.6 ਮਿਲੀਅਨ ਤੋਂ ਵੱਧ ਮਹਿਲਾ ਪਸ਼ੂ ਪਾਲਣ ਕਰਮਚਾਰੀਆਂ ਦਾ ਇੱਕ ਵੱਡਾ ਸਮੂਹ ਹੈ। ਇਹ ਮਹਿਲਾ ਪਸ਼ੂ ਪਾਲਣ ਮਹਿਲਾਵਾਂ 1.25 ਲੱਖ ਕਰੋੜ ਰੁਪਏ ਤੋਂ ਵੱਧ ਦਾ ਕਾਰੋਬਾਰ ਕਰਦੀਆਂ ਹਨ। ਉਨ੍ਹਾਂ ਕਿਹਾ ਕਿ ਇਹ ਮਾਡਲ ਦਰਸਾਉਂਦਾ ਹੈ ਕਿ ਜਦੋਂ ਆਮ ਲੋਕ ਆਪਣੇ ਮਾਲਕ ਬਣ ਜਾਂਦੇ ਹਨ, ਤਾਂ ਛੋਟੀ ਜਿਹੀ ਸ਼ੁਰੂਆਤ ਵੀ ਵਧੀਆ ਨਤੀਜੇ ਦੇ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਅੱਜ, ਪਸ਼ੂ ਪਾਲਣ ਵਾਲੀਆਂ ਮਹਿਲਾਵਾਂ ਦੁੱਧ ਵੇਚ ਕੇ ਸਲਾਨਾ 1 ਕਰੋੜ ਰੁਪਏ ਤੱਕ ਕਮਾ ਰਹੀਆਂ ਹਨ, ਜੋ ਕਿ ਸਹਿਕਾਰੀ ਮਾਡਲ ਦਾ ਕਮਾਲ ਹੈ।

ਸ਼੍ਰੀ ਅਮਿਤ ਸ਼ਾਹ ਨੇ ਟੈਕਸੀ ਡਰਾਈਵਰਾਂ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਉਹ ਅਜੇ ਵੀ ਟੈਕਸੀ ਚਲਾਉਂਦੇ ਹਨ ਅਤੇ ਸਹਿਕਾਰ ਟੈਕਸੀ ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ ਵੀ ਅਜਿਹਾ ਕਰਦੇ ਰਹਿਣਗੇ, ਪਰ ਦੋਵਾਂ ਵਿੱਚ ਇੱਕ ਮਹੱਤਵਪੂਰਨ ਅੰਤਰ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਵਰਤਮਾਨ ਵਿੱਚ, ਟੈਕਸੀ ਦਾ ਪਹੀਆ ਕਿਸੇ ਹੋਰ ਦੀ ਜੇਬ ਵਿੱਚ ਪੈਸੇ ਪਾਉਂਦਾ ਹੈ, ਪਰ ਹੁਣ ਡਰਾਈਵਰਾਂ ਦੇ ਟੈਕਸੀ ਦੇ ਪਹੀਏ ਤੋਂ ਹੋਣ ਵਾਲੀ ਕਮਾਈ ਸਿੱਧੇ ਡਰਾਈਵਰਾਂ ਦੀਆਂ ਜੇਬਾਂ ਵਿੱਚ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਇਹ ਵਿਚਾਰ ਸਹਿਯੋਗ ਦੀ ਭਾਵਨਾ ਤੋਂ ਪੈਦਾ ਹੁੰਦਾ ਹੈ। ਸਹਿਯੋਗ ਦਾ ਅਸਲ ਅਰਥ ਇਹ ਹੈ ਕਿ ਜਦੋਂ ਛੋਟੀ ਪੂੰਜੀ ਵਾਲੇ ਬਹੁਤ ਸਾਰੇ ਲੋਕ ਆਪਣੀ ਤਾਕਤ ਇਕੱਠੀ ਕਰਦੇ ਹਨ, ਤਾਂ ਉਹ ਮਿਲ ਕੇ ਮਹਾਨ ਕੰਮ ਕਰ ਸਕਦੇ ਹਨ। ਵੱਡੀ ਪੂੰਜੀ ਵਾਲੇ ਅਕਸਰ ਵੱਡੇ ਕੰਮ ਇਕੱਲੇ ਕਰਦੇ ਹਨ, ਅਤੇ ਮੁਨਾਫਾ ਕੁਝ ਹੱਦ ਤੱਕ ਸੀਮਤ ਹੁੰਦਾ ਹੈ। ਸ਼੍ਰੀ ਸ਼ਾਹ ਨੇ ਕਿਹਾ ਕਿ ਅੱਜ ਜਿਸ ਸਹਿਕਾਰੀ ਮਾਡਲ 'ਤੇ ਚਰਚਾ ਕੀਤੀ ਜਾ ਰਹੀ ਹੈ ਉਹ ਅੱਜ ਦੇ ਸਮੇਂ ਵਿੱਚ ਸਭ ਤੋਂ ਨਵੀਂ ਅਤੇ ਸਭ ਤੋਂ ਸਫਲ ਪਹਿਲ ਹੈ। ਉਨ੍ਹਾਂ ਕਿਹਾ ਕਿ ਹੁਣ ਟੈਕਸੀ ਦਾ ਪਹੀਆ ਕਿਸੇ ਹੋਰ ਦੀ ਆਮਦਨ ਲਈ ਨਹੀਂ, ਸਗੋਂ ਡਰਾਈਵਰਾਂ ਦੀ ਖੁਸ਼ਹਾਲੀ ਅਤੇ ਭਲਾਈ ਲਈ ਘੁੰਮੇਗਾ।

ਕੇਂਦਰੀ ਸਹਿਕਾਰਤਾ ਮੰਤਰੀ, ਸ਼੍ਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਭਾਰਤ ਵਿੱਚ ਕਈ ਵਿਸ਼ਵ ਪੱਧਰੀ ਸਹਿਕਾਰੀ ਮਾਡਲ ਉੱਭਰੇ ਹਨ, ਜਿਨ੍ਹਾਂ ਵਿੱਚ ਅਮੂਲ, ਇਫਕੋ ਅਤੇ ਕ੍ਰਿਭਕੋ ਵਰਗੇ ਸੰਗਠਨ ਸ਼ਾਮਲ ਹਨ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਵਿੱਚੋਂ ਕਿਸੇ ਵੀ ਸਹਿਕਾਰੀ ਸੰਸਥਾ ਲਈ ਸ਼ੁਰੂਆਤੀ ਪੂੰਜੀ ਵੱਡੀ ਨਹੀਂ ਸੀ। ਇਸੇ ਤਰ੍ਹਾਂ, ਸਹਿਕਾਰ ਟੈਕਸੀ ਵਿੱਚ ਸਭ ਤੋਂ ਵੱਡੀ ਸ਼ੇਅਰ ਪੂੰਜੀ ਸਿਰਫ਼ 500 ਰੁਪਏ ਹੈ, ਅਤੇ ਇਹੀ 500 ਰੁਪਏ ਸਾਰਥੀਆਂ ਨੂੰ ਸੱਚੇ ਮਾਲਕਾਂ ਦਾ ਦਰਜਾ ਦੇ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਇਹ ਛੋਟੀ ਜਿਹੀ ਰਕਮ ਸਾਰਥੀਆਂ ਦੀ ਸਖ਼ਤ ਮਿਹਨਤ, ਸਵੈ-ਮਾਣ ਅਤੇ ਆਰਥਿਕ ਆਜ਼ਾਦੀ ਦੀ ਨੀਂਹ ਬਣ ਜਾਵੇਗੀ।

