ওখোমোর প্রোকৃতি প্রেমী রাইজোলোই আন্তোরিক প্রোনাম।

আসামগী রাজ্যপাল, শ্রী লক্ষ্মন প্রসাদ আচার্য়জী, অসামগী মীয়ামনা পাম্নরবা মুখ্য মন্ত্রী, শ্রী হিমন্ত বিশ্ব শর্মজী, কেন্দ্র সরকারদা লৈরিবা ঐহাক্কী মরুপশিং, শ্রী সর্বানন্দ সোনোৱালজী অমসুং শ্রীমতি পবিত্রা মার্গেরিতা জী, অসামগী মন্ত্রীশিং, শ্রী অতুল বোরা জী, শ্রী চরন বোরাজী, শ্রী কৃষ্ণেন্দু পোলজী, শ্রী কেশব মহন্তজী, অতৈ মকোক থোংবা মীওইশিং অমসুং অসামগী ঐহাক্কী নুংশিরবা ইচিল-ইনাওশিং।

ৱেদর অসি ইংঙি, অমসুড় খুঙ্গংশিং অসি থাপনৈ, অদুবু ঐহাক্না য়েংলিবা মফম খুদিংমক্তা, মীওই কয়া অমা উবা ফংই। অদোম্না ঐখোয়দা য়াইফ-পাউজেল পীনবগীদমক মশিং য়াম্লবা মীওই কয়া অমা লাকখিবা অসিদা ঐহাক্না অদোমগী মফমদা থাগৎপা ফোংদোকচরি।

ঙসি, ঐহাক্না কাজিরঙ্গাদা অমুক হন্না লাকপগী খুদোংচাবা ফংলে। মহৌশানা, ঐহাক্না ঐহাক্কী মমাংগী খোঙচৎ অদু নিংশিংই, মসি মহৌশানি। চহি অনিগী মমাংদা কাজিরঙ্গাদা ঐহাক্না চৎখিবা মতমশিং অসি ঐহাক্কী পুন্সিগী খ্বাইদগী অখন্নবা এক্সপরিয়েন্সশিংগী মনুংদা অমনি। ঐহাক্না কাজিরঙ্গা নেস্নেল পার্কতা চৎপগী খুদোংচাবা ফংখি, অমসুং মথংগী নুমিৎকী অয়ুক্তা, ইলিফন্ত সাফারি অমদা, ঐহাক্না লমদম অসিগী ফজবা অদু য়াম্না নক্না উবা ফংখি।

মরুপশিং,

ঐহাক্না অসামদা লাকপা মতমদা মতম পুম্নমক্তা অখন্নবা নুংঙাইবা অমা ফাওই। মসি অথৌবশিংগী লমনি, লম খুদিংমক্তা শরুক তমখিবা মচানুপা-মচানুপীশিংগী লমনি। ঙরাং ঐহাক গুৱাহাতিদা বাগুরুম্বা দাহো প্রোগ্রামদা শরুক য়াখি। মফম অদুদা, ঐখোয়গী বোদো কম্ম্যুনিতীগী মচানুপীশিংনা মখোয়গী বাগুরুম্বা পর্ফোমেন্সকা লোয়ননা অনৌবা রেকোর্দ অমা শেমখি। অসিগুম্লবা পাক চাউরবা বাগুরুম্বা শক্তম, আর্তিস্ত লিশিং ১০ হেনবগী ইনর্জী, খাম দ্রমগী তান্থা, সিফুং বাসিগী খোইথুমরবা মখোল - হায়রিবা নুংঙাইবা তাঙ্ককশিং অসিনা মীপুম খুদিংমকপু শুমহৎখি। বাগুরুম্বাগী এক্সপরিয়েন্স অসি মীৎতগী থম্মোয়দা লাকখি। অসামগী ঐখোয়গী আর্তিস্তশিংনা তশেংনা শিংথানিংঙাই ওইবা থবক অমা তৌখি। মখোয়না কন্না হোৎনখিবা, মখোয়না শেম-শারিবা, মখোয়গী কোওর্দিনেসন, পুম্নমক অসি থোইদোক হেন্দোকপা অমনি। বাগুরুম্বা দাহৌদা শরুক য়াখিবা আর্তিস্ত পুম্নমকপু ঐহাক্না অমুক্কা হন্না থাগৎপা ফোংদোকচরি। লৈবাক শিনবা থুংনা সোসিএল মেদিয়াদা ইথিল পীরিবা মীওইশিংবু ঐহাক্না থাগৎপা ফোংদোকচরি। ঙরাংদগী হৌনা ঐহাক্না খুন্নাইগী মীদিয়াদা বোদো ত্রেদিসনগী অফবা জগোয় অসি ত্রেন্দ তৌরকপা উবা ফংলে। ঐহাক্না থাজবা থম্লি মদুদি লৈবাক শিনবা থুংনা অমসুং মালেম শিনবা থুংনা মীওইশিংনা আর্ত অমসুং কলচরগী মতাংদা ভারতকী মীৎয়েং অসি, মসিগী শক্তি অসি খঙলগনি। অমসুং থবক অসিবু প্রমোৎ তৌরিবা সোসিএল মীদিয়াদা ইথিল পীরিবা মীওই পুম্নমকসু থাগৎপা ফোংদোকচরি। ঐখোয়গী মীদিয়াগী মরুপশিং, ঙরাং নুমিদাং অসি য়াম্না চিনবা ওইখি, অদুবু ঙসি অয়ুক্তগীদি, তি.ভি. চেনেল কয়ানা প্রোগ্রাম অসি অমুক হন্না শন্দোকপা হৌরে। মসিগী প্রোগ্রাম অসি কয়া য়াম্না চাউবা ওইরমগনি হায়বদু অদোম্না খংলমগনি।

