ਭਾਰਤ ਦੀ ਵਿਲੱਖਣ ਪਛਾਣ ਅਥਾਰਿਟੀ (UIDAI) ਨੇ ਅੱਜ ਆਧਾਰ ਮਾਸਕੋਟ ਲਾਂਚ ਕੀਤਾ, ਜੋ ਕਿ ਆਧਾਰ ਸੇਵਾਵਾਂ ਦੀ ਜਨਤਕ ਸਮਝ ਨੂੰ ਸਰਲ ਬਣਾਉਣ ਲਈ ਇੱਕ ਨਵਾਂ ਨਿਵਾਸੀ-ਮੁਖੀ ਸੰਚਾਰ ਸਾਥੀ ਹੈ। Udai (उदय) ਨਾਮ ਦਾ ਆਧਾਰ ਮਾਸਕੋਟ ਆਧਾਰ ਨਾਲ ਸਬੰਧਿਤ ਜਾਣਕਾਰੀ ਨੂੰ ਵਧੇਰੇ ਸਬੰਧਿਤ ਅਤੇ ਲੋਕਾਂ ਦੇ ਅਨੁਕੂਲ ਬਣਾਉਣ ਵਿੱਚ ਮਦਦਗਾਰ ਹੋਵੇਗਾ। ਇਹ ਆਧਾਰ ਸੇਵਾਵਾਂ ਦੇ ਸੰਚਾਰ ਨੂੰ ਸਰਲ ਬਣਾਏਗਾ - ਭਾਵੇਂ ਇਹ ਅੱਪਡੇਟ, ਪ੍ਰਮਾਣੀਕਰਨ, ਔਫਲਾਈਨ ਤਸਦੀਕ, ਜਾਣਕਾਰੀ ਦੀ ਚੋਣਵੀਂ ਸਾਂਝੇਦਾਰੀ, ਨਵੀਂ ਤਕਨਾਲੋਜੀ ਅਪਣਾਉਣ, ਜ਼ਿੰਮੇਵਾਰ ਵਰਤੋਂ ਅਤੇ ਹੋਰ ਬਹੁਤ ਕੁਝ ਬਾਰੇ ਹੋਵੇਗਾ।

ਇਸ ਦ੍ਰਿਸ਼ਟੀਕੋਣ ਨੂੰ ਅਮਲ ਵਿੱਚ ਲਿਆਉਣ ਲਈ, UIDAI ਨੇ MyGov ਪਲੈਟਫਾਰਮ  'ਤੇ ਰਾਸ਼ਟਰੀ ਡਿਜ਼ਾਈਨ ਅਤੇ ਨਾਮ ਮੁਕਾਬਲੇ ਸ਼ੁਰੂ ਕਰਕੇ ਇੱਕ ਖੁੱਲ੍ਹਾ ਅਤੇ ਸਮਾਵੇਸ਼ੀ ਰਸਤਾ ਚੁਣਿਆ। ਇਸ ਦਾ ਬਹੁਤ ਵੱਡਾ ਹੁੰਗਾਰਾ ਮਿਲਿਆ। UIDAI ਨੂੰ ਦੇਸ਼ ਭਰ ਤੋਂ 875 ਐਂਟਰੀਆਂ ਪ੍ਰਾਪਤ ਹੋਈਆਂ - ਵਿਦਿਆਰਥੀ, ਪੇਸ਼ੇਵਰ, ਡਿਜ਼ਾਈਨਰ, ਆਦਿ - ਹਰੇਕ ਨੇ ਆਧਾਰ ਉਹਨਾਂ ਲਈ ਕੀ ਦਰਸਾਉਂਦਾ ਹੈ ਇਸ ਦੀ ਇੱਕ ਵਿਲੱਖਣ ਵਿਆਖਿਆ ਪੇਸ਼ ਕੀਤੀ। ਚੋਣ ਪ੍ਰਕਿਰਿਆ ਵਿੱਚ ਨਿਰਪੱਖਤਾ ਅਤੇ ਸਖ਼ਤੀ ਨੂੰ ਯਕੀਨੀ ਬਣਾਉਣ ਲਈ ਇੱਕ ਬਹੁ-ਪੱਧਰੀ ਮੁਲਾਂਕਣ ਪ੍ਰਕਿਰਿਆ ਅਪਣਾਈ ਗਈ ਸੀ। ਇਸ ਪ੍ਰਕਿਰਿਆ ਤੋਂ ਜੋ ਉਭਰਿਆ ਉਹ ਇੱਕ ਸੁੰਦਰ ਰਚਨਾ ਹੈ – ਜਿਸ ਨੂੰ ਜਨਤਕ ਕਲਪਨਾ ਦੁਆਰਾ ਆਕਾਰ ਦਿੱਤਾ ਗਿਆ ਹੈ ਅਤੇ ਸੰਸਥਾਗਤ ਮਿਹਨਤ ਦੁਆਰਾ ਸੁਧਾਰਿਆ ਗਿਆ ਹੈ।

ਕੇਰਲ ਦੇ ਤ੍ਰਿਸ਼ੂਰ ਤੋਂ ਅਰੁਣ ਗੋਕੁਲ ਨੇ ਮਾਸਕੋਟ ਡਿਜ਼ਾਈਨ ਮੁਕਾਬਲੇ ਵਿੱਚ ਪਹਿਲਾ ਇਨਾਮ ਜਿੱਤਿਆ, ਪੁਣੇ, ਮਹਾਰਾਸ਼ਟਰ ਦੇ ਇਦ੍ਰੀਸ ਦਵਾਈਵਾਲਾ ਅਤੇ ਉੱਤਰ ਪ੍ਰਦੇਸ਼ ਦੇ ਗਾਜ਼ੀਪੁਰ ਤੋਂ ਕ੍ਰਿਸ਼ਨਾ ਸ਼ਰਮਾ ਕ੍ਰਮਵਾਰ ਦੂਜੇ ਅਤੇ ਤੀਜੇ ਇਨਾਮ ਦੇ ਜੇਤੂ ਰਹੇ।