ਸ਼੍ਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਹਰ ਪੰਜ ਵਰ੍ਹਿਆਂ ਬਾਅਦ ਹੋਣ ਵਾਲੀਆਂ ਚੋਣਾਂ ਤੋਂ ਬਾਅਦ, ਟੈਕਸੀ ਸਾਰਥੀਆਂ ਦੁਆਰਾ ਚੁਣੇ ਗਏ ਦੋ ਪ੍ਰਤੀਨਿਧੀ ਬੋਰਡ 'ਤੇ ਬੈਠਣਗੇ। ਉਹ ਉਨ੍ਹਾਂ ਦੇ ਹਿਤਾਂ ਦੀ ਦੇਖਭਾਲ ਕਰਨਗੇ ਅਤੇ ਉਨ੍ਹਾਂ ਲਈ ਫੈਸਲੇ ਲੈਣਗੇ। ਇਹ ਸਹਿਯੋਗ ਦੀ ਭਾਵਨਾ ਅਤੇ ਮਾਲਕੀ ਦੀ ਸੱਚੀ ਭਾਵਨਾ ਹੈ। ਉਨ੍ਹਾਂ ਕਿਹਾ ਕਿ ਸਹਿਕਾਰ ਟੈਕਸੀ ਕੁੱਲ ਲਾਭ ਦਾ ਸਿਰਫ਼ 20 ਪ੍ਰਤੀਸ਼ਤ ਹੀ ਰੱਖੇਗੀ, ਭਾਵ ਹਰ 100 ਰੁਪਏ ਵਿੱਚੋਂ ਸਿਰਫ਼ 20 ਰੁਪਏ ਸਹਿਕਾਰ ਟੈਕਸੀ ਕੋਲ ਹੀ ਰਹਿਣਗੇ, ਜੋ ਕਿ ਡਰਾਈਵਰਾਂ ਦੀ ਮਲਕੀਅਤ ਹੈ। ਸ਼੍ਰੀ ਸ਼ਾਹ ਨੇ ਕਿਹਾ ਕਿ ਸਾਰਾ ਮੁਨਾਫ਼ਾ ਭਾਰਤ ਟੈਕਸੀ ਨਾਲ ਜੁੜੇ ਸਾਰਥੀਆਂ ਦੇ ਖਾਤਿਆਂ ਵਿੱਚ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਭਾਰਤ ਟੈਕਸੀ ਦੇ ਪੂੰਜੀ ਖਾਤੇ ਵਿੱਚ ਪਏ 20 ਰੁਪਏ ਦੇ ਵੀ ਮਾਲਕ ਸਾਰਥੀ ਹੋਣਗੇ।

ਕੇਂਦਰੀ ਗ੍ਰਹਿ ਅਤੇ ਸਹਿਕਾਰਤਾ ਮੰਤਰੀ ਨੇ ਕਿਹਾ ਕਿ ਭਾਰਤ ਟੈਕਸੀ ਦੀ ਕਲਪਨਾ ਤਿੰਨੋਂ ਮੌਜੂਦਾ ਕਿਸਮਾਂ ਦੀਆਂ ਟੈਕਸੀਆਂ: ਚਾਰ-ਪਹੀਆ ਟੈਕਸੀਆਂ, ਤਿੰਨ-ਪਹੀਆ ਟੈਕਸੀਆਂ ਅਤੇ ਦੋ-ਪਹੀਆ ਵਾਹਨਾਂ ਨੂੰ ਜੋੜ ਕੇ ਕੀਤੀ ਗਈ ਹੈ। ਉਨ੍ਹਾਂ ਨੇ ਦੇਸ਼ ਦੀਆਂ ਮਹਿਲਾਵਾਂ ਨੂੰ ਦੱਸਿਆ ਕਿ ਭਾਰਤ ਟੈਕਸੀ ਉਨ੍ਹਾਂ ਦੀ ਸੁਰੱਖਿਆ ਨੂੰ ਤਰਜੀਹ ਦੇਵੇਗੀ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੇ "ਸਾਰਥੀ ਦੀਦੀ" ਨਾਮਕ ਇੱਕ ਵਿਲੱਖਣ ਸੰਕਲਪ ਵਿਕਸਿਤ ਕੀਤਾ ਹੈ, ਜਿਸ ਦੇ ਤਹਿਤ ਆਉਣ ਵਾਲੇ ਸਮੇਂ ਵਿੱਚ ਐਪ ਵਿੱਚ ਇੱਕ ਸਮਰਪਿਤ "ਸਾਰਥੀ ਦੀਦੀ" ਵਿੰਡੋ ਸ਼ਾਮਲ ਹੋਵੇਗੀ, ਜਿੱਥੇ ਸਿਰਫ਼ "ਸਾਰਥੀ ਦੀਦੀ" ਹੀ ਰਜਿਸਟਰ ਕਰਨ ਵਾਲੀ ਕਿਸੇ ਵੀ ਮਹਿਲਾ ਨੂੰ ਚੁੱਕ ਸਕੇਗੀ। ਸ੍ਰੀ ਸ਼ਾਹ ਨੇ ਕਿਹਾ ਕਿ "ਸਾਰਥੀ ਦੀਦੀ" ਦੋ-ਪਹੀਆ ਵਾਹਨ ਪ੍ਰਦਾਨ ਕਰੇਗੀ ਅਤੇ ਉਨ੍ਹਾਂ ਨੂੰ ਬਹੁਤ ਘੱਟ ਕਿਰਾਏ 'ਤੇ ਸੁਰੱਖਿਅਤ ਢੰਗ ਨਾਲ ਉਨ੍ਹਾਂ ਦੀ ਮੰਜ਼ਿਲ 'ਤੇ ਪਹੁੰਚਾਏਗੀ। ਉਨ੍ਹਾਂ ਕਿਹਾ ਕਿ ਇਹ ਸਹੂਲਤ ਮਹਿਲਾਵਾਂ ਲਈ ਇੱਕ ਮਹੱਤਵਪੂਰਨ ਅਤੇ ਵਿਵਹਾਰਕ ਰਾਹਤ ਸਾਬਤ ਹੋਵੇਗੀ। ਆਉਣ ਵਾਲੇ ਦਿਨਾਂ ਵਿੱਚ, "ਸਾਰਥੀ ਦੀਦੀ" ਰਾਹੀਂ, ਦੇਸ਼ ਦੀਆਂ ਮਹਿਲਾਵਾਂ ਨੂੰ ਇੱਕ ਸੁਰੱਖਿਅਤ, ਕਿਫਾਇਤੀ ਅਤੇ ਸਤਿਕਾਰਯੋਗ ਯਾਤਰਾ ਵਿਕਲਪ ਤੱਕ ਪਹੁੰਚੇਗੀ। ਇਹ ਸਿਰਫ਼ ਇੱਕ ਸੇਵਾ ਨਹੀਂ ਹੈ, ਸਗੋਂ ਮਹਿਲਾਵਾਂ ਦੀ ਸੁਰੱਖਿਆ, ਸਵੈ-ਨਿਰਭਰਤਾ ਅਤੇ ਮਾਣ-ਸਨਮਾਨ ਵੱਲ ਇੱਕ ਮਹੱਤਵਪੂਰਨ ਕਦਮ ਹੈ।