মরুপশিং,

হৌখিবা চহিদা ঐহাক্না ঝুমুর ফেস্তিবেলদা শরুক য়াখি। ঙসি ঐহাক্না মাঘ বিহুগী থৌরমদা মফম অসিদা লাকপগী খুদোংচাবা ফংলে। থা অমগী মমাংদা, ঐহাক মফম অসিদা চাউখৎ-থৌরাংগী প্রোজেক্তশিংগীদমক লাকখি। গুৱাহাতিদা লৈবা মমিং লৈরবা লোকপ্রিয়া গোপীনাথ বোর্দোলোই ইন্তর্নেস্নেল এয়রপোর্ত অসি পাকথোক চাউথোকহনখ্রে। ঐহাক্না মসিগী অনৌবা তর্মিনেল বিলদিং শঙ্গাখি। ঐহাক্না নমরুপতা এমোনিয়া য়ুরিয়া কমপ্লেক্সকী উরেপ উয়ুংসু তমখি। হায়রিবা থৌরমশিং অসিনা বিজেপি সরকারগী "দিবেলপমেন্ত এন্দ হেরিতেজ"গী মন্ত্রবু হেন্না মপাঙ্গল কনখৎহল্লি। ঐখোয়গী মরুপ খরনা ফোতোশিং পুরক্লি অমসুং মখোয়না মফম অদুদা লেপ্লি; মখোয় ৱারগনি। মখোয়বু চংহল্লকউ, ঐহাক্না মখোয়বু লৌশিনগে। নহাক্না মখোয়দু মতুংদা লৌশিনবা য়াই। এস.পি.জি. পর্সনেলনা মখোয়বু পুরকখিবা মীওইশিংদগী ফোতোশিং অদু লৌশিল্লু। করিগুম্বা অদোমগী এদ্রেস অদু মনিংদা ইরবদি, অদোম্না ঐগী চিথী অমা ফংগনি। ময়াম পুম্নমক্কী মীনুংশি অমসুং অদোমগী ৱাখল্লোনশিংবু ইকাই খুম্নবা উৎচরি। ঐহাক্না ময়াম পুম্নমক্কী মফমদা থাগৎপা ফোংদোকচরি। ময়াম পুম্নমক্না ফমথবিয়ু। মফম অসিদা লৈরিবা মীওইশিং, ফমফমদা লেংশিনবিয়ু। মখোয়দা অৱাবা পীবা তৌরোইদবনি।

