প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা সংবিধান সাদানগী সেন্ত্রেল হোলদা কম্মনৱেল্থগী স্পিকরশিং অমসুং প্রেসাইদিং ওফিসারশিংগী ২৮শুবা মীফম হৌদোকখ্রে
ভারতনা খেন্নবশিং লৈবাক অসিগী গনতন্ত্রগী মপাঙ্গল ওন্থোক্লে: প্রধান মন্ত্রী
গনতন্ত্রগী ইন্সতিতুসনশিং অমসুং গনতন্ত্রগী থবকশিংনা গনতন্ত্রদা তুংদু-লৈতাবা, খোঙজেল য়াংবা অমসুং পাক-চাউবা লৈহল্লে: প্রধান মন্ত্রী
ভারত্ত, গনতন্ত্রগী ৱাহন্থোক্তি খ্বাইদগী মনিংদা লৈরিবশিংদা খুদোংচাবা ফংহনবনি: প্রধান মন্ত্রী
ঐখোয়গী গনতন্ত্র অসি মরা চেৎনা তারবা উ পাম্বী অমগুম্বনি; ঐখোয়গী মরৈ য়েৎনবা, ৱারি শানবা অমসুং অপুনবা ওইনা ৱারেপ লৌবগী মতম কুইরবা চৎনবী অমা লৈরি: প্রধান মন্ত্রী
মালেমগী মফম লুপ খুদিংমক্ত গ্লোবেল সাউথকী মরুওইবা ৱাফমশিং ভারতনা পুখৎলি; লৈবাক অসিনা জি-২০গী প্রসিদেন্ত ওইবা মতমদা, ভারতনা গ্লোবেল সাউথকী মরুওইবশিং মালেমগী এজেন্দগী ময়াইদা থমখি: প্রধান মন্ত্রী
प्रविष्टि तिथि:
15 JAN 2026 12:09PM by PIB Imphal
ঙসি প্রধান মন্ত্রী শ্রী নরেন্দ্র মোদীনা ন্যু দিল্লিগী পর্লিয়ামেন্ত হাওস কমপ্লেক্সতা সংবিধান সাদানগী সেন্ত্রেল হোলদা স্পিকরশিং অমসুং প্রেসাইদিং ওফিসারশিংগী ২৮শুবা মীফম হৌদোকখ্রে। থৌরম অদুদা ৱা ঙাংবদা, প্রধান মন্ত্রীনা হায়খি মদুদি সংসদকী গনতন্ত্র চৎপা লৈবাক অমদা স্পিকরগী থৌদাং অসি তোপ-তোপ্পনি। স্পিকরনা ৱা য়াম্না ঙাংদে, অদুবু অতোপ্পশিংনা ঙাংবা তাবা অমসুং মীওই খুদিংমক ৱা ঙাংনবা খুদোংচাবা অমা পীবা হায়বসি মখোয়গী থৌদাংনি। খাংবা কনবা হায়বসিনা স্পিকরশিংগী মরুওইবা গুনি, মখোয়না নোক্ন নোক্না অরাংবা অমসুং কা হেন্না হরাওবা মেম্বরশিং শেন্নৈ।
অখন্নবা থৌরম অসিদা অতিথিশিং তরাম্না ওক্লদুনা, প্রধান মন্ত্রীনা মখোয়গী মরক্ত শরুক য়াবদা হরাওবা ফোঙদোকখি। মহাক্না হায়খি মদুদি মীওই খুদিংমক্না ফম্লিবা মফম অসি ভারতকী গনতন্ত্রগী খোঙচত্ত য়াম্না মরুওই। লোয়লম লৈঙাক্কী অরোবা চহিশিংদা, ভারত শোইদনা নিংতম্বা ফংলগনি হায়বা খঙবা মতমদা, সংবিধান শেম্নবগীদমক সেন্ত্রেল হোল অসিদা কন্সতিতুয়েন্ত এশেমব্লি ফমখি, মরুওইবা খন্ন-নৈনবা অমসুং ৱারেপশিংনা