ਕੇਂਦਰੀ ਗ੍ਰਹਿ ਅਤੇ ਸਹਿਕਾਰਤਾ ਮੰਤਰੀ ਨੇ ਕਿਹਾ ਕਿ ਭਾਰਤ ਟੈਕਸੀ ਨੇ ਨੌਂ ਮੁੱਖ ਸੰਗਠਨਾਂ ਨਾਲ ਸਮਝੌਤਾ ਪੱਤਰ (ਐਮਓਯੂ) 'ਤੇ ਹਸਤਾਖਰ ਕੀਤੇ ਹਨ, ਜਿਨ੍ਹਾਂ ਵਿੱਚ ਦਿੱਲੀ ਟ੍ਰੈਫਿਕ ਪੁਲਿਸ, ਦਿੱਲੀ ਮੈਟਰੋ ਰੇਲ ਕਾਰਪੋਰੇਸ਼ਨ, ਏਅਰਪੋਰਟ ਅਥਾਰਿਟੀ, ਇਫਕੋ ਟੋਕੀਓ ਇੰਸ਼ੋਰੈਂਸ ਅਤੇ ਸਟੇਟ ਬੈਂਕ ਆਫ਼ ਇੰਡੀਆ ਸ਼ਾਮਲ ਹਨ। ਇਹ ਸਮਝੌਤੇ ਭਾਰਤ ਟੈਕਸੀ ਗਾਹਕਾਂ ਨੂੰ ਕਈ ਵਾਧੂ ਲਾਭ ਪ੍ਰਦਾਨ ਕਰਨਗੇ, ਨਾਲ ਹੀ ਇਨ੍ਹਾਂ ਸਾਰੇ ਸੰਗਠਨਾਂ ਨੂੰ ਭਾਰਤ ਟੈਕਸੀ ਸੇਵਾਵਾਂ ਤੱਕ ਅਸਾਨ ਪਹੁੰਚ ਵੀ ਪ੍ਰਦਾਨ ਕਰਨਗੇ। ਉਨ੍ਹਾਂ ਕਿਹਾ ਕਿ ਇਹ ਸੰਗਠਨ ਹੁਣ ਸਹਿਕਾਰ ਟੈਕਸੀ ਦੀ ਸਫਲਤਾ ਵਿੱਚ ਭਾਈਵਾਲ ਬਣ ਗਏ ਹਨ। ਮਾਲਕੀ ਮਾਡਲ 'ਤੇ ਅਧਾਰਿਤ ਇਹ ਨਵਾਂ ਟੈਕਸੀ ਸੰਕਲਪ ਅੱਜ ਪਹਿਲੀ ਵਾਰ ਭਾਰਤ ਵਿੱਚ ਲਾਂਚ ਕੀਤਾ ਗਿਆ ਹੈ, ਜੋ ਨਾ ਸਿਰਫ਼ ਡਰਾਈਵਰਾਂ ਵਿੱਚ ਮਾਲਕੀ ਦੀ ਭਾਵਨਾ ਲਿਆਉਂਦਾ ਹੈ, ਸਗੋਂ ਯਾਤਰੀਆਂ ਅਤੇ ਵੱਖ-ਵੱਖ ਸੰਗਠਨਾਂ ਲਈ ਇੱਕ ਭਰੋਸੇਮੰਦ ਅਤੇ ਸੁਵਿਧਾਜਨਕ ਵਿਕਲਪ ਵੀ ਪ੍ਰਦਾਨ ਕਰਦਾ ਹੈ।

ਸ਼੍ਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਭਾਰਤ ਟੈਕਸੀ ਦੁਆਰਾ ਨਿਰਧਾਰਿਤ ਕੀਤਾ ਗਿਆ ਫਿਕਸਡ ਚਾਰਜ ਸਾਰਥੀ ਦੇ ਖਾਤੇ ਤੋਂ ਵੱਖਰਾ ਰਹੇਗਾ। ਇਸ ਤੋਂ ਇਲਾਵਾ, ਭਾਰਤ ਟੈਕਸੀ ਸਾਰਥੀ ਡਰਾਈਵਰਾਂ ਦੀ ਮਿਹਨਤ ਦੀ ਕਮਾਈ ਵਿੱਚੋਂ ਇੱਕ ਵੀ ਪਰਸੈਂਟ ਕਮਿਸ਼ਨ ਨਹੀਂ ਕੱਟੇਗਾ, ਜਿਸ ਨਾਲ ਉਨ੍ਹਾਂ ਦੀ ਖੁਸ਼ਹਾਲੀ ਵਿੱਚ ਤੇਜ਼ੀ ਨਾਲ ਵਾਧਾ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਭਾਰਤ ਟੈਕਸੀ ਦਾ ਉਦੇਸ਼ ਕੰਪਨੀ ਦੀ ਪੂੰਜੀ ਵਧਾਉਣਾ ਨਹੀਂ ਹੈ, ਸਗੋਂ ਭਾਰਤ ਟੈਕਸੀ ਦੇ ਅਸਲ ਮਾਲਕਾਂ, ਸਾਰਥੀ ਭਰਾਵਾਂ ਅਤੇ ਸਾਰਥੀ ਭੈਣਾਂ ਦੇ ਮੁਨਾਫ਼ੇ ਅਤੇ ਆਮਦਨ ਨੂੰ ਵਧਾਉਣਾ ਹੈ। ਸ਼੍ਰੀ ਸ਼ਾਹ ਨੇ ਕਿਹਾ ਕਿ ਗਾਹਕਾਂ ਦੇ ਭੁਗਤਾਨ ਤੁਰੰਤ ਅਤੇ ਆਪਣੇ ਆਪ ਸਿੱਧੇ ਸਾਰਥੀ ਦੇ ਖਾਤੇ ਵਿੱਚ ਟ੍ਰਾਂਸਫਰ ਹੋ ਜਾਣਗੇ, ਜਿਸ ਨਾਲ ਉਡੀਕ ਦੀ ਜ਼ਰੂਰਤ ਖਤਮ ਹੋ ਜਾਵੇਗੀ। ਕਿਸੇ ਵੀ ਸਾਰਥੀ ਦਾ ਖਾਤਾ ਉਚਿਤ ਸੁਣਵਾਈ ਤੋਂ ਬਿਨਾ ਬੰਦ ਨਹੀਂ ਕੀਤਾ ਜਾਵੇਗਾ। ਹਾਲਾਂਕਿ, ਸਾਰਥੀਆਂ ਦੀ ਇਹ ਵੀ ਜ਼ਿੰਮੇਵਾਰੀ ਹੈ ਕਿ ਉਹ ਗਾਹਕਾਂ ਨਾਲ ਚੰਗਾ ਵਿਵਹਾਰ ਕਰਨ, ਆਪਣੀਆਂ ਟੈਕਸੀਆਂ ਦੀ ਸਦਭਾਵਨਾ ਬਣਾਈ ਰੱਖਣ ਅਤੇ ਸੇਵਾ ਦੀ ਗੁਣਵੱਤਾ 'ਤੇ ਧਿਆਨ ਕੇਂਦ੍ਰਿਤ ਕਰਨ। ਉਨ੍ਹਾਂ ਕਿਹਾ ਕਿ ਸ਼ਿਕਾਇਤਾਂ ਦੇ ਹੱਲ ਲਈ ਇੱਕ ਵਿਆਪਕ ਪ੍ਰਣਾਲੀ ਬਣਾਈ ਗਈ ਹੈ, ਅਤੇ ਨਿਰਪੱਖ ਸੁਣਵਾਈ ਤੋਂ ਬਾਅਦ ਹੀ ਕਾਰਵਾਈ ਕੀਤੀ ਜਾਵੇਗੀ।

ਕੇਂਦਰੀ ਸਹਿਕਾਰਤਾ ਮੰਤਰੀ, ਸ਼੍ਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਹੁਣ ਤੱਕ, ਬੁਕਿੰਗ ਫੀਸ, ਪਲੈਟਫਾਰਮ ਫੀਸ ਅਤੇ ਭਾਰੀ ਕਮਿਸ਼ਨ ਵਰਗੀਆਂ ਚੀਜ਼ਾਂ ਨੇ ਕੰਪਨੀ ਦੀ ਬੈਲੇਂਸ ਸ਼ੀਟਾਂ ਨੂੰ ਮਜ਼ਬੂਤ ​​ਕੀਤਾ ਹੈ ਅਤੇ ਡਰਾਈਵਰਾਂ ਦੀ ਕਮਾਈ ਘਟਾ ਦਿੱਤੀ ਹੈ। ਭਾਰਤ ਟੈਕਸੀ ਕੋਲ ਅਜਿਹੀ ਕੋਈ ਫੀਸ ਜਾਂ ਕਮਿਸ਼ਨ ਨਹੀਂ ਹੈ, ਅਤੇ ਸਾਰਥੀ ਹੀ ਮਾਲਕ ਹੋਣਗੇ। ਇਹ ਵਿਚਾਰ ਪੱਛਮੀ ਮਾਨਸਿਕਤਾ ਵਾਲੇ ਲੋਕਾਂ ਨੂੰ ਸਮਝ ਨਾ ਆਉਣ, ਪਰ ਇਹ ਸਹਿਕਾਰਤਾ ਦੀ ਅਸਲ ਸ਼ਕਤੀ ਹੈ।

