ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ಇಂದು ನವದೆಹಲಿಯಲ್ಲಿ ಭಾರತದ ಮೊದಲ ಸಹಕಾರ ಆಧಾರಿತ ಟ್ಯಾಕ್ಸಿ ಸೇವೆ 'ಭಾರತ್ ಟ್ಯಾಕ್ಸಿ' (Bharat Taxi) ಗೆ ಅಧಿಕೃತವಾಗಿ ಚಾಲನೆ ನೀಡಿದರು. ಈ ಸಂದರ್ಭದಲ್ಲಿ ಕೇಂದ್ರ ಸಹಕಾರ ಸಚಿವಾಲಯದ ರಾಜ್ಯ ಸಚಿವರಾದ ಶ್ರೀ ಕೃಷ್ಣ ಪಾಲ್ ಗುರ್ಜರ್ ಮತ್ತು ಶ್ರೀ ಮುರಳಿಧರ್ ಮೋಹೋಲ್, ಹಾಗೂ ಸಹಕಾರ ಇಲಾಖೆಯ ಕಾರ್ಯದರ್ಶಿ ಡಾ. ಆಶಿಷ್ ಕುಮಾರ್ ಭೂತಾನಿ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು. ಭಾರತ್ ಟ್ಯಾಕ್ಸಿಯ ಚಾಲಕರ ಸಬಲೀಕರಣ ಮತ್ತು ಸಹಕಾರ ಮಾಲೀಕತ್ವ ಆಧಾರಿತ ಮಾದರಿಗೆ ವ್ಯಾಪಕ ಬೆಂಬಲ ವ್ಯಕ್ತಪಡಿಸುವಂತೆ, ವಿವಿಧ ರಾಜ್ಯಗಳ 1,200ಕ್ಕೂ ಹೆಚ್ಚು "ಸಾರಥಿಗಳು" (ಚಾಲಕ ಪಾಲುದಾರರು) ಈ ಐತಿಹಾಸಿಕ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಜಿ ಅವರ ನೇತೃತ್ವದಲ್ಲಿ ಸಹಕಾರ ಸಚಿವಾಲಯವು ಅಸಂಘಟಿತ ವಲಯದಲ್ಲಿ ಕೆಲಸ ಮಾಡುವ ಜನರಿಗಾಗಿ 'ಮಾಲೀಕತ್ವದ ಹಕ್ಕು' (ownership-rights) ಮಾದರಿಯನ್ನು ಅಭಿವೃದ್ಧಿಪಡಿಸುತ್ತಿದೆ ಎಂದು ಹೇಳಿದರು. ಮುಂದಿನ ಮೂರು ವರ್ಷಗಳಲ್ಲಿ, ಕಾಶ್ಮೀರದಿಂದ ಕನ್ಯಾಕುಮಾರಿಯವರೆಗೆ ಮತ್ತು ದ್ವಾರಕಾದಿಂದ ಕಾಮಾಖ್ಯಾದವರೆಗೆ, 'ಸಹಕಾರ ಟ್ಯಾಕ್ಸಿ'ಯು ನಮ್ಮ ಟ್ಯಾಕ್ಸಿ ಸಾರಥಿಗಳ ಕಲ್ಯಾಣಕ್ಕಾಗಿ ಒಂದು ದೊಡ್ಡ ಮಾಧ್ಯಮವಾಗಲಿದೆ ಎಂದು ಅವರು ತಿಳಿಸಿದರು. ತಾವು ಸಂಸತ್ತಿನಲ್ಲಿ ಮೊದಲು ಸಹಕಾರ ಟ್ಯಾಕ್ಸಿಯ ವಿಷಯವನ್ನು ಪ್ರಸ್ತಾಪಿಸಿದಾಗ, ಅನೇಕ ಜನರು - ಅದರಲ್ಲೂ ಮುಖ್ಯವಾಗಿ ಟ್ಯಾಕ್ಸಿ ಕಾರ್ಯಾಚರಣೆಗೆ ಸಂಬಂಧಿಸಿದ ಕಂಪನಿಗಳು - ಸರ್ಕಾರವು ಟ್ಯಾಕ್ಸಿ ವಲಯಕ್ಕೆ ಏಕೆ ಪ್ರವೇಶಿಸುತ್ತಿದೆ ಎಂದು ಪ್ರಶ್ನಿಸಿದ್ದರು ಎಂದು ಶ್ರೀ ಶಾ ಹೇಳಿದರು. ಅಂತಹ ಜನರಿಗೆ 'ಸಹಕಾರ' ಮತ್ತು 'ಸರ್ಕಾರ' ನಡುವಿನ ವ್ಯತ್ಯಾಸ ತಿಳಿದಿಲ್ಲ ಎಂದು ಅವರು ಮಾರ್ಮಿಕವಾಗಿ ನುಡಿದರು. ಸರ್ಕಾರವು ಟ್ಯಾಕ್ಸಿ ವಲಯಕ್ಕೆ ಪ್ರವೇಶಿಸುತ್ತಿಲ್ಲ; ಬದಲಾಗಿ, 'ಸಹಕಾರ' ಟ್ಯಾಕ್ಸಿ ವಲಯಕ್ಕೆ ಪ್ರವೇಶಿಸುತ್ತಿದೆ ಎಂದು ಶ್ರೀ ಶಾ ಅವರು ಸ್ಪಷ್ಟಪಡಿಸಿದರು.

ಬಹುಶಃ ಇಡೀ ವಿಶ್ವದಲ್ಲೇ ಮೊದಲ ಬಾರಿಗೆ ಇಂತಹ ವಿಶಿಷ್ಟ ಕಂಪನಿಯೊಂದು ಅಸ್ತಿತ್ವಕ್ಕೆ ಬರುತ್ತಿದೆ, ಇದರ ನಿಜವಾದ ಮಾಲೀಕರು ಯಾವುದೇ ವ್ಯಕ್ತಿಯಲ್ಲ ಅಥವಾ ಯಾವುದೇ ಹೊರಗಿನ ಕಂಪನಿಯೂ ಅಲ್ಲ, ಬದಲಿಗೆ ಟ್ಯಾಕ್ಸಿ ಓಡಿಸುವ 'ಸಾರಥಿ'ಗಳೇ ಇದರ ಮಾಲೀಕರು ಎಂದು ಕೇಂದ್ರ ಸಹಕಾರ ಸಚಿವ ಶ್ರೀ ಅಮಿತ್ ಶಾ ಅವರು ಹೇಳಿದರು. 'ಸಹಕಾರ ಟ್ಯಾಕ್ಸಿ'ಯೊಂದಿಗೆ ಸಂಯೋಜಿತವಾಗಿರುವ ಪ್ರತಿಯೊಬ್ಬ ಸಾರಥಿ ಸಹೋದರ-ಸಹೋದರಿಯರೂ ಈ ಸಹಕಾರ ಟ್ಯಾಕ್ಸಿ ಸೊಸೈಟಿಯ ನಿಜವಾದ ಮಾಲೀಕರಾಗಿದ್ದಾರೆ. ಈ ಪರಿಕಲ್ಪನೆಯು ಸಹಕಾರ ಟ್ಯಾಕ್ಸಿಗೆ ಸೇರುವ ಸಾರಥಿಗಳ ಜೀವನ, ಆತ್ಮವಿಶ್ವಾಸ ಮತ್ತು ಆರ್ಥಿಕ ಸ್ಥಿತಿಯಲ್ಲಿ ಮೂಲಭೂತ ಬದಲಾವಣೆಯನ್ನು ತರಲಿದೆ ಎಂದು ಅವರು ತಿಳಿಸಿದರು. ಇಂತಹ ಅನೇಕ ಮಾದರಿಗಳು ಈ ಹಿಂದೆ ನಮ್ಮ ದೇಶದಲ್ಲಿ ಯಶಸ್ವಿಯಾಗಿವೆ ಎಂದು ಶ್ರೀ ಶಾ  ಹೇಳಿದರು. ಕೇವಲ 11 ಹಾಲು ಉತ್ಪಾದಕರಿಂದ ಪ್ರಾರಂಭವಾದ 'ಅಮುಲ್', ಇಂದು ಗುಜರಾತ್‌ ನಲ್ಲಿ 36 ಲಕ್ಷಕ್ಕೂ ಹೆಚ್ಚು ಮಹಿಳಾ ಪಶುಪಾಲಕರ ದೊಡ್ಡ ಆಲದ ಮರವಾಗಿ ಬೆಳೆದಿದೆ. ಈ ಮಹಿಳಾ ಪಶುಪಾಲಕರು ಒಂದು ಲಕ್ಷದ ಇಪ್ಪತ್ತೈದು ಸಾವಿರ ಕೋಟಿ ರೂಪಾಯಿಗಳಿಗಿಂತ ಹೆಚ್ಚಿನ ವಹಿವಾಟು ನಡೆಸುತ್ತಿದ್ದಾರೆ. ಸಾಮಾನ್ಯ ಜನರು ತಾವೇ ಮಾಲೀಕರಾದಾಗ, ಸಣ್ಣ ಆರಂಭವು ಹೇಗೆ ದೊಡ್ಡ ಫಲಿತಾಂಶಗಳನ್ನು ನೀಡಬಲ್ಲದು ಎಂಬುದಕ್ಕೆ ಈ ಮಾದರಿಯೇ ಸಾಕ್ಷಿ ಎಂದು ಅವರು ಹೇಳಿದರು. ಇಂದು ಮಹಿಳಾ ಪಶುಪಾಲಕರು ಹಾಲು ಮಾರಾಟ ಮಾಡುವ ಮೂಲಕ ವಾರ್ಷಿಕ ಒಂದು ಕೋಟಿ ರೂಪಾಯಿಗಳವರೆಗೆ ಸಂಪಾದಿಸುತ್ತಿದ್ದಾರೆ, ಇದು ಸಹಕಾರ ಮಾದರಿಯ ಅದ್ಭುತವಾಗಿದೆ ಎಂದು ಅವರು ಶ್ಲಾಘಿಸಿದರು.