মরুপশিং,

কলিয়াবোর অসি অসামগী পুৱারীদা মরু ওইবা মফম অমা ওইরি। হায়রিবা মফম অসি অসামগী হৌজিক অমসুং তুংলমচৎকীদমক য়াম্না মরু ওই। মসি কাজিরঙ্গা নেস্নেল পার্ককী গেৎৱে অমসুং অৱাংথংবা অসামগা শম্নবগী হব অমনি। মফম অসিদগীনি লান্মী লচিত বোর্ফুকাননা মুগল লান্মীশিংবু মাইথিবা পীনবা থৌরাং তৌরকখিবা। মহাক্কী লুচিং মখাদা, অসামগী মীয়াম্না থৌনা, অমত্তা ওইদুনা অমসুং ফিরেপ চেৎনা মুগল লান্মীবু মাইথিবা পীখি। মসি লানগী মায় পাকপা খক্তা নত্তে, মসি অসামগী মশাগী ইকাই খুম্নবা অমসুং থাজবগী ময়েক শেংনা ফোংদোকপা অমনি। মমাংদা, হায়রিবা লমদম অসিনা অসামগী নোংচুপ থংবা শরুক পুম্নমকপু চলাইবগী থৌদাং লৌরম্মি। অহোম নিংথৌগী মতমদগী হৌনা কলিয়াবোর অসি স্ত্রেতেজিক ওইবা মরুওইবা অমা ওইদুনা লাক্লি। ঐহাক্না নুংঙাইবা ফাওই মদুদি বি.জে.পি.গী সরকারগী মখাদা লমদম অসি হৌজিক কনেক্তিবিতী অমসুং চাউখৎপগী মরুওইবা সেন্তর অমা ওইরক্লি।

মরুপশিং,

ঙসিদি, বিজেপিনা লৈবাক শীনবা থুংনা মীয়ামগী অহানবা অপাম্বা ওইরে। হৌখিবা চহি অমা অমসুং মখায় অসিদা, বিজেপিদা লৈবাক্কী থাজবা অসি লেপ্তনা হেনগৎলক্লি। হন্দক্তা, বিহারদা মীখল পাংথোকখি, অমসুং চহি ২০গী মতুংদা, মফম অদুগী মীয়াম্না বি.জে.পি.বু রেকোর্দ মশিং য়াম্বা ভোৎ পীখি অমসুং রেকোর্দ মশিং য়াম্বা সিৎতা খনখি। নুমিৎ অনীনিগী মমাংদা, মহারাস্ত্রাগী মরুওইবা শহরশিংদা মেয়র অমসুং কাউন্সিলরগী মীখলগী ফল লাউথোকখ্রে। মালেমগী খ্বাইদগী চাউবা ম্যুনিসিপাল কোর্পোরেসনশিংগী মনুংদা অমা ওইরিবা মুম্বাইদা, মীয়াম্না অহানবা ওইনা বি.জে.পি.দা রেকোর্দ ওইবা মেন্দেত অমা পীখি। য়াম্না নুংঙাইবা ৱাফমদি, মায় পাকপা অসি মুম্বাইদনি, অদুবু কুমহৈশিং অসি কাজিরাঙ্গাদনি। মহারাস্ত্রাগী শহর অয়াম্বগী মীয়াম্না বিজেপিবু মখোয়গী সেবা তৌনবগী খুদোংচাবা পীখ্রে।

মরুপশিং,

মমাংদা, অৱাং নোংপোক্কী লমদমদা, কেরলাগী মীয়াম্না বি.জে.পি.দা চাউনা মতেং পাংখি। অহানবা ওইনা, মফম অসিদা বিজেপিনা মেয়র অমা লৈরে, অমসুং হৌজিক্তি বিজেপিনা কেরলাগী কোনুং, তিরুবন্তপুরমদা থবক তৌরি। মরুপশিং, ইকুই কুইদ্রিঙৈদা লাকখিবা মীখলগী ফল পুম্নমক্কী মেন্দেত অসি ময়েক শেংলে। লৈবাক অসিগী ভোতরশিংনা ঙসি অফবা লৈঙাক অমসুং চাউখৎপা পাম্মি। মখোয়না চাউখৎ-থৌরাং অমসুং হেরিতেজ অনিমক্তা মীৎয়েং থম্লি। মরম অসিনা মখোয়না বি.জে.পি. পামলি।

মরুপশিং,

হায়রিবা মীখলশিং অসিনা অতোপ্পা পাউজেল অমা পীরি: লৈবাক অসিনা কংগ্রেস পার্তীগী নেগেতিব পোলিসীবু লেপ্পা লৈতনা য়ানীংদবা ফোঙদোক্লি। মুম্বাইদা, কংগ্রেস পার্তী অসি লিংখৎখিবা শহর অদুদা, হৌজিক্তি মসিনা মরিশুবা নত্ত্রগা মঙাশুবা খ্বাইদগী চাউবা পার্তী ওইরে। মহারাস্ত্রাদা কংগ্রেসনা দিকেদ কয়া লৈঙাক্লম্বা অদুদা, পার্টি অসি মপুং ফানা তাথখ্রে। কংগ্রেসনা চাউখৎ-থৌরাংগী এজেন্দা অমত্তা লৈতবনা মরম ওইদুনা লৈবাক অসিগী থাজবা মাংখ্রে। অসিগুম্বা কংগ্রেস পার্তী অমনা অসাম নৎত্রগা কাজিরঙ্গাগীদমক করিগুম্বা অফবা অমত্তা তৌবা ঙম্লোই।