ਸ਼੍ਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਭਾਰਤ ਟੈਕਸੀ ਦੀ ਸ਼ੁਰੂਆਤ ਸਹਿਕਾਰੀ ਖੇਤਰ ਲਈ ਨਵੇਂ ਆਯਾਮ ਖੋਲ੍ਹਣ ਦੀ ਸ਼ੁਰੂਆਤ ਵੀ ਹੈ। ਸਹਿਕਾਰੀ ਲਹਿਰ ਭਾਰਤ ਵਿੱਚ ਪਿਛਲੇ 125 ਵਰ੍ਹਿਆਂ ਤੋਂ ਚੱਲ ਰਹੀ ਹੈ, ਪਰ ਹੁਣ ਸਮਾਂ ਆ ਗਿਆ ਹੈ ਕਿ ਸਹਿਕਾਰੀ ਮਾਡਲ ਨੂੰ ਨਵੇਂ ਖੇਤਰਾਂ ਵਿੱਚ ਲਿਜਾਇਆ ਜਾਵੇ। ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਦੀ ਅਗਵਾਈ ਹੇਠ, ਸਹਿਕਾਰਤਾ ਮੰਤਰਾਲਾ ਅਸੰਗਠਿਤ ਖੇਤਰ ਵਿੱਚ ਕੰਮ ਕਰਨ ਵਾਲੇ ਲੋਕਾਂ ਲਈ ਮਾਲਕੀ ਅਧਿਕਾਰਾਂ ਦਾ ਇੱਕ ਮਾਡਲ ਵਿਕਸਿਤ ਕਰ ਰਿਹਾ ਹੈ। ਆਉਣ ਵਾਲੇ ਸਮੇਂ ਵਿੱਚ, ਅਸੀਂ ਇਸ ਮਾਡਲ ਨੂੰ ਤਿੰਨ ਜਾਂ ਚਾਰ ਅਜਿਹੇ ਖੇਤਰਾਂ ਵਿੱਚ ਅੱਗੇ ਵਧਾਵਾਂਗੇ, ਜਿੱਥੇ ਮਿਹਨਤੀ ਆਪਣੇ ਪਸੀਨੇ ਅਤੇ ਮਿਹਨਤ ਦਾ ਫਲ ਉਸੇ ਦੇ ਕੋਲ ਰਹੇਗਾ।

ਕੇਂਦਰੀ ਗ੍ਰਹਿ ਮੰਤਰੀ ਅਤੇ ਸਹਿਕਾਰਤਾ ਮੰਤਰੀ ਨੇ ਕਿਹਾ ਕਿ ਭਾਰਤ ਟੈਕਸੀ ਦੇ ਚਾਰ ਮੁੱਖ ਸਿਧਾਂਤ ਮਾਲਕੀ, ਸੁਰੱਖਿਆ, ਮਾਣ, ਅਤੇ "ਸਬਕਾ ਪਹੀਆ, ਸਾਰੀਆਂ ਦੀ ਪ੍ਰਗਤੀ "ਹਨ, ਜਿਸ ਦਾ ਅਰਥ ਹੈ ਸਾਰਿਆਂ ਲਈ ਲਾਭਾਂ ਦੀ ਨਿਰਪੱਖ ਵੰਡ। ਭਾਰਤ ਟੈਕਸੀ ਇਨ੍ਹਾਂ ਚਾਰ ਉਦੇਸ਼ਾਂ ਨੂੰ ਧਿਆਨ ਵਿੱਚ ਰੱਖ ਕੇ ਸ਼ੁਰੂ ਕੀਤੀ ਗਈ ਸੀ ਅਤੇ ਭਵਿੱਖ ਵਿੱਚ ਇਹ ਇੱਕ ਬਹੁਤ ਸਫਲ ਪ੍ਰਯੋਗ ਸਾਬਤ ਹੋਵੇਗੀ। ਉਨ੍ਹਾਂ ਕਿਹਾ ਕਿ ਇਸਦੀ ਸਥਾਪਨਾ 6 ਜੂਨ, 2025 ਨੂੰ ਕੀਤੀ ਗਈ ਸੀ, ਅਤੇ ਅੱਜ ਵਪਾਰਕ ਤੌਰ 'ਤੇ ਸ਼ੁਰੂ ਹੋ ਰਹੀ ਹੈ। ਸਿਰਫ਼ ਅੱਠ ਮਹੀਨਿਆਂ ਦੇ ਅੰਦਰ, ਭਾਰਤ ਟੈਕਸੀ ਨੇ ਪਹਿਲਾਂ ਹੀ ਦਿੱਲੀ ਅਤੇ ਗੁਜਰਾਤ ਵਿੱਚ ਕਿਸੇ ਵੀ ਹੋਰ ਟੈਕਸੀ ਕੰਪਨੀ ਨਾਲੋਂ ਜ਼ਿਆਦਾ ਸਾਰਥੀ ਅਤੇ ਗਾਹਕ ਰਜਿਸਟਰ ਕਰ ਲਏ ਹਨ। ਕਿਸੇ ਹੋਰ ਕੰਪਨੀ ਨੇ ਇੰਨੇ ਘੱਟ ਸਮੇਂ ਵਿੱਚ ਇੰਨੀ ਵੱਡੀ ਗਿਣਤੀ ਵਿੱਚ ਰਜਿਸਟ੍ਰੇਸ਼ਨ ਪ੍ਰਾਪਤ ਨਹੀਂ ਕੀਤੀ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਆਉਣ ਵਾਲੇ ਦਿਨਾਂ ਵਿੱਚ, ਸਾਡੇ ਸਾਰਥੀ ਭਰਾਵਾਂ ਅਤੇ ਭੈਣਾਂ ਨੂੰ ਆਪਣੇ ਆਪ ਬੀਮਾ, ਸਰਕਾਰੀ ਰੁਜ਼ਗਾਰ ਯੋਜਨਾਵਾਂ, ਕਰਜ਼ੇ, ਸਬਸਿਡੀਆਂ ਅਤੇ ਗਿਗ ਵਰਕਰਾਂ ਨਾਲ ਸਬੰਧਿਤ ਸਾਰੀਆਂ ਸਰਕਾਰੀ ਯੋਜਨਾਵਾਂ ਤੋਂ ਲਾਭ ਪ੍ਰਾਪਤ ਹੋਣਗੇ। ਅਸੀਂ ਇਹ ਯਕੀਨੀ ਬਣਾਉਣ ਲਈ ਲਗਾਤਾਰ ਕੰਮ ਕਰ ਰਹੇ ਹਾਂ ਕਿ ਹਰ ਸਾਰਥੀ ਨੂੰ ਪੂਰਾ ਸਤਿਕਾਰ, ਸੁਰੱਖਿਆ ਅਤੇ ਵਿੱਤੀ ਤਾਕਤ ਮਿਲੇ।