ಶ್ರೀ ಅಮಿತ್ ಶಾ ಅವರು ಟ್ಯಾಕ್ಸಿ ಸಾರಥಿಗಳಿಗೆ ಮನವಿ ಮಾಡುತ್ತಾ, "ನೀವು ಈಗಲೂ ಟ್ಯಾಕ್ಸಿ ಓಡಿಸುತ್ತಿದ್ದೀರಿ, ಸಹಕಾರ ಟ್ಯಾಕ್ಸಿಗೆ ಸೇರಿದ ನಂತರವೂ ಟ್ಯಾಕ್ಸಿ ಓಡಿಸುವುದನ್ನು ಮುಂದುವರಿಸುತ್ತೀರಿ; ಆದರೆ ಇವೆರಡರ ನಡುವೆ ಒಂದು ದೊಡ್ಡ ವ್ಯತ್ಯಾಸವಿರುತ್ತದೆ" ಎಂದು ಹೇಳಿದರು. ಪ್ರಸ್ತುತ ಟ್ಯಾಕ್ಸಿಯ ಚಕ್ರ ಉರುಳಿದಾಗ ಬರುವ ಹಣ ಬೇರೆಯವರ ಜೇಬಿಗೆ ಸೇರುತ್ತಿದೆ, ಆದರೆ ಇನ್ನು ಮುಂದೆ ಸಾರಥಿಗಳ ಟ್ಯಾಕ್ಸಿ ಚಕ್ರದಿಂದ ಬರುವ ಆದಾಯ ನೇರವಾಗಿ ಸಾರಥಿಗಳ ಸ್ವಂತ ಜೇಬಿಗೆ ಸೇರಲಿದೆ ಎಂದು ಅವರು ತಿಳಿಸಿದರು. ಈ ಆಲೋಚನೆಯು ಸಹಕಾರದ ಮನೋಭಾವದಿಂದ ಹುಟ್ಟಿಕೊಂಡಿದೆ ಎಂದು ಅವರು ಹೇಳಿದರು. ಅಲ್ಪ ಪ್ರಮಾಣದ ಬಂಡವಾಳ ಹೊಂದಿರುವ ಅನೇಕ ಜನರು ತಮ್ಮ ಶಕ್ತಿಯನ್ನು ಒಟ್ಟುಗೂಡಿಸಿದಾಗ, ಅವರು ಒಟ್ಟಾಗಿ ದೊಡ್ಡ ಕಾರ್ಯಗಳನ್ನು ಸಾಧಿಸಬಹುದು ಎಂಬುದೇ ಸಹಕಾರದ ನಿಜವಾದ ಅರ್ಥವಾಗಿದೆ. ದೊಡ್ಡ ಬಂಡವಾಳ ಹೊಂದಿರುವವರು ದೊಡ್ಡ ಕೆಲಸಗಳನ್ನು ಏಕಾಂಗಿಯಾಗಿ ಮಾಡುತ್ತಾರೆ ಮತ್ತು ಲಾಭವೂ ಕೆಲವೇ ಜನರಿಗೆ ಸೀಮಿತವಾಗಿರುತ್ತದೆ. ಇಂದು ಚರ್ಚಿಸಲಾಗುತ್ತಿರುವ ಸಹಕಾರ ಮಾದರಿಯು ಇಂದಿನ ಕಾಲದ ಅತ್ಯಂತ ನೂತನ ಮತ್ತು ಯಶಸ್ವಿ ಆರಂಭವಾಗಿದೆ ಎಂದು ಶ್ರೀ ಶಾ ಅವರು ಹೇಳಿದರು. ಇನ್ನು ಮುಂದೆ ಟ್ಯಾಕ್ಸಿಯ ಚಕ್ರವು ಬೇರೆಯವರ ಆದಾಯಕ್ಕಾಗಿ ಓಡುವುದಿಲ್ಲ, ಬದಲಿಗೆ ಟ್ಯಾಕ್ಸಿ ಸಾರಥಿಗಳ ಏಳಿಗೆ ಮತ್ತು ಯೋಗಕ್ಷೇಮಕ್ಕಾಗಿ ಓಡಲಿದೆ ಎಂದು ಅವರು ಆಶಯ ವ್ಯಕ್ತಪಡಿಸಿದರು.

ಕೇಂದ್ರ ಸಹಕಾರ ಸಚಿವ ಶ್ರೀ ಅಮಿತ್ ಶಾ ಅವರು ಮಾತನಾಡಿ, ಭಾರತದಲ್ಲಿ ಈಗಾಗಲೇ ಅಮುಲ್ (Amul), ಇಫ್ಕೊ (IFFCO), ಕ್ರಿಬ್ಕೊ (KRIBHCO) ನಂತಹ ಅನೇಕ ವಿಶ್ವದರ್ಜೆಯ ಸಹಕಾರ ಮಾದರಿಗಳನ್ನು ನಿರ್ಮಿಸಲಾಗಿದೆ ಎಂದು ಹೇಳಿದರು. ಈ ಯಾವುದೇ ಸಹಕಾರ ಸಂಸ್ಥೆಗಳು ಆರಂಭದಲ್ಲಿ ದೊಡ್ಡ ಪ್ರಮಾಣದ ಬಂಡವಾಳವನ್ನು ಹೊಂದಿರಲಿಲ್ಲ ಎಂದು ಅವರು ನೆನಪಿಸಿದರು. ಅದೇ ರೀತಿ, 'ಸಹಕಾರ ಟ್ಯಾಕ್ಸಿ'ಯಲ್ಲಿ ಗರಿಷ್ಠ ಷೇರು ಬಂಡವಾಳ ಕೇವಲ 500 ರೂಪಾಯಿಗಳಾಗಿದ್ದು, ಇದೇ 500 ರೂಪಾಯಿಗಳು ಸಾರಥಿಗಳಿಗೆ ನಿಜವಾದ ಮಾಲೀಕರ ಸ್ಥಾನಮಾನವನ್ನು ನೀಡುತ್ತಿವೆ ಎಂದು ಅವರು ತಿಳಿಸಿದರು. ಈ ಸಣ್ಣ ಮೊತ್ತವು ಟ್ಯಾಕ್ಸಿ ಸಾರಥಿಗಳ ಕಠಿಣ ಪರಿಶ್ರಮ, ಸ್ವಾಭಿಮಾನ ಮತ್ತು ಆರ್ಥಿಕ ಸ್ವಾತಂತ್ರ್ಯಕ್ಕೆ ಅಡಿಪಾಯವಾಗಲಿದೆ ಎಂದು ಅವರು ಹೇಳಿದರು.