মরুপশিং,

কাজিরঙ্গাগী ফজবগী মতাংদা ভারত রত্ন দা. ভুপেন হাজরিকানা হায়খি, "ঐগী কাজিরঙ্গা অসি লাইবক ফবনি, মহৌশাগী ফজরবা মফম অসিদা শান্নরি, ঐগী থম্মোয় অসি শেংদোকপগুম্না ফাওই।" ৱাহৈশিং অসিনা কাজিরঙ্গাবু য়াম্না নুংশিজবা অদু উৎলি অমসুং মহৌশাগী লমদা অসামগী মীয়ামগী নুংশিজবা অদুসু উৎলি। কাজিরঙ্গা অসি নেস্নেল পার্ক অমা খক্তা নত্তে, মসি অসামগী থম্মোয়নি, ভারতকী বাইওদাইবর্সিতীগী মমল য়াম্লবা জুৱেল অমনি। য়ুনেস্কোনা মসিবু ৱার্ল্দ হেরিতেজ সাইত অমা ওইনা লাউথোকখ্রে।

মরুপশিং,

কাজিরঙ্গা অমসুং মসিগী লম্লক্কী শা-উচেকশিংবু ঙাক-শেন্দুনা থম্বা হায়বসি অকোয়বগী ফিভম ঙাক-শেন্দুনা থম্বতা নত্তে। মসি অসামগী তুংলমচৎ অমসুং মসিগী তুংগী চারোন-শুরোনগীদমক ঐখোয়গী থৌদাং অমসু ওইরি। অমসুং মসি মোদীগী থৌদাং খক্তা নত্তে, অদোমগীসু থৌদাং অমনি। অসুম্না ৱাখলদা থমদুনা, ঙসি অসামগী লৈমায়দগী অনৌবা প্রোজেক্তশিং হৌদোক্লে, অমসুং মখোয়শিং অসিনা য়াম্না কান্নবা অমা পীগনি। প্রোজেক্তশিং অসিগীদমক্তা ঐহাক্না অদোমবু থম্মোয় শেংনা থাগৎপা ফোংদোকচরি।

মরুপশিং,

কাজিরাঙ্গা অসি মচি অমা খক্তা পানবা সমুগন্ধাগী লৈফমনি। চহি খুদিংগী, ব্রহ্মপুত্র তুরেলনা ঈশিং মরাং কায়না চঙলকপা মতমদা, খ্বাইদগী চাউবা শিংনবসি লাকই। লম্লক্কী শা-উচেকশিংনা হেন্না ৱাংবা মফম অমা থিবা হৌই, অমসুং মসিগী থৌওং অসিদা মখোয়না নেস্নেল হায়ৱে লান্না চৎকে তৌই। অসিগুম্বা মতমশিংদা, সমুগন্ধা, সমু, অমসুং সজিশিং অসি লম্বীগী নাকলদা তোয়না থোরকই। ঐখোয়গী হোৎনরিবশিং অসি লম্বী অসি মথৌ পাংথোকপা ঙম্নবা অমসুং উমং অসি শাফনা লৈহন্নবগীনি। মসিগী ৱাখল্লোন অসিগী মখাদা কলিয়াবোরদগী নুমালীগর ফাওবদা কিলোমীতর ৯০ রোম শাংবা কোরিদোর অমা শেমগৎলি। প্রোজেক্ত অসি চাউরাক্না লুপা করোর ৭,০০০ চংগনি। মসিদা চাউরাক্না কিলোমীতর 35 শাংবা এলিভেতেদ ৱাইল্দলাইফ কোরিদোর অমা য়াওগনি। অহেনবা শরুক অসিদা ভেহিকলশিংনা চৎপা ঙম্লগনি, অদুগা লম্লক্কী শা-উচেকশিংদা অকায়বা অমত্তা লৈতনা মখাদা মনীং তম্না চৎপা ঙম্লগনি। মসিগী দিজাইন অসি মচি অমা খক্তা পানবা সমুগন্ধা, সমু অমসুং কৈশিংগী চৎনবীগী ওইবা খোঙচৎকী লম্বীশিংবু ৱাখলদা থমদুনা শেমগৎপনি।