ਸ਼੍ਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਨੇ 2020-21 ਵਿੱਚ ਗਿਗ ਵਰਕਰਾਂ ਦੀ ਭਲਾਈ ਲਈ ਇੱਕ ਮਹੱਤਵਪੂਰਨ ਪਹਿਲਕਦਮੀ ਸ਼ੁਰੂ ਕੀਤੀ ਸੀ। ਹੁਣ, 2025-26 ਦੇ ਬਜਟ ਵਿੱਚ, ਭਾਰਤ ਸਰਕਾਰ ਨੇ ਦੇਸ਼ ਭਰ ਦੇ 125 ਮਿਲੀਅਨ ਤੋਂ ਵੱਧ ਗਿਗ ਵਰਕਰਾਂ ਲਈ ਕਈ ਯੋਜਨਾਵਾਂ ਅਤੇ ਸਹੂਲਤਾਂ ਪੇਸ਼ ਕੀਤੀਆਂ ਹਨ। ਪਹਿਲਾਂ, ਈ-ਸ਼੍ਰਮ ਪੋਰਟਲ 'ਤੇ ਰਜਿਸਟ੍ਰੇਸ਼ਨ ਉਨ੍ਹਾਂ ਲੋਕਾਂ ਤੱਕ ਸੀਮਿਤ ਸਨ ਜਿਨ੍ਹਾਂ ਨੂੰ ਪੈਨਸ਼ਨ ਕਟੌਤੀਆਂ ਪ੍ਰਾਪਤ ਹੋਈਆਂ ਸਨ ਜਾਂ ਰਸਮੀ ਤੌਰ 'ਤੇ ਮਾਨਤਾ ਪ੍ਰਾਪਤ ਕਰਮਚਾਰੀਆਂ ਵਜੋਂ ਰਜਿਸਟਰਡ ਸਨ। ਹੁਣ, ਇਸ ਸੀਮਾ ਨੂੰ ਹਟਾਉਣ ਨਾਲ, ਦੇਸ਼ ਭਰ ਦੇ 125 ਮਿਲੀਅਨ ਗਿਗ ਵਰਕਰ ਈ-ਸ਼੍ਰਮ ਪੋਰਟਲ 'ਤੇ ਰਜਿਸਟਰ ਕਰ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਭਾਰਤ ਟੈਕਸੀ ਨਾਲ ਜੁੜੇ ਸਾਰੇ ਸਾਰਥੀ ਵਰਕਰ ਹੁਣ ਅਸਾਨੀ ਨਾਲ ਈ-ਸ਼੍ਰਮ ਪੋਰਟਲ 'ਤੇ ਰਜਿਸਟਰ ਕਰ ਸਕਦੇ ਹਨ। ਰਜਿਸਟ੍ਰੇਸ਼ਨ ਤੋਂ ਬਾਅਦ, ਉਹ ਪ੍ਰਧਾਨ ਮੰਤਰੀ ਜਨ ਆਰੋਗਯ ਯੋਜਨਾ ਦੇ ਤਹਿਤ ਆਪਣਾ ਅਤੇ ਆਪਣੇ ਪਰਿਵਾਰਾਂ ਲਈ 5 ਲੱਖ ਰੁਪਏ ਤੱਕ ਦਾ ਮੁਫਤ ਡਾਕਟਰੀ ਇਲਾਜ ਪ੍ਰਾਪਤ ਕਰਨਗੇ। ਸਾਰਥੀ ਵਰਕਰ ਭਾਰਤ ਟੈਕਸੀ ਵਿੱਚ ਸ਼ਾਮਲ ਹੋਣ 'ਤੇ ਇਹ ਮੁਫਤ ਡਾਕਟਰੀ ਦੇਖਭਾਲ ਪ੍ਰਾਪਤ ਕਰਨਾ ਸ਼ੁਰੂ ਕਰ ਦੇਣਗੇ। ਇਸ ਤੋਂ ਇਲਾਵਾ, ਈ-ਸ਼੍ਰਮ ਪੋਰਟਲ 'ਤੇ ਰਜਿਸਟਰਡ ਕਰਮਚਾਰੀਆਂ ਲਈ ਉਪਲਬਧ ਕਈ ਹੋਰ ਸਮਾਜਿਕ ਸੁਰੱਖਿਆ ਯੋਜਨਾਵਾਂ ਵੀ ਆਪਣੇ ਆਪ ਕਿਰਿਆਸ਼ੀਲ ਹੋ ਜਾਣਗੀਆਂ।

ਕੇਂਦਰੀ ਗ੍ਰਹਿ ਅਤੇ ਸਹਿਕਾਰਤਾ ਮੰਤਰੀ ਨੇ ਕਿਹਾ ਕਿ ਭਾਰਤ ਟੈਕਸੀ ਮਾਡਲ ਨਾ ਸਿਰਫ਼ ਸਾਰਥੀਆਂ ਦੀ ਆਰਥਿਕ ਸਥਿਤੀ ਨੂੰ ਮਜ਼ਬੂਤ ​​ਕਰੇਗਾ, ਸਗੋਂ ਉਨ੍ਹਾਂ ਦੇ ਸਨਮਾਨ, ਸੁਰੱਖਿਆ ਅਤੇ ਮਾਲਕੀ ਨੂੰ ਵੀ ਯਕੀਨੀ ਬਣਾਏਗਾ। ਉਨ੍ਹਾਂ ਅੱਗੇ ਕਿਹਾ ਕਿ ਭਾਰਤ ਟੈਕਸੀ ਐਪ ਨੂੰ SoS ਅਲਰਟ ਨਾਲ ਜੋੜਿਆ ਗਿਆ ਹੈ, ਜੋ ਐਮਰਜੈਂਸੀ ਦੀ ਸਥਿਤੀ ਵਿੱਚ ਸੁਰੱਖਿਆ ਅਤੇ ਸਹਾਇਤਾ ਤੱਕ ਤੁਰੰਤ ਪਹੁੰਚ ਪ੍ਰਦਾਨ ਕਰਦੇ ਹਨ। ਵਰਤਮਾਨ ਵਿੱਚ, ਦਿੱਲੀ-ਐੱਨਸੀਆਰ ਵਿੱਚ ਅੱਠ ਹੈਲਪਲਾਈਨਾਂ ਅਤੇ ਸਹਾਇਤਾ ਕੇਂਦਰ ਸਥਾਪਿਤ ਕੀਤੇ ਗਏ ਹਨ, ਅਤੇ ਨੇੜਲੇ ਭਵਿੱਖ ਵਿੱਚ ਅਜਿਹੇ ਕੇਂਦਰਾਂ ਦਾ ਇੱਕ ਵਿਸ਼ਾਲ ਨੈੱਟਵਰਕ ਦੇਸ਼ ਭਰ ਵਿੱਚ ਫੈਲਾਇਆ ਜਾਵੇਗਾ। ਪੂਰੀ ਸ਼ਿਕਾਇਤ ਨਿਵਾਰਨ ਪ੍ਰਕਿਰਿਆ ਐਪ, ਵੈੱਬਸਾਈਟ ਅਤੇ ਇੱਕ ਟੋਲ-ਫ੍ਰੀ ਨੰਬਰ ਰਾਹੀਂ ਤਿੰਨ ਪੱਧਰਾਂ 'ਤੇ ਕੰਮ ਕਰੇਗੀ। ਇਸ ਤੋਂ ਇਲਾਵਾ, ਸਾਡੇ ਪ੍ਰਤੀਨਿਧੀ ਨਿਯਮਿਤ ਤੌਰ 'ਤੇ ਸਾਰਥੀਆਂ ਨਾਲ ਮੁਲਾਕਾਤ ਕਰਨਗੇ ਤਾਂ ਜੋ ਕਿਸੇ ਵੀ ਮੁੱਦੇ ਦਾ ਸਮੇਂ ਸਿਰ ਹੱਲ ਯਕੀਨੀ ਬਣਾਇਆ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਅੱਜ ਤੋਂ, ਸਾਰਥੀ ਹਿਡਨ ਚਾਰਜਿਸ ਤੋਂ ਪੂਰੀ ਤਰ੍ਹਾਂ ਮੁਕਤ ਹਨ। ਲੁਕਵੇਂ ਖਰਚੇ ਲੈਣਾ ਸਾਰਥੀਆਂ ਵਿਰੁੱਧ ਧੋਖਾਧੜੀ ਦਾ ਇੱਕ ਰੂਪ ਹੈ। ਟੋਲ, ਪਾਰਕਿੰਗ ਅਤੇ ਹੋਰ ਸਾਰੀਆਂ ਵਾਧੂ ਫੀਸਾਂ ਵੀ ਮੁਆਫ਼ ਕਰ ਦਿੱਤੀਆਂ ਜਾਣਗੀਆਂ। ਇਸ ਤੋਂ ਇਲਾਵਾ, ਹੈਲਪਲਾਈਨ ਸਾਰਥੀਆਂ ਲਈ 24 ਘੰਟੇ, ਹਫ਼ਤੇ ਦੇ ਸੱਤ ਦਿਨ ਉਪਲਬਧ ਰਹੇਗੀ। ਵਰਤਮਾਨ ਵਿੱਚ, ਇਹ ਗੁਜਰਾਤ, ਦਿੱਲੀ ਅਤੇ ਐੱਨਸੀਆਰ ਦੇ ਕੁਝ ਸ਼ਹਿਰਾਂ ਵਿੱਚ ਸ਼ੁਰੂ ਹੋ ਰਿਹਾ ਹੈ। ਪਰ ਤਿੰਨ ਸਾਲਾਂ ਤੋਂ ਵੀ ਘੱਟ ਸਮੇਂ ਵਿੱਚ, ਅਸੀਂ ਹਰ ਰਾਜ ਅਤੇ ਦੇਸ਼ ਦੇ ਹਰ ਵੱਡੇ ਸ਼ਹਿਰ ਤੱਕ ਪਹੁੰਚ ਜਾਵਾਂਗੇ।