ಶ್ರೀ ಅಮಿತ್ ಶಾ ಅವರು ಮಾತನಾಡಿ, ಪ್ರತಿ ಐದು ವರ್ಷಕ್ಕೊಮ್ಮೆ ನಡೆಯುವ ಚುನಾವಣೆಯ ನಂತರ, ಟ್ಯಾಕ್ಸಿ ಸಾರಥಿಗಳಿಂದ ಆಯ್ಕೆಯಾದ ಇಬ್ಬರು ಪ್ರತಿನಿಧಿಗಳು ಮಂಡಳಿಯಲ್ಲಿ ಕುಳಿತುಕೊಳ್ಳಲಿದ್ದಾರೆ ಎಂದು ಹೇಳಿದರು. ಅವರು ಸಾರಥಿಗಳ ಹಿತಾಸಕ್ತಿಗಳನ್ನು ನೋಡಿಕೊಳ್ಳುತ್ತಾರೆ ಮತ್ತು ಅವರ ಪರವಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಾರೆ. ಇದೇ ಸಹಕಾರದ ಜೀವಾಳ ಮತ್ತು ನಿಜವಾದ ಮಾಲೀಕತ್ವದ ಹಕ್ಕುಗಳ ಸ್ಫೂರ್ತಿಯಾಗಿದೆ ಎಂದು ಅವರು ತಿಳಿಸಿದರು. ಸಹಕಾರ ಟ್ಯಾಕ್ಸಿಯು ಒಟ್ಟು ಲಾಭದಲ್ಲಿ ಕೇವಲ 20 ಪ್ರತಿಶತವನ್ನು ಮಾತ್ರ ತನ್ನಲ್ಲಿ ಇರಿಸಿಕೊಳ್ಳಲಿದೆ; ಅಂದರೆ, 100 ರೂಪಾಯಿಗಳಲ್ಲಿ ಸಹಕಾರ ಟ್ಯಾಕ್ಸಿಯು ಕೇವಲ 20 ರೂಪಾಯಿಗಳನ್ನು ಮಾತ್ರ ತನ್ನ ಬಳಿ ಇಟ್ಟುಕೊಳ್ಳುತ್ತದೆ—ಇದರ ಮಾಲೀಕರೂ ಸಹ ಸಾರಥಿಗಳೇ ಆಗಿರುತ್ತಾರೆ ಎಂದು ಶ್ರೀ ಶಾ ಹೇಳಿದರು. ಸಂಪೂರ್ಣ ಲಾಭವು ಭಾರತ್ ಟ್ಯಾಕ್ಸಿಯೊಂದಿಗೆ ಸಂಯೋಜಿತವಾಗಿರುವ ಸಾರಥಿಯ ಖಾತೆಗೆ ಸೇರಲಿದೆ ಎಂದು ಅವರು ತಿಳಿಸಿದರು. ಭಾರತ್ ಟ್ಯಾಕ್ಸಿಯ ಬಂಡವಾಳ ಖಾತೆಯಲ್ಲಿ ಉಳಿಯುವ 20 ರೂಪಾಯಿಗಳ ಮಾಲೀಕರೂ ಸಹ ಸಾರಥಿಗಳೇ ಆಗಿರುತ್ತಾರೆ ಎಂದು ಅವರು ಸ್ಪಷ್ಟಪಡಿಸಿದರು.

ನಾಲ್ಕು ಚಕ್ರದ ಟ್ಯಾಕ್ಸಿಗಳು, ತ್ರಿಚಕ್ರ ವಾಹನಗಳು ಮತ್ತು ದ್ವಿಚಕ್ರ ವಾಹನಗಳು ಸೇರಿದಂತೆ ಅಸ್ತಿತ್ವದಲ್ಲಿರುವ ಮೂರು ಮಾದರಿಯ ವಾಹನಗಳನ್ನು ಒಟ್ಟುಗೂಡಿಸಿ 'ಭಾರತ್ ಟ್ಯಾಕ್ಸಿ'ಯನ್ನು ರೂಪಿಸಲಾಗಿದೆ ಎಂದು ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರು ತಿಳಿಸಿದರು. ದೇಶದ ಮಾತೃಶಕ್ತಿಗೆ ಸಂದೇಶ ನೀಡಿದ ಅವರು, ಭಾರತ್ ಟ್ಯಾಕ್ಸಿಯು ಮಹಿಳೆಯರ ಸುರಕ್ಷತೆಗೆ ಅತ್ಯುನ್ನತ ಆದ್ಯತೆ ನೀಡಲಿದೆ ಎಂದು ಭರವಸೆ ನೀಡಿದರು. ಇದಕ್ಕಾಗಿ 'ಸಾರಥಿ ದೀದಿ' (Sarathi Didi) ಎಂಬ ವಿಶೇಷ ಪರಿಕಲ್ಪನೆಯನ್ನು ಸಿದ್ಧಪಡಿಸಲಾಗಿದ್ದು, ಮುಂಬರುವ ದಿನಗಳಲ್ಲಿ ಆ್ಯಪ್‌ ನಲ್ಲಿ 'ಸಾರಥಿ ದೀದಿ'ಗಾಗಿ ಪ್ರತ್ಯೇಕ ವಿಭಾಗವಿರಲಿದೆ. ಇದರ ಮೂಲಕ ನೋಂದಾಯಿಸಿಕೊಳ್ಳುವ ಯಾವುದೇ ಮಹಿಳೆಯನ್ನು 'ಸಾರಥಿ ದೀದಿ'ಯರೇ ಪಿಕ್-ಅಪ್ ಮಾಡಲಿದ್ದಾರೆ ಎಂದು ಅವರು ಹೇಳಿದರು. 'ಸಾರಥಿ ದೀದಿ'ಯರು ದ್ವಿಚಕ್ರ ವಾಹನಗಳಲ್ಲಿ ಬಂದು ಮಹಿಳೆಯರನ್ನು ಅತ್ಯಂತ ಕಡಿಮೆ ದರದಲ್ಲಿ ಸುರಕ್ಷಿತವಾಗಿ ಅವರ ಗಮ್ಯಸ್ಥಾನಕ್ಕೆ ತಲುಪಿಸಲಿದ್ದಾರೆ ಎಂದು ಶ್ರೀ ಶಾ ತಿಳಿಸಿದರು. ಈ ಸೌಲಭ್ಯವು ಮಹಿಳೆಯರಿಗೆ ಅತ್ಯಂತ ದೊಡ್ಡ ಮತ್ತು ಪ್ರಾಯೋಗಿಕ ಪರಿಹಾರವೆಂದು ಸಾಬೀತಾಗಲಿದೆ. ಮುಂಬರುವ ದಿನಗಳಲ್ಲಿ 'ಸಾರಥಿ ದೀದಿ' ಮೂಲಕ ದೇಶದ ಮಾತೃಶಕ್ತಿಗೆ ಸುರಕ್ಷಿತ, ಕೈಗೆಟುಕುವ ಮತ್ತು ಗೌರವಾನ್ವಿತ ಪ್ರಯಾಣದ ಆಯ್ಕೆ ಸಿಗಲಿದೆ. ಇದು ಕೇವಲ ಒಂದು ಸೇವೆಯಲ್ಲ, ಬದಲಿಗೆ ಮಹಿಳೆಯರ ಸುರಕ್ಷತೆ, ಸ್ವಾವಲಂಬನೆ ಮತ್ತು ಘನತೆಯತ್ತ ಇಟ್ಟಿರುವ ಪ್ರಮುಖ ಹೆಜ್ಜೆಯಾಗಿದೆ ಎಂದು ಅವರು ಹೇಳಿದರು.

ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರು ಮಾತನಾಡಿ, ಭಾರತ್ ಟ್ಯಾಕ್ಸಿಯು ದೆಹಲಿ ಸಂಚಾರಿ ಪೊಲೀಸ್, ದೆಹಲಿ ಮೆಟ್ರೋ ರೈಲು ನಿಗಮ (DMRC), ವಿಮಾನಯಾನ ಪ್ರಾಧಿಕಾರ (Airport Authority), ಇಫ್ಕೊ ಟೋಕಿಯೋ ಇನ್ಶೂರೆನ್ಸ್ (IFFCO Tokio Insurance) ಮತ್ತು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಸೇರಿದಂತೆ ಒಟ್ಟು ಒಂಬತ್ತು ಪ್ರಮುಖ ಸಂಸ್ಥೆಗಳೊಂದಿಗೆ ಒಪ್ಪಂದಗಳಿಗೆ (MoUs) ಸಹಿ ಹಾಕಿದೆ ಎಂದು ತಿಳಿಸಿದರು.ಈ ಒಪ್ಪಂದಗಳ ಮೂಲಕ ಭಾರತ್ ಟ್ಯಾಕ್ಸಿಯ ಗ್ರಾಹಕರಿಗೆ ಅನೇಕ ಹೆಚ್ಚುವರಿ ಸೌಲಭ್ಯಗಳು ದೊರೆಯಲಿವೆ ಮತ್ತು ಅದೇ ಸಮಯದಲ್ಲಿ, ಈ ಎಲ್ಲಾ ಸಂಸ್ಥೆಗಳು ಭಾರತ್ ಟ್ಯಾಕ್ಸಿಯ ಸೇವೆಗಳನ್ನು ಸುಲಭವಾಗಿ ಪಡೆಯಲು ಸಾಧ್ಯವಾಗುತ್ತದೆ ಎಂದು ಅವರು ಹೇಳಿದರು. ಈ ಸಂಸ್ಥೆಗಳು ಈಗ 'ಸಹಕಾರ ಟ್ಯಾಕ್ಸಿ'ಯ ಯಶಸ್ಸಿನ ಪಾಲುದಾರರಾಗಿವೆ ಎಂದು ಅವರು ತಿಳಿಸಿದರು. ಮಾಲೀಕತ್ವದ ಮಾದರಿಯನ್ನು ಆಧರಿಸಿದ ಈ ಹೊಸ ಟ್ಯಾಕ್ಸಿ ಪರಿಕಲ್ಪನೆಯನ್ನು ಇಂದು ಭಾರತದಲ್ಲಿ ಮೊದಲ ಬಾರಿಗೆ ಪ್ರಾರಂಭಿಸಲಾಗಿದೆ, ಇದು ಸಾರಥಿಗಳಿಗೆ ಮಾಲೀಕತ್ವದ ಹಕ್ಕಿನ ಮನೋಭಾವವನ್ನು ತರುವುದಲ್ಲದೆ, ಪ್ರಯಾಣಿಕರಿಗೆ ಮತ್ತು ವಿವಿಧ ಸಂಸ್ಥೆಗಳಿಗೆ ವಿಶ್ವಾಸಾರ್ಹ ಮತ್ತು ಅನುಕೂಲಕರ ಆಯ್ಕೆಯನ್ನು ನೀಡುತ್ತದೆ ಎಂದು ಅವರು ಹೇಳಿದರು.