লৈবাক অসিগী তুংগী ফিবম শেমখি। মফম অসি সংবিধান সাদান হায়না মমিং থোন্দুনা হৌজিক ভারতনা পুৱারি ওইরবা মফম অসি গনতন্ত্রদা কৎথোক্লে। হন্দক লৈবাক অসিগী সংবিধান চহি ৭৫ মপুংফারকপগী থৌরম ভারতনা পাংথোকখ্রে। সংবিধান সাদান্দা শক্নাইরবা মীওইশিং শরুক য়াবা অসি ভারতকী গনতন্ত্রগী অখন্নবা তাঞ্জা অমনি।
প্রধান মন্ত্রীনা হায়খি মদুদি ভারত্ত কম্মনৱেল্থগী স্পিকরশিং অমসুং প্রেসাইদিং ওফিসারশিংগী মীফম পাংথোকপা হন্দক্কী অসিনা মরিশুবনি। হন্দক্কী মীফম অসিগী মরুওইবা থিমদি সংসদকী গনতন্ত্র মপুংফানা চৎহনবা হায়বনি। ভারতনা নিংতম্বা ফংবা মতমদা, খেন্নবা য়াম্না লৈবা লৈবাক অমদা গনতন্ত্র হিংবা ঙম্লোই হায়না চিংনবা ফোঙদোকখি। ভারতনা খেন্নবশিং লৈবাক অসিগী গনতন্ত্রগী মপাঙ্গল ওন্থোক্লে। অতোপ্পা মরুওইবা য়াম্না চিংনবা অমনা করিগুম্বা নমদুনা ভারত্ত গনতন্ত্র হিংলবসু, চাউখৎপা ঙম্লোই হায়বসিনি। গনতন্ত্রগী ইন্সতিতুসনশিং অমসুং গনতন্ত্রগী থবকশিংনা গনতন্ত্রদা তুংদু-লৈতাবা, খোঙজেল য়াংবা অমসুং পাক-চাউবা লৈহল্লে হায়বা ভারতনা উৎলে। ঙসি ভারত মালেমদা য়াংনা চাউখৎলক্লিবা ইকোনোমি ওইরে, য়ু.পি.আইগী খুৎথাংদা মালেমগী খ্বাইদগী চাউবা দিজিতেল পেমেন্তগী থবক ভারত্ত লৈরি, ভারত তিকা খ্বাইদগী য়াম্না পুথোকপা লৈবাক, ষ্টিল পুথোকপদা অনিশুবা খ্বাইদগী চাউবা, ষ্টার্দঅপকী থবকশিংদা অহুমসুবা খ্বাইদগী চাউবা, এভিএসনগী কৈথেলদা অহুমসুবা খ্বাইদগী চাউবা, রেলৱে নেতৱার্কত মরিশুবা খ্বাইদগী চাউবা, মেত্রো রেল নেতৱার্ক অহুমসুবা খ্বাইদগী চাউবা, শঙ্গোম খ্বাইদগী য়াম্না পুথোকপা অমসুং চেং পুথোকপদা অনিশুবা খ্বাইদগী চাউবা লৈবাক্নি। ভারত্ত, গনতন্ত্রগী ৱাহন্থোক্তি খ্বাইদগী মনিংদা লৈরিবশিংদা খুদোংচাবা ফংহনবনি। মীচং-মীখাই নাইদনা মীওই খুদিংমক কান্নবশিং ফংহন্নবা মীয়ামগী য়াইফনবা ভারতনা থবক পায়খৎলি। মীয়ামগী য়াইফনবা ৱাখল অসিনা মরম ওইদুনা, চহি খর অসিদা মীওই করোর ২৫ লায়রবা কোক্লে। ভারত্ত গনতন্ত্র হায়বসি খুদোংচাবশিং ফংহনবনি।