ਕੇਂਦਰੀ ਸਹਿਕਾਰਤਾ ਮੰਤਰੀ, ਸ਼੍ਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਆਉਣ ਵਾਲੇ ਦਿਨਾਂ ਵਿੱਚ, ਅਸੀਂ ਭਾਰਤ ਟੈਕਸੀ ਵਿੱਚ ਕਈ ਨਵੀਆਂ ਸੇਵਾਵਾਂ ਜੋੜਾਂਗੇ ਅਤੇ ਇਸ ਦਾ ਨਿਰੰਤਰ ਵਿਸਤਾਰ ਕਰਾਂਗੇ। ਉਨ੍ਹਾਂ ਨੇ ਦਿੱਲੀ-ਐੱਨਸੀਆਰ ਦੇ ਸਾਰੇ ਗਾਹਕਾਂ ਅਤੇ ਡਰਾਈਵਰਾਂ ਨੂੰ ਦੱਸਿਆ ਕਿ ਭਾਰਤ ਟੈਕਸੀ ਅੱਜ ਪੂਰੀ ਤਰ੍ਹਾਂ ਕਾਰਜਸ਼ੀਲ ਹੈ। ਇਹ ਸਿਰਫ਼ ਇੱਕ ਟੈਕਸੀ ਸੇਵਾ ਨਹੀਂ ਹੈ, ਸਗੋਂ ਸਾਡੇ ਦੇਸ਼ ਦੇ ਲੱਖਾਂ ਸਾਰਥੀਆਂ ਦੀ ਖੁਸ਼ਹਾਲੀ, ਸਵੈ-ਮਾਣ ਅਤੇ ਆਰਥਿਕ ਤਾਕਤ ਨੂੰ ਵਧਾਉਣ ਲਈ ਇੱਕ ਸ਼ਕਤੀਸ਼ਾਲੀ ਸਾਧਨ ਹੈ। ਉਨ੍ਹਾਂ ਕਿਹਾ ਕਿ ਦਿੱਲੀ-ਐਨਸੀਆਰ ਵਿੱਚ 250,000 ਤੋਂ ਵੱਧ ਸਾਰਥੀ ਭਾਰਤ ਟੈਕਸੀ ਵਿੱਚ ਸ਼ਾਮਲ ਹੋਏ ਹਨ, 850,000 ਤੋਂ ਵੱਧ ਯਾਤਰੀ ਇਸ ਪਰਿਵਾਰ ਦਾ ਹਿੱਸਾ ਬਣ ਚੁੱਕੇ ਹਨ, ਅਤੇ ਕਈ ਵੱਡੀਆਂ ਕੰਪਨੀਆਂ ਨਾਲ ਸਮਝੌਤੇ ਅੰਤਿਮ ਪੜਾਅ ਵਿੱਚ ਹਨ। ਉਨ੍ਹਾਂ ਵਿਸ਼ਵਾਸ ਪ੍ਰਗਟ ਕੀਤਾ ਕਿ ਭਾਰਤ ਟੈਕਸੀ ਦਾ ਭਵਿੱਖ ਉੱਜਵਲ ਹੈ।

ਇਸ ਤੋਂ ਪਹਿਲਾਂ ਦਿਨ ਵਿੱਚ, ਭਾਰਤ ਟੈਕਸੀ ਦੀ ਸ਼ੁਰੂਆਤ ਪ੍ਰਤੀਕਾਤਮਕ ਤੌਰ 'ਤੇ ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਵਿਗਿਆਨ ਭਵਨ ਤੱਕ 100 ਕਾਰਾਂ ਦੀ ਇੱਕ ਵਿਸ਼ਾਲ ਰੈਲੀ ਨਾਲ ਕੀਤੀ ਗਈ । ਇਹ ਰੈਲੀ ਦੇਸ਼ ਦੇ ਟੈਕਸੀ ਭਾਈਚਾਰੇ ਦੀ ਏਕਤਾ, ਸਵੈ-ਮਾਣ ਅਤੇ ਸਮੂਹਿਕ ਤਾਕਤ ਦਾ ਇੱਕ ਸ਼ਕਤੀਸ਼ਾਲੀ ਪ੍ਰਦਰਸ਼ਨ ਸੀ।

ਇਸ ਪ੍ਰੋਗਰਾਮ ਦੌਰਾਨ, ਚੋਟੀ ਦੇ ਪੰਜ ਉੱਤਮ ਸਾਰਥੀਆਂ ਨੂੰ ਉਨ੍ਹਾਂ ਦੇ ਮਹੱਤਵਪੂਰਨ ਯੋਗਦਾਨਾਂ ਲਈ ਸਨਮਾਨਿਤ ਕੀਤਾ ਗਿਆ, ਇੱਕ ਸਹਿਕਾਰੀ ਮਾਡਲ ਦੇ ਤਹਿਤ ਡਰਾਈਵਰ ਮਾਲਕੀ ਅਤੇ ਭਾਗੀਦਾਰੀ ਨੂੰ ਉਤਸ਼ਾਹਿਤ ਕੀਤਾ ਗਿਆ। ਹਰੇਕ ਸਨਮਾਨਿਤ ਸਾਰਥੀ ਨੂੰ ਇੱਕ ਨਿਜੀ ਦੁਰਘਟਨਾ ਬੀਮਾ ਸਰਟੀਫਿਕੇਟ ਅਤੇ 5 ਲੱਖ ਰੁਪਏ ਦਾ ਪਰਿਵਾਰਕ ਸਿਹਤ ਬੀਮਾ ਕਵਰੇਜ ਪ੍ਰਾਪਤ ਹੋਇਆ, ਜੋ ਕਿ ਡਰਾਈਵਰ ਭਲਾਈ ਅਤੇ ਸਮਾਜਿਕ ਸੁਰੱਖਿਆ ਪ੍ਰਤੀ ਭਾਰਤ ਟੈਕਸੀ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ।