মরুপশিং,

করিদোর অসিনা অৱাং অসাম অমসুং অরুনাচল প্রদেশকী মরক্তা কনেক্তিবিতী ফগৎহনগনি। কাজিরঙ্গা এলিভেতেদ কোরিদোর অমসুং অনৌবা রেল সর্বিসশিংনা অসামগী মীয়ামগীদমক অনৌবা খুদোংচাবা কয়া অমা লৈহল্লগনি। মরুওইবা প্রোজেক্তশিং অসিগীদমক্তা অসামগী মীয়াম অমসুং লৈবাক পুম্ববু ঐনা থাগৎপা ফোংদোকচরি।

মরুপশিং,

মহৌশাগী ফিভমবু ঙাক-শেনবা মতমদা, মসিনা খুদোংচাবশিংসু পীরি। হৌখিবা চহিশিংদা কাজিরঙ্গাদা লাকপা তুরিস্তশিংগী মশিং লেপ্তনা হেনগৎলক্লি। হোমস্তে, গাইদ সর্ভিস, ত্রান্সপোর্ত, হেন্দিক্রাফ্ট অমসুং অপীকপা বিজিনেসকী খুত্থাংদা, মফম অদুগী নহাশিংনা ইনকমগী অনৌবা সোর্সশিং ফংলি।

মরুপশিং,

ঙসি, ঐহাক্না অসামগী মীয়াম অমসুং রাজ্য সরকারবু অতোপ্পা মাইপাকপগীদমক থাগৎপা ফোংদোকচরি। কাজিরঙ্গাদা সমুগন্ধা হাৎপা অসি অসামগী খ্বাইদগী চাউবা শিংনবা অমা ওইরকখিবা মতম অমা লৈরম্মি। ২০১৩ অমসুং ২০১৪দা মশীং য়াম্লবা মচি অমা পানবা সমুগন্ধাশিং শিখি। মসি মখা চত্থহল্লোই হায়না বিজেপি সরকারনা ৱারেপ লৌখি। মদুদগী ঐখোয়না সেক্যুরিতী সিস্তেম অদু মপাঙ্গল কনখৎহনখি। ফোরেস্ত দিপার্তমেন্ততা মোদর্ন রিসোর্সশিং ফংহনখি, সর্ভিলেন্স সিস্তেম হেনগৎহনখি, অমসুং 'বন দুর্গা' ইনিসিয়েতিবকী খুত্থাংদা নুপীশিংগী শরুক য়াবা হেনগৎহনখি। মসিনা অফবা মহৈ অমা পীরি। ২০২৫দা, রাইনোশিংবু ইকাই খুম্নবগী থৌদোক অমত্তা রিপোর্ত তৌখিদে। মরম অদুনা, অদোম পুম্নমক অমসুং সরকারনা নুংঙাইবা ফোংদোকচরি। মসি বিজেপি সরকারগী পোলিতিকেল ৱিল অমসুং অসামগী মীয়ামগী হোৎনবনা ওইথোকহল্লি।

মরুপশিং,

মতম কয়াগী মমাংদগী, মহৌশা অমসুং চাউখৎপা হায়বসি অমগা অমগা অকাইবা পীনৈ, অমগা অমগা পুন্না লৈমিন্নবা  য়াদে হায়না মীয়াম্না থাজরম্মি। অদুবু ঙসিদি, ভারতনা মালেমদা উৎলি মদুদি হায়রিবা অনি অসিগা লোয়ননা ইকোনোমী অমসুং ইকোলোজী অনিমক পুন্না চাউখৎপা ঙমগনি। হৌখিবা চহি তরা অসিদা, লৈবাক অসিদা উমং অমসুং উ পাম্বী মশিং হেনগৎলক্লি। "এক পের মা কে নাম" কেম্পেনদা মীয়াম্না থৌনা ফনা শরুক য়াখি। মসিগী কেম্পেন অসিগী মখাদা হৌজিক ফাওবদা উ পাম্বী কোতি ২৬০ হেন্না থাখ্রে। ২০১৪দগী হৌরগা লৈবাক অসিদা তাইগর অমসুং এলিফান্ত রিজর্বশিংগী মশিং হেনগৎলক্লি। ঙাক-শেনবা মফমশিং অমসুং কম্ম্যুনিতী রিজার্বশিংসু চাউনা পাকথোক চাউথোক্লে। মতম কয়াগী মমাংদা ভারত্তা মুৎখ্রবা চিতাশিং হৌজিক অমুক হন্না পুশিল্লক্লি। ঙসিদি, চিতা অসি মীওইশিংগী অনৌবা পাম্বৈ অমা ওইরে। ঐখোয়না ৱেৎলেন্দ কঞ্জার্বেসনগী মতাংদসু লেপ্পা লৈতনা থবক তৌরি। ঙসিদি, ভারতনা এসিয়াদা খ্বাইদগী চাউবা রামসর নেটৱার্ক লৈরে। রামসর সাইতশিংগী মশীংগী মতুং ইন্না, ভারতনা মালেমদা অহুমশুবদা লৈরি। হৌজিক, ঐখোয়গী অসাম রাজ্যনা মালেমদা চাউখৎ-থৌরাংগা লোয়ননা ঐখোয়না ঐখোয়গী হেরিতেজ অমসুং মহৌশাগী ফিভম অসি করম্না ঙাক-শেন্দুনা থম্বগে হায়বদু উৎলি।