প্রধান মন্ত্রীনা হায়খি মদুদি মীয়াম্না মকোক্ত লৈবদগী ভারত্ত গনতন্ত্র চৎনবনি। মীয়ামগী অনিংবশিং অমসুং মঙলানশিং মরুওইনা লৌরি অমসুং মখোয়গী লম্বীদা অপনবা অমতা লৈহন্দ্রে, থবকশিংদগী হৌরগা তেক্নোলোজি ফাওবা খুদিংমক মীয়ামদা ফংহল্লে। মসিগী গনতন্ত্রগী ৱাখল্লোন অসি ভারতকী শিংলিশিং অমসুং ৱাখলদা চেল্লি। কোবিদ-১৯ লাইচৎ মনুংদা মালেম শীনবা থুংনা অৱাবা মায়োক্নবা মতমদা, ভারতনা লৈবাক ১৫০ হেনবদা হিদাকশিং অমসুং তিকাশিং ফংহনখি। মীয়ামগী নুংঙাইনবা, য়াইফনবা থবক পায়খৎপা হায়বসি ভারতকী চৎনবীনি অমসুং মসিনা ভারতকী গনতন্ত্র য়োকখৎলিবনি।
প্রধান মন্ত্রীনা হায়খি মদুদি ভারত গনতন্ত্র চৎপা খ্বাইদগী চাউবা লৈবাক ওইনা মালেম শীনবা থুংনা খঙনরি। ভারতকী গনতন্ত্রগী পাক-চাউবা অসি অখন্নবনি। ২০২৪ দা পাংথোকখিবা সাধরন মীখল অদু মীওইবগী পুৱারিদা খ্বাইদগী চাউবা গনতন্ত্রগী থবক ওইখি। মহাদেস খরগী অপুনবা মীশিংদগী হেন্না, মীওই মিল্লিয়ন ৯৮০ রোম ভোৎ থাদনবা মিং চল্লে। মীরেপ ৮০০০ হেন্না অমসুং রাজনিতি দল ৭০০ হেন্না লাম্বা তৌনরি অমসুং মীখলশিংদা নুপী ভোত্তরশিং মশিং য়াম্না শরুক য়াবা উবা ফংলে। ঙসিদিগী ভারতকী নুপীশিংনা শরুক য়াবা খক নত্তনা লুচিংবসু ওইরে। লৈবাক অসিগী অহানবা নাগরিক, ভারতকী রাষ্ট্রপতি নুপী অমনি অমসুং মীফম অসি পাংথোক্লিবা দিল্লিগী চীফ মিনিষ্টরসু নুপী অমনি। খুঙ্গং অমসুং লোকেল গভর্নমেন্ত বোদিশিংদা, ভারতকী নুপী মীহুৎ মিল্লিয়ন ১.৫ হেন্না লৈরি, খুঙ্গংগী লুচিংবশিংগী চাদা ৫০ রোম ওইরি, মসি মালেমদা লাম্বা লৈবা নত্তে। ভারতকী গনতন্ত্র খেন্নবা কয়ানা পীক থল্লি। লোল চা কয়া ঙাংলি, তোঙান তোঙানবা লোলশিংগী তেলিবিজন চেন্নেল ৯০০ হেন্না লৈরি অমসুং পাউচে অমসুং চেফোঙ লিশিং কয়া ফোঙলি।
প্রধান মন্ত্রীনা হায়খি মদুদি খুন্নাই খর খক্তদা অসিগুম্বা পাক-চাউবা অমা লৈবা ঙম্লি অমসুং লৈবাক অসিগী গনতন্ত্রগী অকনবা য়ুম্ফম অমা লৈবদগী মসিগী খেন্নবা অসি ভারতনা নুংঙাইবা ঙম্লি। ঐখোয়গী গনতন্ত্র অসি মরা চেৎনা তারবা উ পাম্বী অমগুম্বনি; ঐখোয়গী মরৈ য়েৎনবা, ৱারি শানবা অমসুং অপুনবা ওইনা ৱারেপ লৌবগী মতম কুইরবা চৎনবী অমা লৈরি অমসুং ভারত গনতন্ত্রগী মমানি হায়না খঙনরি। চহি ৫০০০ হেল্লবা ভারতকী অশেংলবা লাইরিক বেদাশিংদা, ৱাফম কয়া খন্ননবা মীয়াম পুনবা অমসুং খন্ন-নৈনরবা অমসুং য়ানবা