ਇਸ ਸਮਾਗਮ ਦੌਰਾਨ ਮਾਣਯੋਗ ਕੇਂਦਰੀ ਗ੍ਰਹਿ ਮੰਤਰੀ ਅਤੇ ਸਹਿਕਾਰਤਾ ਮੰਤਰੀ ਦੀ ਮੌਜੂਦਗੀ ਵਿੱਚ ਪ੍ਰਮੁੱਖ ਜਨਤਕ ਅਤੇ ਨਿਜੀ ਭਾਈਵਾਲਾਂ ਨਾਲ ਨੌਂ ਸਮਝੌਤਿਆਂ (ਐਮਓਯੂ) ਦਾ ਅਦਾਨ-ਪ੍ਰਦਾਨ ਵੀ ਕੀਤਾ ਗਿਆ, ਜਿਸ ਦਾ ਉਦੇਸ਼ ਕਾਰਜਸ਼ੀਲ ਏਕੀਕਰਣ, ਡਿਜੀਟਲ ਸਮਰੱਥਾ ਅਤੇ ਸੇਵਾ ਗੁਣਵੱਤਾ ਨੂੰ ਮਜ਼ਬੂਤ ​​ਕਰਨਾ ਹੈ।

ਦਿੱਲੀ ਟ੍ਰੈਫਿਕ ਪੁਲਿਸ ਅਤੇ ਸਹਿਕਾਰ ਟੈਕਸੀ ਕੋਆਪ੍ਰੇਟਿਵ ਲਿਮਿਟੇਡ ਵਿਚਕਾਰ ਹਸਤਾਖਰ ਕੀਤੇ ਗਏ ਇੱਕ ਸਮਝੌਤਾ ਪੱਤਰ (MoU) ਦੇ ਤਹਿਤ, ਭਾਰਤ ਟੈਕਸੀ ਨੂੰ ਦਿੱਲੀ ਵਿੱਚ 21 ਸਥਾਨਾਂ 'ਤੇ ਸਥਿਤ 34 ਪ੍ਰੀ-ਪੇਡ ਟੈਕਸੀ ਬੂਥਾਂ ਨੂੰ ਡਿਜੀਟਲ ਰੂਪ ਵਿੱਚ ਚਲਾਉਣ ਦੀ ਇਜਾਜ਼ਤ ਦਿੱਤੀ ਜਾਵੇਗੀ, ਜਿਸ ਨਾਲ ਯਾਤਰੀ ਸੁਰੱਖਿਆ, ਪਾਰਦਰਸ਼ਿਤਾ, ਡਰਾਈਵਰ ਦੀ ਕਮਾਈ ਅਤੇ ਸੇਵਾ ਦੀ ਗੁਣਵੱਤਾ ਵਿੱਚ ਵਾਧਾ ਹੋਵੇਗਾ। ਭਾਰਤ ਟੈਕਸੀ ਨੇ ਦਿੱਲੀ ਟ੍ਰੈਫਿਕ ਪੁਲਿਸ ਦੇ ਸਹਿਯੋਗ ਨਾਲ ਇੱਕ ਸੰਯੁਕਤ ਕਮਾਂਡ ਅਤੇ ਕੰਟਰੋਲ ਸੈਂਟਰ ਵੀ ਸਥਾਪਿਤ ਕੀਤਾ ਹੈ, ਜਿਸ ਵਿੱਚ ਰੀਅਲ-ਟਾਈਮ ਰਾਈਡ ਮੌਨੀਟਰਿੰਗ, SOS ਅਲਰਟ ਅਤੇ ਫੌਰੀ ਐਮਰਜੈਂਸੀ ਪ੍ਰਤੀਕਿਰਿਆ ਵਿਧੀ ਸ਼ਾਮਲ ਹੈ, ਜੋ ਸੜਕ ਸੁਰੱਖਿਆ, ਰੈਗੂਲੇਟਰੀ ਪਾਲਣਾ ਅਤੇ ਯਾਤਰੀ ਸੁਰੱਖਿਆ ਨੂੰ ਉਤਸ਼ਾਹਿਤ ਕਰੇਗੀ।

ਨੈਸ਼ਨਲ ਈ-ਗਵਰਨੈਂਸ ਡਿਵੀਜ਼ਨ (NeGD), MeitY ਨਾਲ ਹਸਤਾਖਰ ਕੀਤੇ ਗਏ ਇਸ ਸਮਝੌਤੇ ਤਹਿਤ ਡਿਜੀਟਲ ਇੰਡੀਆ ਫ੍ਰੇਮਵਰਕ ਦੇ ਅੰਦਰ ਭਾਰਤ ਟੈਕਸੀ ਨੂੰ ਸਲਾਹ ਅਤੇ ਤਕਨੀਕੀ ਸਹਾਇਤਾ ਪ੍ਰਦਾਨ ਕੀਤੀ ਜਾਵੇਗੀ, ਜਿਸ ਨਾਲ ਡਿਜੀਲੌਕਰ, ਉਮੰਗ ਅਤੇ API ਸੇਤੂ ਨਾਲ ਏਕੀਕਰਣ ਸੰਭਵ ਹੋਵੇਗਾ। ਇਹ ਟੈਕਸੀ ਸਾਰਥੀਆਂ ਨੂੰ ਪੇਪਰਲੈੱਸ ਔਨਬੋਰਡਿੰਗ, ਸਰਕਾਰੀ ਸੇਵਾਵਾਂ ਤੱਕ ਏਕੀਕ੍ਰਿਤ ਪਹੁੰਚ, ਸੁਰੱਖਿਅਤ ਇੰਟਰਓਪਰੇਬਲ ਓਪਰੇਸ਼ਨ, ਕੈਸ਼ਲੈੱਸ ਪੈਮੇਂਟ ਅਤੇ ਬਿਹਤਰ ਸੰਚਾਲਨ ਕੁਸ਼ਲਤਾ ਦਾ ਲਾਭ ਲੈਣ ਦੇ ਯੋਗ ਬਣਾਏਗਾ।

ਦਿੱਲੀ ਮੈਟਰੋ ਰੇਲ ਕਾਰਪੋਰੇਸ਼ਨ (DMRC) ਨਾਲ ਸਾਂਝੇਦਾਰੀ ਵਿੱਚ 10 ਪ੍ਰਮੁੱਖ ਮੈਟਰੋ ਸਟੇਸ਼ਨਾਂ 'ਤੇ ਬਾਈਕ ਟੈਕਸੀਆਂ, ਈ - ਆਟੋ/CNG ਆਟੋ ਅਤੇ ਕੈਬਾਂ ਰਾਹੀਂ ਆਖਰੀ-ਮੀਲ ਤੱਕ ਸੰਪਰਕ ਪ੍ਰਦਾਨ ਕੀਤਾ ਜਾਵੇਗਾ, ਜਿਸ ਨਾਲ ਯਾਤਰੀ ਇੱਕ ਪਲੈਟਫਾਰਮ 'ਤੇ ਪੂਰੀ ਯਾਤਰਾ ਦੀ ਯੋਜਨਾ ਬਣਾ ਸਕਣਗੇ ਅਤੇ ਭੁਗਤਾਨ ਕਰ ਸਕਣਗੇ, ਜਦਕਿ ਡਰਾਈਵਰਾਂ ਨੂੰ ਵਧੇਰੇ ਯਾਤਰਾਵਾਂ ਅਤੇ ਘੱਟ ਵਿਹਲੇ ਸਮੇਂ ਦਾ ਲਾਭ ਮਿਲੇਗਾ।

ਏਅਰਪੋਰਟ ਅਥਾਰਿਟੀ ਆਫ਼ ਇੰਡੀਆ (ਏਏਆਈ) ਨਾਲ ਹਸਤਾਖਰ ਕੀਤੇ ਗਏ ਐੱਮਓਯੂ ਦੇਸ਼ ਭਰ ਦੇ ਏਏਆਈ ਹਵਾਈ ਅੱਡਿਆਂ 'ਤੇ ਭਾਰਤ ਟੈਕਸੀ ਦੇ ਸੰਚਾਲਨ ਨੂੰ ਨਿਯਮਿਤ ਕਰੇਗਾ, ਜਿਸ ਵਿੱਚ ਪਿਕ-ਅੱਪ ਜ਼ੋਨ, ਮਨਜ਼ੂਰੀ ਵਾਲੇ ਸਾਈਨੇਜ਼ ਅਤੇ ਸਖ਼ਤ ਸੁਰੱਖਿਆ ਅਤੇ ਸੇਵਾ ਮਾਪਦੰਡ ਹੋਣਗੇ, ਜਿਸ ਨਾਲ ਪੂਰੇ ਭਾਰਤ ਵਿੱਚ ਨਿਯੰਤ੍ਰਿਤ ਹਵਾਈ ਅੱਡਿਆਂ ਦੇ ਸੰਚਾਲਨ ਨੂੰ ਸਮਰੱਥ ਬਣਾਇਆ ਜਾਵੇਗਾ।