মরুপশিং,

অৱাং-নোংপোক্কী খ্বাইদগী চাউবা প্রোব্লেমদি মতম পুম্নমক্তা অরাপ্পা অসিনা ওইদুনা লাক্লি। থমোয় অমসুং ৱাখল্লোনগা মরী লৈনবা অরাপ্পা অমসুং জিওগ্রাফিগা মরী লৈনবা অরাপ্পা। দিকেদ কয়াগী মমাংদগী, লমদম অসিগী মীওইশিংনা লৈবাক অসিগী চাউখৎ-থৌরাং অসি অতোপ্পা মফমদা থোক্লি হায়না খল্লি, অমসুং মখোয় অসি মাংজিল থারি। মসিনা শেন্মিৎলোনদা শোকহনবতা নত্তনা থাজবদসু শোকহল্লি। বিজেপি সরকারনা, মসিগী দবল-ইঞ্জিন এপ্রোচকা লোয়ননা, মসিগী ৱাখল্লোন অসি হোংহন্নবা হোৎনখি অমসুং অৱাং নোংপোক্কী চাউখৎপদা মরু ওইবা পীখি। আসাম অসি লম্বী, রেল, এয়র অমসুং ঈশিং লম্বীগী খুত্থাংদা শম্নহন্নবা হোৎনরি।

মরুপশিং,

ঐখোয়না রেলগী কনেক্তিবিতী হেনগৎলকপা মতমদা মসিনা খুন্নাই অমসুং শেন্মিৎলোন অনিমক্তা কান্নবা ফংই। মরম অদুনা, অৱাং নোংপোক লমদমদা কনেক্তিবিতী পাকথোক চাউথোকহনবা অসি য়াম্না মরু ওই। অদুবু কংগ্রেস পার্তীনা মসিগী মতাংদা করিগুম্বা অমত্তা খল্লমদে। ঐহাক্না অদোমদা মশীং অমা পীজগে। কেন্দ্রদা কংগ্রেসনা লৈঙাক পায়রিঙৈ মতমদা, অসামদা রেলৱেজকীদমক য়াম্না পিকপা বজেৎ ফংখি। চাউরাক্না লুপা করোর ২,০০০ ওইগনি। হৌজিক, বিজেপি সরকারগী মখাদা, মসি চহিগী ওইনা চাউরাক্না লুপা করোর ১০,০০০দা হেনগৎখ্রে। হৌজিক ঐহাক্না অদোমদা হংজরি, অদোম্না ফিগর অসিবু নীংশিংলব্রা? অদোম্না ফিগর অসিবু নীংশিংলব্রা? নৎত্রগা অদোম্না খংলব্রা? ঐহাক্না অমুক্কা হন্না অদোমদা নীংশিংহল্লি, কংগ্রেসকী মতমদা, অসামদা রেলৱেজগীদমক লুপা করোর ২,০০০ ফংখি। কয়া য়াম্না চংলি? মীপুম খুদিংমক্না, ঐঙোন্দা হায়বিয়ু, মদুদা করম্বা শেনফম ফংবগে? কয়া য়াম্না? কয়া য়াম্না? বি.জে.পি. সরকারনা লৈঙাক পায়রক্লবা মতুংদা, অসামনা কয়া য়াম্না ফংলবগে? লুপা করোর ১০,০০০গী শেনফম ওইগনি। কয়া য়াম্না? কয়া য়াম্না? কয়া য়াম্না? লুপা করোর ১০,০০০গী শেনফম ওইগনি। মসিনা তাক্লিবদি বিজেপিনা অসামদা রেলৱেজগীদমক কংগ্রেসনা পীখিবা শেনফমদগী শরুক মঙা হেন্না পীরি।