ಭಾರತ್ ಟ್ಯಾಕ್ಸಿ ನಿರ್ಧರಿಸಿದ ನಿಗದಿತ ಶುಲ್ಕವು ಸಾರಥಿಗಳ ಖಾತೆಯಿಂದ ಪ್ರತ್ಯೇಕವಾಗಿರುತ್ತದೆ ಎಂದು ಶ್ರೀ ಅಮಿತ್ ಶಾ ತಿಳಿಸಿದರು. ಇದಲ್ಲದೆ, ಸಾರಥಿಗಳ ಕಷ್ಟದ ಗಳಿಕೆಯಿಂದ ಭಾರತ್ ಟ್ಯಾಕ್ಸಿಯು ಒಂದು ಪ್ರತಿಶತದಷ್ಟು ಕಮಿಷನ್ ಕೂಡ ಕಡಿತಗೊಳಿಸುವುದಿಲ್ಲ, ಇದರಿಂದಾಗಿ ಅವರ ಸಮೃದ್ಧಿಯು ವೇಗವಾಗಿ ಹೆಚ್ಚಾಗಲಿದೆ ಎಂದು ಅವರು ಹೇಳಿದರು. ಭಾರತ್ ಟ್ಯಾಕ್ಸಿಯ ಉದ್ದೇಶವು ಕಂಪನಿಯ ಬಂಡವಾಳವನ್ನು ಹೆಚ್ಚಿಸುವುದಲ್ಲ, ಬದಲಿಗೆ ಭಾರತ್ ಟ್ಯಾಕ್ಸಿಯ ನಿಜವಾದ ಮಾಲೀಕರಾದ ಸಾರಥಿ ಸಹೋದರರು ಮತ್ತು ಸಾರಥಿ ದೀದಿಯರ ಲಾಭ ಮತ್ತು ಆದಾಯವನ್ನು ಹೆಚ್ಚಿಸುವುದಾಗಿದೆ ಎಂದು ಅವರು ತಿಳಿಸಿದರು. ಗ್ರಾಹಕರು ಪಾವತಿಸುವ ಹಣವು ನೇರವಾಗಿ ಮತ್ತು ತಕ್ಷಣವೇ, ಸ್ವಯಂಚಾಲಿತವಾಗಿ ಸಾರಥಿಯ ಖಾತೆಗೆ ವರ್ಗಾವಣೆಯಾಗಲಿದೆ; ಇದಕ್ಕಾಗಿ ಕಾಯುವ ಅಗತ್ಯವಿರುವುದಿಲ್ಲ ಎಂದು ಶ್ರೀ ಶಾ ಹೇಳಿದರು. ಸರಿಯಾದ ವಿಚಾರಣೆ ನಡೆಸದೆ ಯಾವುದೇ ಸಾರಥಿಯ ಖಾತೆಯನ್ನು ಮುಚ್ಚಲಾಗುವುದಿಲ್ಲ. ಆದಾಗ್ಯೂ, ಗ್ರಾಹಕರೊಂದಿಗೆ ಉತ್ತಮವಾಗಿ ವರ್ತಿಸುವುದು, ತಮ್ಮ ಟ್ಯಾಕ್ಸಿಯ ಘನತೆಯನ್ನು ಕಾಪಾಡಿಕೊಳ್ಳುವುದು ಮತ್ತು ಸೇವೆಯ ಗುಣಮಟ್ಟದ ಮೇಲೆ ಗಮನ ಹರಿಸುವುದು ಸಾರಥಿಗಳ ಜವಾಬ್ದಾರಿಯಾಗಿದೆ ಎಂದು ಅವರು ಹೇಳಿದರು. ದೂರುಗಳ ವಿಚಾರಣೆಗಾಗಿ ಸಂಪೂರ್ಣ ವ್ಯವಸ್ಥೆಯನ್ನು ಜಾರಿಗೆ ತರಲಾಗಿದ್ದು, ನ್ಯಾಯಯುತ ವಿಚಾರಣೆಯ ನಂತರವಷ್ಟೇ ಕ್ರಮ ಕೈಗೊಳ್ಳಲಾಗುವುದು ಎಂದು ಅವರು ತಿಳಿಸಿದರು.

ಈವರೆಗೆ ಬುಕಿಂಗ್ ಶುಲ್ಕ, ಪ್ಲಾಟ್‌ ಫಾರ್ಮ್ ಶುಲ್ಕ ಮತ್ತು ಹೆಚ್ಚಿನ ಕಮಿಷನ್‌ ಗಳಂತಹ ಪದಗಳು ಕಂಪನಿಯ ಬ್ಯಾಲೆನ್ಸ್ ಶೀಟ್ ಅನ್ನು ಹೆಚ್ಚಿಸಲು ಮತ್ತು ಸಾರಥಿಗಳ ಗಳಿಕೆಯನ್ನು ಕಡಿಮೆ ಮಾಡಲು ಬಳಕೆಯಾಗುತ್ತಿದ್ದವು ಎಂದು ಕೇಂದ್ರ ಸಹಕಾರ ಸಚಿವ ಶ್ರೀ ಅಮಿತ್ ಶಾ ಅವರು ಹೇಳಿದರು. ಆದರೆ 'ಭಾರತ್ ಟ್ಯಾಕ್ಸಿ'ಯಲ್ಲಿ ಅಂತಹ ಯಾವುದೇ ಶುಲ್ಕ ಅಥವಾ ಕಮಿಷನ್ ವ್ಯವಸ್ಥೆ ಇರುವುದಿಲ್ಲ ಮತ್ತು ಸಾರಥಿಗಳೇ ಇದರ ಮಾಲೀಕರಾಗಿರುತ್ತಾರೆ ಎಂದು ತಿಳಿಸಿದರು. ಪಾಶ್ಚಿಮಾತ್ಯ ಮನೋಸ್ಥಿತಿಯ ಜನರಿಗೆ ಈ ಆಲೋಚನೆ ಅರ್ಥವಾಗದಿರಬಹುದು, ಆದರೆ ಇದೇ ಸಹಕಾರದ ನಿಜವಾದ ಶಕ್ತಿ ಎಂದು ಅವರು ಪ್ರತಿಪಾದಿಸಿದರು.

ಶ್ರೀ ಅಮಿತ್ ಶಾ ಅವರು, ಭಾರತ್ ಟ್ಯಾಕ್ಸಿಯ ಆರಂಭವು ಸಹಕಾರ ಕ್ಷೇತ್ರಕ್ಕೆ ಹೊಸ ಆಯಾಮಗಳನ್ನು ತೆರೆಯುವ ಆರಂಭವೂ ಆಗಿದೆ ಎಂದು ಹೇಳಿದರು. ಭಾರತದಲ್ಲಿ ಕಳೆದ 125 ವರ್ಷಗಳಿಂದ ಸಹಕಾರ ಚಳವಳಿ ನಡೆಯುತ್ತಿದೆ, ಆದರೆ ಈಗ ಸಹಕಾರ ಮಾದರಿಯನ್ನು ಹೊಸ ಹೊಸ ಕ್ಷೇತ್ರಗಳಿಗೆ ಕೊಂಡೊಯ್ಯುವ ಸಮಯ ಬಂದಿದೆ ಎಂದು ಅವರು ತಿಳಿಸಿದರು. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಜಿಯವರ ನೇತೃತ್ವದಲ್ಲಿ ಸಹಕಾರ ಸಚಿವಾಲಯವು ಅಸಂಘಟಿತ ವಲಯದಲ್ಲಿ ಕೆಲಸ ಮಾಡುವ ಜನರಿಗಾಗಿ 'ಮಾಲೀಕತ್ವದ ಹಕ್ಕುಗಳ ಮಾದರಿ'ಯನ್ನು ಸಿದ್ಧಪಡಿಸುತ್ತಿದೆ. ಮುಂಬರುವ ದಿನಗಳಲ್ಲಿ, ಕೆಲಸ ಮಾಡುವ ವ್ಯಕ್ತಿಯ ಬೆವರು ಮತ್ತು ಕಠಿಣ ಪರಿಶ್ರಮದ ಫಲವು ಅದೇ ವ್ಯಕ್ತಿಯ ಬಳಿ ಉಳಿಯುವಂತಹ ಇನ್ನು ಮೂರ್ನಾಲ್ಕು ಕ್ಷೇತ್ರಗಳಲ್ಲಿ ನಾವು ಈ ಮಾದರಿಯನ್ನು ಮುಂದುವರಿಸಲಿದ್ದೇವೆ ಎಂದು ಅವರು ಹೇಳಿದರು.

ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರು ಭಾರತ್ ಟ್ಯಾಕ್ಸಿಯ ನಾಲ್ಕು ಪ್ರಮುಖ ಮಂತ್ರಗಳನ್ನು ಘೋಷಿಸಿದರು: ಮಾಲೀಕತ್ವ (Ownership), ಭದ್ರತಾ ಕವಚ (Security Cover), ಘನತೆ (Dignity) ಮತ್ತು "ಎಲ್ಲರ ಚಕ್ರ, ಎಲ್ಲರ ಪ್ರಗತಿ", ಅಂದರೆ ಎಲ್ಲರಿಗೂ ಲಾಭಾಂಶದ ಸಮಾನ ವಿತರಣೆ. ಈ ನಾಲ್ಕು ಉದ್ದೇಶಗಳೊಂದಿಗೆ ಭಾರತ್ ಟ್ಯಾಕ್ಸಿ ಆರಂಭವಾಗಿದ್ದು, ಮುಂಬರುವ ದಿನಗಳಲ್ಲಿ ಇದು ಅತ್ಯಂತ ಯಶಸ್ವಿ ಪ್ರಯೋಗವೆಂದು ಸಾಬೀತಾಗಲಿದೆ ಎಂದು ಅವರು ಹೇಳಿದರು. ಇದನ್ನು 6 ಜೂನ್ 2025 ರಂದು ಸ್ಥಾಪಿಸಲಾಯಿತು ಮತ್ತು ಇಂದಿನಿಂದ ಇದು ವಾಣಿಜ್ಯಿಕವಾಗಿ ಚಾಲನೆ ಪಡೆಯುತ್ತಿದೆ. ಕೇವಲ 8 ತಿಂಗಳುಗಳಲ್ಲಿ, ದೆಹಲಿ ಮತ್ತು ಗುಜರಾತ್‌ನಲ್ಲಿ ಇತರ ಯಾವುದೇ ಟ್ಯಾಕ್ಸಿ ಕಂಪನಿಗಿಂತ ಹೆಚ್ಚಿನ ಸಾರಥಿಗಳು ಮತ್ತು ಗ್ರಾಹಕರು ಭಾರತ್ ಟ್ಯಾಕ್ಸಿಯನ್ನು ಸೇರಿಕೊಂಡಿದ್ದಾರೆ. ಇಷ್ಟು ಕಡಿಮೆ ಅವಧಿಯಲ್ಲಿ ಇಷ್ಟು ದೊಡ್ಡ ಪ್ರಮಾಣದಲ್ಲಿ ನೋಂದಣಿಗಳನ್ನು ಬೇರೆ ಯಾವುದೇ ಕಂಪನಿ ಸಾಧಿಸಿಲ್ಲ ಎಂದು ಅವರು ತಿಳಿಸಿದರು. ಮುಂಬರುವ ದಿನಗಳಲ್ಲಿ, ನಮ್ಮ ಸಾರಥಿ ಸಹೋದರ-ಸಹೋದರಿಯರು ವಿಮೆ, ಸರ್ಕಾರದ ಉದ್ಯೋಗ ಯೋಜನೆಗಳು, ಸಾಲಗಳು, ಸಬ್ಸಿಡಿಗಳು ಮತ್ತು ಗಿಗ್ ವರ್ಕರ್ಸ್‌ ಗೆ  ಸಂಬಂಧಿಸಿದ ಎಲ್ಲಾ ಸರ್ಕಾರಿ ಯೋಜನೆಗಳ ಪ್ರಯೋಜನಗಳನ್ನು ಸ್ವಯಂಚಾಲಿತವಾಗಿ ಪಡೆಯಲು ಸಾಧ್ಯವಾಗುತ್ತದೆ. ಪ್ರತಿ ಸಾರಥಿಗೆ ಪೂರ್ಣ ಘನತೆ, ಭದ್ರತೆ ಮತ್ತು ಆರ್ಥಿಕ ಶಕ್ತಿಯನ್ನು ಒದಗಿಸುವ ನಿಟ್ಟಿನಲ್ಲಿ ನಾವು ನಿರಂತರವಾಗಿ ಕೆಲಸ ಮಾಡುತ್ತಿದ್ದೇವೆ ಎಂದು ಶ್ರೀ ಶಾ ಹೇಳಿದರು.

ಕೇಂದ್ರ ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ಮಾತನಾಡಿ, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರು 2020-21ರಲ್ಲಿ ಗಿಗ್ ವರ್ಕರ್ಸ್ ಕಲ್ಯಾಣಕ್ಕಾಗಿ ಮಹತ್ವದ ಉಪಕ್ರಮವನ್ನು ಪ್ರಾರಂಭಿಸಿದ್ದರು ಎಂದು ತಿಳಿಸಿದರು. ಈಗ, 2025-26ರ ಬಜೆಟ್‌ನಲ್ಲಿ ಭಾರತ ಸರ್ಕಾರವು ದೇಶಾದ್ಯಂತ ಇರುವ ಒಂದು ಕೋಟಿ ಇಪ್ಪತ್ತೈದು ಲಕ್ಷಕ್ಕೂ ಹೆಚ್ಚು ಗಿಗ್ ವರ್ಕರ್ಸ್‌ ಗಾಗಿ ಅನೇಕ ಯೋಜನೆಗಳು ಮತ್ತು ಸೌಲಭ್ಯಗಳನ್ನು ತಂದಿದೆ. ಈ ಹಿಂದೆ, ಕೇವಲ ಪಿಂಚಣಿ ಕಡಿತವಾಗುವ ಅಥವಾ ಔಪಚಾರಿಕವಾಗಿ ನೋಂದಾಯಿತ ಕಾರ್ಮಿಕರಿಗೆ ಮಾತ್ರ ಇ-ಶ್ರಮ್ (e-Shram) ಪೋರ್ಟಲ್‌ ನಲ್ಲಿ ನೋಂದಾಯಿಸಿಕೊಳ್ಳುವ ಹಕ್ಕಿತ್ತು. ಈಗ ಈ ಮಿತಿಯನ್ನು ತೆಗೆದುಹಾಕುವ ಮೂಲಕ ದೇಶದ ಒಂದು ಕೋಟಿ ಇಪ್ಪತ್ತೈದು ಲಕ್ಷ ಗಿಗ್ ವರ್ಕರ್ಸ್ ಇ-ಶ್ರಮ್ ಪೋರ್ಟಲ್‌ ನಲ್ಲಿ ತಮ್ಮನ್ನು ತಾವು ನೋಂದಾಯಿಸಿಕೊಳ್ಳಬಹುದು ಎಂದು ಅವರು ಹೇಳಿದರು. ಭಾರತ್ ಟ್ಯಾಕ್ಸಿಯೊಂದಿಗೆ ಸಂಯೋಜಿತವಾಗಿರುವ ಎಲ್ಲಾ ಸಾರಥಿಗಳು ಈಗ ಸುಲಭವಾಗಿ ಇ-ಶ್ರಮ್ ಪೋರ್ಟಲ್‌ ನಲ್ಲಿ ನೋಂದಾಯಿಸಿಕೊಳ್ಳಬಹುದು. ನೋಂದಣಿಯ ನಂತರ, ಅವರಿಗೆ ಮತ್ತು ಅವರ ಕುಟುಂಬಕ್ಕೆ ಪ್ರಧಾನ ಮಂತ್ರಿ ಜನ ಆರೋಗ್ಯ ಯೋಜನೆಯಡಿ (PMJAY) ಐದು ಲಕ್ಷ ರೂಪಾಯಿಗಳವರೆಗೆ ಉಚಿತ ಚಿಕಿತ್ಸೆ ಸ್ವಯಂಚಾಲಿತವಾಗಿ ದೊರೆಯಲಿದೆ. ಭಾರತ್ ಟ್ಯಾಕ್ಸಿಗೆ ಸೇರಿದ ತಕ್ಷಣವೇ ಸಾರಥಿಗಳಿಗೆ ಈ ಉಚಿತ ವೈದ್ಯಕೀಯ ಸೌಲಭ್ಯ ಸಿಗಲು ಪ್ರಾರಂಭವಾಗುತ್ತದೆ. ಇದರ ಜೊತೆಗೆ, ಇ-ಶ್ರಮ್ ಪೋರ್ಟಲ್‌ ನಲ್ಲಿ ನೋಂದಾಯಿತ ಕಾರ್ಮಿಕರಿಗೆ ಲಭ್ಯವಿರುವ ಇತರ ಹಲವಾರು ಸಾಮಾಜಿಕ ಭದ್ರತಾ ಯೋಜನೆಗಳು ಸಹ ನಿಮಗಾಗಿ ಸ್ವಯಂಚಾಲಿತವಾಗಿ ಸಕ್ರಿಯಗೊಳ್ಳುತ್ತವೆ ಎಂದು ಶ್ರೀ ಶಾ ತಿಳಿಸಿದರು.

ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರು ಮಾತನಾಡಿ, ಭಾರತ್ ಟ್ಯಾಕ್ಸಿ ಮಾದರಿಯು ಸಾರಥಿಗಳ ಆರ್ಥಿಕ ಸ್ಥಿತಿಯನ್ನು ಬಲಪಡಿಸುವುದು ಮಾತ್ರವಲ್ಲದೆ, ಅವರ ಘನತೆ, ಭದ್ರತೆ ಮತ್ತು ಮಾಲೀಕತ್ವವನ್ನು ಖಚಿತಪಡಿಸಲಿದೆ ಎಂದು ಹೇಳಿದರು. ತುರ್ತು ಸಂದರ್ಭಗಳಲ್ಲಿ ತಕ್ಷಣವೇ ಭದ್ರತೆ ಮತ್ತು ಸಹಾಯವನ್ನು ಪಡೆಯಲು ಭಾರತ್ ಟ್ಯಾಕ್ಸಿ ಆ್ಯಪ್‌ನಲ್ಲಿ SOS ಅಲರ್ಟ್ ಸೌಲಭ್ಯವನ್ನು ಒದಗಿಸಲಾಗಿದೆ. ಪ್ರಸ್ತುತ, ದೆಹಲಿ-NCR ನಲ್ಲಿ ಎಂಟು ಸಹಾಯವಾಣಿ ಮತ್ತು ಸಹಾಯ ಕೇಂದ್ರಗಳನ್ನು ಸ್ಥಾಪಿಸಲಾಗಿದ್ದು, ಮುಂಬರುವ ದಿನಗಳಲ್ಲಿ ದೇಶಾದ್ಯಂತ ಇಂತಹ ಕೇಂದ್ರಗಳ ಬೃಹತ್ ಜಾಲವನ್ನು ನಿರ್ಮಿಸಲಾಗುವುದು ಎಂದು ಅವರು ತಿಳಿಸಿದರು. ಸಂಪೂರ್ಣ ಕುಂದುಕೊರತೆ ನಿವಾರಣಾ ಪ್ರಕ್ರಿಯೆಯು ಮೂರು ಹಂತಗಳಲ್ಲಿ ಕಾರ್ಯನಿರ್ವಹಿಸಲಿದೆ—ಆ್ಯಪ್ ಮೂಲಕ, ವೆಬ್‌ಸೈಟ್ ಮೂಲಕ ಮತ್ತು ಟೋಲ್-ಫ್ರೀ ಸಂಖ್ಯೆಯ ಮೂಲಕ. ಇದರ ಜೊತೆಗೆ, ನಮ್ಮ ಪ್ರತಿನಿಧಿಗಳು ನಿಯಮಿತವಾಗಿ ಸಾರಥಿಗಳನ್ನು ಭೇಟಿ ಮಾಡಲಿದ್ದಾರೆ, ಇದರಿಂದ ಪ್ರತಿ ಸಮಸ್ಯೆಯನ್ನೂ ಸಕಾಲದಲ್ಲಿ ಪರಿಹರಿಸಬಹುದಾಗಿದೆ. ಇಂದಿನಿಂದ ಸಾರಥಿಗಳು ಗುಪ್ತ ಶುಲ್ಕಗಳಿಂದ ಸಂಪೂರ್ಣ ಮುಕ್ತರಾಗಿದ್ದಾರೆ ಎಂದು ಅವರು ಘೋಷಿಸಿದರು. ಗುಪ್ತ ಶುಲ್ಕಗಳನ್ನು ತೆಗೆದುಕೊಳ್ಳುವುದು ಸಾರಥಿಗಳಿಗೆ ಮಾಡುವ ಒಂದು ರೀತಿಯ ವಂಚನೆಯಾಗಿದೆ. ಟೋಲ್, ಪಾರ್ಕಿಂಗ್ ಮತ್ತು ಇತರ ಎಲ್ಲಾ ಹೆಚ್ಚುವರಿ ಶುಲ್ಕಗಳಿಂದಲೂ ಸಾರಥಿಗಳಿಗೆ ಮುಕ್ತಿ ಸಿಗಲಿದೆ. ಅಲ್ಲದೆ, ಸಾರಥಿಗಳಿಗಾಗಿ ದಿನದ 24 ಗಂಟೆ, ವಾರದ ಏಳು ದಿನವೂ ಸಹಾಯವಾಣಿ ಲಭ್ಯವಿರುತ್ತದೆ. ಸದ್ಯಕ್ಕೆ ಇದು ಗುಜರಾತ್‌ನ ಕೆಲವು ನಗರಗಳು, ದೆಹಲಿ ಮತ್ತು NCR ನಲ್ಲಿ ಆರಂಭವಾಗುತ್ತಿದೆ. ಆದರೆ ಮುಂದಿನ ಮೂರು ವರ್ಷಗಳಿಗಿಂತ ಕಡಿಮೆ ಅವಧಿಯಲ್ಲಿ ನಾವು ದೇಶದ ಪ್ರತಿ ರಾಜ್ಯ ಮತ್ತು ಪ್ರತಿ ದೊಡ್ಡ ನಗರವನ್ನು ತಲುಪಲಿದ್ದೇವೆ ಎಂದು ಶ್ರೀ ಶಾ ತಿಳಿಸಿದರು.

ಮುಂದಿನ ದಿನಗಳಲ್ಲಿ ನಾವು 'ಭಾರತ್ ಟ್ಯಾಕ್ಸಿ'ಯಲ್ಲಿ ಇನ್ನೂ ಅನೇಕ ಹೊಸ ಸೇವೆಗಳನ್ನು ಸೇರಿಸಲಿದ್ದೇವೆ ಮತ್ತು ಅದನ್ನು ನಿರಂತರವಾಗಿ ವಿಸ್ತರಿಸಲಿದ್ದೇವೆ ಎಂದು ಕೇಂದ್ರ ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ತಿಳಿಸಿದರು. ದೆಹಲಿ-ಎನ್‌ ಸಿ ಆರ್‌ ನ (Delhi-NCR) ಎಲ್ಲಾ ಗ್ರಾಹಕರು ಮತ್ತು ಸಾರಥಿಗಳಿಗೆ ಸಂದೇಶ ನೀಡಿದ ಅವರು, ಇಂದಿನಿಂದ ಭಾರತ್ ಟ್ಯಾಕ್ಸಿ ಅವರ ಸೇವೆಯಲ್ಲಿ ಸಂಪೂರ್ಣವಾಗಿ ತೊಡಗಲಿದೆ ಎಂದು ಹೇಳಿದರು. ಇದು ಕೇವಲ ಟ್ಯಾಕ್ಸಿ ಸೇವೆಯಲ್ಲ, ಬದಲಿಗೆ ನಮ್ಮ ದೇಶದ ಕೋಟ್ಯಂತರ ಸಾರಥಿಗಳ ಸಮೃದ್ಧಿ, ಸ್ವಾಭಿಮಾನ ಮತ್ತು ಆರ್ಥಿಕ ಶಕ್ತಿಯನ್ನು ಹೆಚ್ಚಿಸುವ ಪ್ರಬಲ ಮಾಧ್ಯಮವಾಗಲಿದೆ. ಈಗಾಗಲೇ ದೆಹಲಿ-ಎನ್‌ ಸಿ ಆರ್‌ ನಲ್ಲಿ 2.5 ಲಕ್ಷಕ್ಕೂ ಹೆಚ್ಚು ಚಾಲಕರು ಭಾರತ್ ಟ್ಯಾಕ್ಸಿಗೆ ಸೇರ್ಪಡೆಗೊಂಡಿದ್ದಾರೆ, 8.5 ಲಕ್ಷಕ್ಕೂ ಹೆಚ್ಚು ಪ್ರಯಾಣಿಕರು ಈ ಕುಟುಂಬದ ಭಾಗವಾಗಿದ್ದಾರೆ ಮತ್ತು ಹಲವಾರು ದೊಡ್ಡ ಕಂಪನಿಗಳೊಂದಿಗಿನ ನಮ್ಮ ಒಪ್ಪಂದಗಳು ಅಂತಿಮ ಹಂತದಲ್ಲಿವೆ ಎಂದು ಅವರು ತಿಳಿಸಿದರು. ಭಾರತ್ ಟ್ಯಾಕ್ಸಿಯ ಭವಿಷ್ಯವು ಅತ್ಯಂತ ಉಜ್ವಲವಾಗಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.