ਦਿੱਲੀ ਟੂਰਿਜ਼ਮ ਐਂਡ ਟ੍ਰਾਂਸਪੋਰਟੇਸ਼ਨ ਡਿਵੈਲਪਮੈਂਟ ਕਾਰਪੋਰੇਸ਼ਨ/ਦਿੱਲੀ ਏਅਰਪੋਰਟ ਪਾਰਕਿੰਗ ਸਰਵਿਸਿਜ਼ (DAPS-GMR ਸਮਰਥਿਤ) ਨਾਲ ਹੋਏ ਇੱਕ ਸਮਝੌਤੇ ਦੇ ਤਹਿਤ, ਭਾਰਤ ਟੈਕਸੀ ਦੀਆਂ ਵ੍ਹਾਈਟ ਕੈਬ ਸੇਵਾਵਾਂ ਨੂੰ IGI ਏਅਰਪੋਰਟ ਟਰਮੀਨਲਾਂ 'ਤੇ ਕਈ ਪਾਰਕਿੰਗ ਥਾਵਾਂ 'ਤੇ ਮਨਜ਼ੂਰੀ ਦਿੱਤੀ ਗਈ ਹੈ। DAPS ਪਹਿਲੇ ਸਾਲ ਲਈ ਪ੍ਰਤੀ ਟਰਿੱਪ 245 ਰੁਪਏ ਦੀ ਪਿਕ-ਅੱਪ ਫੀਸ 'ਤੇ 20% ਛੋਟ ਦੀ ਪੇਸ਼ਕਸ਼ ਕਰੇਗਾ, ਜੋ ਭਾਰਤ ਟੈਕਸੀ ਦੀਆਂ ਕਾਲੀ-ਪੀਲੀ ਸੇਵਾਵਾਂ ਦੇ ਪੂਰਕ ਹਨ ਅਤੇ ਹਵਾਈ ਅੱਡਿਆਂ ਦੀਆਂ ਸਵਾਰੀਆਂ ਦੀ ਗਿਣਤੀ ਅਤੇ ਮਾਲੀਏ ਵਿੱਚ ਮਹੱਤਵਪੂਰਨ ਵਾਧਾ ਕਰੇਗਾ ।

ਇਫਕੋ ਟੋਕੀਓ ਨੂੰ ਭਾਰਤ ਟੈਕਸੀ ਦੇ ਬੀਮਾ ਭਾਈਵਾਲ ਵਜੋਂ ਸ਼ਾਮਲ ਕੀਤਾ ਗਿਆ ਹੈ, ਜੋ ਸਰਥੀਆਂ ਨੂੰ ਮਾਮੂਲੀ ਦਰਾਂ 'ਤੇ 5 ਲੱਖ ਰੁਪਏ ਦਾ ਨਿਜੀ ਦੁਰਘਟਨਾ ਬੀਮਾ ਪ੍ਰਦਾਨ ਕਰੇਗਾ, ਨਾਲ ਹੀ ਲੰਬੇ ਸਮੇਂ ਦੇ ਸਾਰਥੀਆਂ ਦੀ ਤੰਦਰੁਸਤੀ ਅਤੇ ਬੀਮਾ ਸਮਾਧਾਨਾਂ 'ਤੇ ਸਲਾਹ ਸਹਾਇਤਾ ਵੀ ਪ੍ਰਦਾਨ ਕਰੇਗਾ ।

ਪੇਟੀਐੱਮ ਨਾਲ ਸਮਝੌਤੇ ਤਹਿਤ  ਡਿਜੀਟਲ ਭੁਗਤਾਨ, ਕੋ-ਬ੍ਰਾਂਡਿਡ ਔਫਰਿੰਗ, ਅਤੇ ਫਿਨਟੈੱਕ ਸਮਰੱਥਾਵਾਂ ਨੂੰ ਸਮਰੱਥ ਬਣਾਏਗਾ, ਜਿਸ ਵਿੱਚ ਭੁਗਤਾਨ ਗੇਟਵੇ ਏਕੀਕਰਣ ਅਤੇ ਪੇਟੀਐੱਮ ਦੇ ਪਾਰਟਨਰ ਈਕੋਸਿਸਟਮ ਤੱਕ ਪਹੁੰਚ ਸ਼ਾਮਲ ਹੈ। ਪੇਟੀਐੱਮ ਪਰਿਵਾਰਕ ਕਵਰੇਜ ਸਹਿਤ ਡਰਾਈਵਰ ਸਮੂਹ ਸਿਹਤ ਬੀਮਾ ਵਿੱਚ ਵੀ ਸਹਿਯੋਗ ਕਰ ਰਿਹਾ ਹੈ।

ਜੀਐੱਮਆਰ ਨਾਲ ਸਾਂਝੇਦਾਰੀ ਆਈਜੀਆਈ ਹਵਾਈ ਅੱਡੇ ਦੇ ਟਰਮੀਨਲਾਂ 'ਤੇ ਭਾਰਤ ਟੈਕਸੀ ਦੀ ਨਿਯੰਤ੍ਰਿਤ ਪਹੁੰਚ ਅਤੇ ਸੇਵਾ ਵਿਸਥਾਰ ਨੂੰ ਮਜ਼ਬੂਤ ​​ਕਰੇਗੀ, ਜਿਸ ਨਾਲ ਹਵਾਈ ਅੱਡੇ ਦੀ ਗਤੀਸ਼ੀਲਤਾ ਕਾਰਜਾਂ ਨੂੰ ਹੋਰ ਮਜ਼ਬੂਤੀ ਮਿਲੇਗੀ।

ਐੱਸਬੀਆਈ  ਨਾਲ ਹਸਤਾਖਰ ਕੀਤੇ ਗਏ ਸਮਝੌਤੇ ਤਹਿਤ ਪ੍ਰਧਾਨ ਮੰਤਰੀ ਮੁਦਰਾ ਯੋਜਨਾ ਵਰਗੀਆਂ ਯੋਜਨਾਵਾਂ ਦੇ ਤਹਿਤ ਵਪਾਰਕ ਯਾਤਰੀ ਵਾਹਨਾਂ ਲਈ ਤਰਜੀਹੀ ਵਿੱਤ ਪ੍ਰਦਾਨ ਕੀਤਾ ਜਾਵੇਗਾ। ਸਹਿਕਾਰ ਟੈਕਸੀ ਯੋਗ ਡਰਾਈਵਰ-ਮਾਲਕਾਂ ਦੀ ਪਛਾਣ ਕਰੇਗੀ ਅਤੇ ਸਹਾਇਤਾ ਕਰੇਗੀ, ਜਦੋਂ ਕਿ ਐੱਸਬੀਆਈ ਆਪਣੇ ਮੌਜੂਦਾ ਦਿਸ਼ਾ-ਨਿਰਦੇਸ਼ਾਂ ਦੇ ਅਨੁਸਾਰ ਤੁਰੰਤ ਪ੍ਰਕਿਰਿਆ ਨੂੰ ਯਕੀਨੀ ਬਣਾਏਗਾ।

*****

ਆਰਕੇ/ਏਕੇ/ਆਰਆਰ/ਪੀਆਰ/ਪੀਐਸ/ਏਕੇ