পুরক্লবা মতুংদা ৱারেপ লৌবগী মতাংদা পল্লি। ভারত অসি ভগবন বুদ্ধগী লমদমনি, বুদ্ধিষ্ট শঙ্গদা খন্ন-নৈনবা পাংথোকখি অমসুং য়ানবা নত্ত্রগা ভোৎ লৌনদুনা ৱারেপ লৌখি। তামিল নাদুদা ১০শুবা চহিচাগী ইনস্ক্রিপসন অমদা গনতন্ত্রগী গুনশিংগা লোয়ননা খুঙ্গং অমদা মীয়াম পুনখিবা অমসুং ৱারেপ লৌখিবগী মতাংদা পল্লি। ভারতকী গনতন্ত্রগী গুনশিং মতম্না চাংয়েং তৌখ্রবনি, খেন্নবা কয়ানা শৌগৎলি অমসুং মীরোল কয়া কয়াগী মতুংদা মপাঙ্গল কনখৎলে।
প্রধান মন্ত্রীনা হায়খি মদুদি কম্মনৱেল্থগী অপুনবা মীশিংগী চাদা ৫০ রোম ভারত্ত লৈরি। লৈবাক খুদিংমক চাউখৎনবা ভারতনা পাংবা য়াবা মতেং পাংনবা হোৎনরি। হকহেল, ক্লাইমেত চেঞ্জ, শেন-থুম চাউখৎপা নত্ত্রগা ইন্নোবেসন ওইবা য়াই, কম্মনৱেল্থগী ষ্টেনেবল দিবলপমেন্ত গোলশিং ফংহনবা হায়বসি ভারতকী মপুংফাবা থৌদাংনি। মরুপ ওইরিবা লৈবাকশিংদগী তম্নবা ভারতনা মখা তানা থবকশিং পায়খৎলি অমসুং ভারতনা খঙবশিংসু অতোপ্পা কম্মনৱেল্থ লৈবাকশিংদা পীরি।
প্রধান মন্ত্রীনা হায়খি মদুদি মমাঙদা অমুক্ত ওইখিদ্রিবা ফিবম অমদা মালেম অসি অহোংবা অমা লাকপা মতমদা, মসি গ্লোবেল সাউথকী অনৌবা লম্বীশিং শেম্নবা তাঞ্জা অমসুনি। মালেমগী মফম লুপ খুদিংমক্ত গ্লোবেল সাউথকী মরুওইবা ৱাফমশিং ভারতনা পুখৎলি; লৈবাক অসিনা জি-২০গী প্রসিদেন্ত ওইবা মতমদা, ভারতনা গ্লোবেল সাউথকী মরুওইবশিং মালেমগী এজেন্দগী ময়াইদা থমখি। অনৌবা থবকশিংগী কান্নবশিংদা গ্লোবেল সাউথ অমসুং কম্মনৱেল্থ লৈবাকশিং শীনবা থুংনা ফংহন্নবা ভারতনা লেপ্তনা হোৎনরি। গ্লোবেল সাউথকী মরুপ লৈবাকশিংনা ভারত্ত পায়খৎলিবা থবকশিং অদুগা চপ মান্নবা থবকশিং পায়খৎনবা ওপন-সোর্ছ তেক্নোলোজি প্লেতফোর্মশিং ভারতনা শেমগৎলি।
প্রধান মন্ত্রীনা হায়খি মীফম অসিগী মরুওইবা পান্দম অমদি সংসদকী গনতন্ত্রগী মরমদা খঙবা হেনগৎনবা তোঙান তোঙানবা লম্বীশিং থিবনি। থবক অসিদা স্পিকরশিং অমসুং প্রেসাইদিং ওফিসারশিং অনিমক্কী মরুওইবা থৌদাং লৈরি, মসিনা মখোয়গী লৈবাক্ত গনতন্ত্রগী থবকশিংগা মীয়ামগা হেন্না শম্নহল্লে। ষ্টদি তুরশিং, ত্রেনিং প্রোগ্রামশিং অমসুং ইনতর্নশিপশিংগী খুৎথাংদা, সংসদকী মরমদা হেন্না কুপ্না খঙনবা মীয়ামদা খুদোচাবশিং পীরে। মরৈ য়েৎনবশিং অমসুং হাওসকী থবকশিং খুদক্ত লম লমগী লোলশিং হন্দোক্নবা ভারত্ত এ.আই শীজিন্নবা হৌরে। এ.আইগী মতেংগা লোয়ননা সংসদকা মরী লৈনবা থবকশিং হেন্না লাইথোকহল্লে। মসিনা হৌরক্লিবা মীরোলশিংদা সংসদকী থবকশিং মপুংফানা খঙনবা হেন্না ফবা খুদোংচাবা অমা পীরে।