মরুপশিং,

ইনভেস্তমেন্ত হেনগৎলকপনা পাক-শন্না ইনফ্রাস্ত্রকচর চাউখৎহনখি। অনৌবা রেলৱে লাইনশিং থম্বা, ত্রেকশিং শরুক অনি ওইহনবা অমসুং ইলেক্ত্রিফিকেসন তৌবনা রেলৱেগী কেপাসিতী হেঙ্গৎহনখ্রে অমসুং মীয়ামগীদমক হেন্না ফবা খুদোংচাবশিং ফংহনখ্রে। ঙসি কলিয়াবোরদগী হৌদোক্লিবা অনৌবা ত্রেন সর্বিস অহুম অসি আসামগী রেল কনেক্তিবিতীদা চাউনা চাউথোকচবনি। ভন্দে ভারত স্লিপর ত্রেননা গুৱাহাতীবু কোলকাতাগা শম্নহল্লগনি। মোদর্ন স্লিপর ত্রেন অসিনা অরাপ্পা লমগী খোঙচৎপু হেন্না নুংঙাইহল্লগনি। মসিগা লোয়ননা অমৃত ভারত এক্সপ্রেস ত্রেন অনিসু হৌদোক্লে। হায়রিবা ত্রেনশিং অসিনা অসাম, ৱেস্ত বেঙ্গল, বিহার অমসুং উত্তর প্রদেশকী মরুওইবা স্তেসন কয়া অমা কোনশিনগনি। মসিনা লমকোইবশিংদা হকথেংননা কান্নবা ফংহল্লগনি। হায়রিবা ত্রেনশিং অসিনা অসামগী ত্রেদরশিংবু অনৌবা কৈথেলশিংগা শম্নহল্লগনি, মহৈরোইশিংদা অনৌবা এজুকেসনগী খুদোংচাবশিং ফংহনগনি অমসুং আসামগী মীয়ামদা লৈবাক অসিগী তোঙান-তোঙানবা মফমশিংদা চৎথোক-চৎশিন তৌবদা লাইথোকহল্লগনি। কনেক্তিবিতী পাকথোক চাউথোকহনবনা অৱাং-নোংপোক লমদম অসি চাউখৎপগী লম্বীদা লৈহৌরোই হায়বগী থাজবা পীরি। অৱাং-নোংপোক অসি হৌজিক্তি য়াম্না লাপ্পা নত্তে, অৱাং-নোংপোক অসি হৌজিক্তি ঐখোয়গী থম্মোয়গা নক্নরে, অমসুং দিল্লীগা নক্নরে।

মরুপশিং,

ঙসি, অসামনা মায়োক্নরিবা মরুওইবা শিংনবশিংগী মতাংদসু খন্ন-নৈনবগী তঙাইফদবা অদু লৈরে। মসিগী চেলেঞ্জ অসি অসামগী শক্তম, অসামগী চৎনবী অসি ঙাক শেন্নবা হোৎনবনি। ঐঙোন্দা হায়বিয়ু, অসামগী শক্তম অসি ঙাকথোক্কদৌরিবরা নৎত্রগা ঙাকথোক্লোইদৌরিবরা? নত্তে, মীপুম খুদিংমক্না পাউখুম পীবীয়ু, অসামগী শক্তম অসি ঙাক্কদৌরিব্রা নৎত্রগা ঙাকলোইদোইরা? নহাক্কী আইদেন্তিতী অদু ঙাকথোক্কদৌরিবরা নৎত্রগা ঙাকথোক্লোইদৌরিবরা? অদোমগী ইমা-ইপাশিংগী লেগেসী অসি ঙাকথোক্কদৌরিবরা নৎত্রগা ঙাকথোক্কদৌরিবরা? ঙসিদি, আসামদা বিজেপি সরকারনা ইনফিলত্রেসনগা মরী লৈননা লৌখৎলিবা থবকশিং, ঐখোয়গী উমংশিং, পুৱারীগী ওইবা অমসুং কলচরগী ওইবা মফমশিং, অমসুং অদোমগী লমশিং অসি আইন্না য়াদবা মওংদা খোপচিনবগী মওং অসি পাক শন্না থাগৎপা ফোংদোক্লি। মসি অচুম্বা থবকরা? মসি পাইখৎকদবরা? মসি অদোমগী কান্ননবগীদমক্তা নৎত্রা? অদুবু, মরুপশিং, অসামদা কংগ্রেস পার্তীনা করি তৌখি? সরকার শেম্নবা, ভোৎ খরা ফংনবা, মখোয়না অসামগী লম অসি ইনফিলিত্রেতরশিংদা পীখি। কংগ্রেস পার্তীনা অসামদা চহি কয়া লৈঙাক শেমখি। মতমসিগী মনুংদা, ইনফিলত্রেসন অসি মখা তানা হেনগৎলকখি, অমসুং মসিগী ইনফিলত্রেতরশিংনা করি তৌখি? মখোয়না অসামগী পুৱারী, মসিগী চৎনবী, নত্রগা ঐখোয়গী থাজবশিংবু ইকায় খুম্নদে, অমসুং মরম অদুনা, মখোয়না মফম খুদিংমক্তা লম লৌশিনখি। ইনফিলত্রেসননা মরম ওইদুনা, এনিমেল কোরিদোরশিং লৌশিনখি, ইলিগেল হন্তিং হেনগৎখি, অমসুং স্মগলিং অমসুং অতোপ্পা ক্রাইমশিংসু হেনগৎখি।