ಇದಕ್ಕೂ ಮೊದಲು, ಇಂದಿರಾಗಾಂಧಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ವಿಜ್ಞಾನ ಭವನದವರೆಗೆ 100 ಕಾರುಗಳ ಭವ್ಯ ರ‍್ಯಾಲಿ ನಡೆಸುವ ಮೂಲಕ ಭಾರತ್ ಟ್ಯಾಕ್ಸಿಯ ಬಿಡುಗಡೆಯನ್ನು ಸಾಂಕೇತಿಕವಾಗಿ ಗುರುತಿಸಲಾಯಿತು. ಈ ರ‍್ಯಾಲಿಯು ದೇಶದ ಟ್ಯಾಕ್ಸಿ ಸಮುದಾಯದ ಏಕತೆ, ಹೆಮ್ಮೆ ಮತ್ತು ಸಾಮೂಹಿಕ ಶಕ್ತಿಯ ಪ್ರದರ್ಶನವಾಗಿತ್ತು. 

ಕಾರ್ಯಕ್ರಮದ ಸಮಯದಲ್ಲಿ, ಅತ್ಯುತ್ತಮ ಪ್ರದರ್ಶನ ನೀಡಿದ ಅಗ್ರ ಐದು ಸಾರಥಿಗಳನ್ನು ಅವರ ಗಮನಾರ್ಹ ಕೊಡುಗೆಗಾಗಿ ಗೌರವಿಸಲಾಯಿತು. ಈ ಮೂಲಕ ಸಹಕಾರ ಮಾದರಿಯಡಿಯಲ್ಲಿ ಚಾಲಕರ ಮಾಲೀಕತ್ವ ಮತ್ತು ಭಾಗವಹಿಸುವಿಕೆಯನ್ನು ಉತ್ತೇಜಿಸಲಾಯಿತು. ಗೌರವಿಸಲ್ಪಟ್ಟ ಪ್ರತಿ ಸಾರಥಿಗೆ ವೈಯಕ್ತಿಕ ಅಪಘಾತ ವಿಮೆ ಪ್ರಮಾಣಪತ್ರಗಳು ಮತ್ತು ₹5 ಲಕ್ಷದ ಕೌಟುಂಬಿಕ ಆರೋಗ್ಯ ವಿಮಾ ರಕ್ಷಣೆಯನ್ನು ನೀಡಲಾಯಿತು, ಇದು ಚಾಲಕರ ಕಲ್ಯಾಣ ಮತ್ತು ಸಾಮಾಜಿಕ ಭದ್ರತೆಯ ಬಗ್ಗೆ ಭಾರತ್ ಟ್ಯಾಕ್ಸಿ ಹೊಂದಿರುವ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ.

ಕಾರ್ಯಕ್ರಮದ ಸಮಯದಲ್ಲಿ, ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರ ಸಮ್ಮುಖದಲ್ಲಿ ಪ್ರಮುಖ ಸಾರ್ವಜನಿಕ ಮತ್ತು ಖಾಸಗಿ ಪಾಲುದಾರರೊಂದಿಗೆ ಒಟ್ಟು ಒಂಬತ್ತು ಸಾಮೂಹಿಕ ಒಪ್ಪಂದಗಳನ್ನು (MoUs) ವಿನಿಮಯ ಮಾಡಿಕೊಳ್ಳಲಾಯಿತು. ಕಾರ್ಯಾಚರಣೆಯ ಏಕೀಕರಣ, ಡಿಜಿಟಲ್ ಸಬಲೀಕರಣ ಮತ್ತು ಸೇವೆಯ ಗುಣಮಟ್ಟವನ್ನು ಬಲಪಡಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ.

ದೆಹಲಿ ಸಂಚಾರಿ ಪೊಲೀಸ್ ಮತ್ತು ಸಹಕಾರ ಟ್ಯಾಕ್ಸಿ ಕೋ-ಆಪರೇಟಿವ್ ಲಿಮಿಟೆಡ್ ನಡುವೆ ಸಹಿ ಮಾಡಲಾದ ತಿಳುವಳಿಕಾ ಒಪ್ಪಂದದ ಅಡಿಯಲ್ಲಿ, ದೆಹಲಿಯಾದ್ಯಂತ 21 ಸ್ಥಳಗಳಲ್ಲಿ 34 ಪ್ರಿಪೇಯ್ಡ್ ಟ್ಯಾಕ್ಸಿ ಬೂತ್‌ಗಳನ್ನು ಡಿಜಿಟಲ್ ಆಗಿ ನಿರ್ವಹಿಸಲು ಭಾರತ್ ಟ್ಯಾಕ್ಸಿಗೆ ಅನುಮತಿ ನೀಡಲಾಗುವುದು, ಇದರಿಂದಾಗಿ ಪ್ರಯಾಣಿಕರ ಸುರಕ್ಷತೆ, ಪಾರದರ್ಶಕತೆ, ಚಾಲಕರ ಆದಾಯ ಮತ್ತು ಸೇವೆಯ ಗುಣಮಟ್ಟವನ್ನು ಹೆಚ್ಚಿಸಲಾಗುವುದು. ದೆಹಲಿ ಸಂಚಾರಿ ಪೊಲೀಸರ ಬೆಂಬಲದೊಂದಿಗೆ, ಭಾರತ್ ಟ್ಯಾಕ್ಸಿಯು ಜಂಟಿ ಕಮಾಂಡ್ ಮತ್ತು ಕಂಟ್ರೋಲ್ ಸೆಂಟರ್ ಅನ್ನು ಸಹ ಸ್ಥಾಪಿಸಿದೆ, ಇದು ನೈಜ-ಸಮಯದ ಸವಾರಿ ಮೇಲ್ವಿಚಾರಣೆ (real-time ride monitoring), SOS ಎಚ್ಚರಿಕೆಗಳು ಮತ್ತು ತ್ವರಿತ ತುರ್ತು ಪ್ರತಿಕ್ರಿಯೆ ಕಾರ್ಯವಿಧಾನಗಳನ್ನು ಒಳಗೊಂಡಿದ್ದು, ರಸ್ತೆ ಸುರಕ್ಷತೆ, ನಿಯಂತ್ರಕ ಅನುಸರಣೆ ಮತ್ತು ಪ್ರಯಾಣಿಕರ ಭದ್ರತೆಯನ್ನು ಉತ್ತೇಜಿಸುತ್ತದೆ.

ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ (MeitY) ರಾಷ್ಟ್ರೀಯ ಇ-ಗವರ್ನನ್ಸ್ ವಿಭಾಗದ (NeGD) ಜೊತೆಗಿನ ತಿಳುವಳಿಕಾ ಒಪ್ಪಂದದ ಅಡಿಯಲ್ಲಿ, ಭಾರತ್ ಟ್ಯಾಕ್ಸಿಗೆ ಡಿಜಿಟಲ್ ಇಂಡಿಯಾ ಚೌಕಟ್ಟಿನಡಿಯಲ್ಲಿ ಸಲಹಾ ಮತ್ತು ತಾಂತ್ರಿಕ ಬೆಂಬಲವನ್ನು ನೀಡಲಾಗುವುದು, ಇದು ಡಿಜಿಲಾಕರ್, ಉಮಾಂಗ್ (UMANG) ಮತ್ತು API ಸೇತುಗಳೊಂದಿಗೆ ಸಂಯೋಜನೆಯನ್ನು ಸಕ್ರಿಯಗೊಳಿಸುತ್ತದೆ. ಇದು ಸಾರಥಿಗಳಿಗೆ ಕಾಗದರಹಿತ ಪ್ರವೇಶ, ಸರ್ಕಾರಿ ಸೇವೆಗಳಿಗೆ ಏಕೀಕೃತ ಪ್ರವೇಶ, ಸುರಕ್ಷಿತ ಇಂಟರ್-ಆಪರೇಬಲ್ ಕಾರ್ಯಾಚರಣೆಗಳು, ನಗದು ರಹಿತ ಪಾವತಿಗಳು ಮತ್ತು ಸುಧಾರಿತ ಕಾರ್ಯಾಚರಣಾ ದಕ್ಷತೆಯನ್ನು ಒದಗಿಸುತ್ತದೆ.

ದೆಹಲಿ ಮೆಟ್ರೋ ರೈಲು ಕಾರ್ಪೊರೇಷನ್ (DMRC) ಸಹಭಾಗಿತ್ವದಲ್ಲಿ, 10 ಪ್ರಮುಖ ಮೆಟ್ರೋ ನಿಲ್ದಾಣಗಳಲ್ಲಿ ಬೈಕ್ ಟ್ಯಾಕ್ಸಿಗಳು, ಇ-ಆಟೋಗಳು/ಸಿ ಎನ್‌ ಜಿ (CNG) ಆಟೋಗಳು ಮತ್ತು ಕ್ಯಾಬ್‌ ಗಳ ಮೂಲಕ ಕೊನೆಯ ಹಂತದ ಸಂಪರ್ಕವನ್ನು ಒದಗಿಸಲಾಗುವುದು. ಇದು ಪ್ರಯಾಣಿಕರಿಗೆ ಒಂದೇ ವೇದಿಕೆಯಲ್ಲಿ ತಮ್ಮ ಸಂಪೂರ್ಣ ಪ್ರಯಾಣವನ್ನು ಯೋಜಿಸಲು ಮತ್ತು ಪಾವತಿಸಲು ಅನುವು ಮಾಡಿಕೊಡುತ್ತದೆ, ಜೊತೆಗೆ ಚಾಲಕರಿಗೆ ಹೆಚ್ಚಿನ ಪ್ರವಾಸಗಳು ಮತ್ತು ಕಡಿಮೆ ಕಾಯುವ ಸಮಯವನ್ನು ಖಚಿತಪಡಿಸುತ್ತದೆ.