প্রধান মন্ত্রীনা হায়খি মহাক কম্মনৱেল্থগী লৈবাক ২০ হেন্না চৎপগী খুদোংচাবা ফংলে। মহাক সংসদ কয়াদা ৱা ঙাংবগী খুদোংচাবশিং ফংখ্রে। মহাক্না চৎলুবা মফম খুদিংমক্ত মহাক্না লৌশিং কয়া তম্লকখি। মহাক্না থেংনরকপা খ্বাইদগী ফবা থবক খুদিংমক লোক সভাগী স্পিকর অমসুং রাজ্য সভাগী চিয়ারমেন অমসুং দিপুতি চিয়ারমেন্দা পাউদমখি। মীফম অসিনা তম্বা অমসুং শরুক য়ামিন্নবগী থবকশিং মখা তানা ফগৎহনগনি। মহাক্কী ৱারোলশিং অসি লোইশিনবগা লোয়ননা, মীফম শরুক য়াখিবশিংদা মহাক্না মহাক্কী য়াইফ পাউজেল পীখি।
থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা লোক সভাগী স্পিকর শ্রী ওম বিরলা, রাজ্য সভাগী চিয়ার্মেন শ্রী হরিভান্স, ইন্তরপার্লিয়ামেন্তরি য়ুনিয়নগী প্রসিদেন্ত দোক্তর তুলিয়া অকসন, কম্মনৱেল্থ পর্লিয়ামেন্তরি এসোসিএসনগী চিয়ারপর্সন দোক্তর খৃষ্টোফর কালিলা য়াওখি।
নুঙগীৱারোল
লোক সভাগী স্পিকর শ্রী ওম বিরলানা ময়াই তাংবল লৌদুনা পাংথোক্কদৌরিবা মীফম অদুদা কম্মনৱেল্থ লৈবাক ৪১ অমসুং মালেমগী তোঙান তোঙানবা মফমশিংগী সেমি-ওতোনোমস পর্লিয়ামেন্ত ৪ গী স্পিকর অমসুং প্রসাইদিং ওফিসার ৬১ শরুক য়াগনি।
মীফম অদুদা মপাঙ্গল কনবা গনতন্ত্রগী ইন্সতিতুসনশিং লৈহনবদা স্পিকরশিং অমসুং প্রেসাইদিং ওফিসারশিংগী থৌদাং, সংসদ মথৌ পাংথোকপা আর্তিফিসিএল ইন্তিলিজেন্স শীজিন্নবা, সংসদকী মেম্বরশিংদা সোসিএল মেদিয়ানা পীরিবা ইথিল, সংসদকী মরমদা মীয়াম্না খঙবা হেনগৎহন্নবা লাল্লোংশিং অমসুং ভোৎ থাদবা খক নত্তনা মীয়াম্না শরুক য়াবগী মতাংদা য়াওনা হৌজিক থেংনরিবা সংসদকী মরুওইবা ৱাফমশিং কুপ্না খন্নগনি।
***
(रिलीज़ आईडी: 2214955)
आगंतुक पटल : 15
इस विज्ञप्ति को इन भाषाओं में पढ़ें:
English
,
Urdu
,
Marathi
,
हिन्दी
,
Bengali
,
Assamese
,
Gujarati
,
Odia
,
Tamil
,
Telugu
,
Kannada
,
Malayalam