ਭੋਪਾਲ ਦੀ ਰੀਆ ਜੈਨ ਨੇ ਮਾਸਕੋਟ ਨਾਮ ਮੁਕਾਬਲੇ ਵਿੱਚ ਪਹਿਲਾ ਇਨਾਮ ਜਿੱਤਿਆ, ਉਸ ਤੋਂ ਬਾਅਦ ਪੁਣੇ ਦੇ ਇਦ੍ਰੀਸ ਦਵਾਈਵਾਲਾ ਅਤੇ ਹੈਦਰਾਬਾਦ ਦੇ ਮਹਾਰਾਜ ਸਰਨ ਚੇਲਾਪਿੱਲਾ ਕ੍ਰਮਵਾਰ ਦੂਜੇ ਅਤੇ ਤੀਜੇ ਸਥਾਨ 'ਤੇ ਰਹੇ।

ਯੂਆਈਡੀਏਆਈ ਦੇ ਚੇਅਰਮੈਨ ਨੀਲਕੰਠ ਮਿਸ਼ਰਾ ਨੇ ਤਿਰੂਵਨੰਤਪੁਰਮ ਵਿੱਚ ਇੱਕ ਯੂਆਈਡੀਏਆਈ ਸਮਾਗਮ ਵਿੱਚ ਮਾਸਕੋਟ ਦਾ ਉਦਘਾਟਨ ਕੀਤਾ ਅਤੇ ਜੇਤੂਆਂ ਨੂੰ ਸਨਮਾਨਿਤ ਕੀਤਾ। ਯੂਆਈਡੀਏਆਈ ਦੇ ਚੇਅਰਮੈਨ ਮਿਸ਼ਰਾ ਨੇ ਕਿਹਾ ਕਿ ਮਾਸਕੋਟ ਦੀ ਸ਼ੁਰੂਆਤ ਭਾਰਤ ਦੇ ਇੱਕ ਅਰਬ ਤੋਂ ਵੱਧ ਨਿਵਾਸੀਆਂ ਲਈ ਆਧਾਰ ਸੰਚਾਰ ਨੂੰ ਸਰਲ, ਵਧੇਰੇ ਸਮਾਵੇਸ਼ੀ ਅਤੇ ਵਧੇਰੇ ਸਬੰਧਿਤ ਬਣਾਉਣ ਲਈ ਯੂਆਈਡੀਏਆਈ ਦੇ ਚੱਲ ਰਹੇ ਯਤਨਾਂ ਵਿੱਚ ਇੱਕ ਹੋਰ ਕਦਮ ਹੈ।

ਯੂਆਈਡੀਏਆਈ ਦੇ ਸੀਈਓ ਭੁਵਨੇਸ਼ ਕੁਮਾਰ ਨੇ ਕਿਹਾ ਕਿ ਇੱਕ ਖੁੱਲ੍ਹੇ ਰਾਸ਼ਟਰੀ ਮੁਕਾਬਲੇ ਰਾਹੀਂ ਇਸ ਮਾਸਕੋਟ ਨੂੰ ਡਿਜ਼ਾਈਨ ਕਰਨ ਅਤੇ ਨਾਮਕਰਣ ਲਈ ਲੋਕਾਂ ਨੂੰ ਸੱਦਾ ਦੇ ਕੇ, ਯੂਆਈਡੀਏਆਈ ਨੇ ਆਧਾਰ ਦੇ ਇੱਕ ਮੁੱਖ ਸਿਧਾਂਤ ਦੀ ਪੁਸ਼ਟੀ ਕੀਤੀ: ਭਾਗੀਦਾਰੀ ਵਿਸ਼ਵਾਸ ਅਤੇ ਮਨਜ਼ੂਰੀ ਬਣਾਉਂਦੀ ਹੈ। ਭਰਵੇਂ ਹੁੰਗਾਰੇ ਨੇ ਦਿਖਾਇਆ ਕਿ ਲੋਕ ਜਨਤਕ ਭਲਾਈ ਦੇ ਤੌਰ 'ਤੇ ਆਧਾਰ ਨਾਲ ਕਿੰਨੀ ਡੂੰਘਾਈ ਨਾਲ ਜੁੜਦੇ ਹਨ।

ਯੂਆਈਡੀਏਆਈ ਦੇ ਡਿਪਟੀ ਡਾਇਰੈਕਟਰ ਜਨਰਲ ਵਿਵੇਕ ਸੀ.ਵਰਮਾ ਨੇ ਕਿਹਾ ਕਿ ਜਿਵੇਂ ਕਿ ਮਾਸਕੋਟ ਇੱਕ ਸਾਥੀ ਅਤੇ ਇੱਕ ਕਹਾਣੀਕਾਰ ਵਜੋਂ ਆਪਣੀ ਯਾਤਰਾ ਸ਼ੁਰੂ ਕਰਦਾ ਹੈ, ਇਹ ਨਿਵਾਸੀਆਂ ਨੂੰ ਆਧਾਰ ਨਾਲ ਸਬੰਧਿਤ ਜਾਣਕਾਰੀ ਨਾਲ ਅਸਾਨੀ ਨਾਲ ਜੁੜਨ ਵਿੱਚ ਸਹਾਇਤਾ ਕਰੇਗਾ।

*********

ਐੱਮਐੱਸਜ਼ੈੱਡ/ਬਲਜੀਤ