ಭಾರತೀಯ ವಿಮಾನಯಾನ ಪ್ರಾಧಿಕಾರದ (AAI) ಜೊತೆಗಿನ ತಿಳುವಳಿಕಾ ಒಪ್ಪಂದವು (MoU), ಪಿಕಪ್ ವಲಯಗಳು, ಸೈನೇಜ್ ಅನುಮತಿಗಳು ಮತ್ತು ಕಟ್ಟುನಿಟ್ಟಾದ ಭದ್ರತೆ ಹಾಗೂ ಸೇವಾ ಮಾನದಂಡಗಳು ಸೇರಿದಂತೆ ದೇಶಾದ್ಯಂತದ AAI ವಿಮಾನ ನಿಲ್ದಾಣಗಳಲ್ಲಿ ಭಾರತ್ ಟ್ಯಾಕ್ಸಿ ಕಾರ್ಯಾಚರಣೆಗಳನ್ನು ನಿಯಂತ್ರಿಸುತ್ತದೆ. ಆ ಮೂಲಕ ಭಾರತದಾದ್ಯಂತ ನಿಯಂತ್ರಿತ ವಿಮಾನ ನಿಲ್ದಾಣ ಕಾರ್ಯಾಚರಣೆಗಳನ್ನು ಇದು ಸಕ್ರಿಯಗೊಳಿಸುತ್ತದೆ.

ದೆಹಲಿ ಪ್ರವಾಸೋದ್ಯಮ ಮತ್ತು ಸಾರಿಗೆ ಅಭಿವೃದ್ಧಿ ನಿಗಮ / ಡೆಲ್ಲಿ ಏರ್‌ ಪೋರ್ಟ್ ಪಾರ್ಕಿಂಗ್ ಸರ್ವಿಸಸ್ (DAPS – GMR ಬೆಂಬಲಿತ) ಜೊತೆಗಿನ ಒಪ್ಪಂದದ ಅಡಿಯಲ್ಲಿ, IGI ವಿಮಾನ ನಿಲ್ದಾಣದ ಟರ್ಮಿನಲ್‌ ಗಳಾದ್ಯಂತ ಹಲವಾರು ಪಾರ್ಕಿಂಗ್ ಸ್ಥಳಗಳಲ್ಲಿ ಭಾರತ್ ಟ್ಯಾಕ್ಸಿಯ ವೈಟ್ ಕ್ಯಾಬ್ (white cab) ಸೇವೆಗಳಿಗೆ ಅನುಮತಿ ನೀಡಲಾಗಿದೆ. ಮೊದಲ ವರ್ಷದವರೆಗೆ ಪ್ರತಿ ಪ್ರವಾಸದ ₹245 ಪಿಕಪ್ ಶುಲ್ಕದ ಮೇಲೆ DAPS 20% ರಿಯಾಯಿತಿಯನ್ನು ನೀಡಲಿದೆ. ಇದು ಭಾರತ್ ಟ್ಯಾಕ್ಸಿಯ ಕಾಲಿ-ಪೀಲಿ ಸೇವೆಗಳಿಗೆ ಪೂರಕವಾಗಲಿದೆ ಮತ್ತು ವಿಮಾನ ನಿಲ್ದಾಣದ ಸವಾರಿಗಳ ಸಂಖ್ಯೆ ಹಾಗೂ ಆದಾಯವನ್ನು ಗಮನಾರ್ಹವಾಗಿ ಹೆಚ್ಚಿಸುತ್ತದೆ.

ಇಫ್ಕೊ ಟೋಕಿಯೋ (IFFCO Tokio) ಸಂಸ್ಥೆಯನ್ನು ಭಾರತ್ ಟ್ಯಾಕ್ಸಿಯ ವಿಮಾ ಪಾಲುದಾರರನ್ನಾಗಿ ಸೇರಿಸಿಕೊಳ್ಳಲಾಗಿದ್ದು, ಇದು ಚಾಲಕರಿಗೆ ಅತ್ಯಲ್ಪ ದರದಲ್ಲಿ ₹5 ಲಕ್ಷದ ವೈಯಕ್ತಿಕ ಅಪಘಾತ ವಿಮಾ ರಕ್ಷಣೆಯನ್ನು ಒದಗಿಸುತ್ತದೆ. ಇದರೊಂದಿಗೆ ಚಾಲಕರ ದೀರ್ಘಕಾಲೀನ ಕಲ್ಯಾಣ ಮತ್ತು ವಿಮಾ ಪರಿಹಾರಗಳಿಗಾಗಿ ಸಲಹಾ ಬೆಂಬಲವನ್ನೂ ನೀಡುತ್ತದೆ.

ಪೇಟಿಎಂ (Paytm) ಜೊತೆಗಿನ ಒಪ್ಪಂದದ ಅಡಿಯಲ್ಲಿ ಡಿಜಿಟಲ್ ಪಾವತಿಗಳು, ಜಂಟಿ ಬ್ರ್ಯಾಂಡೆಡ್ ಕೊಡುಗೆಗಳು ಮತ್ತು ಫಿನ್‌ ಟೆಕ್ ಸಬಲೀಕರಣವನ್ನು ಸಕ್ರಿಯಗೊಳಿಸಲಾಗುವುದು. ಇದು ಪಾವತಿ ಗೇಟ್‌ ವೇ ಸಂಯೋಜನೆ ಮತ್ತು ಪೇಟಿಎಂನ ಪಾಲುದಾರ ವ್ಯವಸ್ಥೆಯ ಪ್ರವೇಶವನ್ನು ಒಳಗೊಂಡಿರುತ್ತದೆ. ಪೇಟಿಎಂ ಸಂಸ್ಥೆಯು ಚಾಲಕರ ಕುಟುಂಬವನ್ನೂ ಒಳಗೊಂಡ ಸಮೂಹ ಆರೋಗ್ಯ ವಿಮೆಗೆ ಬೆಂಬಲ ನೀಡುತ್ತಿದೆ.

ಜಿಎಂಆರ್ (GMR) ಜೊತೆಗಿನ ಸಹಭಾಗಿತ್ವವು ವಿಮಾನ ನಿಲ್ದಾಣದ ಸಂಚಾರ ಕಾರ್ಯಾಚರಣೆಗಳನ್ನು ಮತ್ತಷ್ಟು ಬಲಪಡಿಸಲಿದೆ ಮತ್ತು ಐಜಿಐ (IGI) ವಿಮಾನ ನಿಲ್ದಾಣದ ಟರ್ಮಿನಲ್‌ ಗಳಲ್ಲಿ ಭಾರತ್ ಟ್ಯಾಕ್ಸಿಯ ನಿಯಂತ್ರಿತ ಪ್ರವೇಶ ಮತ್ತು ಸೇವಾ ವಿಸ್ತರಣೆಯನ್ನು ಬಲಪಡಿಸುತ್ತದೆ.

ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಜೊತೆ ಸಹಿ ಮಾಡಲಾದ ಒಪ್ಪಂದದ ಅಡಿಯಲ್ಲಿ, ಪ್ರಧಾನ್ ಮಂತ್ರಿ ಮುದ್ರಾ ಯೋಜನೆಯಂತಹ ಯೋಜನೆಗಳ ಮೂಲಕ ವಾಣಿಜ್ಯ ಪ್ರಯಾಣಿಕ ವಾಹನಗಳಿಗೆ ಆದ್ಯತೆಯ ಹಣಕಾಸು ಸೌಲಭ್ಯವನ್ನು ಲಭ್ಯವಾಗುವಂತೆ ಮಾಡಲಾಗುತ್ತದೆ. ಸಹಕಾರ ಟ್ಯಾಕ್ಸಿಯು ಅರ್ಹ ಚಾಲಕ-ಮಾಲೀಕರನ್ನು ಗುರುತಿಸಿ ಅವರಿಗೆ ಬೆಂಬಲ ನೀಡಲಿದೆ, ಮತ್ತು ಎಸ್‌ ಬಿ ಐ (SBI) ತನ್ನ ಚಾಲ್ತಿಯಲ್ಲಿರುವ ಮಾರ್ಗಸೂಚಿಗಳಿಗೆ ಅನುಗುಣವಾಗಿ ಅರ್ಜಿಗಳನ್ನು ತ್ವರಿತವಾಗಿ ಪರಿಗಣಿಸುವುದನ್ನು ಖಚಿತಪಡಿಸುತ್ತದೆ.

*****