মরুপশিং,

হায়রিবা ইনফিলত্রেতরশিংনা দেমোগ্রাফিক বেলেন্স থুগাইরি, ঐখোয়গী কলচরদা লান্দারকখি, লায়রবশিং অমসুং নহাশিংগী থবক মুনখি, অমসুং ত্রাইবেল এরিয়াশিংদা লৈবা মীওইশিংগী লমদা আইননা য়াদবা মওংদা লৌশিল্লি। মখোয়না অসাম অমসুং লৈবাক পুম্বগী সেক্যুরিতীদা অচৌবা খুদোংথীবা অমা ওইহল্লি।

মরুপশিং,

নহাক্না কংগ্রেস পার্তীদা য়াম্না চেকশিন্না লৈগদবনি। কংগ্রেসকী পোলিসী অমখক্তমক লৈ: ইলিগেল ইমিগ্রেন্তশিং ঙাক-শেনবা অমসুং মখোয়গী মতেংগা লোয়ননা শক্তি পায়বা! কংগ্রেস অমসুং মসিগী মরী লৈনবশিংনা লৈবাক শীনবা থুংনা মসি তৌরি। বিহারদসু, মখোয়না ইলিগেল ইমিগ্রান্তশিং ঙাক্নবা খোঙচৎ অমসুং রেলীশিং পাংথোকখি। অদুবু বিহারগী মীয়াম্না কংগ্রেসপু মপুং ফানা য়াখিদে। হৌজিক অসামগী মীয়ামগী মতমনি, অমসুং অসামগী মীয়াম্নাসু কংগ্রেসতা মতিক চাবা পাউখুম পীরগনি হায়না ঐহাক্না থাজবা থম্লি।

মরুপশিং,

অসামগী চাউখৎপা অসিনা অৱাং-নোংপোক্কী চাউখৎপদা অনৌবা থোঙ হাংলি। অসামনা এক্ত ইস্ত পোলিসীগী লমদা মাংজিল থানা চংশিল্লি। অসাম চাউখৎলকপা মতমদা অৱাং-নোংপোক লমদমসু চাউখৎলগনি। অৱাং-নোংপোক্না খুমাং চাউশিল্লকপা মতমদা, ভারতসু খুমাং চাউশিল্লি। ঐখোয়গী হোৎনরিবশিং অমসুং অসামগী মীয়ামগী থাজবা অসিনা অৱাং-নোংপোক পুম্নমকপু অনৌবা থাক্তা পুখৎকনি। থাজবা অসিগা লোয়ননা, ঐহাক্না অমুক্কা হন্না ময়াম পুম্নমকপু ঙসিগী প্রোজেক্তশিং অসিগীদমক থাগৎচরি। অদোম্না ঐগা লোয়ননা হায়বিয়ু:

ভারত ইমানা য়াইফরে।

ভারত ইমানা য়াইফরে।

মসি ভন্দে মাতরমগী চহি ১৫০ শুবনি, অচুম্বা তৌরমবশিং অদু নীংশিংবগী মতমনি। ঐহাক্কা লোয়ননা হায়বিয়ু-

ভন্দে মাতরম।

ভন্দে মাতরম।

ভন্দে মাতরম।

ভন্দে মাতরম।

ভন্দে মাতরম।

ভন্দে মাতরম।

ভন্দে মাতরম।

ভন্দে মাতরম।

ভন্দে মাতরম।

ভন্দে মাতরম।

ভন্দে মাতরম।

***